Yo 3

1Đei minh 'nu bơngai anăn sư Nikôđem, sư kiơ̆ tơdrong Pharisi. Sư pơm kră sek tơlang khŭl bơngai Juđê. 2Sư năm ngôi tơ Yêsu kơmăng, na sư khan kơ Yêsu: “Ơ 'Bok Thây, nhôn băt kơ Ih 'Bok Thây đơ̆ng 'Bok Kei-Dei wơh. Dah 'Bok Kei-Dei ưh kơ tơgŭm Ih, lei Ih ưh kơ gơh pơm tơdrong mơsêh mơyang thoi Ih pơm ahrei ôh.”

3Na Yêsu khan kơ sư: “Inh wă khan kơ ih tơpă, bơngai bu ưh kơ tơpŭ ming 'nao, bơngai 'noh ưh kơ layơ wă đei 'Bok Kei-Dei pơm Pơtao pơgơ̆r sư, mă dang ei mă tơ dêh char Sư ning-mônh.”

4Nikôđem khan kơ Sư: “Thoi yơ bơngai kră boih gơh tơpŭ ming 'nao? Sư gơh mơ̆t lăm klak mĕ sư na tơpŭ ming dơ̆ng hă?”

5Yêsu khan kơ sư: “Inh khan kơ ih boih, bơngai bu ưh kơ tơpŭ ming 'nao, bơngai 'noh ưh kơ layơ wă đei 'Bok Kei-Dei pơm Pơtao pơgơ̆r sư, mă dang ei mă tơ dêh char Sư ning-mônh. Tơdrong tơpŭ ming 'nao 'noh đơ̆ng Yang Bơhngol 'Lơ̆ng. Sư pơm kơ bơ̆n jơhngơ̆m 'lơ̆ng, na bơ̆n iŏk 'batem păng đak, thoi noh boih tơdrong tơpŭ ming 'nao. 6Mĕ bơ̆n tơpŭ kơ bơ̆n sơ̆, noh păng akâu sư kơdih. Mă-lei bơ̆n tơpŭ ming 'nao dơ̆ng, 'noh đơ̆ng Yang Bơhngol 'Lơ̆ng pơm kơ bơ̆n. 7Na dang ei đon ih 'nĕ tơchĕng hlĭch gah tơdrong Inh athei iĕm tơpŭ ming 'nao 'noh. 8Kial sư thu gô mơ̆ng kơ sư wă, bơ̆n kơtơ̆ng jơwa sư, mă-lei bơ̆n ưh kơ băt sư thu đơ̆ng yơ wă năm tơ yơ. Na Yang Bơhngol 'Lơ̆ng Sư kư̆m pơm kơ bơ̆n thoi noh mơ̆n; bơ̆n ưh kơ băt Sư pơm thoi yơ mă-lei bơ̆n băt kơ Sư ăn kơ bơ̆n tơpŭ ming 'nao tơpă.”

9Nikôđem khan: “Thoi yơ kon bơngai gơh jing thoi noh lĕ?”

10Yêsu khan dơ̆ng kơ sư: “Liơ lu bơngai Juđê pôk ih thây bơtho lu sư boih mă ih ưh kơ hlôh tơdrong noh? 11Inh khan kơ ih tơpăt: Nhôn bơtho iĕm tơdrong nhôn; nhôn 'bôh tơpă boih na nhôn gơh roi ăn kơ iĕm; mă-lei iĕm ưh kơ wă lui dôm tơdrong nhôn bơtho. 12'Nâu Inh bơtho iĕm dang ei gah tơdrong ala teh âu, mă iĕm ưh kơ lui. Tơdah Inh wă bơtho gah tơdrong 'Bok Kei-Dei kơpal plĕnh ti, iĕm kư̆m ưh kơ lui rai loi. 13Đĭ-đăng bơngai ala teh âu, ưh tam đei bu tŏk tơ plĕnh ti boih ôh. Inh Kon Bơngai, pôm Inh đĕch đơ̆ng plĕnh ti jur tơ ala teh âu.

14“Na tơ char glă sơ̆ ki sơ̆ kach Môis pơm minh dăng 'bih păng mam kong, sư tơ'băk 'bih ei kơpal 'long wă kơ đe lăng 'bih ei na huay kơ lôch đơ̆ng 'bih choh. Kư̆m thoi noh mơ̆n đe gô atŏk Inh Kon Bơngai tơ 'long pơglang tơpă ning-mônh. 15Thoi noh mơ̆n na bơngai bu lui kơ Sư, bơngai 'noh sư gô iung arih oei hơdai hăm 'Bok Kei-Dei ling-lang. 16'Bok Kei-Dei 'mêm mơnat tơpă rim 'nu bơngai jơ̆p ala teh âu na Sư mah ăn Kon pôm Sư lôch tang kon bơngai. Bơngai bu lui kơ Kon Sư huay kơ lôch hiong ôh. Bơngai 'noh sư gô oei hơdai hăm 'Bok Kei-Dei arih ling-lang. 17'Bok Kei-Dei wơh Kon Sư jur tơ ala teh âu wă pơklaih kon bơngai đơ̆ng tơdrong yoch, ưh kơ sĭ wă phak kon bơngai ôh.

