Bl 19
19
Lot sơng lu linh jang 'lơ̆ng lăm pơlei Sôđôm
1Lăp hiưp kơ'năr kơsơ̆, 'bar 'nu linh jang 'lơ̆ng noh truh tơ pơlei Sôđôm, kơplah noh Lot sư oei ngôi 'bơ̆t 'măng jang pơlei. Lăp Lot 'bôh 'bar 'nu linh jang 'lơ̆ng, sư iung tơkan sơng na drap tơ teh kơkuh. 2Sư khan: “Kơkuh kơ măr iĕm, ơ kơdră, apinh năm ngôi tơ hnam inh đĭch đam măr iĕm păng 'bĭch ngôi hloi măng 'nâu. Âu đak măr iĕm ôp jơ̆ng, na pơgê dơning măr iĕm yak năm.” 'Bar 'nu linh jang 'lơ̆ng khan.
“Ưh măng âu nhi 'bĭch 'bơ̆t 'măng jang pơlei.”
3Mă-lei Lot 'nur khŏm khŏm dĭng 'bar 'nu linh jang 'lơ̆ng chu năm 'bĭch tơ hnam sư. Sư pôk ăn tơmam sa, pơm 'bĕng ưh kơ đei 'buh, na bre linh jang 'lơ̆ng sŏng sa.
4Kơplah linh jang 'lơ̆ng tam mă 'bĭch, na lu bơngai drŏ-nglo lăm pơlei Sôđôm, đơ̆ng 'lơ̆p truh tơ kră, wă khan đĭ pơlei kư̆m năm wang tăp dăr kơ hnam Lot. 5Lu sư krao Lot na apinh: “Bre tơmoi mă kơsơ̆ 'nâu hei mơ̆t tơ hnam ih dang ei bre sư tơ yơ? Tơlĕch bre sư tơ âu, wă kơ lu nhôn ngôi hăm bre sư.”
6Lot lĕch tơ'bơ̆p lu kon pơlei tơ 'măng, đơ̆ng noh sư tang 'măng, 7păng khan kơ lu sư thoi âu: “Âu, inh apinh lu iĕm lê̆ kơ pơm tơdrong kơnê̆ noh! 8Âu inh đei 'bar 'nu kon adruh tam mă đei klo, inh gô ăn bre sư kơ lu iĕm, na mơ̆ng kơ iĕm wă pơm kiơ, kư̆ pơm mơ̆ng kơ iĕm wă; kư̆ mă huay kơ pơm kiơ kơ bre 'bar 'nu lăm hnam inh âu; yua kơ bre sư năm pơdơh tơ hnam inh.”
9Na kon pơlei khan: “Ih weh tơ nai!” Khan dơ̆ng: “Ih tơmoi truh tơ âu năm oei đĕch, mă-lei ih 'maih wă sek tơlang kơ nhôn hă? Thoi noh! Gô nhôn pơm kơnê̆ kơ ih păng bre tơmoi noh.” Na, lu sư tŭn drŭt Lot kơtang dêh păng tŭn drŭt wă kơ 'măng noh pơchah.
10Mă-lei 'bar 'nu linh jang chro ti, dui Lot tơmơ̆t lăm hnam păng tang lê̆ 'măng, 11Na phak lu kon pơlei iŏk đơ̆ng 'lơ̆p truh tơ kră, 'bơ̆t 'măng ei, lu sư măt bơbôl đĭ, dĭng lu sư chơchă 'măng ưh pă băt.
Pơrăm pơlei Sôđôm păng Gômôrơ
12'Bar 'nu linh jang 'lơ̆ng apinh Lot thoi âu: “Ih hăm pă đei bu dơ̆ng tơ âu? Ŏng, kon drŏ-nglo, kon drŏ-kăn păng pơlei âu đei bu dơ̆ng gah ih, athei chông ba lĕch đĭ bĕ đơ̆ng âu! 13Nhi wă pơrăm lê̆ anih âu, yua kơ đei nơ̆r roi tơdrong kơnê̆ kơtơ̆ng truh tơ Kră Yang, thoi noh na Sư wơh nhi jur tơ âu wă pơrăm.”
14Na Lot lĕch roi hloi kơ ŏng wă jê̆ oei kơ bre kon sư thoi âu: “Iung bĕ, lĕch đơ̆ng anih âu, yua kơ Kră Yang wă pơrăm boih pơlei âu.” Mă-lei bre kon ŏnga sư ngeh kơ Lot pơma hơnul.
15Truh kiơ̆ pơgê linh jang 'lơ̆ng gơnhĕk kơ Lot păng khan: “Iung wă, chông bre kon ih păng akăn ih lĕch bĕ, kơnh hli kơ 'bơm iĕm hai gah tơdrong wă phak pơlei âu.” 16Mă-lei Lot pơngĭ. Yua kơ Kră Yang mơnat kơ Lot, na 'bar 'nu linh jang 'lơ̆ng rôp ti sư păng lu kon drŏ-kăn sư dui tơlĕch đơ̆ng pơlei ei. 17Na kơplah bre linh jang 'lơ̆ng chông ba bre sư lĕch hlôi boih, minh 'nu lăm bre sư khan: “Kơdâu ôn bĕ, wă pơklaih tơdrong arih, 'nĕ pă hue tơ rŏng păng kư̆m 'nĕ chă pơdơh tơ anih lăm thŭng, athei kơdâu tŏk tơ kông, kơnh hli kơ ih lôch.”
