Yo 15

1Yêsu bơtho dơ̆ng thoi âu: “Inh âu boih thoi lĕ tơm 'long hơmu, na 'Bă Inh thoi lĕ bơngai pơtăm. 2Na dôm lu bơngai lui kơ Inh thoi lĕ dơng, tơ'bla, sơdrai mă chăt đơ̆ng Inh. Dơng mơ'nah ưh kơ đei plei, 'Bă Inh chre tŭk. Đei dơng mơ'nah plei mơ̆n, mă ưh kơ trem, Sư sơleh tŭk lu tơ'bla iĕ, wă kơ sư plei trem păng plei tih. 3Na dang ei iĕm thoi lĕ dơng 'long mă chăt 'lơ̆ng boih, kơlih kơ iĕm mơ̆ng dôm nơ̆r Inh bơtho. 4Na iĕm athei oei kơjăp lăm Inh khŏm khŏm, mă Inh kư̆m oei lăm iĕm mơ̆n. Dah iĕm ưh kơ oei lăm Inh, iĕm ưh kơ đei plei ôh, kư̆m thoi lĕ kơ dơng mă ưh kơ đei tơm thoi yơ sư gơh đei plei?

5“Thoi noh na Inh wă roi kơ iĕm mă nhên dơ̆ng: Inh thoi lĕ kơ tơm 'long, iĕm thoi lĕ kơ dơng, tơ'bla, sơdrai. Bơngai bu oei kơjăp lăm Inh, Inh oei lăm sư mơ̆n, bơngai 'noh sư gô đei plei trem. Dah ưh kơ đei Inh, iĕm ưh kơ gơh pơm kiơ ôh. 6Bơngai bu ưh kơ oei lăm Inh, 'Bă Inh gô tŭk lê̆ sư, kư̆m thoi đe tŭk dơng 'long, na dơng 'noh jing kro. Klaih kơ noh đe dônh lu dơng kro noh klơ̆m tŭk lăm ŭnh, na ŭnh gô sa sư.

7“Dah iĕm oei lăm Inh, lei dôm nơ̆r Inh bơtho oei lăm iĕm păng dah iĕm apinh Inh tơdrong kiơ Inh gô ăn kơ iĕm tơdrong 'noh mơ̆n păng sĭt gô đei tơpă. 8Dah iĕm đei plei trem iĕm bơngai kiơ̆ Inh tơpă păng đe gô 'bôh iĕm pơm thoi noh na đe ư-ang kơ 'Bă Inh tơpă. 9Inh 'mêm kơ iĕm kư̆m thoi 'Bă Inh 'mêm kơ Inh mơ̆n. Iĕm 'nĕ kơ achăng Inh hŏ na Inh gô 'mêm kơ iĕm, wei-lăng iĕm ling-lang. 10Dah iĕm răk dôm tơdrong Inh bơtho, lei inh 'mêm kơ iĕm tơpă, wei-lăng iĕm khŏm khŏm, kư̆m thoi Inh răk dôm tơdrong 'Bă Inh bơtho na Sư 'mêm kơ Inh tơpă păng wei-lăng Inh khŏm khŏm mơ̆n.

11“Inh roi ăn kơ iĕm dôm tơdrong âu wă kơ iĕm chơt hiôk kư̆m thoi Inh chơt hiôk. Thoi noh na lu iĕm gô chơt hiôk tơpă. 12Inh pơkă ăn kơ iĕm thoi âu: Iĕm athei 'mêm mơnat dih băl kư̆m thoi Inh 'mêm mơnat kơ iĕm. 13Bơngai bu ăn akâu sư kơdih lôch tang lu buăl juăt sư, bơngai 'noh boih 'mêm mơnat kơ buăl juăt sư tơpă. 14Dah iĕm răk dôm tơdrong Inh pơkă lei iĕm buăl juăt Inh tơpă. 15Dang ei Inh ưh pă lăng iĕm thoi đĭch đam Inh boih. Inh lăng iĕm thoi buăl juăt Inh tơpă. Lu bơngai đĭch đe, yŏng sư ưh kơ roi tôm tơdrong sư ôh. Mă-lei Inh roi kơ iĕm tôm tơdrong Inh kơtơ̆ng đơ̆ng 'Bă Inh. 16Ưh kơ sĭ iĕm krao Inh tơbôl păng iĕm ôh sơ̆, Inh krao iĕm wă kơ iĕm bôl păng Inh păng Inh wơh iĕm, wă kơ iĕm năm chă bơtho đe wă kơ đei plei păng wă kơ plei noh huay kơ ôm. Dah iĕm apinh 'Bă Inh tơdrong kiơ yua kơ iĕm tơbôl păng Inh, tơdrong noh Sư gô ăn kơ iĕm tơpă. 17Inh pơkă ăn kơ iĕm minh 'măng âu dơ̆ng: Iĕm athei 'mêm mơnat dih băl.

