Le 4

Tơ'bôh ăn kơ Môis tơdrong hlĭch

1Môis drơ̆ng khan: Mă-lei kon pơlei noh ưh kơ lui păng ưh kơ chu nơ̆r inh, lu sư gô khan: Kră Yang ưh kơ đei tơbang tơ'bôh ăn kơ ih ôh.

2Kră Yang khan: Ti ih chĕp kiơ? Môis tơl khan: Minh pôm 'long jra.

3Kră Yang khan dơ̆ng: Klơ̆m sư tơ teh. Sư klơ̆m hloi tơ teh, 'long jra noh jing minh dăng 'bih; Môis kơdâu weh đơ̆ng sư. 4Kră Yang khan kơ Môis: Iŏk ti ih rôp kiĕng sư 'noh. Môis chro ti năm rôp na 'bih ei jing hloi 'long jra chĕp lăm ti dơ̆ng. 5Kră Yang khan: 'Noh wă kơ lu sư lui kơ Kră Yang 'Bok Kei-Dei 'bok sư, wă khan Kră Yang 'Bok Kei-Dei Abraham, Kră Yang 'Bok Kei-Dei Isăk, Kră Yang 'Bok Kei-Dei Jakôp, đei tơ'bôh boih kơ ih.

6Kră Yang khan dơ̆ng: Dan ti ih tơ kơtơh. Na sư dan hloi, klaih kơ 'noh sư hiŏng ti. Na, 'bôh ti sư 'bơm chin kok hmông thoi prĕl.

7Kră Yang khan dơ̆ng: Dan ti ih tơ kơtơh dơ̆ng; na sư dan hloi tơ kơtơh, achăng ti sư lăng 'bôh sĕch akar sư thoi so.

8Kră Yang khan dơ̆ng: Tơdah layơ kon pơlei 'noh ưh kơ lui kơ ih păng ưh kơ chu kiơ̆ nơ̆r tơdra mă blŭng-a, lei sư gô lui kiơ̆ nơ̆r tơdra mă 'bar. 9Tơdah kon pơlei ưh kơ lui kơ đĭ 'bar tơdra 'nâu păng ưh kơ chu kiơ̆ nơ̆r ih, lei chhŏ đak krong Nil tuh tơ teh hrĕng kro; đak mă ih iŏk đơ̆ng đak krong noh gô jing pham jơ̆p kơ teh hrĕng kro noh.

10Môis tơl Kră Yang thoi âu: Ơ! Kră Yang bơnê kơkuh kơ Ih, đơ̆ng năr brei năr mơsơ̆, mă đơ̆ng krô Ih pơma bơtho đĭch đam Ih, inh ưh tam trŏ bơngai pơma gơh hơgei, yua kơ 'bơ̆r păng hơpiĕt inh pơma arăk ưh kơ hơđăl.

11Kră Yang khan dơ̆ng: Bu pơjing kơ 'bơ̆r adrĕch kon bơngai? Dah bu pơm kơmlo, pơm klĭk, pơm kơ măt hơdah păng ưh kơ bang? Hăm trŏ kơ Inh Kră Yang? 12Thoi ei, na năm bĕ; inh gô oei hơdai lăm 'bơ̆r păng bơtho ih dôm nơ̆r trŏ wă pơma.

13Môis tơl khan: Ơ! Kơkuh kơ Ih Kră Yang Ih wă wơh bu năm, wơh bĕ.

14Na Kră Yang hil mĭl kơ Môis na khan: Hăm trŏ Arôn bơngai Lêwi, 'nhŏng ih dah kiơ? Inh băt bơngai 'noh sư gơh pơma hơgei păng to, sư oei năm wă sơng ih; lăp sư 'bôh ih, lăm jơhngơ̆m sư hiôk dêh. 15Lei na ih pơma hăm sư păng hơmet lê̆ dôm nơ̆r wă pơma lăm 'bơ̆r sư, kơplah măr iĕm pơma. Inh gô oei hơdai lăm 'bơ̆r ih păng 'bơ̆r 'nhŏng ih, bơtho iĕm dôm tơdrong kiơ wă pơm. 16'Noh boih sư gô pơma hăm kon pơlei tơplih kơ ih, yua pơm 'bơ̆r ih, na ih gô nhen thoi Kră Yang 'Bok Kei-Dei kơ sư noh mơ̆n. 17Ih chĕp 'long jra 'nâu wă yua pơm tôm tơdrong hlĭch.

