Yo 7
7
1Đơ̆ng rŏng kơ noh Yêsu oei năm chă bơtho tơ dêh Galilê. Sư ưh pă năm bơtho tơ dêh Juđê boih kơlih kơ lu bơngai Juđê wă pơlôch Sư. 2Lăp wă jê̆ truh năr giĕng đe Juđê mă đe anăn Giĕng Bơsŭn, 3na lu oh Yêsu khan kơ Sư: “Ih jăk đơ̆ng âu năm tơ dêh Juđê wă kơ lu bơngai lui kơ Ih tơ ei 'bôh tơdrong mơsêh mơyang Ih pơm. 4Dah bơ̆n wă kơ đe băt kơ tơdrong jang bơ̆n, na bơ̆n ưh kơ gơh ôn tơdrong jang bơ̆n ôh. Dah Ih gơh pơm tơdrong mơsêh mơyang tơpă lei Ih athei pơm tơ'bôh 'bơ̆t anăp đe lơ wă kơ đe băt kơ Ih.”
5Lu oh Sư pơma thoi noh kơlih kơ lu sư ưh tam mă lui; oh Sư tăm mă ưh kơ lui kơ Sư tăm. 6Yêsu khan kơ lu oh Sư: “Ưh tam mă trŏ Inh wă năm tơ Pơlei Jêrusalem tơbăt kơ đe tơdrong Inh ôh. Mă-lei dah iĕm wă năm, layơ kư̆m bưh. 7Yua kơ iĕm tơduă kon bơngai ala teh âu, đe huay hil areh kơ iĕm ôh. Pôm Inh đĕch lu sư hil tơpă, kơlih kơ Inh tơ'bôh kơ lu sư tơdrong kơnê̆ lu sư pơm. 8Na iĕm năm hơpong bĕ năr giĕng noh. Gah Inh tam mă năm ôh, kơlih kơ tam mă trŏ kơ Inh wă năm.”
9Sư khan thoi noh boih na Sư oei lăm dêh Galilê đĕch năr noh. 10Đơ̆ng rŏng lu oh Sư năm hơpong tơ Pơlei Jêrusalem wă pơm giĕng ei, Yêsu kư̆m năm mơ̆n. Mă-lei Sư năm hrĕp ưh kơ ăn đe băt. 11Trŏ năr giĕng ei boih lu bơngai Juđê chă Sư tơ noh. Lu sư khan: “Yêsu tơ yơ?”
12Lu kon pơlei pơla pơma 'bơm gah tơdrong Yêsu. Lu mơ'nah khan Sư bơngai 'lơ̆ng tơpăt; lu mơ'nah khan Sư ưh kơ 'lơ̆ng ôh, khan Sư chă hơlĕnh kơ kon pơlei pơla đĕch. 13Lu bơngai mă pơma thoi noh, lu sư ưh kơ pơma 'bơ̆t anăp đe tơpôl ôh kơlih kơ lu sư hli kơ lu kră sư.
Yêsu bơtho lăm hnam akŭm tơm tơ Pơlei Jêrusalem lăm tŏk-bŏk năr Giĕng Bơsŭn
14Lăp tŏk-bŏk năr giĕng ei na Yêsu mơ̆t lăm hnam akŭm 'Bok Kei-Dei tơm, na Sư bơtho đe lăm noh. 15Lu bơngai Juđê sơleng kơ đon yua kơ Yêsu bơtho hơgei tơpă. Lu sư pơma dih băl khan: “Lơliơ 'Bok âu ưh kơ đei chă pơhrăm tơ hnam trưng mă-lei Sư hơgei tôm tơdrong?”
16Yêsu khan kơ lu sư: “Tơdrong Inh bơtho âu ưh kơ sĭ lĕch đơ̆ng Inh ôh. Tơdrong âu lĕch đơ̆ng 'Bok Kei-Dei mă wơh Inh. 17Bơngai bu 'maih pơm kiơ̆ thoi 'Bok Kei-Dei wă, bơngai 'noh sư gô băt tơdrong Inh bơtho âu lĕch đơ̆ng 'Bok Kei-Dei tơpă, dah lĕch đơ̆ng Inh kơdih. 18Bơngai bu bơtho kiơ̆ kơ đon sư tơchĕng kơdih, bơngai 'noh sư wă pơang akâu sư kơdih đĕch. Mă-lei dah bơngai bu bơtho wă pơư pơang nơ̆r 'Bok mă wơh sư, bơngai 'noh bơtho tơpăt, ưh kơ đei layơ hơlĕnh. 19Hăm trŏ kơ Môis ată ăn kơ iĕm tơdrong juăt, mă-lei lăm lu iĕm ưh kơ đei bu răk tơdrong juăt noh? Na iĕm khan Inh ưh kơ răk tơdrong juăt Môis, na iĕm khan wă pơlôch Inh. Kơlih kơ kiơ iĕm wă pơlôch Inh noh?”
