Bl 11
11
'Ba'bel
1'Nâu, đĭ-đăng kon bơngai kơpal teh pơma minh nơ̆r pơma đĕch. 2Mă-lei iŏk đơ̆ng kon bơngai weh tơ gah hơlĕch, lu sư 'bôh teh dơnă, tơring char Sinar, na oei hloi tơ noh.
3Bơngai âu pơma dơnuh păng bơngai noh khan: “Âu! Bĕ bơ̆n man găch na 'buh lăm ŭnh.” Kơplah noh, găch tơplih kơ tơmo, chai pơm tơmam klep. 4Na khan thoi âu: “'Nâu bơ̆n athei pơjing minh pôm pơlei tih păng pơm hnam Thôt tŏk-bŏk pơlei, kơjung truh tơ plĕnh;a bơ̆n athei pơm ư-ang kơ bơ̆n; hli kơ bơ̆n tơklah tơklang tơ jơ̆p-jang kơpal teh đak âu.”
5Kră Yang jur lăng pơlei hnam thôt mă kon bơngaib đei pơm. 6Kră Yang khan thoi âu: “Âu! Lăp minh adrĕch kon bơngai, lăp minh nơ̆r pơma; păng tơdrong jang lu sư đei pơm; dang ei ưh kơ đei kiơ pơgăn lu sư đơ̆ng tơdrong lu sư pơkă wă pơm. 7Bĕ, lu bơ̆n jur pơm bơlŭ lê̆ nơ̆r pơma lu sư ưh pă hlôh băl dơ̆ng kơ nơ̆r pơma bơngai âu pơma kơ bơngai to.” 8Đơ̆ng noh, Kră Yang pơm ăn kơ lu sư tơklah tơklang jơ̆p-jang kơ teh păng lu sư ưh pă đei man pơjing pơlei noh dơ̆ng. 9Yua kơ noh na đe krao anăn pơlei 'Ba'belc yua kơ tơ anih noh Kră Yang bơlŭ lê̆ nơ̆r pơma kon bơngai lăm teh, đơ̆ng noh boih Sư ăn kơ kon bơngai tơklah tơklang tơ jơ̆p-jang kơ teh đak.
Adrĕch adrung Isơrael đơ̆ng Abram truh tơ Jôsep
Đơ̆ng 11:10 truh tơ chăl 50
Adrĕch Sem
10Âu adrĕch adrung Sem:
Đơ̆ng rŏng kơ đak lơ̆p 'bar sơnăm Sem đei minh-hrĕng sơnăm, pơjing Apaksat. 11Đơ̆ng rŏng kơ đei Apaksat boih, Sem oei arih pơđăm-hrĕng sơnăm kư̆m đei pơjing kơ kon drŏ-nglo, kon drŏ-kăn.
12Apaksat đei pêng-jĭt pơđăm sơnăm pơjing Sêlah. 13Đơ̆ng rŏng Apaksat đei pơjing Sêlah boih, sư arih đei pêng-hrĕng pêng sơnăm pơjing kon drŏ-nglo kon drŏ-kăn.
14Sêlah đei pêng-jĭt sơnăm, pơjing kơ Eber. 15Đơ̆ng rŏng kơ Sêlah pơjing kơ Eber boih sư oei arih đei puăn-hrĕng pêng-jĭt sơnăm, sư đei pơjing kon drŏ-nglo, kon drŏ-kăn.
16Eber đei pêng-jĭt puăn sơnăm, pơjing kơ Pêlek. 17Đơ̆ng rŏng kơ Eber pơjing Pêlek boih, oei arih puăn-hrĕng pêng-jĭt sơnăm, kư̆m đei pơjing kon drŏ-nglo kon drŏ-kăn.
18Pêlek đei pêng-jĭt sơnăm, pơjing kơ Rêbu. 19Đơ̆ng rŏng Pêlek pơjing Rêbu boih, sư oei arih đei 'bar-hrĕng tơsĭn sơnăm, đei pơjing kon drŏ-nglo, kon drŏ-kăn.
20Rêbu đe pêng-jĭt 'bar sơnăm, pơjing kơ Sêruk. 21Đơ̆ng rŏng Rêbu pơjing Sêruk boih, oei arih truh tơ 'bar-hrĕng tơpơh sơnăm, pơjing kon drŏ-nglo kon drŏ-kăn.
22Sêruk đei pêng-jĭt 'bar sơnăm, pơjing Nahôr. 23Đơ̆ng rŏng kơ Sêruk pơjing Nahôr boih, sư oei arih đei 'bar-hrĕng sơnăm.
24Nahôr đei 'bar-jĭt tơsĭn sơnăm, pơjing Thêra. 25Đơ̆ng rŏng kơ Nahôr pơjing kơ Thêra boih, sư oei arih minh-hrĕng mơjĭt-tơsĭn sơnăm, đei pơjing kon drŏ-nglo, kon drŏ-kăn.
26Gah Thêra đei tơpơh-jĭt sơnăm, pơjing Abram, Nahôr păng Haran.
27Âu boih adrĕch adrung Thêra: Thêra pơjing kơ Abram, Nahôr păng Haran; Haran pơjing kơ Lot. 28Kơplah 'bă sư Thêra oei arih, Haran sư lôch lăm tơring sư kơdih, lăm, pơlei Ur dêh Kalđê. 29Abram păng Nahôr chă akăn; akăn Abram anăn sư Sarai, gah akăn Nahôr anăn Milka: Milka hăm Iska kon drŏ-kăn Haran. 30Sarai âu sư hơwŏng, ưh kơ đei kon.
31Thêra chông ba Abram, kon drŏ-nglo sư, Lot kon drŏ-nglo Haran, sâu sư păng Sarai akăn Abram, mŏ mai sư, lĕch đơ̆ng Ur, lăm dêh Kalđê, na năm tơ char Kanaan kơplah lu sư truh tơ pơlei Charan sư pơjing hnam dơnŏ bơ̆jang sa tơ noh.
32Thêra arih đei 'bar-hrĕng pơđăm sơnăm, na sư lôch tơ pơlei Charan.
Currently Selected:
Bl 11: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
