Bl 32

Tơdrong Jakôp hơmet wă tơ'bơ̆p Êsâu

1Jakôp oei năm rok trong, đei linh jang 'lơ̆ng Kră Yang 'Bok Kei-Dei tơ'bơ̆p sư. 2Kơplah Jakôp 'bôh lu đe ei, sư khan: Noh kơđông linh Kră Yang 'Bok Kei-Dei! Sư krao anăn anih noh Mahanaim.a 3Jakôp wơh đam sư năm tơ 'nhŏng sư Êsâu adrol tơ lăm dêh char Sir tơring Eđôm: 4Sư pơkă khan: Lu iĕm athei tơbăt kơ Êsâu, yŏng tơ'ngla inh thoi âu: Jakôp, đĭch đam ih, sư đei khan thoi âu: Inh oei tơ hnam La'ban dĭng truh năr âu: 5Đei rơmo, aseh, triu, đĭch drŏ-nglo, đam drŏ-kăn, thoi noh apinh lu đe âu năm roi kơ yŏng tơ'ngla inh băt adrol, wă kơ đei pŭn hiôk đơ̆ng yŏng tơ'ngla inh.

6Lu đam sư brŏk đơ̆ng Êsâu păng roi kơ Jakôp thoi âu: Lu nhôn năm truh tơ Êsâu 'nhŏng ih; na âu; sư oei chông ba puăn-hrĕng 'nu bơngai wă năm sơng ih. 7Jakôp hli dêh păng tơtăm dêh, na sư klah asong hloi lu bơngai năm kiơ̆ hơdai lu khŭl triu, rơmo, lu lăk-đa pơm 'bar khŭl na khan: 8Tơdah Êsâu blah minh khŭl ayơ, minh khŭl nai gơh klaih.

9Đơ̆ng noh Jakôp krao khan thoi âu: “Ơ Kră Yang 'Bok Kei-Dei kơ 'bok inh 'bok Abraham. 'Bă inh Isăk, wă khan Kră Yang! Ih đei bơtho pơkă kơ inh thoi âu: ‘Wih brŏk bĕ tơ tơring ih tơ 'nhŏng oh, kơtum kơtŏng ih, na Inh gô ăn pŭn hiôk kơ ih.’ 10Inh âu ưh kơ rơ-a na ưh kơ hơnhŏ gơh đei pŭn hiôk păng dôm tơdrong 'lơ̆ng tơpăt Ih mă đei pơm boih kơ đĭch đam Ih adrol sơ̆. Wă tŏk găn đak Krong Jôrđăn inh đei lăp minh pôm 'long jra đĕch, kơna dang ei inh đei 'bar khŭl bơngai âu. 11Thoi noh apinh Kră Yang 'Bok Kei-Dei pơklaih inh đơ̆ng ti Êsâu, 'nhŏng inh, kơnh hli kơ sư blah inh păng đe kon drŏ-kăn inh hai dơ̆ng. 12Na Ih đei khan thoi âu: Sĭt tơpă inh gô ăn pŭn hiôk kơ ih păng ăn kơ adrĕch adrung ih chek lar thoi chuơh đak dơsĭ, ưh kơ đei bu kĕ jô̆ yua kơ lơ tơpă.’ ” 13Kơmăng noh sư oei tơ noh, sư iŏk lu tơmam kon sem dơrong hơmet pơm tơmam ăn kơ 'nhŏng sư, Êsâu. 14Noh 'bar-hrĕng bơbe yŏng păng 'bar-jĭt bơbe tơno, 'bar-hrĕng triu yŏng păng mơjĭt triu tơno. 15Pêng-jĭt lăk-đa yŏng đei kon oei mŏm puăn-jĭt tŏ rơmo yŏng păng mơjĭt tŏ rơmo tơno; 'bar-jĭt tŏ aseh akăn păng mơjĭt tŏ aseh tơno. 16Đơ̆ng noh jao ăn kơ rim 'nu lu đĭch đam sư, rim 'nu wei rong minh khŭl păng pơkă kơ lu sư khan: Lu iĕm kư̆ rai yak adrol, ataih băl khŭl triu 'nâu păng khŭl triu to. 17Jakôp kư̆m pơkă khan kơ khŭl bơngai mă yak adrol: Mưh Êsâu tơ'bơ̆p ih păng apinh: Yŏng ih bu? Ih năm tơ yơ? Lu sem dơrong 'nâu, sem dơrong bu? 18Ih tơl thoi âu: Tơmam Jakôp đĭch đam ih; noh jing tơmam pơyơ̆r ăn kơ ih. Jakôp kiơ̆ đơ̆ng rŏng. 19Jakôp kư̆m pơkă khan kơ lu đĭch đam nai tơl Êsâu kư̆m lei-lăi, na thim nơ̆r: 'Nâu Jakôp đĭch đam ih oei yak đơ̆ng rŏng! 20Jakôp tơchĕng: Inh pơyơ̆r tơmam âu kơ Êsâu adrol, wă kơ sư dă 'biơ̆ kơ hil, na đơ̆ng noh inh tơ'bơ̆p đơ̆ng rŏng; rŏ lăng sư sơng iŏk inh hiôk 'biơ̆ kơnh. 21Thoi noh, lu tơmam âu ba adrol, gah sư, măng noh sư oei lăm bơsŭn. 22Lăm măng noh sư iung, chông ba bre akăn sư, bre đam sư păng mơjĭt-mônh 'nu kon sư tŏk rok đak glung Jabôk. 23Sư chông tŏk găn kơ thong păng chĕp đĭ-đăng mŭk tơmam sư dai.

