Jang 1
1
'Bok Kei-Dei pơkă gô ăn Yang Bơhngol 'Lơ̆ng
1Ơ Theophil, lăm hla bơar mă mônh hơdrol sơ̆, inh chih ră roi kơ ih tôm tơdrong Yêsu pơm păng 'bơ̆r Sư bơtho, 2tơm hmơm truh tơ năr 'Bok Kei-Dei atŏk Sư tơ plĕnh. Hơdrol kơ Sư wă tŏk tơ plĕnh, Yang Bơhngol 'Lơ̆ng ăn kơ Sư bơtho lu jơ̆ng 'bang mă đêl Sư rơih.
3Đơ̆ng rŏng kơ Yêsu lôch tam mă tŏk tơ plĕnh noh Sư năm tơ'bôh akâu Sư tơ jơ̆ng 'bang Sư ei. Yêsu tơbăt kơ lu sư akâu Sư kơdih oei arih. Kơplah puăn-jĭt năr noh Sư tơ'bôh akâu păng bơtho lu sư gah tơdrong 'Bok Kei-Dei wă pơgơ̆r. 4Hơtai ei lu sư oei akŭm dih băl, Yêsu khă lu sư: “Iĕm 'nĕ tam jăk đơ̆ng Pơlei Jêrusalem, iĕm athei chang gô Yang Bơhngol 'Lơ̆ng mă đêl 'Bă Inh pơkă gô ăn kơ iĕm kư̆m thoi Inh roi kơ iĕm ki. 5Yôhan pơm kơ iĕm 'batem păng đak, mă-lei pă đunh boih 'Bă Inh gô pơm kơ iĕm 'batem phara, Sư gô ăn kơ iĕm Yang Bơhngol 'Lơ̆ng Sư.”
Yêsu tŏk tơ plĕnh
6Na dôm lu sư âu oei akŭm dih băl jet Yêsu thoi âu: “Ơ Kră Yang, hăm trŏ dang ei Ih wă ăn dêh Isơrael rơngei dơ̆ng?”
7Yêsu khan: “Năr 'noh 'Bă Inh pơkă kơdih, Sư ưh kơ ăn iĕm băt ôh. 8Mă-lei lăp Yang Bơhngol 'Lơ̆ng jur oei păng iĕm, iĕm gô đei jơhngơ̆m pran năm bơtho tơdrong Inh tơ Pơlei Jêrusalem, jơ̆p kơ dêh char Juđê păng dêh Samari, đơ̆ng noh jơ̆p kơ teh đak.”
9Sư bơtho khan kơ đe ei đang boih, đơ̆ng noh Kră Yang Yêsu tŏk tơ kơpal plĕnh, hơmơ̆l gom Sư. Na đe ei hnhoi Sư dĭng tơ hơmơ̆l gom Sư ưh pă 'bôh boih.
10Lu sư oei 'bloh tơ plĕnh khŏm khŏm, na lu sư 'bôh hloi 'bar 'nu linh jang 'lơ̆ng hrŭk ao kok dơ̆ng jê̆ 'bơ̆t lu đe ei. Na bre linh jang 'lơ̆ng khan kơ lu đe ei thoi âu: 11“Ơ bơngai Galilê, iĕm lăng 'bloh chă kiơ tơ plĕnh? Ning-mônh Sư gô jur dơ̆ng kư̆m thoi Sư tŏk mơ̆n.”
Bơngai lui rơih chă bơngai plơ̆ng wă păl Juđa lôch
12Đơ̆ng noh na lu bơngai jơ̆ng 'bang Yêsu đơ̆ng kông Ôliwơ brŏk tơ Pơlei Jêrusalem dang minh kơsô̆. 13Lăp lu sư truh tơ Pơlei Jêrusalem boih na lu sư tŏk tơ hnam anih gah kơpal. Na anăn lu sư oei tơ ei: Pêtrôs, Yôhan, Yakơ, Andrê, Philip, Thôm, 'Barthôlêmi, Mathiơ, Yakơ kon Alphê, Simôn mă kiơ̆ khŭl đe Sêlôt sơ̆, Juđa kon Yakơ bơngai nai. 14Lu đe âu krao khan ling-lang kơ Kră Yang 'Bok Kei-Dei. Kư̆m đei Mari mĕ Yêsu păng lu oh Yêsu drŏ-nglo păng lu drŏ-kăn nai dơ̆ng akŭm pôm đon krao khan păng lu sư mơ̆n.
15Kơplah noh sơ̆, minh năr ei đei dang lăp minh-hrĕng 'bar-jĭt 'nu bơngai akŭm dih băl, Pêtrôs iung 'bơ̆t tŏk-bŏk bôl sư khan hloi: 16“Ơ lu 'nhŏng oh, Yang Bơhngol 'Lơ̆ng ăn kơ Đawit chih pơkă lê̆ hơdrol roi gah Juđa sơ̆ lăm sơ̆p hla bơar 'Bok Kei-Dei. Yua kơ thoi noh na trŏ dang ei tơpă. Juđa tơ'bôh trong kơ đe năm rôp Yêsu. 17Juđa sơ̆ oei păng bơ̆n, jang hơdai păng bơ̆n.
18“Juđa iŏk jên đơ̆ng bơngai wă rôp Yêsu na đơ̆ng jên ei sư blơ̆ răt mir đe. Đơ̆ng noh na Juđa sư pơrăm kơdih akâu, sư huŏng hơtat pơchah klak lôch hloi. 19Đĭ-đăng bơngai lăm Pơlei Jêrusalem kơtơ̆ng tơdrong noh na lu sư anăn mir ei Akelđama, wă khan mir pơda.
20Đawit chih lăm sơ̆p hla bơar tơdrong hơriso hơdrol kơ đe tam mă tơpŭ kơ Juđa thoi âu:
‘Hnam sư gô adro ưh kơ đei bu oei.
Tơdrong jang sư bơ̆n ăn kơ bơngai nai iŏk.’
21-22“Na dang ei bơ̆n athei rơih minh 'nu dơ̆ng wă mơ̆t bơ̆jang hơdai lu jơ̆ng 'bang Yêsu bơ̆n, na sư hơdai păng bơ̆n gô roi tơbăt kơ đe Yêsu iung arih boih. Bơ̆n athei rơih chă minh 'nu bơngai đêl oei hơdai păng bơ̆n, đơ̆ng Yêsu 'nao oei păng bơ̆n na Yôhan pơm 'batem sơ̆ truh tơ 'Bok Kei-Dei atŏk Yêsu tơ plĕnh.”
23Pêtrôs pơma đang boih na lu sư rơih iŏk 'bar 'nu bơngai, minh 'nu đei pêng tŏ anăn: Yôsep 'Barsa'ba Jutu; păng minh 'nu dơ̆ng anăn sư Mathias. 24-25Na lu sư krao khan kơ Kră Yang thoi âu: “Kră Yang, Ih băt đĭ lăm jơhngơ̆m đon kon bơngai. Apinh Ih tơ'bôh kơ nhôn bơngai ayơ Ih rơih boih wă pơm jơ̆ng 'bang Yêsu wă păl Juđa. Juđa tŭk tơdrong jang âu năm tơ anih sư trŏ dang noh boih.”
26Klaih kơ noh lu sư hlang lăng na 'blep trŏ hloi kơ Mathias. Na đe jô̆ sư lăm mơjĭt-'bar 'nu jơ̆ng 'bang Yêsu dơ̆ng.
Yang Bơhngol 'Lơ̆ng jur oei păng bơngai lui
Currently Selected:
Jang 1: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
