Bl 42

Lu kon drŏ-nglo Jakôp jur răt 'ba đơ̆ng dêh Êyiptơ. Jôsep kơnăl kơ lu đe 'nhŏng sư

1Jakôp kơtơ̆ng tơ dêh char Êyiptơ đei 'ba, na sư khan kơ lu kon drŏ-nglo sư thoi âu: Liơ iĕm hrăn tơlăng băl? 2Păng khan dơ̆ng thoi âu: Inh kơtơ̆ng tơ dêh char Êyiptơ đei tĕch 'ba; lu iĕm athei jur tơ noh năm răt kơ lu bơ̆n 'ba wă kơ bơ̆n arih huay kơ lôch.

3Mơjĭt 'nu 'nhŏng Jôsep jur tơ Êyiptơ wă chă răt sa 'ba. 4Mă-lei Jakôp ưh kơ ăn Bênjamin oh Jôsep năm hơdai lu 'nhŏng sư; yua kơ sư tơchĕng: Inh athei bơwei, kơnh hli kơ đei tơdrong truh kơ sư. 5Tơ dêh Kanaan kư̆m pơngot, na lu kon Isơrael kư̆m jur tơ Êyiptơ chă 'ba kư̆m thoi lu đe nai.

6Na kơplah 'nâu, trŏ kơ Jôsep pơgơ̆r lăm dêh char Êyiptơ noh păng kư̆m tĕch ăn 'ba kơ đĭ-đăng kon pơlei. Lu đe 'nhŏng Jôsep truh, drap bon kơkuh 'bơ̆t anăp sư; 7Jôsep 'bôh kơnăl kơ lu 'nhŏng sư; mă-lei sư pơm ưh kơ băt ôh kơ lu 'nhŏng sư, pơm pơma 'mơng kơ lu 'nhŏng: Lu iĕm đơ̆ng yơ? Lu sư tơl: Đơ̆ng dêh Kanaan truh tơ âu wă chă sa 'ba.

8Thoi noh, Jôsep băt kơnăl kơ lu sư; mă-lei lu 'nhŏng sư ưh kơnăl kơ sư ôh. 9Jôsep 'blŏk kơ đêl sư apo 'bôh gah lu 'nhŏng oh sư, sư ôr khan iĕm dăr lăng teh đak âu, lăng lu anih mă char lu nhôn tơrăn.

10Lu sư tơl thoi âu: Ơ yŏng kơdră ưh kơ sĭ thoi ei ôh; lu đĭch đam ih âu wă răt sa 'ba đĕch. 11Đĭ-đăng lu nhôn 'nhŏng oh minh pôm 'bă, hnam dơnŏ tơpăt 'lơ̆ng đĕch, ưh kơ trŏ khan chă dăr teh đak iĕm ôh. 12Jôsep tơl lu sư dơ̆ng: Ưh kơ trŏ ôh, lu iĕm âu chă dăr lăng char nhôn âu, anih ayơ ayơ tơrăn. 13Lu sư tơl dơ̆ng: Lu đĭch đam ih âu đei mơjĭt-'bar 'nu 'nhŏng oh minh pôm 'bă, oei tơ char Kanaan; na đei minh 'nu oh hiong, oei pă oh hơdruch oei tơ hnam hăm 'bă nhôn.

14Jôsep khan noh trŏ tơpă lu iĕm âu chă dăr teh đak. 15'Nâu inh wă pơlong lăng lu iĕm: Inh pơkăm hăm anăn Pharaôn na pơkă, tơdah oh hơdruch iĕm ưh kơ năm tơ âu lei lu iĕm ưh kơ gơh klaih hlôi đơ̆ng anih âu. 16Athei wơh minh 'nu lăm lu iĕm brŏk na chông ba oh hơdruch iĕm jur tơ âu; gah đĭ-đăng lu iĕm oei chĭt lê̆ tơ âu. Nơ̆r lu iĕm pơma inh wă pơlong lăng 'mơ̆i wă kơ băt iĕm pơma noh tơpă dah ưh. Tơdah ưh kơ tơpă, lei inh pơkăm hăm anăn Pharaôn pơkă kơ lu iĕm âu chă dăr lăng char nhôn. 17Na, Jôsep athei chĭt lê̆ lu sư hơdai lăm pêng năr.

Jôsep athei năm iŏk Bênjamin jur

18Truh năr mă pêng; Jôsep khan kơ lu sư thoi âu: Inh hli kơ Kră Yang 'Bok Kei-Dei; athei pơm thoi âu, na gơh arih. 19Tơdah lu iĕm jing minh pôm hnam dơnŏ 'lơ̆ng đĕch, athei lê̆ minh 'nu phak tơ âu, oei hơdôm 'nu noh brŏk chĕp ba phe 'ba na 'me rong hnam dơnŏ iĕm oei pơngot. 20Na khan dơ̆ng, iĕm athei chông ba oh hơdruch jur tơ âu, lei nơ̆r iĕm pơma noh trŏ păng lu iĕm huay kơ lôch, thoi noh lu sư pơm kiơ̆.

21Lu sư khan tơduă lu sư thoi âu: Sĭt tơpă bơ̆n đei pơm yoch hăm oh bơ̆n boih; yua kơ adrol sơ̆ bơ̆n 'bôh jơhngơ̆m sư sơ'ngon, sư apinh bơ̆n mơnat, mă-lei lu bơ̆n ưh kơ mơ̆ng, thoi noh na 'nâu đei tơdrong truh kơ lu bơ̆n thoi âu.

