Bl 48

Jakôp sơkat ăn pŭn hiôk kơ bre kon Jôsep

1Đơ̆ng rŏng kơ tơdrong noh đei bơngai năm khan kơ Jôsep thoi âu: Dang ei 'bă ih jĭ; Jôsep chông ba 'bar 'nu kon drŏ-nglo sư, bre Manase păng Êphraim. 2Lu sư tơbăt ăn kơ Jakôp thoi âu: Âu Jôsep kon ih, năm ngôi apong tơ ih, Isơrael adrin iung kơpal giơng.

3Jakôp khan kơ Jôsep thoi âu: Kră Yang 'Bok Kei-Dei mơsêh mơyang đei tơ'bôh kơ inh păng ăn kơ inh tơdrong pŭn hiôk tơ Lus, lăm dêh Kanaan. 4Thoi âu: 'Nâu inh gô ăn kơ ih pơjing hơ'lơ̆p hrôh lơ, jing minh adrĕch adrung tih. Inh gô ăn kơ kon sâu ih đei dêh char âu wă arih jang sa ling-lang.

5Dang ei, 'bar 'nu kon drŏ-nglo kon đei pơjing lăm dêh char Êyiptơ adrol kơ inh truh noh, Êphraim păng Manase, kư̆m dang hơ'lơ̆p inh thoi Rubên păng Simêôn mơ̆n. 6Gah hơ'lơ̆p mă kon đei pơjing đơ̆ng rŏng noh, sư gah e, gah tơdrong mŭk măk, teh choh lu sư gô đei đêl e asong kơ bre 'nhŏng sư ră. 7Kơplah inh brŏk đơ̆ng Phadan tơ Kanaan na mĕ e lôch rok trong tơm măt inh, jê̆ Êphrat; inh 'bŭ sư jê̆ trong brŏk tơ Êphrat. Wă khan Betlehem.

8Isơrael 'bôh lu kon drŏ-nglo na jet: Bĕ bre bu 'nâu?

9Jôsep tơl: 'Nâu bre kon drŏ-nglo mă Kră Yang 'Bok Kei-Dei đei ăn kơ inh tơ dêh char âu.

Isơrael pơma hơlơ̆k dơ̆ng: Apinh ba tơ âu, wă kơ inh sơkat ăn đei pŭn hiôk kơ bre sư.

10Măt Isơrael ưh kơ bang yua kơ kră, jing pă đei 'bôh kiơ Jôsep năm ba bre kon sư năm jê̆, Jakôp kuăr chŭm.

11Isơrael khan kơ Jôsep thoi âu: Adrol kơ inh tơchĕng pă 'bôh muh măt e boih, mă-lei dang ei Kră Yang 'Bok Kei-Dei pơm ăn kơ inh gơh 'bôh lu adrĕch ioi e dơ̆ng.

12Jôsep iŏk bre kon sư đơ̆ng blu păng kŭl-tăng 'bă sư na drap bon tơ teh. 13Đơ̆ng noh, sư ba 'bar 'nu kon sư noh năm jê̆ tơ 'bă sư; ti gah 'ngiĕo sư pel Manase năm tơ gah 'ma kơ 'bă sư; ti gah 'ma chông Êphraim năm tơ gah 'ngiĕo kơ 'bă sư. 14Isơrael chro ti 'ma sư, pel kơpal kơ̆l Êphraim, bơngai 'lơ̆p, ti gah 'ngiĕo sư pel kơ̆l Manase, sư dan ti thoi sư đei đon tơchĕng pha. Yua kơ Manase bơngai 'lŏ.

15Đơ̆ng noh sư sơkat ăn kơ Jôsep đei pŭn hiôk.

Apơi apinh Kră Yang 'Bok Kei-Dei

'bok inh Abraham păng 'bă inh Isăk

chu yom Kră Yang 'Bok Kei-Dei

mă wei rong inh đơ̆ng oei nge sơ̆ khơ̆ dang ei.

16Linh jang đei dŏng pơklaih inh đơ̆ng tơdrong pơmat-tat,

apinh Ih tuh ăn tơdrong pŭn hiôk kơ bre hơ'lơ̆p âu;

wă pơtrơp ioi adrĕch inh păng 'bok yă inh Abraham hăm Isăk

păng ăn kơ lu sư hrôh rai lơ jơ̆p-jang kơ teh đak!

17Mă-lei Jôsep 'bôh 'bă sư dan ti 'ma kơpal kơ̆l Êphraim, na đei đon ưh kơ lăp, na sư iŏk ti 'ma 'bă sư mă đei dan kơpal kơ̆l Êphraim na tơplih tơ kơ̆l Manase. 18Na sư khan: Ưh kơ trŏ thoi noh ôh, 'bă kon 'nâu kơdră dan ti gah 'ma 'bă lei trŏ.

19Mă-lei 'bă sư ưh kơ chu, pơjah khan: 'Bă băt dăm, 'bă băt. Sư kư̆m jing minh adrĕch adrung sư kư̆m jing tih mơ̆n, kon, mă-lei oh sư jing minh adrĕch tih hloh oei tơ jơ̆p-jang dêh char lăm teh đak. 20Lăm năr noh sư sơkat ăn pŭn hiôk kơ 'bar 'nu sâu sư 'nei păng khan thoi âu:

Yua anăn Ih na kon pơlei Isơrael hơpơi băl đei pŭn hiôk thoi âu:

Apinh Kră Yang 'Bok Kei-Dei pơm ăn kơ ih thoi Êphraim păng Manase.

Thoi noh, Jakôp pôk Êphraim, adrol kơ Manase.

21Jakôp khan kơ Jôsep thoi âu: 'Nâu, 'bă wă jê̆ lôch, mă-lei Kră Yang 'Bok Kei-Dei gô tơgŭm dŏng lu đe kon wih brŏk tơ dêh char 'bok yă. 22Gah 'bă gô ăn kơ kon teh lơ hloh kơ lu 'nhŏng oh, teh bri mă đei yua hră đao blah iŏk đơ̆ng ti lu kon pơlei Amôrit noh.

Currently Selected:

Bl 48: bdq

Highlight

Copy

Compare