Bl 12
12
Abram pŭn đei Kră Yang 'Bok Kei-Dei rơih
1Âu, Kră Yang đei khan kơ Abram thoi âu: “Ih athei lĕch đơ̆ng dêh char âu, tơklah đơ̆ng hnam dơnŏ păng 'nhŏng oh mĕ 'bă ih, na năm tơ dêh char mă Inh gô tơ'bôh kơ ih.
2Inh gô ăn kơ ih jing minh adrĕch adrung tih,
Inh gô ăn kơ ih pŭn hiôk,
đe kư̆m gô ư-ang kơ ih,
păng ih gô jing tơm kơ tơdrong pŭn hiôk,
3Inh gô ăn pŭn hiôk kơ bu mă sơkat kơ ih pŭn hiôk.
Inh gô hiap pơtê̆ bơngai bu mă hiap pơtê̆ ih;
păng đĭ-đăng adrĕch adrung kon bơngai kơpal teh âu
gô đei pŭn hiôk đơ̆ng ih.”
Abram truh tơ char Kanaan
4Đơ̆ng noh Abram năm, kiơ̆ thoi nơ̆r Kră Yang khan tơ'bôh, Lot kư̆m kiơ̆ hơdai sư. Kơplah Abram lĕch đơ̆ng Charan, sư đei tơpơh-jĭt pơđăm sơnăm boih. 5Abram chông ba Sarai, akăn sư, Lot mon sư păng đĭ-đăng lu mŭk tơmam sư đei hơmet ba păng lu đĭch đam sư mă đei đơ̆ng Charan, lĕch đơ̆ng noh, lu sư năm truh tơ dêh Kanaan.
6Abram yak găn dêh char âu, truh tơ tơnơm 'long kôih tơ Mamrê, jê̆ pơlei Sichem. Kơplah noh lu kon pơlei Kanaan oei oei tơ lăm dêh char noh. 7Kră Yang pơdah kơ Abram păng pơkă khan: Inh gô ăn adrĕch adrung ih teh đak âu! Đơ̆ng noh, Abram pơm minh pôm chơnang soi kơ Kră Yang, Tơ'ngla mă đei pơdah akâu sư kơ Abram.
8Đơ̆ng noh, sư yak găn kông groi gah hơlĕch kơ pơlei Bethel, na pơm bơsŭn; bơmơ̆t kơ noh Bethel, tơ gah hơlĕch đei Ahi. Na sư pơm minh pôm chơnang soi tơ noh kơ Kră Yang wă krao apinh Sư. 9Đơ̆ng rŏng, Abram yak rah pơm rah bơsŭn 'net 'net dĭng truh tơ gah gơal, anăn Nêgeo.
Abram jur tơ dêh Êyiptơ
10Kơplah ei sơ̆, tơ dêh sư đei pơngot rơwĕt. Tơdrong pơngot rơwĕt âu tih dêh, na Abram jur tơ char Êyiptơ oei gô tơ noh. 11Kơplah sư wă oei lăm dêh Êyiptơ, Abram đei khan hăm Sarai, akăn sư thoi âu: “Âu, inh băt kơ ih jing minh 'nu bơngai drŏ-kăn 'lơ̆ng hơbŏ. 12Mưh ba tơ'bơ̆p kon pơlei Êyiptơ, sư 'bôh ih, lu sư gô khan, ‘noh jơ̆ akăn sư’; kơnh hli kơ lu sư pơlôch inh, na gô lê̆ ih arih. 13Na inh apinh khan ih jơ̆ oh drŏ-kăn inh, wă kơ đơ̆ng ih na đe gô sơng iŏk inh hiôk-hian păng huay kơ pơlôch.”
14Abram truh tơ dêh Êyiptơ kon pơlei Êyiptơ 'bôh Sarai bơngai drŏ-kăn 'lơ̆ng hơbŏ tơpă. 15Lu bơngai jang kơ pơtao Pharaôn kư̆m năm tơkan roi 'bơ̆t anăp pơtao lu sư 'bôh bơngai drŏ-kăn 'lơ̆ng noh, na chông ba bơngai drŏ-kăn 'lơ̆ng noh mơ̆t tơ hnam Pharaôn. 16Yua kơ drŏ-kăn noh, na Pharaôn sơng iŏk Abram hiôk 'lơ̆ng păng ăn kơ Abram đei lơ triu, rơmo aseh tơno, aseh akăn, lăk-đa, đĭch drŏ-nglo, đam drŏ-kăn.
17Na yua kơ Sarai, akăn Abram, na Kră Yang phak Pharaôn hăm hnam dơnŏ sư đei tơdrong jĭ krưp dêh. 18Pharaôn năm krao Abram na apinh Abram thoi âu: “Ih pơm kiơ kơ inh thoi noh? Liơ ih ưh kơ roi kơ inh bơngai drŏ-kăn noh akăn ih? 19Mă-lei khan noh oh drŏ-kăn ih? Na jing inh iŏk hĭ sư pơm akăn. Dang ei âu akăn ih; iŏk sư bĕ păng weh tơ nai.” 20Na Pharaôn khan pơkă kơ lu linh sư, ba klo kăn Abram hăm đĭ-đăng mŭk tơmam sư năm tơ nai.
Currently Selected:
Bl 12: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