Jakôp tơglơ̆m băl hăm linh jang 'lơ̆ng tơ kông Phêniel tơplih hloi anăn sư krao Isơrael

24Jakôp oei minh drô̆ sư; na đei minh 'nu bơngai tơglơ̆m hăm sư truh pơgê. 25Kơplah bơngai noh mơn pă kĕ jei sư boih, na teh 'bơ̆t kơting rơhiĕo Jakôp; kơting rơhiĕo ei tơpling hloi 'bơ̆t măr sư oei tơglơ̆m. 26Bơngai noh khan: 'Brưch đĭ wă 'năr boih, achăng inh bĕ; mă-lei Jakôp tơl: Inh ưh kơ ăn ih năm ôh. Tơdah ih ưh kơ đei sơkat ăn kơ inh đei pŭn hiôk. 27Bơngai ei jet anăn ih bu tơl: “Anăn inh Jakôp.” 28Bơngai ei khan: “Anăn ih ưh pă Jakôp dơ̆ng boih. Mă-lei krao anăn ih Isơrael, b yua kơ ih tơglơ̆m hăm Kră Yang 'Bok Kei-Dei păng bơngai nai; tă kơ jei ih ngăl.”

29Jakôp apinh: “Ăn kơ inh băt anăn ih.”

Sư tơl: “Yua kơ kiơ ih apinh anăn inh?” Đơ̆ng bơngai noh sơkat ăn kơ Jakôp đei pŭn hiôk 'bơ̆t noh.

30Jakôp krao anăn anih noh Phênielc Yua kơ sư khan thoi âu: Inh 'bôh boih Kră Yang 'Bok Kei-Dei 'bơ̆t tơm măt inh păng inh gơh oei arih.

31Kơplah sư yak hlôi kơ anih Phêniel, 'bôh 'năr lĕch boih; na Jakôp jơ̆ng sư jo, sư yak khuĕ khuĕ yua kơ sư tơglĕch kơting rơhiĕo. 32Yua kơ thoi noh na truh tơ dang ei, kon pơlei Isơrael ưh kơ đei bu sa huan rơhiĕo, yua kơ bơngai noh đei teh 'bơ̆t rơhiĕo Jakôp, tơ anih huan rơhiĕo.

Currently Selected:

Bl 32: bdq

Highlight

Compare

Copy