Bl 17
17
Kră Yang 'Bok Kei-Dei pơgơ̆p pơkă hăm Abram
1Kơplah Abram tơsĭn-jĭt tơsĭn sơnăm, na Kră Yang tơ'bôh kơ Abram păng khan thoi âu: “Inh boih Kră Yang 'Bok Kei-Dei mơsêh mơyang, ih athei oei 'bơ̆t anăp Inh na ih jing minh 'nu bơngai 'lơ̆ng tơpăt. 2Inh gô pơgơ̆p pơkă pơkăm hăm ih, pơm ăn kơ adrĕch adrung ih rai lơ hloh.”
3Abram drap bon tơ teh, Kră Yang 'Bok Kei-Dei khan kơ Abram thoi âu: 4“'Nâu, gah Inh âu, Inh đei pơkă boih hăm ih, thoi noh ih gô jing 'bok kơ ơ adrĕch adrung bơngai, 5Đe ưh pă krao ih Abram boih, gô krao ih Abrahama yua kơ Inh ăn kơ ih pơm 'bă kơ lơ adrĕch adrung. 6Inh gô pơm ăn kơ ih pơjing hơ'lơ̆p rai lơ; wă kơ đơ̆ng ih jing đei lơ dêh char păng lu pơtao gô lĕch đơ̆ng ih mơ̆n. 7Inh pơgơ̆p pơkă hăm ih păng lu ioi adrĕch adrung ih truh tơ dôm jơhnơr noh pơgơ̆p pơkă ling-lang, Inh boih Kră Yang 'Bok Kei-Dei ih păng lu adrĕch adrung ih. 8Dêh char mă lu iĕm oei dang ei thoi tơmoi đĕch Inh gô ăn kơ ih păng lu adrĕch adrung ih dêh Kanaan, wă jang sa ling-lang hloi. Inh boih Kră Yang 'Bok Kei-Dei lu sư.”
Kăt tơdra akar
9Âu dơ̆ng; Kră Yang 'Bok Kei-Dei pơma kơ Abraham thoi âu: “Gah ih hăm lu adrĕch adrung ih, đơ̆ng jơhnơr âu truh tơ jơhnơr nai, athei wei răk nơ̆r Inh pơgơ̆p pơkă. 10Rim 'nu kon drŏ-nglo ih athei kăt tơdra akar; Âu boih nơ̆r pơgơ̆p pơkă lu iĕm athei wei răk; wă khan âu tơdrong Inh pơgơ̆p pơkă hăm lu iĕm păng hăm lu adrĕch drung đơ̆ng rŏng dơ̆ng. 11Lu iĕm athei kăt tơdra akar; tơdrong juăt noh wă tơdra kơ nơ̆r pơgơ̆p pơkă Inh hăm lu iĕm. 12Lăm đĭ jơhnơr, rim 'nu kon drŏ-nglo lăm lu iĕm, mă hơiơch tơ hnam dah iĕm răt kon đe păng jên, ưh kơ trŏ adrĕch adrung iĕm, dah truh tơhngam năr boih, athei kăt tơdra akar. 13Bơngai mă hơiơch lăm hnam ih dah ih răt athei kăt tơdra akar ngăl. Nơ̆r pơgơ̆p pơkăm hăm lu iĕm noh jơ̆ tơdra lăm akar lu iĕm wă kơ 'blŏk tơdrong inh pơkă wă tơgŭm iĕm ling-lang. 14Rim 'nu drŏ-nglo mă ưh kơ chu kăt tơdra sĕch akar sư kơdih, gô tơlĕch lê̆ sư đơ̆ng khŭl adrĕch sư; bơngai noh sư sơngah kơ nơ̆r Inh pơgơ̆p pơkă.”
Kră Yang 'Bok Kei-Dei pơkă wă ăn Isăk kơ Abraham hăm Sara
15Kră Yang 'Bok Kei-Dei khan dơ̆ng kơ Abraham thoi âu: “Gah Sarai akăn ih, lê̆ pă krao Sarai dơ̆ng; mă-lei krao sư Sara.b 16Inh gô ăn pŭn hiôk kơ sư, đơ̆ng sư Inh gô ăn kơ ih minh 'nu kon drŏ-nglo. Inh ăn kơ sư đei pŭn hiôk, sư gô pơm mĕ kơ lơ adrĕch adrung; wă kơ đơ̆ng sư jing đei lơ dêh char păng dôm lu pơtao gô lĕch đơ̆ng sư.”
17Abraham drap bon tơ teh, hiĕk păng khan lăm to thoi âu: “Ô 'bônh ah bơngai kah minh-hrĕng sơnăm boih, na gơh pơjing kon dơ̆ng? Gah Sara, sư tơsĭn-jĭt, gô đei hơ'lơ̆p hă?” 18Abraham khan kơ Kră Yang 'Bok Kei-Dei thoi âu: “Ô hơpơi Ih ăn kơ Ismael oei arih 'bơ̆t anăp Ih!”
19Kră Yang 'Bok Kei-Dei khan dơ̆ng thoi âu: “Sĭt tơpă, Sara, akăn ih, gô pơjing kơ minh 'nu hơ'lơ̆p drŏ-nglo, na ih gô krao anăn sư Isăkc Inh gô pơgơ̆p pơkă hăm sư, wă pơgơ̆p pơkă ling-lang hăm adrĕch adrung sư. 20Inh gô tơl nơ̆r ih krao apinh kơ Ismael. Âu inh ăn pŭn hiôk kơ sư, gô pơm ăn kơ sư pơjing kon sâu rai lơ; sư gô jing 'bok kơ mơjĭt-'bar yŏng pơgơ̆r păng Inh gô ăn kơ sư jing adrĕch adrung tih. 21Mă-lei Inh gô pơgơ̆p pơkă hăm Isăk truh sơnăm anăp dang âu, Sara gô tơpŭ kơ ih Isăk.”
22Đang kơ Kră Yang 'Bok Kei-Dei đei khan boih, na sư weh đơ̆ng Abraham tŏk tơ plĕnh.
23Trŏ lăm năr noh Abraham rôp Ismael kon drŏ-nglo sư păng đĭ-đăng lu kon drŏ-nglo lăm hnam sư, dah kon drŏ-nglo tơpŭ lăm hnam sư, dah sư iŏk jên răt kon đe, na kăt ăn tơdra akar, trŏ thoi nơ̆r Kră Yang 'Bok Kei-Dei đei akhan. 24Abraham đei tơsĭn-jĭt tơsĭn sơnăm boih na kăt tơdra akar; 25gah Ismael kon sư kơplah sư kăt tơdra akar, sư 'nao mơjĭt-pêng sơnăm. 26Kŭm lăm năr noh Abraham păng Ismael chu kăt tơdra akar, 27păng đĭ-đăng lu drŏ-nglo, mă tơpŭ lăm hnam sư noh, dah iŏk jên răt bơngai đơ̆ng tơmoi, kư̆m chu kăt tơdra akar hăm sư ngăl.
Currently Selected:
Bl 17: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