18Lot khan: “Ơ kơdră ưh kơ gơh! 19Âu, inh boih mă đĭch đam Ih 'mêm mơnat, Ih đei tơ'bôh boih tơdrong 'mêm mơnat kơ inh tih tơpă! Păng pơklaih tơdrong arih inh. Mă-lei inh wă kơdâu tŏk tơ kông ưh kơ kĕ adrol kơ tơdrong truh kơ pơlei âu, na inh wă lôch boih. 20To pơlei iĕ noh mă jĭ tăm, lăp kơ inh gơh ôn kơ'nơp tơ noh, ô hơpơi kơ ih rŏ ăn kơ inh ôn tơ pơlei noh wă pơklaih tơdrong arih inh. Pơlei âu hăm trŏ kơ iĕ ưh?”
21Linh jang 'lơ̆ng khan: “Âu, inh mơnat kơ ih dơ̆ng, gô huay pơrăm pơlei mă ih khan noh. 22Jăk mă tĕnh tĕnh kơdâu ôn tơ noh, yua kơ dah ih ưh tam truh kơdâu ôn tơ noh, inh ưh kơ gơh pơm kiơ.” Yua kơ noh, na đe krao pơlei noh Soar.b
23Kơplah 'năr lĕch hlôi kơ teh boih, na Lot truh mơ̆t tơ pơlei Soar. 24Na, Kră Yang ăn 'mi prĕl ŭnh păng ŭnh đơ̆ng plĕnh ti jruh tơ Sôđôm păng Gômôrơ, 25pơrăm 'bar tŏ pơlei 'nâu, anih lăm thŭng, đĭ-đăng kon pơlei păng lu 'long pơle păng 'nhĕt 'nhot chăt kơpal teh. 26Mă-lei akăn Lot hue lăng tơ rŏng, na akâu sư jing bơtŏl 'boh.
27Abraham iung đơ̆ng hrôih, năm truh tơ anih mă đêl sư krao apinh Kră Yang. 28Sư tơmang lăng tơ gah Sôđôm păng Gômôrơ păng đĭ-đăng tơ lăm thŭng, lăng 'bôh 'nhui đơ̆ng teh, 'nhui nhen lĕch đơ̆ng tơnuh ŭnh tih.
29Na, kơplah Kră Yang 'Bok Kei-Dei pơrăm lu pơlei lăm thŭng, wă khan pơlei mă Lot oei, na Sư oei 'blŏk hloi kơ Abraham păng sư pơklaih hloi Lot đơ̆ng anih mă pơrăm tih noh.
Tơm đei kon pơlei Môap păng kon pơlei Amôn
30Lot hli dêh oei tơ pơlei Soar, na sư hăm bre kon drŏ-kăn lê̆ pơlei noh tŏk oei tơ kông, oei lăm hơgơp tơmo. 31Kon adruh 'lŏ sư pơma hăm oh sư thoi âu: “'Bă ba đĭ kră pă kĕ boih, na ưh pă đei bu kơpal teh âu wă oei kơ ba kiơ̆ thoi tơdrong juăt lăm teh đak wă kơ đei ioi adrĕch. 32Ba athei hling tơdrô pôk gai 'bă păng 'bĭch hăm sư wă kơ đei adrĕch adrung đơ̆ng 'bă.”
33Măng noh bre sư hling tơdrô gai 'bă sư; mă-lei 'bă sư ưh kơ băt hloi layơ kon sư 'bĭch hơdai păng kơplah layơ sư iung weh.
34Na năr dơning dơ̆ng, mŏ sư khan kơ oh sư: “'Nâu măng hei inh 'bĭch hăm 'bă boih; na ba kư̆m athei hling tơdrô gai 'bă dơ̆ng, na lê̆ e năm 'bĭch hăm 'bă, wă kơ đei adrĕch ioi đơ̆ng 'bă.” 35Măng noh bre sư tuh tơdrô gai 'bă bre sư dơ̆ng, đơ̆ng noh oh sư iung năm 'bĭch hăm 'bă sư. Mă-lei 'bă sư ưh kơ băt hloi kơ kon sư năm 'bĭch layơ, iung weh dang yơ.
36Bre kon adruh Lot bre sư đei anăp đơ̆ng 'bă bre sư. 37Mŏ sư tơpŭ kon drŏ-nglo, krao anăn Môap; noh boih jing 'bok kơ kon pơlei adrĕch Môap mă dĭng truh dang ei. 38Oh sư kư̆m đei kon drŏ-nglo, anăn sư Bên Ami; noh jing 'bok kơ kon pơlei Ammôn dĭng truh dang ei.
Currently Selected:
Bl 19: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
