Jang 8
8
1Đơ̆ng rŏng kơ đe pơlôch Êtien ei, lu bơngai ưh kơ lui pơm lơ tơdrong kơnê̆ kơ lu bơngai lui kiơ̆ kơ Yêsu tơ Pơlei Jêrusalem. Na đĭ-đăng lu bơngai lui ei jăk tơklah tơklang jơ̆p-jang kơ dêh Juđê păng dêh Samari. Pôm lu jơ̆ng 'bang Yêsu đĕch ưh kơ jăk. 2Đei lu bơngai lui kơjăp năm 'bŭ atâu Êtien. Lu sư nhơ̆m hmoi ơh kơ Êtien lôch.
3Mă-lei Sôl pơm kơnê̆ kơ lu bơngai lui wă kơ lu sư hiong răm. Sư năm jơ̆p jơ̆p mơ̆t tơ hnam đe, rôp lu bơngai lui kơ Yêsu, bơngai drŏ-nglo drŏ-kăn, tah hloi lu sư lăm hnam phak.
Philip bơtho Tơdrong 'Nao 'Lơ̆ng tơ dêh Samari
4Na lu bơngai jăk đơ̆ng Pơlei Jêrusalem ei, lu sư năm bơtho nơ̆r 'Bok Kei-Dei jơ̆p jơ̆p. 5Hơtai ei Philip năm tơ Pơlei Samari, bơtho gah tơdrong Yêsu. Sư khan: “Yêsu boih 'Bok Krist mă 'Bok Kei-Dei ăn wă pơgơ̆r bơ̆n.” 6'Bok Kei-Dei ăn kơ Philip pơm lơ tơdrong mơsêh mơyang. Na lu kon pơlei pơla 'bôh Philip pơm thoi noh, na lu sư wă mơ̆ng mă nhên. 7Philip pơklaih lu bơngai yang mơ̆t. Lăp Philip pơklaih bơngai yang kơnê̆ mơ̆t ei, na yang ei pơret kơdâu hloi jăk tơ nai. Sư kư̆m đei pơklaih lơ bơngai kue jo mơ̆n. 8Na pơlei ei chơt hiôk tơpă.
9Lăm pơlei ei đei minh 'nu bơngai anăn sư Simôn. Đơ̆ng sơ̆ sư pơm lơ tơdrong hlĭch tơpă na lu bơngai Samari sơleng kơ đon. Simôn sư pơang akâu kơdih khan sư bơngai hơgei tơpă. 10Đĭ-đăng lu kon pơlei pơla mă bơngai tih, bơngai iĕ năm mơ̆ng Simôn ngăl. Lu sư khan: “'Bok Kei-Dei ăn kơ Simôn pơm tơdrong mơsêh mơyang hơgei tơpă.”
11Sư pơm tơdrong hlĭch âu đunh boih na lu sư mơ̆ng Simôn tơpă. 12Mă-lei lăp lu sư lui kơ nơ̆r Philip bơtho gah Tơdrong 'Nao 'Lơ̆ng Yêsu Krist păng tơdrong 'Bok Kei-Dei wă pơgơ̆r bơ̆n, na Philip pơm 'batem kơ lu sư bơngai drŏ-nglo, drŏ-kăn hloi. 13Simôn kư̆m lui mơ̆n păng iŏk 'batem. Klaih kơ noh sư oei păng Philip ling-lang. Sư 'bôh tơdrong mơsêh mơyang đơ̆ng 'Bok Kei-Dei ăn kơ Philip pơm, na sư sơleng kơ đon ưh kơ băt thoi yơ dơ̆ng.
14-15Lu jơ̆ng 'bang Yêsu tơ Pơlei Jêrusalem kơtơ̆ng ang đe Samri lui kơ 'Bok Kei-Dei boih. Na lu jơ̆ng 'bang Yêsu wơh Pêtrôs păng Yôhan năm tơ dêh Samari wă krao khan kơ lu bơngai 'nao lui, apinh 'Bok Kei-Dei ăn kơ sư Yang Bơhngol 'Lơ̆ng, 16yua kơ Yang Bơhngol 'Lơ̆ng tam mă oei păng lu sư. Lu sư iŏk 'batem hăm anăn Kră Yang Yêsu đĕch.
17Na Pêtrôs păng Yôhan pel kơ̆l lu bơngai lui na Yang Bơhngol 'Lơ̆ng jur oei păng lu sư hloi.
18Simôn 'bôh bre sư pel kơ̆l lu sư, Yang Bơhngol 'Lơ̆ng jur oei păng lu sư hloi na Simôn khan wă ăn jên kơ bre sư. 19Sư khan thoi âu: “Apinh biĕm ăn kơ inh gơh pel kơ̆l đe na Yang Bơhngol 'Lơ̆ng oei păng đe hloi, na inh ăn kơ biĕm jên.”
20Na Pêtrôs khan kơ Simôn thoi âu: “Ih păng jên ih gô hiong lăm dơnâu ŭnh đĕch, ih ngêh khan gơh răt Yang Bơhngol 'Lơ̆ng 'Bok Kei-Dei. 21'Bok Kei-Dei ưh kơ ăn kơ ih tơdrong âu ôh yua kơ Sư 'bôh jơhngơ̆m ih ưh kơ 'lơ̆ng păng Sư. 22Ih athei tơbral kơdih tơdrong yoch ih âu. Apinh 'Bok Kei-Dei 'nĕ jô̆ yo kơ ih tơdrong ih tơchĕng yoch noh hei. 23Đon ih kơnê̆ tơpă, ih oei hiong lăm tơdrong măng mu.”
