Bl 40
40
Jôsep tơlang tơdrong apo kơ bre bơ̆jang kơ 'bok pơtao
1Đang kơ dôm tơdrong noh boih, đei tơdrong truh kơ bre bơ̆jang kơ pơtao, minh 'nu lăng hơmet đak nhă, minh 'nu lăng gah tơmam sa păng pơm 'bĕng sa kơ pơtao Êyiptơ, đei pơm yoch hăm yŏng tơ'ngla sư. 2Pơtao Pharaôn blĕk dêh kơ bre sư, pơm 'bĕng păng lăng hơmet đak nhă. 3Na kư̆m wang tah bre sư hơdai lăm hnam phak mă đei tah Jôsep lăm noh. 4Yŏng wei-lăng hnam phak jao kơ Jôsep awih awăn kơ bre noh, bre sư oei tơ lăm hnam phak kư̆m đunh 'biơ̆.
5Lăm minh măng ei bơngai pôk đak nhă păng bơngai hơmet tơmam sa kơ pơtao Êyiptơ mă đe oei phak, kư̆m đei apo 'bôh, đĭ-đăng tơdrong apo bre sư noh wă tơbăt đei tơdrong kiơ truh kơdih kơdih.
6Dơning loh; Jôsep năm tơ bre sư, 'bôh muh măt bre sư hơ'nhŭk sơ'ngon. 7Na sư apinh: Năr âu liơ măr iĕm sơ'ngon thoi noh?
8Bre sư tơl: Nhi đei tep apo, mă ưh kơ băt wă khan kiơ. Roi bĕ tơdrong măr iĕm apo noh kơ inh mơ̆ng.
9Bơngai hơmet đak nhă noh roi ăn kơ Jôsep tơdrong sư apo noh thoi âu: Inh đei tep apo, inh 'bôh minh tơnơm 'long hơmu 'bơ̆t anăp inh; 10Tơm hơmu noh đei pêng tŏ dơng. 'Bôh dơng noh đei bluh tơmơ̆ng, pơkao, hơie đei plei đum hĭ. 11Tơ ti inh đei chĕp kơchŏk pơtao Pharaôn, đơ̆ng noh inh phĕ chơpĕt plei hơmu noh inh pôk tơpơng ăn tơ ti Pharaôn.
12Jôsep khan: Tơdrong apo noh wă khan thoi âu: Pêng tŏ dơng noh wă khan pêng năr. 13Pă pêng năr dơ̆ng Pharaôn gô tơlĕch ih đơ̆ng hnam phak, hơlơ̆k ăn kơ ih jang thoi đêl, ih gô pôk kơchŏk Pharaôn tơpơng tơ ti sư thoi so, thoi ih đei jang pơm bơngai lăng hơmet đak nhă sơ̆. 14Kơna mưh ih đei jang dơ̆ng, ih 'blŏk kơ inh, roi ăn kơ Pharaôn gah tơdrong arih inh păng kư̆m ăn kơ inh lĕch đơ̆ng anih 'nâu. 15Yua kơ đe rôp ba inh đơ̆ng bơngai Hêbrơ păng tơ âu inh ưh kơ đei pơm yoch kiơ, mă-lei đe kư̆m tah inh lăm hnam pơmat 'nâu.
16Bơngai pơm 'bĕng 'bôh tơdrong Jôsep tơblang tơdrong apo trŏ na khan! Gah tơdrong inh đei tep apo noh thoi âu: Inh yơ̆l pêng tŏ bai 'bĕng kơpal kơ̆l inh. 17Bai mă kơpal hloh, đei tôm 'bĕng pơm ăn kơ Pharaôn; sem jruh tơ bai kơpal kơ̆l inh na sa đĭ hloi tơmam sa noh.
18Jôsep khan: Tơdrong apo noh wă khan thoi âu: Pêng tŏ bai noh wă khan pêng năr. 19Oei pă pêng năr dơ̆ng, Pharaôn sek tơlang kơ ih, athei đe atol ih tơ 'long na sem jur sa sĕch ih.
20Truh tơ năr mă pêng, trŏ năr tơpŭ kơ Pharaôn, sư hơmet et sa chơt hiôk krao đĭ lu 'bok tih păng tơlĕch hloi 'bok lăng hơmet đak nhă hăm 'bok pơm 'bĕng đơ̆ng hnam phak. 21Pharaôn pôk ăn kơ bơngai mă lăng hơmet đak nhă jang thoi đêl ki sơ̆, wă kơ bơngai 'nâu pôk glơng đak nhă tơ sư thoi so; 22mă-lei kư̆m athei đe chô̆ atol 'bok pơm 'bĕng, trŏ thoi nơ̆r Jôsep đei tơblang.
23Đơ̆ng noh bơngai mă lăng pôk đak nhă kư̆m đĭ hiơt kơ Jôsep boih, pă 'blŏk kơ Jôsep dơ̆ng.
Currently Selected:
Bl 40: bdq
Highlight
Copy
Compare
Share
Want to have your highlights saved across all your devices? Sign up or sign in
©Bahnar Bible Association. All rights reserved.