20Lu kon pơlei pơla kơtơ̆ng sư pơma thoi noh na khan kơ sư: “'Noh Ih wơnh boih, bu đei chă wă pơlôch Ih? Ưh kơ đei bu ôh.”
21Yêsu khan: “Lăm năr pơdơh Sa'bat Inh pơklaih minh 'nu bơngai jĭ jăn, na iĕm khan Inh pơm ưh kơ trŏ. 22Môis pơkă ăn kơ iĕm tơdrong kăt tơdra akar; mă tơpă ưh kơ sĭ kơ Môis ôh hơdrol. Tơdrong kăt tơdra akar noh đơ̆ng lu yă 'bok iĕm sơ̆ pơtơ̆p hơdrol. Na lăp năr pơdơh Sa'bat iĕm kư̆m jang kăt tơdra akar đe mơ̆n, yua kơ Môis pơkă thoi noh. 23Iĕm jang kăt tơdra akar đe lăm năr pơdơh kư̆m gơh; liơ iĕm hil kơ Inh pơklaih bơngai jĭ jăn lăm năr pơdơh mơ̆n? Inh pơklaih bơngai jĭ jăn lăm năr pơdơh Sa'bat, noh trŏ hloh kơ iĕm kăt tơdra akar đe lăm năr pơdơh Sa'bat. 24Iĕm 'nĕ kơ sek tơlang kiơ̆ kơ jơhngơ̆m iĕm pran. Iĕm athei sek tơlang mă tơpăt, athei tơchĕng mă tôm tơdrong hơdrol 'mơ̆i.”
Hăm trŏ kơ Sư 'Bok Krist?
25Lăm lu kon pơlei pơla Jêrusalem đei bơngai mơ'nah khan: “Yêsu âu dah kiơ lu kră bơ̆n khan wă rôp pơlôch Sư ei? 26Dang ei Sư oei bơtho 'bơ̆t anăp bơ̆n tơpôl, mă-lei lu kră bơ̆n ưh kơ đei pơm kiơ kơ Sư, noh lu kră bơ̆n băt kơ Sư 'Bok Krist mă gô pơgơ̆r bơ̆n tơpă boih dah kiơ dang ei? 27Mă-lei bơ̆n băt kơ Sư ưh kơ sĭ 'Bok Krist ôh, kơlih kơ bơ̆n băt kơ Sư bơngai đơ̆ng yơ. Mă-lei dah 'Bok Krist truh bơ̆n ưh kơ băt Sư đơ̆ng yơ ôh.”
28Yêsu băt kơ lu sư pơma thoi noh na Sư bơtho 'bơ̆r re lăm hnam akŭm 'Bok Kei-Dei tơm: “Lu iĕm khan iĕm băt kơ Inh bơngai đơ̆ng yơ. Mă tơpă ưh kơ sĭ Inh bơngai đơ̆ng noh ôh. Ưh kơ sĭ Inh truh tơ iĕm yua kơ akâu Inh wă kơdih ôh. 'Bok Kei-Dei wơh Inh tơpă. Mă-lei iĕm ưh kơ băt kơ Sư. 29Inh băt kơ Sư tơpă kơlih kơ Inh jur đơ̆ng Sư, yua kơ Sư wơh Inh.”
30Thoi noh na lu đe ei wă rôp Sư ră, mă-lei ưh kơ đei ti bu chro rôp Sư ôh, yua kơ tam trŏ 'Bok Kei-Dei ăn. 31Kư̆m đei lơ bơngai mơ'nah lui kơ Sư tơpă. Na lu đe ei khan: “Bơngai âu pơm lơ tơdrong mơsêh mơyang tơpă. Nhôn tơchĕng băt kơ Sư 'Bok Krist tơpă boih âu.”
Lu bơngai Juđê wă rôp Yêsu
32Bơngai Pharisi kơtơ̆ng ang kon pơlei pơma 'bơm Yêsu thoi noh, na lu bơngai Pharisi păng lu 'bok soi tih wơh lu linh sư năm rôp Yêsu. 33Na Yêsu khan kơ lu bơngai tơpôl: “Inh oei hơdai iĕm ưh pă đunh boih. Klaih kơ noh Inh wă wih tơ 'Bok mă wơh Inh. 34Iĕm gô chă Inh mă-lei ưh kơ 'bôh. Iĕm ưh kơ gơh truh tơ anih Inh ôh.”
35Lu bơngai Juđê pơma dih băl khan: “Bơngai âu Sư wă năm tơ yơ, Sư khan bơ̆n ưh kơ gơh 'bôh Sư dơ̆ng? Rŏ lăng Sư wă năm oei păng lu bơngai Juđê mă oei tơ dêh đe na bơtho lu bơngai dêh đe. 36Păng Sư wă khan kiơ Sư khan: ‘Iĕm gô chă Inh mă-lei ưh kơ gơh 'bôh Inh,’ păng: ‘Iĕm ưh kơ gơh truh tơ anih Inh mơ̆n?’ ”
Yêsu apinh đe: Bu 'maih nhă đak?