24Na Simôn khan kơ bre sư thoi âu: “Apinh biĕm krao khan kơ 'Bok Kei-Dei tơgŭm inh; apinh Sư mơnat kơ inh 'nĕ ăn kơ inh hiong lăm dơnâu ŭnh thoi ih khan hei.”
25Na tơ Pơlei Samari bre Pêtrôs păng Yôhan bơtho tơdrong Kră Yang Yêsu păng roi dôm tơdrong sư 'bôh Yêsu pơm sơ̆. Klaih kơ noh bre sư wih tơ Pơlei Jêrusalem dơ̆ng. Kơplah bre sư oei yak rok trong, bre sư mơ̆t drong lơ tơ pơlei đe wă bơtho rah Tơdrong 'Nao 'Lơ̆ng Yêsu tơ pơlei đe lăm dêh char Samari.
Philip tơgŭm bơngai pơm tih đơ̆ng dêh Êthiôpia
26Na gah Philip dơ̆ng, linh jang 'lơ̆ng 'Bok Kei-Dei khan kơ sư thoi âu: “Ih năm tơ gah gơal Pơlei Jêrusalem hŏ, gah trong char glă chơngue mă jur đơ̆ng Pơlei Jêrusalem truh tơ Pơlei Gasa.”
27Na Philip năm hloi. Kơplah Philip yak rok trong ei sư 'bôh minh 'nu bơngai pơm tih kư̆m oei yak rok trong ei mơ̆n. Bơngai pơm tih ei, sư khŭl bơngai dêh char Êthiôpia. Sư wei-lăng jên yă Kanđake. Yă Kanđake pơm pơtao dêh char Êthiôpia. Na bơngai mă wei jên yă pơtao ei, ki sư năm tơ Pơlei Jêrusalem năm kơkuh kơ 'Bok Kei-Dei. 28Na năr ei sư wih đơ̆ng Pơlei Jêrusalem. Kơplah sư oei yak rok trong hao kơpal gre aseh sư, sư đŏk lăng sơ̆p hla bơar tơdrong 'Bok Kei-Dei, đơ̆ng Êsai chih khan lê̆ hơdrol sơ̆. 29Na Yang Bơhngol 'Lơ̆ng khan kơ Philip: “Năm bĕ ih, yak hơdai păng bơngai hao gre aseh noh.”
30Na Philip năm yak hơdai păng kơtơ̆ng 'bok ei đŏk sơ̆p hla bơar Êsai. Philip khan kơ sư: “Ih đŏk lăng tơdrong noh, ih hăm hlôh ưh?”
31'Bok ei khan: “Lơliơ inh gơh hlôh, ưh kơ đei bu bơtho inh?”
Sư apinh Philip tŏk gre sư oei jê̆ păng sư.
32Na 'bok ei đŏk lăng sơ̆p hla bơar ei thoi âu:
“Bơngai noh đe anhăk ba Sư thoi đe anhăk triu wă pơlôch.
Thoi kon triu ưh kơ chă hmoi lăp đe yuă sŏk sư, bơngai noh kư̆m ưh kơ đei ôr pơma ha pơret ôh.
33Đe jô̆ kơ Sư bơngai ưh kơ 'lơ̆ng,
păng lu bơngai sek tơlang kơ Sư ưh kơ tơpăt.
Lu bơngai hơtai Sư oei arih ei sơ̆ pơm kơnê̆ tơpă, na pơlôch Sư.”
34Na bơngai wei jên yă pơtao ei jet Philip: “'Bok pơtruh nơ̆r 'Bok Kei-Dei ei sơ̆ roi tơdrong sư kơdih dah roi tơdrong đe?”
35Na Philip khan kơ sư: “Tơdrong ba đŏk 'noh hei, Êsai khan lê̆ hơdrol gah tơdrong Yêsu.” Na đơ̆ng noh Philip bơtho sư tôm tơdrong Yêsu. 36Kơplah bre sư oei yak rok trong ei, bre sư 'bôh đak. Na bơngai ei khan kơ Philip: “Ih lăng 'bơ̆t âu đei đak glung. Ih hăm gơh pơm kơ inh 'batem dang ei dah ưh?”
37Philip khan: “Dah ih lui hăm đĭ jơhngơ̆m klơm klak ih, gơh mơ̆n pơm.” Na bơngai pơm tih ei khan: “Inh lui kơ Yêsu Krist Kon 'Bok Kei-Dei.”
38'Bok tih ei khan kơ bơngai wơ̆r gre sư athei dơ̆ng, na gre aseh ei dơ̆ng. Bre sư jur tơ đak, Philip pơm hloi kơ sư 'batem. 39Philip pơm kơ sư 'batem đang boih, bre sư tŏk tơ kông. Na Yang Bơhngol 'Lơ̆ng hiŏng anhăk Philip tơ nai, na 'bok tih ei ưh kơ 'bôh sư tơ yơ dơ̆ng. Mă-lei 'bok ei kư̆ kơ brŏk tơ pơlei sư. Jơhngơ̆m sư chơt hiôk tơpă. 40Philip pă tam băt 'bôh 'băi truh tơ Pơlei Aso hloi. Sư năm jơ̆p jơ̆p tơ dêh ei, bơtho Tơdrong 'Nao 'Lơ̆ng Yêsu tôm kơ pơlei đe hloi. Sư bơtho đơ̆ng Pơlei Aso truh tơ Pơlei Sêsarê.
Sôl lui kơ Kră Yang Yêsu
Currently Selected:
Jang 8: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
