Bl 21
21
Sara tơpŭ kơ Isăk
1Kră Yang năm tơgŭm yă Sara, kiơ̆ thoi nơ̆r sư đei pơma pơkă, pơm 'blep thoi Sư đei khan kơ Sara. 2Sara anăp, tơpŭ ăn minh 'nu kon drŏ-nglo kơ Abraham lăm năr sư đĭ kră boih, trŏ 'blep kơ năr đêl Kră Yang 'Bok Kei-Dei pơkă. 3Abraham anăn kon sư mă Sara tơpŭ ăn kơ sư noh Isăk. 4Trŏ tơhngam năr, Abraham kăt tơdra akar kơ Isăk kiơ̆ thoi tơdrong juăt mă Kră Yang 'Bok Kei-Dei đei pơkă. 5Âu, kơplah Sara tơpŭ kơ Isăk, Abraham đei minh-hrĕng sơnăm boih.
6Sara khan thoi âu: “Kră Yang 'Bok Kei-Dei đei pơm kơ inh minh tơdrong hiôk, đĭ-đăng bu bu kơtơ̆ng kư̆m hiôk chhôk hơdai hăm inh.” 7Na khan dơ̆ng thoi âu: “Hăm đei bu pơ̆n khan kơ Abraham khan Sara wă tơmŏm kon sư hah? Mă-lei inh tơpŭ boih kơ kon drŏ-nglo kơplah inh đĭ kră pă kĕ.”
Sara pơpuh Hagar păng Ismael. Kră Yang 'Bok Kei-Dei tơgŭm
8Kon hơ'lơ̆p wơ̆ 'lŏ, na pă mŏm boih; trŏ lăm năr Isăk lê̆ mŏm noh, Abraham đei hơmet sŏng sa tih wă kơ chơt hiôk. 9Sara 'bôh kon drŏ-nglo mă Hagar, bơngai Êyiptơ, đei tơpŭ ăn kơ Abraham kon drŏ-nglo noh hiĕk che bơle kơ Isăk. 10Sara khan kơ Abraham thoi âu: “Pơpuh tơweh lê̆ đam noh hăm kon sư bĕ, yua kơ kon drŏ-nglo đam noh ưh kơ gơh iŏk mŭk tơmam đơ̆ng kon drŏ-nglo inh Isăk.” 11Nơ̆r âu pơm kơ Abraham sơ'ngon dêh, yua kơ Ismael kon drŏ-nglo sư. 12Mă-lei Kră Yang 'Bok Kei-Dei khan kơ Abraham thoi âu: “Ih 'nĕ sơ'ngon kơ kon drŏ-nglo ih hăm đĭch ih noh. Sara sư pơma thoi ih athei mơ̆ng sư pơma yua kơ Isăk âu gô pơjing adrĕch adrung ih. 13Inh kư̆m pơm ăn kơ kon drŏ-nglo ih mă đơ̆ng đĭch ih noh jing minh pôm adrĕch, yua kơ sư kư̆m kon ih pơjing.”
14Abraham iung đơ̆ng hrôih, iŏk 'bĕng păng minh pôm get đak ăn kơ Hagar; tơ'băk lu tơmam noh 'bơ̆t hơngiĕng sư păng jao ăn kơ sư kon drŏ-nglo sư noh, na puh tơweh. Hơgar sư weh, yak trong ataih wih rok thŭng Bêrsêba. 15Kơplah đak lăm get đĭ, sư ming lê̆ kon sư 'bơ̆t minh tơnơm 'long iĕ ei, 16Năm hơ-oei ataih 'biơ̆ dang tôch 'brơ̆m hră jruh; na sư khan lăm to khan: “Ôi rŏ inh huay kơ 'bôh kon inh lôch!” Sư hơ-oei nhơ̆m ơh.