Bơngai ala teh pơm kơnê̆ kơ bơngai lui

18“Dah bơngai ala teh âu hil areh kơ iĕm, iĕm kư̆m băt mơ̆n lu sư hil 'noh, lu sư hil areh kơ Inh mă hơdrol. 19Dah iĕm khŭl bơngai ala teh âu, lei tơduă iĕm ala teh âu 'mêm mơnat dih băl. Mă-lei Inh rơih iŏk iĕm đơ̆ng khŭl ala teh âu na lu sư lăng iĕm thoi lĕ ưh kơ dih bôl. Kơlih kơ thoi noh na lu sư hil areh kơ lu iĕm.

20“Mă lu iĕm athei 'blŏk gah tơdrong Inh bơtho hei: ‘Đĭch ưh kơ lah tih hloh kơ yŏng sư.’ Đe pơm kơnê̆ kơ Inh păng đe gô pơm kơnê̆ kơ iĕm mơ̆n. Đe lui yom kơ nơ̆r Inh bơtho dang yơ, đe kư̆m lui yom kơ nơ̆r iĕm bơtho dang noh mơ̆n. 21Iĕm kiơ̆ Inh na lu sư pơm kơnê̆ kơ iĕm yua kơ lu sư ưh kơ băt kơ 'Bă Inh mă wơh Inh.

22“Dah Inh ưh kơ năm bơtho lu sư lei lu sư ưh kơ hil kơ Inh ôh. Mă-lei dang ei lu sư hil kơ Inh păng kuă kơ lui kơ tơdrong Inh bơtho na lu sư chă tơdrong yoch tơpă. 23Bơngai bu hil areh kơ Inh, bơngai 'noh hil areh kơ 'Bă Inh mơ̆n. 24Đơ̆ng sơ̆ ưh kơ đei bu pơm tơdrong mơsêh mơyang dang Inh. Dah Inh ưh kơ pơm tơdrong mơsêh mơyang 'bơ̆t anăp lu sư wă tơbăt ăn kơ lu sư Inh đơ̆ng 'Bok Kei-Dei thoi krô hmă, lei lu sư ưh kơ hil kơ Inh ôh. Na dang ei lu sư 'bôh Inh păng 'bôh dôm tơdrong Inh pơm boih, na lu sư hil areh kơ Inh păng hil areh kơ 'Bă Inh mơ̆n. Lu sư chă tơdrong yoch tơpă. 25Đe chih khan lê̆ hơdrol lăm sơ̆p hla bơar tơdrong juăt lu sư sơ̆ khan: ‘Lu sư hil areh kơ Inh ưh kơ đei tơdrong kiơ.’ Yua kơ chih thoi noh na dang ei bơ̆n 'bôh 'blep trŏ thoi noh tơpă.

26“'Bok Dŏng Mơnat gô truh tơ iĕm, anăn Sư Yang Bơhngol 'Lơ̆ng. Sư tơbăt ăn kơ iĕm tơdrong 'Bok Kei-Dei. Sư gô jur đơ̆ng 'Bă Inh yua kơ Inh wơh Sư đơ̆ng anih 'Bă Inh; na Sư gô bơtho tơdrong Inh. 27Mă lu iĕm kư̆m bơtho tơdrong Inh mơ̆n, kơlih kơ iĕm oei hơdai hăm Inh đơ̆ng tơm hmơm sơ̆ boih.

Currently Selected:

Yo 15: bdq

Highlight

Copy