Le 13

Tơdrong juăt pơyơ̆r kon kơdră

1Kră Yang khan kơ Môis: 2Lăm kon pơlei Isơrael mă bơngai dah sem dơrong, athei pơyơ̆r 'măn lê̆ kơ Inh dôm kon kơdră yua kơ kon kơdră noh gah Inh.

3Môis pơma hăm kon pơlei, iĕm athei 'blŏk hơdơ̆r kơ năr 'nâu, yua năr 'nâu năr Kră Yang yua ti mơsêh Sư pơklaih lu iĕm đơ̆ng dêh Êyiptơ, klaih đơ̆ng teh đak pơm đĭch đam; na 'nĕ sa 'bĕng đei 'buih pông. 4Năr 'nâu, trŏ khei mônh, lu iĕm lĕch.a 5Mưh layơ Kră Yang ba lu iĕm tơ dêh kon pơlei Kanaan, kon pơlei Hêtit, kon pơlei Amôrit, kon pơlei Hêwit păng kon pơlei Jêbus boih, dêh teh mơ̆r 'lơ̆ng thoi đak sut đak toh păng dêh Kră Yang mă pơkă hăm lu 'bok iĕm, na truh lăm khei 'nâu ih athei wei răk tơdrong giĕng 'nâu. 6Lăm tơpơh năr ih athei sa 'bĕng ưh kơ đei 'buih pông, truh năr tơpơh gô đei et sa bơnê kơkuh kơ Kră Yang. 7Athei sa 'bĕng ưh kơ đei 'buih pông lăm tơpơh năr, lăm tơring iĕm 'nĕ ăn kơ đei 'bôh 'buih pông. 8Lăm năr noh athei roi ăn kơ kon drŏ-nglo iĕm, bơ̆n pơm tơdrong 'noh yua kơ Kră Yang pơm 'lơ̆ng kơ inh, kơplah inh lĕch đơ̆ng dêh Êyiptơ. 9Tơdrong noh iĕm athei pơm tơ'bôh minh tơdra tơ ti iĕm, pơm minh tơdrong 'blŏk hơdơ̆r chih tơ klĕng, wă kơ tơ'blŏk tơdrong juăt Kră Yang oei tơ lăm 'bơ̆r iĕm, yua kơ hăm ti mơsêh mơyang Kră Yang pơklaih iĕm lĕch đơ̆ng dêh Êyiptơ. 10Rim sơnăm, truh bơyan, iĕm athei bơwei nơ̆r tơtă tơdrong 'nâu ling-lang.

11Layơ Kră Yang chông iĕm mơ̆t tơ dêh Kanaan, kiơ̆ thoi Sư pơkă pơ'ngam bơih hăm ih păng 'bok ih, sư gô pơjao dêh noh kơ ih, 12na ih athei pơyơ̆r ăn Kră Yang lu kon kơdră drŏ-nglo hăm lu kon tơno tuh blŭng-a lăm sem dơrong, yua kơ lu sư gô jing gah Kră Yang ngăl. 13Mă-lei rim kon aseh iĕ blŭng-a, iĕm athei rôp triu kon dah bơbe kon huai tơplih, tơdah ưh, athei wĕch hơko sư, kư̆m athei huai iŏk rim kon kơdră kon drŏ-nglo iĕm.

14Na tơdah dơning dơmônh kon drŏ-nglo iĕm apinh iĕm: Tơdrong noh wă khan kiơ? Lei ih athei roi kơ sư: 'Noh yua kơ Kră Yang yua ti mơsêh pơklaih lu nhôn lĕch đơ̆ng dêh Êyiptơ, dêh mă nhôn pơm đĭch; 15yua kơ kơplah Pharaôn arăng kơ̆l ưh kơ ăn kơ lu nhôn năm, Kră Yang pơlôch đĭ hloi lu kon kơdră lăm dêh Êyiptơ, đơ̆ng kon kơdră drŏ-nglo kon bơngai truh tơ kon sem dơrong tuh blŭng-a, yua tơdrong noh, inh pơyơ̆r ăn Kră Yang dôm kon sem dơrong tơno tuh blŭng-a păng inh huai iŏk kon kơdră kon drŏ-nglo inh. 16'Noh gô pơm minh tơdrong tơdra tơ ti ih păng chơ̆m tơ klĕng ih, wă tơbăt tơ'blŏk Kră Yang yua ti mơsêh pơklaih lu nhôn lĕch đơ̆ng dêh Êyiptơ.

Yak hlôi kơ đak dơsĭ

17Kơplah Pharaôn achăng kon pơlei Isơrael năm, Kră Yang 'Bok Kei-Dei ưh kơ đei chông ba kon pơlei noh năm rok trong gah dêh Philistin, noh trong jăl jê̆ hloh; yua kơ Kră Yang khan: Hli kơ kon pơlei tơ'bơ̆p tơdrong tơblah wang, lu sư wih brŏk hơlơ̆k đơ̆ng tơ dêh Êyiptơ. 18Lei na Kră Yang 'Bok Kei-Dei chông ba lu kon pơlei năm dăr rok kiơ̆ trong lăm char glă, gah Đak Dơsĭ 'Brê. Kon pơlei Isơrael chĕp khêl đao lĕch đơ̆ng dêh Êyiptơ.

19Môis chĕp anhăk ba kơting Jôsep; yua kơ Jôsep đei athei kon sâu Isơrael pơkă pơkăm anhăk ba kơting sư: Tơpă Kră Yang 'Bok Kei-Dei gô dŏng pơklaih lu iĕm; na lu iĕm athei anhăk ba kơting inh lĕch đơ̆ng dêh 'nâu.

Jrăng hơmơ̆l păng jrăng pla ŭnh

20Lu sư năm đơ̆ng Sukôt oei pơdơh pơm bơsŭn tơ Êtham tôch kơ char glă. 21Kră Yang năm adrol kơ kon pơlei, tơ kơ'năr hăm minh pôm jrăng hơmơ̆l, wă ba trong yak năm; tơ kơmăng hăm minh pôm jrăng ŭnh, wă pơchrang ăn kơ lu sư, wă kơ lu sư gơh năm ling-lang kơ'năr păng kơmăng. 22Kơ'năr jrăng hơmơ̆l ưh kơ đei layơ weh đơ̆ng kon pơlei, jrăng ŭnh tơ kơmăng kư̆m lei-lăi.

Currently Selected:

Le 13: bdq

Highlight

Copy

Compare