Bl 15
15
Kră Yang 'Bok Kei-Dei pơkă pơ'ngam dơ̆ng hăm 'bok Abram
1Đơ̆ng rŏng kơ tơdrong noh, đei nơ̆r Kră Yang khan dơ̆ng kơ Abram lăm tơdrong tơ'bôh thoi âu:
“Ơ Abram ih 'nĕ kơ hli;
Inh âu jơ̆ khêl pĕng ih;
ih gô đei tơmam apah tih tơpă.”
2Abram tơl thoi âu: “Kơkuh kơ Ih Kră Yang. Ih gô ăn kiơ? Inh gô lôch mă-lei ưh kơ đei kon, bơngai ioi adrĕch adrung hnam inh noh Êliêser, Đơ̆ng pơlei Đamas.” 3Na Abram khan dơ̆ng: “Âu Kră Yang pơm kơ inh tôch adrĕch; minh 'nu đĭch đam tơpŭ lăm hnam inh gô jing bơngai pơtrơp ioi tơdrong jang inh.”
4Kră Yang khan dơ̆ng kơ Abram thoi âu: “Bơngai noh ưh kơ trŏ wă pơtrơp tơdrong jang ih ôh, mă-lei bơngai đơ̆ng blu pôih ih pơjing, bơngai mă gô pơtrơp tơdrong jang adrĕch ioi ih.” 5Na Kră Yang chông sư tơ đaih păng khan: “Ih athei ngoi lăng tơ plĕnh. Dah ih kĕ jô̆ lu sơnglŏng jô̆ bĕ.” Kră Yang khan dơ̆ng: “Adrĕch adrung ih kư̆m gô thoi noh.”
6Abram lui tơpă kơ Kră Yang, na Kră Yang jô̆ sư bơngai tơpăt.
Tơdrong soi păng tơdrong Abram apo
7Kră Yang 'Bok Kei-Dei khan dơ̆ng kơ Abram thoi âu: “Inh jơ̆ Kră Yang, Kră Yang mă chông anhăk ih đơ̆ng Ur, lăm char Kalđê, gô ăn kơ ih char âu jang sa.”
8Abram tơl thoi âu: “Kơkuh kơ Ih Kră Yang, liơ inh băt inh gô đei char âu?”
9Kră Yang tơl: “Ih athei rôp ăn kơ Inh minh pôm kon rơmo akăn pêng sơnăm, minh pôm bơbe akăn pêng sơnăm păng minh pôm kon triu tơno pêng sơnăm, minh pôm sem pơgâm păng minh pôm kơtơp hơnar.”
10Abram rôp tôm đĭ lu kon sem noh, blah phơ̆t tŏk-bŏk rĭ lê̆ tơklă băl; mă-lei sem păr sư ưh kơ đei blah asong ôh. 11Đei lu sem păr jruh kôp tơ kơpal lu kon sem mă lôch noh, đơ̆ng noh Abram puh lu sư păr đĭ.
12Kơplah noh măt 'năr 'nao wă mơ̆t, na Abram tep hlơ̆k. Âu đei tơdrong truh hli krưp, măng mu gom akâu sư. 13Na Kră Yang khan kơ Abram thoi âu: “Inh khan kơ ih tơpă lu adrĕch adrung ih gô oei tơ lăm minh pôm char ưh kơ trŏ char lu sư, oei tơ ei thoi tơmoi đĕch păng pơm đĭch đam kơ char noh, na char noh gô pơjuă pơđep lu sư lăm puăn-hrĕng sơnăm. 14Mă-lei inh gô phak char mă adrĕch adrung ih pơm đĭch noh, đơ̆ng noh, kơplah iĕm lĕch hlôi, lu iĕm gô đei tơmam lơ tơpă. 15Gah ih gô arih sot dĭng kră truh tơ ih lôch, na ih gô brŏk tơ yă 'bok hiôk-hian;a 16dĭng truh tơ jơhnơr tăl puăn lu adrĕch adrung ih gô wih brŏk hơlơ̆k tơ âu, yua kơ 'bơ̆t noh boih tơdrong yoch kon pơlei Amôrit tôm wă phak boih.”
17Kơplah măt 'năr mơ̆t boih, glĭp kơmăng mu truh na đei minh pôm tơnuh ŭnh tih lĕch 'nhui păng đei pla ŭnh soh dơhlông tơ lu kon sem mă đei blah noh hei. 18Lăm năr noh Kră Yang đei nơ̆r pơkă pơgơ̆p pơkăm hăm Abram, na khan thoi âu: “Inh gô ăn kơ adrĕch adrung ih dêh char âu, đơ̆ng glung Êyiptơb dĭng truh tơ glung tih noh, wă khan glung Ơphrat. 19Noh char bơngai Kênit, lu Kênêsit, lu Kamơnit. 20Hêtit, Phêliyit, Rêphaim, 21Amôrit, Kanaan, Girgasit păng Jêbus.”
Currently Selected:
Bl 15: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