Môis wih tơ char Êyiptơ

18Môis wih tơ tơnei sư Jêthrô na khan: Apinh 'bă ăn kơ inh wih brŏk tơ lu 'nhŏng oh inh tơ dêh Êyiptơ, wă lăng lăng lu sư hăm oei arih ưh. Jêthrô khan hloi kơ Môis: Kon yak mă 'lơ̆ng bĕ.

19Kră Yang khan hăm Môis tơ Mađian thoi âu: Wih bĕ tơ dêh Êyiptơ, yua kơ dôm lu bơngai mă chă wă pơlôch ih lôch đĭ boih. 20Môis sư pôk hơtŏk akăn păng kon sư tơ kơpal kơdŭ aseh iĕ, wih brŏk tơ dêh Êyiptơ. Sư chĕp ba 'long jra đơ̆ng Kră Yang 'Bok Kei-Dei ăn kơ sư.

21Kră Yang khan kơ Môis: Mưh wih tơ dêh Êyiptơ, kơchăng kơ tơdrong mơsêh hlĭch Inh đei pơjao 'bơ̆t ti ih mă ih pơm 'bơ̆t anăp Pharaôn; mă-lei Inh gô pơm ăn kơ sư arăng kơ̆l ưh kơ ăn kon pơlei năm. 22Lei ih roi tơbăt kơ Pharaôn: Kră Yang khan thoi âu: Isơrael jơ̆ kon drŏ-nglo Inh wă khan kon kơdră Inh, 23mă Inh đei khan hăm ih: Ăn kơ kon drŏ-nglo Inh năm, wă kơ lu sư kơkuh kơ Inh. Mưh ih ưh kơ chu ăn kơ lu sư năm. 'Nâu Inh gô pơlôch kon kơdră drŏ-nglo ih.

24Kơplah oei năm rok trong, Kră Yang tơ'bơ̆p Môis tơ anih hnam đe mơdro păng wă pơlôch lê̆ sư. 25Sêpôra iŏk tơmo tơ noh pơm săng, kăt tơdra akar kơ kon sư păng klơ̆m lê̆ tơ ala jơ̆ng Môis na sư khan: Tơpă, ih jing klo inh đơ̆ng pham kon ba âu! 26Kră Yang lê̆ klo sư arih; Kơplah noh akăn sư khan: Ih jing klo inh tơpă! Yua kơ đơ̆ng kăt tơdra akar kon ba na ih arih hiôk.

'Bok Kei-Dei wơh Arôn năm sơng Môis

27Kră Yang khan kơ Arôn thoi âu: Năm bĕ tơ char glă sơng Môis. Arôn năm hloi, tơ'bơ̆p Môis tơ kông Kră Yang 'Bok Kei-Dei păng sư chŭm Môis. 28Môis roi ăn kơ Arôn băt dôm nơ̆r Kră Yang wơh sư păng dôm tơdrong mơsêh hlĭch mă Kră Yang bơtho athei sư pơm.

29Na Môis hăm Arôn năm hơdai tơ dêh Êyiptơ, krao akŭm dôm lu kră bơngai Isơrael. 30Arôn ră roi đĭ dôm nơ̆r đơ̆ng Kră Yang đei pơma hăm Môis păng Môis kư̆m pơm tơdrong mơsêh hlĭch 'bơ̆t anăp kon pơlei. 31Lu sư lui kơ nơ̆r 'noh, băt kơ Kră Yang oei hơdai hăm kon pơlei Isơrael păng 'bôh dôm tơdrong pơmat-tat lu sư; na lu sư kŭp kơ̆l kơkuh kơ Kră Yang hloi.

Currently Selected:

Le 4: bdq

Highlight

Copy

Compare