Le 15
15
Nơ̆r Môis păng kon pơlei Isơrael hơri
1Đơ̆ng noh, Môis păng kon pơlei Isơrael hơri 'bai 'nâu kơ Kră Yang, khan: Inh gô hơri ư-ang kơ Kră Yang, yua kơ Sư mơsêh mơyang tih. Kră Yang klơ̆m lê̆ aseh păng bơngai hao aseh lăm đak dơsĭ.
2Kră Yang bơih jơhngơ̆m pran kơtang inh păng tơdrong hơri inh: Sư bơih tơ'ngla pơklaih inh. Sư Kră Yang 'Bok Kei-Dei inh, inh wă hơri ư-ang kơ Sư; Sư jơ̆ Kră Yang 'Bok Kei-Dei kơ 'bok yă inh, na inh đĭ jơhngơ̆m gô kơkuh pơyom kơ sư.
3Kră Yang thoi linh tơblah; Anăn Sư Kră Yang.
4Kră Yang, sư klơ̆m hŭt lê̆ bơih khŭl linh păng đĭ-đăng gre aseh; Lu yŏng linh bơngai mă Pharaôn rơih iŏk lôch hiong đĭ lăm đak dơsĭ 'Brê,
5Đak jrŭ klơ̆p gom lu sư; Lu sư krăm truh tơ kơđĕl đak dơsĭ thoi minh pôm tơmo.
6Ơ Kră Yang! Ti gah 'ma Ih pran kơtang mơsêh mơyang. Ơ Kră Yang! Ti gah 'ma Ih pơrăm boih lu linh ayăt.
7Hăm tơdrong pran kơtang mơsêh mơyang tih krưp Ih, pơrăm boih lu bơngai blah Ih; tơdrong Ih hil mĭl, Soh pơrăm lu sư thoi ŭnh sa hơnong ba.
8Hơyuh đơ̆ng 'bơ̆r Ih tơthu bơ̆ lê̆ đak khơ̆t tŏk thoi bơnơ̆; Anih đak jrŭ jing arăng lăm đak dơsĭ.
9Linh ayăt khan: Bơ̆n druh, bơ̆n gô druh tam, Bơ̆n gô hiôk asong băl tơmam đơ̆ng bơ̆n blah iŏk; Inh toh đao gưm pơlôch lu sư.
10Ih tơthu kial lĕch, kial đơ̆ng Ih đak dơsĭ lơ̆p lê̆ lu sư boih; lu sư krăm thoi kơtuăl bơlơ̆k tơ kơđĕl đak jrŭ.
11Ơ Kră Yang! Lăm lu yang bu yang, thoi Ih? 'Lơ̆ng rơgoh, mơsêh mơyang, mă đei ư-ang, Trŏ kơ hli, trŏ kơ pơyom, gơh pơm dôm tơdrong hlĭch chrơp.
12Ih yơ̆r ti 'ma Ih, Teh 'bŭ klơ̆p lê̆ lu sư.
13Hăm jơhngơ̆m Ih 'mêm mơnat sĭt dui anhăk kon pơlei 'nâu mă Ih đei huai iŏk boih; Ih yua tơdrong pran kơtang pơgơ̆r lu sư wih tơ anih 'lơ̆ng rơgoh mă Ih oei.
14Lu adrĕch bơngai tơmoi, lu sư hli tơtơ̆. Kon pơlei Philistin hli krưp tih tơpă.
15Lu kră pơgơ̆r Eđôm hli tơrơ rŭng răng dêh. Dôm lu kră pơgơ̆r char Môap dai hli tơtơ̆; Đĭ-đăng kon pơlei lăm char Kanaan jơhngơ̆m rŭng răng đĭ.
16Tơdrong hli tơrơ dêh truh tơ lu sư; Ơ Kră Yang! Kơkŏng ti pran kơtang Ih. Lu sư jing kơmlo nhen thoi tơmo, Tơ̆p mă truh layơ kon pơlei Ih yak hlôi; Tơ̆p mă truh kon pơlei mă Ih huai iŏk boih yak hlôi đĭ.
17Ơ Kră Yang! Ih gô ba lu sư mơ̆t păng pơtăm lu sư tơ kơpal kông Ih. Ơ Kră Yang; anih Ih đei hơmet boih, wă pơm anih Ih oei, Ơ Kră Yang! Anih 'lơ̆ng rơgoh mă ti Ih đei pơjing boih.
18Kră Yang gô pơgơ̆r ling-lang, hlŏng hloi.
Nơ̆r Miriam hơri
19Kơplah aseh Pharaôn, gre aseh sư, hăm lu bơngai chĕp gre aseh sư, đak dơsĭ klơ̆p lê̆ lu sư boih. Kră Yang iŏk đak dơsĭ klơ̆p tơ kơpal lu sư, Mă-lei gah kon pơlei Isơrael năm rok tŏk-bŏk đak dơsĭ thoi năm tơ kơpal teh hrĕng. 20Miriam mŏ Arôn bơngai drŏ-kăn khan lê̆ adrol păng lu drŏ-kăn dai kiơ̆, đơ̆ng rŏng chĕp hơgơ̆r iĕ suang rah. 21Miriam hơri tơl lu sư: Hơri ư-ang bĕ kơ Kră Yang, yua kơ Sư mơsêh mơyang tih hloh. Sư klơ̆m lê̆ aseh păng bơngai hao aseh lăm đak dơsĭ.
Đak tăng tơ Mara
22Môis chông kon pơlei Isơrael năm đơ̆ng đak dơsĭ 'brê, lu sư năm truh tơ tơmăn glă Sur; pêng năr kơ trong năm lăm tơmăn glă, chă đak ưh kơ đei. 23Wă truh tơ Mara đei đak, mă-lei đak tơ noh tăng, nhă ưh kơ gơh na anih 'nâu đe krao Mara.a 24Kon pơlei pơma jŏk kơ Môis khan: Lu nhôn wă nhă kiơ.
25Môis krao apinh Kră Yang; Kră Yang tơ'bôh ăn kơ sư minh pôm dơng 'long, sư iŏk klơ̆m lăm đak, na đak jing 'lơ̆ng. Na tơ noh, Kră Yang ăn tơdrong juăt hăm tơdrong tơtă ăn kơ kon pơlei păng tơ noh sư pơlong lăng lu sư. 26Sư khan: Tơdah iĕm mơ̆ng nơ̆r Kră Yang 'Bok Kei-Dei, pơm 'lơ̆ng tơpăt 'bơ̆t anăp Inh tơdah iĕm mơ̆ng nơ̆r tơtă păng wei răk dôm tơdrong juăt Inh, lei Inh ưh kơ đei tuh kơ iĕm minh tơdrong jĭ jăn mă inh tuh ăn boih kơ dêh Êyiptơ; Inh boih Kră Yang, tơ'ngla pơklaih iĕm đơ̆ng jĭ jăn.
Tơ Êlim
27Lu kon pơlei truh tơ Êlim; tơ noh đei mơjĭt-'bar tŏ tu đak mơlĕch păng tơpơh-jĭt 'long gol, kon pơlei oei pơdơh, jê̆ đak noh.
Currently Selected:
Le 15: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
