Jang 4
4
1Kơplah bre Pêtrôs păng Yôhan oei pơma kơ lu đe ei, na blư kơ lu 'bok soi truh tơ ei. 'Bok yŏng lu linh wei-lăng hnam akŭm 'Bok Kei-Dei tơm păng lu bơngai Sađusê kư̆m kiơ̆ sư mơ̆n. 2Lu sư ơh klai kơ bre Pêtrôs păng Yôhan bơtho khan tơdrong Yêsu iung arih đơ̆ng lôch boih, khan bơngai bơ̆n lôch boih na khan gô iung arih dơ̆ng lei-lăi thoi Yêsu. 3Na lu sư rôp tah bre sư lăm hnam phak yua kơ kơsơ̆ boih, ưh kơ tam sek tơlang. 4Mă-lei đơ̆ng Pêtrôs păng Yôhan bơtho ei đei lơ 'nu bơngai lui kiơ̆ kơ Yêsu. Na jô̆ đơ̆ng Yêsu tŏk tơ plĕnh truh tơ đe rôp bre sư, gah drŏ-nglo đĕch đei pơđăm-rơbâu 'nu bơngai lui kiơ̆ kơ Yêsu boih.
5Truh pơgê dơning na lu 'bok pơgơ̆r đe Juđê, lu thây bơtho tơdrong juăt đe Juđê păng lu 'bok gơh sek tơlang, pêng khŭl lu 'bok âu akŭm tơ Pơlei Jêrusalem wă sek tơlang tơdrong bre Pêtrôs păng Yôhan. 6Pêng khŭl ei akŭm păng Ana pơm 'bok soi tơm, Kaiphe, Yôhan, Aleksandrê păng đĭ adrĕch đe 'bok soi tơm. 7Lu kră sek tơlang anhăk ba bre Pêtrôs păng Yôhan wă sek tơlang. Lu sư jet bre Pêtrôs: “Đơ̆ng bu ăn kơ biĕm gơh pơklaih bơngai hơwen hơwo âu?”
8Na Pêtrôs 'bĕnh kơ Yang Bơhngol 'Lơ̆ng khan kơ lu sư thoi âu: “Ơ đe kră sek tơlang păng kră pơgơ̆r lu bơngai Juđê, 9-10tơ̆ng iĕm wă jet nhi tơdrong bơngai hơwen hơwo klaih boih âu, nhi gô roi kơ iĕm păng roi kơ đĭ-đăng lu khŭl Juđê mơ̆n, Yêsu Krist Pơlei Nasaret pơklaih sư. Iĕm băt mơ̆n Yêsu, iĕm pơ̆ng pơlôch Sư tơ 'long pơglang ki. Mă-lei 'Bok Kei-Dei tơiung arih Sư đơ̆ng lôch boih. Na bơngai hơwen hơwo âu gơh klaih yua kơ Yêsu tơgŭm sư.
11Yêsu thoi lĕ kơ minh pôm tơmo mă lu bơngai man hnam tŭk lê̆,
mă-lei tơmo noh dang ei gĭt tơpă, yua wă man 'bơ̆t mum hnam.
Iĕm boih thoi lĕ kơ lu bơngai man hnam noh yua kơ iĕm tŭk lê̆ Yêsu. 12Pă đei bu nai dơ̆ng gơh pơklaih bơ̆n đơ̆ng tơdrong yoch. 'Bok Kei-Dei ăn Kon pôm Sư Yêsu Krist đĕch wă pơklaih bơ̆n.”
13Na lu sư sơleng kơ đon 'bôh bre Pêtrôs păng Yôhan pơma nuih tơpă. Lu sư kơnăl kơ bre sư bơngai ưh kơ đei hŏk, bơngai kuli đĕch, na lu sư kơnăl kơ bre sư oei hơdai păng Yêsu sơ̆. 14Mă bơngai đêl hơwen hơwo ei kư̆m dơ̆ng hơdai păng bre Pêtrôs mơ̆n. Lu 'bok sek tơlang ei 'bôh bơngai đêl hơwen hơwo ei klaih 'lơ̆ng boih, na lu sư ưh pă gơh pơjah thoi yơ dơ̆ng.
15Na lu sư athei đe tơlĕch bre Pêtrôs păng Yôhan tơ 'ngoaih tŏ sĕt đĕch yua kơ lu sư wă pơđâu tơdrong noh kơdrô̆ lu sư. 16“Bơ̆n wă pơm liơ kơ bre sư? Đĭ-đăng bơngai lăm Pơlei Jêrusalem kơtơ̆ng boih tơdrong mơsêh mơyang noh bre sư pơklaih bơngai hơwen hơwo âu, bơ̆n ưh kơ gơh khan ưh ôh yua tơdrong noh tơpă. 17Mă-lei bơ̆n athei khă bre sư bơtho tơdrong Yêsu wă kơ tơdrong noh jah tôch.”
18Na lu sư krao tơmơ̆t bre Pêtrôs păng Yôhan tơ lăm dơ̆ng khan hloi: “Biĕm 'nĕ pă bơtho tơdrong Yêsu dơ̆ng hŏ.”
19Mă-lei bre Pêtrôs păng Yôhan pơma tơwih kơ sư thoi âu: “Iĕm tơchĕng lăng deh, 'Bok Kei-Dei athei nhi chu kơ iĕm dah athei chu kơ Sư đĕch? 20Nhi athei roi đĭ tơdrong nhi 'bôh Yêsu pơm păng đĭ tơdrong Sư pơma đĕch.”