22Rubên tơl; Hăm trŏ kơ inh khan kơ lu đe oh khan: 'Nĕ kơ pơm yoch kơ bơngai 'lơ̆p noh? Mă-lei lu iĕm ưh kơ mơ̆ng, 'nâu dang tơiung pham sư tuh kơ lu bơ̆n. 23Yua kơ Jôsep đei yua minh 'nu bơngai pơma tơblang hăm lu 'nhŏng sư, na đe 'nhŏng sư ngeh kơ Jôsep ưh kơ kơtơ̆ng ưh kơ băt,

24Jôsep tơwih muh măt sư weh tơ nai na nhơ̆m, đơ̆ng noh wih pơma dơnuh păng đe 'nhŏng sư dơ̆ng; na sư rôp lê̆ Simêôn minh 'nu lăm lu 'nhŏng sư athei chô̆ 'bơ̆t tơm muh măt lu 'nhŏng sư.

25Jôsep athei lu đe jang kơ sư tŏng ăn 'ba 'bĕnh kơ 'bi păng tah pơdrâu jên tơ rim 'bi lu 'nhŏng sư, kư̆m đei ăn thim tơmam sa rok trong. Đam sư pơm thoi nơ̆r sư đei pơkă. 26Đơ̆ng noh lu sư hơtŏk 'ba lu sư tơ kơdŭ aseh na wih brŏk.

27Truh tơ anih pai sa, minh 'nu lăm lu sư pơih lăng lăm 'bi wă ăn kơ aseh lu sư sa 'ba, oei 'bôh jên lu sư oei 'bơ̆t 'bi sư. 28Na hloi khan kơ lu 'nhŏng oh sư! Jên inh oei ba pơdrâu, âu oei tơ lăm 'ba âu! Lu 'nhŏng oh sư hli pơma rah, tơtơ̆ rah na khan: Kră Yang 'Bok Kei-Dei đei pơm kiơ kơ lu bơ̆n lâu kih.

Jakôp ưh kơ ăn Bênjamin năm

29Lu sư wih brŏk tơ Jakôp 'bă lu sư tơ dêh Kanaan, roi ăn kơ 'bă sư mơ̆ng dôm tơdrong truh, thoi âu: 30Bơngai mă oei pơm yŏng lăm char Êyiptơ pơma kơ lu nhôn khan lu nhôn năm chă dăr lăng char sư. 31Mă-lei lu nhôn đei tơl sư thoi âu: Lu nhôn bơngai 'lơ̆ng đĕch, ưh kơ sĭ chă lăng dêh char iĕm ôh. 32Lu nhôn âu mơjĭt-'bar 'nu 'nhŏng oh, minh pôm 'bă minh 'nu hiong ưh pă băt tơ yơ oei pă oh hơdruch sư oei hăm 'bă nhôn tơ char Kanaan.

33Bơngai mă pơm yŏng char noh khan: Pơm thoi âu, na inh băt kơ lu iĕm bơngai tơpăt; lê̆ bĕ tơ âu minh 'nu, đĭ lu iĕm wih brŏk ba 'ba 'me rong hnam dơnŏ lu iĕm. 34Iĕm athei iŏk chông ba oh hơdruch iĕm tơ inh. Thoi noh, na inh băt nhen iĕm ưh kơ trŏ bơngai chă dăr char nhôn, na trŏ kơ bơngai tơpăt 'lơ̆ng đĕch; inh gô pơdrâu 'nhŏng iĕm noh, na iĕm gơh mơdro sa lăm char âu rơngei.

35Na, Kơplah lu 'nhŏng sư tuh 'ba đơ̆ng 'bi sư kơdih kơdih, na 'bơ̆t 'bơ̆r 'bi, rim 'nu jên oei oei ngăl tơ rim 'bi lu sư; 'bă sư hăm lu 'nhŏng oh sư 'bôh jên oei đei, na hli dêh.

36Jakôp, 'bă lu sư khan thoi âu: Lu iĕm tă kơ pơm tơhiong lê̆ kon inh; Jôsep hiong hloi boih Simêôn kư̆m hiong mơ̆n; na dang ei wă chông anhăk Bênjamin năm dơ̆ng hă? Dôm tơdrong ơh sơ'ngon âu tă tuh kơ inh ngăl.

37Rubên drơ̆ng 'bă sư thoi âu: 'Bă, ih athei pơjao oh nhôn kơ inh, inh gô chông tơwih sư brŏk tơ ih, tơdah oh nhôn ưh kơ brŏk tơ âu, lei ih pơlôch 'bar 'nu kon drŏ-nglo inh to kư̆m bưh.

38Mă-lei Jakôp tơl sư: Kon hơdruch inh ưh kơ ăn sư kiơ̆ iĕm ôh. Yua kơ 'nhŏng sư đĭ lôch hiong boih, oei lăp pă minh 'nu sư, tơdah đei tơdrong ưh kơ pŭn truh kơ sư rok trong dơ̆ng lei lu iĕm âu wă pơm ăn kơ 'bok sŏk ko âu ơh sơ'ngon blĕk wă jur tơ dêh atâu.

Currently Selected:

Bl 42: bdq

Highlight

Copy

Compare