37Tơpă wă tôch Năr Giĕng Bơsŭn ei, năr noh năr đe akŭm giĕng tih tơpă, na Yêsu iung dang dơ̆ng bơtho 'bơ̆r re khan: “Bơngai bu rơhing 'maih nhă đak, năm tơ Inh bĕ. 38Bơngai bu lui kơ Inh sư gô đei đak glung ro lăm jơhngơ̆m sư păng ăn kơ sư arih ling-lang kư̆m thoi đe chih lăm sơ̆p hla bơar 'Bok Kei-Dei sơ̆.”
39Sư khan thoi noh dang khan kơ lu bơngai lui kơ Sư gô đei Yang Bơhngol 'Lơ̆ng đơ̆ng 'Bok Kei-Dei ăn jur oei păng lu sư. Mă-lei kơplah noh 'Bok Kei-Dei tam mă ăn Yang Bơhngol 'Lơ̆ng ôh, kơlih Yêsu tam mă lôch iung arih tŏk tơ plĕnh.
Kon pơlei pơla tơklah băl đon gah tơdrong Yêsu
40Lu kon pơlei pơla kơtơ̆ng Yêsu pơma thoi noh boih, na lu bơngai mơ'nah khan: “'Bok âu boih 'Bok mă pơtruh nơ̆r 'Bok Kei-Dei tơpă mă bơ̆n chang gô Sư đơ̆ng sơ̆.”
41Lu mơ'nah dơ̆ng khan: “'Bok âu boih 'Bok Krist tơpă.”
Đei lu mơ'nah dơ̆ng khan: “Ưh ôh. 'Bok âu sư lĕch đơ̆ng dêh Galilê mă-lei 'Bok Krist Sư ưh kơ lĕch đơ̆ng dêh Galilê ôh, 42yua kơ đei lăm sơ̆p hla bơar 'Bok Kei-Dei đe chih khan 'Bok Krist lĕch đơ̆ng krung kơtum 'bok Đawit, đơ̆ng pơlei 'bok Đawit mơ̆n. Pơlei ei anăn Pơlei Betlehem lăm dêh char Juđê.”
43Thoi noh na lu kon pơlei pơla tơklah băl đon gah tơdrong Yêsu. 44Lu mơ'nah wă rôp Sư ră, mă-lei ưh kơ đei ti bu chro rôp Sư dơ̆ng.
Lu kră Juđê ưh kơ wă lui kơ Yêsu
45Lu linh ei brŏk hoh đĕch tơ lu yŏng sư. Na lu yŏng sư 'bok soi tih păng lu đe Pharisi jet lu linh sư khan: “Lơliơ iĕm ưh kơ rôp anhăk Sư tơ âu?”
46Lu linh sư khan: “Đơ̆ng sơ̆ tam lah đei bơngai bơtho hơgei dang Sư.”
47Na lu bơngai Pharisi hil kơ lu sư: “'Noh iĕm hơdai wang lui kơ 'bơ̆r Sư bơtho hơlĕnh kơ kon pơlei pơla hăm trŏ? 48Bĭ lu bơngai pơm tih, lu bơngai Pharisi, hăm đei hơdai lui kiơ̆ Sư? Ưh kơ đei bu ôh. 49Iĕm kiơ̆ kơ lu kon pơlei pơla, lu sư jơ̆l ưh kơ hlôh lăm tơdrong juăt 'Bok Kei-Dei. Lu sư khŭl bơngai 'Bok Kei-Dei wă tŭk.”
50Na đei minh 'nu bơngai sư kư̆m pơm tih lăm bơngai Pharisi, anăn sư Nikôđem, 'bok mă năm ngôi tơ Yêsu kơmăng sơ̆. Sư iung pơma tơduă lu sư pơm tih thoi âu: 51“Kiơ̆ kơ tơdrong juăt bơ̆n, ưh kơ gơh phak đe ôh dah lu kră tam mă mơ̆ng păng sek tơlang bơngai mă đe jâu noh, yua kơ bơ̆n ưh kơ băt sư pơm 'lơ̆ng ră dah sư pơm yoch.”
52Na lu bôl buăl sư khan kơ sư: “Ih bơngai đơ̆ng dêh Galilê mơ̆n hă? Ih đŏk lăng lăm sơ̆p hla bơar 'Bok Kei-Dei bĕ, na ih gô băt đe ưh kơ đei chih roi khan bơngai mă pơtruh nơ̆r 'Bok Kei-Dei lĕch đơ̆ng dêh Galilê ôh, mă Sư âu lĕch đơ̆ng dêh Galilê.”
53Klaih kơ noh đĭ-đăng lu sư brŏk tơklah tơ hnam kơdih.
Drŏ-kăn ngôi pơyô kư̆ kă
Currently Selected:
Yo 7: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