21Lu bơngai sek tơlang khă sư pă minh 'măng dơ̆ng na tơlĕch bre sư. Lu đe 'bok sek tơlang, sư tơchĕng tơduă sư khan: “Ưh pă gơh phak bre sư thoi yơ boih. Bơ̆n athei tơlĕch bre sư đĕch, yua kơ kon pơlei pơla đĭ ư-ang kơ 'Bok Kei-Dei pơklaih bơngai hơwen hơwo noh boih.”
22Bơngai đêl hơwen hơwo ei sư hloh puăn-jĭt sơnăm boih.
Bơngai lui krao khan apinh 'Bok Kei-Dei tơgŭm lu sư wă kơ nuih bơtho tơdrong Yêsu
23Bre Pêtrôs păng Yôhan lĕch đơ̆ng ei năm tơ lu bôl sư păng roi đĭ tơdrong lu 'bok soi tơm păng lu kră sek tơlang khă bre sư. 24Lu bôl sư kơtơ̆ng thoi noh boih, na đĭ kơ lu sư ei krao khan kơ 'Bok Kei-Dei thoi âu: “Ơ Kră Yang 'Bok Kei-Dei, nhôn băt kơ Ih pơjing plĕnh teh păng đak dơsĭ; păng đĭ-đăng tơmam đơ̆ng Ih pơjing ngăl. 25-26Yang Bơhngol 'Lơ̆ng Ih yua 'bơ̆r đĭch đam Ih 'bok nhôn Đawit sơ̆, khan thoi âu:
‘Ơ Kră Yang, kơlih tơdrong kiơ dêh char đe tơmoi hil kơ Ih păng Kon Ih 'Bok Krist?
Yua kơ kiơ bơngai Isơrael wă pơm kơnê̆ ră kơ Ih,
mă-lei sư ưh kơ kĕ?
Păng lu 'bok pơtao, lu kră pơgơ̆r hơdai wă ayăt kơ Ih mơ̆n.’
27-28Lăm Pơlei Jêrusalem âu lu kră pơgơ̆r hlôi ayăt kơ Kon Ih Yêsu mă 'lơ̆ng tơpăt, Sư boih 'Bok Krist mă Ih ăn pơgơ̆r nhôn. 'Bok pơtao Hêrôt păng 'bok pơgơ̆r Pilat, bre sư pơm minh đon păng lu bơngai dêh đe tơmoi păng lu bơngai Isơrael wă ayăt kơ Yêsu; trŏ tơpă yua kơ đơ̆ng nơ̆r Ih khan lê̆ hơdrol sơ̆, truh dang ei 'blep tơpă boih. 29Dang ei ơ Kră Yang 'Bok Kei-Dei, lu sư oei hil kơ nhôn khă nhôn bơtho tơdrong Yêsu; na dang ei nhôn apinh Ih tơgŭm lu nhôn đĭch đam Ih, wă kơ nhôn nuih chă bơtho nơ̆r Ih kơ kon bơngai. 30Apinh Ih yua mơsêh mơyang Ih wă pơklaih đe jĭ jăn. Păng apinh Kon Ih Yêsu mă 'lơ̆ng tơpăt ăn kơ nhôn pơm lơ tơdrong mơsêh mơyang.”
31Lăp lu sư krao khan đang boih, hnam mă sư akŭm ei adrŏ kyĭng kiơ̆ng. Đĭ-đăng lu sư 'bĕnh kơ Yang Bơhngol 'Lơ̆ng na jing nuih tơpă bơtho nơ̆r 'Bok Kei-Dei.
Bơngai lui đei tơmam kơdih kơdih, mă-lei lu sư jô̆ tơmam sư hơdai ngăl
32Dôm lu bơngai lui pôm đon pôm jơhngơ̆m. Rim 'nu lu sư đei tơmam kơdih kơdih, mă-lei lu sư jô̆ tơmam sư hơdai ngăl. 33Lu bơngai jơ̆ng 'bang Yêsu roi kơ đe lu sư 'bôh Yêsu iung arih boih. Lu sư kư̆m gơh pơm tơdrong mơsêh mơyang mơ̆n đơ̆ng Yêsu ăn kơ lu sư gơh tơgŭm đe. Păng 'Bok Kei-Dei kư̆m tơgŭm lu sư lăm tôm tơdrong mơ̆n. 34Lu bơngai lui kơ Yêsu ưh kơ đei bu jơ̆l kơ tơmam ưh kơ mah ôh yua kơ dôm lu bơngai đei hnam, mir 'ba, sư blơ̆ mơdro đei bơ̆n kon jên. 35Lu sư pơyơ̆r kơ 'Bok Kei-Dei ăn kơ lu bơngai jơ̆ng 'bang Yêsu chă asong lu bơngai mă hoh kơ đei.
36Đei minh 'nu bơngai anăn sư Yôsep mă-lei lu bơngai jơ̆ng 'bang Yêsu anăn sư 'Barna'ba wă khan bơngai pơlung đe, pơhiôk jơhngơ̆m đe. Sư adrĕch adrung Lêwi sơ̆ mă-lei mĕ sư tơpŭ tơ dêh Chiprơ. 37Sư đei minh hlak mir na blơ̆ mơdro đei jên. Sư pơyơ̆r kơ 'Bok Kei-Dei tơpă, sư ăn kơ lu bơngai jơ̆ng 'bang Yêsu.
Anania păng Sepir hơlĕnh kơ 'Bok Kei-Dei
Currently Selected:
Jang 4: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