17Kră Yang 'Bok Kei-Dei kơtơ̆ng kon hơ'lơ̆p noh nhơ̆m, na linh jang 'lơ̆ng đơ̆ng plĕnh krao Hagar thoi âu: “Ơ Hagar! Ih đei tơdrong kiơ? 'Nĕ kơ hli, yua kơ Kră Yang 'Bok Kei-Dei kơtơ̆ng boih nơ̆r hơ'lơ̆p ih nhơ̆m tơ anih sư noh. 18Iung bĕ păng tơiung kon ih đơ̆ng noh, rôp ti chông sư, yua kơ inh gô ăn kơ sư jing minh adrĕch tih kơdrâ̆m.”
19Đơ̆ng noh Kră Yang 'Bok Kei-Dei tơ'bôh hloi kơ sư tơ noh đei đak sơlŭng. Sư năm sŏ 'bĕnh kơ get akar na ăn kơ kon sư nhă.
20Kră Yang 'Bok Kei-Dei kư̆m tơgŭm ăn kơ kon sư wơ̆; sư oei tơ lăm thŭng glă, gơh prah hră đam. 21Kơplah sư oei tơ thŭng Pharan, mĕ sư rôp ăn kơ sư akăn đơ̆ng char Êyiptơ.
Abraham pơgơ̆p hăm Abimêlek tơ Bêrsêba
22Lăm char noh, pơtao Abimêlek hăm Pikôl, kră pơgơ̆r linh sư, khan kơ Abraham thoi âu: “Kră Yang 'Bok Kei-Dei kư̆m tơgŭm ih lăm dôm tơdrong ih jang. 23Thoi noh, dang ei, pơkă bĕ 'bơ̆t anăp Kră Yang 'Bok Kei-Dei ih ưh pă hơlĕnh kơ inh, kơ kon inh hăm kơ adrĕch inh dơ̆ng. Mă-lei ih athei arih sa mă 'lơ̆ng hăm inh păng char mă ih oei dang ei kư̆m thoi inh oei arih sa hăm ih sơ̆.” 24Abraham tơl thoi âu: “Inh pơkă.”
25Abraham ưh kơ hiôk hăm pơtao Abimêlek gah đak sơlŭng mă lu đĭch đam pơtao tơgar iŏk. 26Pơtao Abimêlek pơma thoi âu: “Inh kư̆m ưh kơ băt bu mă pơm kơ ih ưh kơ hiôk thoi noh; ih kư̆m ưh kơ roi kơ inh adrol; na inh kư̆m 'nao băt năr âu đĕch.”
27Đơ̆ng noh Abraham rôp triu hăm rơmo pơyơ̆r ăn kơ pơtao Abimêlek, đơ̆ng noh măr sư pơgơ̆p pơkăm băl. 28Abraham rơih iŏk tơpơh tŏ kon triu dăm. 29Pơtao Abimêlek apinh Abraham: “Pơm kiơ mă rơih lê̆ tơpơh tŏ kon triu dăm noh?” 30Sư tơl: “Apinh pơtao iŏk bĕ tơpơh tŏ kon triu dăm âu, đơ̆ng tơpang ti inh kơdih ăn, wă kơ ih pơsĭt kơ inh đei sir boih đak sơlŭng âu.” 31Yua đơ̆ng noh, na đe krao anăn anih âu Bêrsêbaa yua kơ tơ anih noh đei bre sư pơkă pơkăm băl. 32Thoi noh bre sư đei pơkă pơgơ̆p băl tơ Bêrsêba. Đơ̆ng noh pơtao Abimêlek păng yŏng pơgơ̆r linh Pikôl iung, brŏk tơ tơring Philistin. 33Abraham đei pơtăm minh tơnơm 'long plei me tơ Bêrsêba păng tơ anih noh sư krao khan kơ Kră Yang, Kră Yang 'Bok Kei-Dei mă arih ling-lang. 34Abraham oei đunh lăm char Philistin.
Currently Selected:
Bl 21: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