18“Bơngai bu lui kơ Kon Sư huay kơ pŭ tơdrong phak ôh. Bơngai bu ưh kơ chu lui kơ Kon Sư, 'Bok Kei-Dei sek tơlang tơdrong sư boih păng wă phak sư tơpă yua kơ sư ưh kơ wă lui kơ Kon pôm Sư. 19'Bok Kei-Dei sek tơlang kon bơngai, Sư pơlong lăng thoi âu: Sư wơh Kon Sư jur pơchrang ăn tơdrong hơdah Sư tơ ala teh âu. Mă-lei kon bơngai ưh kơ wă kơ tơdrong hơdah Sư ôh. Kon bơngai wă oei lăm măng mu đĕch yua kơ lu sư wă pơm tơdrong kơnê̆ ling-lang. 20Bơngai bu pơm tơdrong kơnê̆, bơngai 'noh sư ưh kơ wă kơ tơdrong hơdah păng sư ưh kơ wă năm jê̆ tơdrong hơdah, yua kơ sư hli, dah năm jê̆ tơdrong hơdah sư tơchĕng 'Bok Kei-Dei 'bôh hloi tơdrong kơnê̆ sư. 21Mă-lei dah bu pơm tơpăt, sư ưh kơ hli năm jê̆ tơdrong hơdah păng wă kơ đe 'bôh dôm tơdrong tơpăt sư pơm đơ̆ng 'Bok Kei-Dei ăn kơ sư.”

Yôhan oei pơma tơdrong Yêsu

22Đơ̆ng rŏng kơ noh Yêsu năm hơdai hăm lu bơngai pơhrăm păng Sư năm tơ dêh Juđê. Yêsu oei hơdai hăm lu sư tơ ei păng Sư pơm kơ đe 'batem. 23Yôhan sư pơm kơ đe 'batem tơ Pơlei Anon jê̆ Pơlei Salim kơlih kơ tơ ei đei đak dơnâu. Na đe năm tơ sư tơ ei wă iŏk 'batem. 24Hơtai 'noh đe tam mă tah Yôhan lăm hnam phak ôh.

25Na đei minh 'nu bơngai Juđê năm tơ lu bơngai pơhrăm păng Yôhan pơjah pơjăng păng sư gah tơdrong pơm kơ đe 'batem. 26Lu bơngai pơhrăm păng Yôhan năm tơ Yôhan păng khan: “Ơ 'bok thây, 'Bok mă oei hơdai hăm ih pah to krong Jôrđăn, bơngai mă ih khan Sư Kon 'Bok Kei-Dei, dang ei Sư kư̆m pơm kơ đe 'batem. Đĭ-đăng bơngai năm kơdih kơdih tơ Sư.”

27Yôhan khan kơ lu sư thoi âu: “Ưh kơ đei bu gơh pơm tơdrong kiơ dah 'Bok Kei-Dei ưh kơ ăn kơ sư. 28Iĕm kư̆m kơtơ̆ng boih tơdrong inh khan kơ iĕm ki, inh ưh kơ sĭ kơ 'Bok Krist ôh. Inh bơngai 'Bok Kei-Dei ăn truh hơdrol wă hơmet trong kơ 'Bok Krist. 29Pơtih gia, lăp đe pơkong, drŏ-nglo mă iŏk akăn, sư boih hiôk chơt tơpă. Păng buăl mă pơm kơdranh drŏ-nglo 'noh sư kư̆m dơ̆ng jê̆ 'bơ̆t sư mơ̆n păng mơ̆ng sư pơma, buăl sư kư̆m chơt hiôk mơ̆n. Na inh kư̆m dang kơdranh bơngai mă iŏk akăn 'noh mơ̆n. Inh kơtơ̆ng Yêsu pơma, inh hiôk chơt tơpă. 30Sư rai đunh rai pơm tih; gah inh rai đunh rai sruh rai iĕ.

Bơngai mă jur đơ̆ng plĕnh

31“Bơngai mă jur đơ̆ng plĕnh ti, bơngai 'noh tih hloh kơ đĭ-đăng bơngai. Bơngai bu đơ̆ng ala teh âu, sư 'noh bơngai mơnglang đĕch păng sư băt pơma gah tơdrong ala teh âu đĕch. Bơngai mă jur đơ̆ng plĕnh ti 'noh tih hloh kơ đĭ-đăng bơngai tơpă. 32Sư roi kơ đe dôm tơdrong Sư 'bôh păng Sư kơtơ̆ng. Mă-lei ưh kơ đei bơngai bu wă lui kơ nơ̆r Sư bơtho. 33Bơngai bu lui kơ nơ̆r Sư bơtho, bơngai 'noh sư lui kơ 'Bok Kei-Dei pơma sĭt tơpă, 34yua kơ 'Bok Kei-Dei wơh Kon Sư Yêsu, na Yêsu jur bơtho nơ̆r 'Bă Sư 'Bok Kei-Dei tơpă. 'Bok Kei-Dei ăn kơ Sư Yang Bơhngol 'Lơ̆ng oei hơdai hăm Sư ling-lang, na Yang Bơhngol 'Lơ̆ng tơgŭm Sư lăm tôm tơdrong tơpă ưh kơ đei kơ'bah kiơ. 35'Bă Sư 'Bok Kei-Dei lăp đon kơ Kon Sư tơpă, na pơchĕp ăn kơ Sư gơh pơm tôm tơdrong. 36Bơngai bu lui kơ Kon Sư, bơngai 'noh sư gô oei hơdai hăm 'Bok Kei-Dei arih ling-lang. Bơngai bu ưh kơ lui yom kơ Kon Sư, bơngai 'noh sư ưh kơ đei arih ling-lang ôh. 'Bok Kei-Dei hil kơ sư tơpă păng sĭt gô phak sư ning-mônh.”

Yêsu wih tơ dêh Galilê

Currently Selected:

Yo 3: bdq

Highlight

Copy