Luk 2
2
1Lăm sơnăm noh 'bok pơtao tơm đe Rôm, anăn sư Ôgut, chih hla bơar athei đe chă chih măt rim kon bơngai jơ̆p kơ tơring sư pơgơ̆r. 2'Nâu mă blŭng-a đe chih anăn tơ lăm hla bơar, kơplah Krinus oei pơm 'bok tih lăm dêh char Siri. 3Lu đe wang brŏk tơ pơlei sư kơdih wă chih tơmơ̆t anăn lu sư.
4Yôsep yak đơ̆ng Pơlei Nasaret, dêh char Galilê, năm tơ Pơlei Betlehem, dêh char Juđê, pơlei Đawit sơ̆, yua kơ sư kon sâu adrĕch adrung Đawit. 5Thoi noh sư năm chih tơmơ̆t anăn sư tơ lăm sơ̆p hla bơar hơdai hăm Mari bơngai mă sơkơ̆t hăm sư, sư oei anăp.
6Lăm năr bre sư oei tơ noh, truh kơ khei 'năr Mari boih, 7klaih kơ noh sư tơpŭ kơ minh 'nu kon kơdră sư. Sư tơsu kơ kon sư minh blah khăn, klaih kơ noh tơ'bĭch kơpal 'nhĕt kro tơ lăm war rơmo yua kơ ưh kơ đei anih boih lăm hnam 'bĭch tơmoi.
Linh jang 'lơ̆ng roi kơ bơngai wei triu tơdrong đe tơpŭ kơ Yêsu
8Jê̆ pơlei noh đei lu bơngai wei triu kral kơmăng wei-lăng triu sư tơ bri. 9Minh 'nu linh jang 'lơ̆ng Kră Yang năm tơ'bôh kơ lu sư. Tơdrong mơsêh mơyang pơchrang hơdah tăp dăr kơ lu sư. Lu sư hli tơtey. 10Linh jang 'lơ̆ng khan kơ lu sư: “Iĕm 'nĕ kơ hli, yua kơ inh wă roi kơ iĕm tơdrong 'lơ̆ng, tơdrong mă đĭ-đăng kon bơngai 'nă hal. 11Măng 'nâu tơ pơlei Đawit, đe tơpŭ kơ minh 'nu 'Bok Dŏng Pơklaih, 'Bok Kră Yang, Krist. 12Tơdrong 'nâu wă tơbăt kơ iĕm chă Sư: Iĕm gô 'bôh minh 'nu kon nge tơsu khăn, tơ'bĭch kơpal 'nhĕt kro lăm war rơmo.”
13Klaih kơ noh lu sư 'bôh blư bla linh jang 'lơ̆ng lơ tơpă dơ̆ng hơdai păng buăl sư mă jur hơdrol. Lu sư hơri bơnê kơ Kră Yang 'Bok Kei-Dei thoi âu:
14“Ư-ang kơ 'Bok Kei-Dei mă oei tơ plĕnh ti.
Sư wă ăn hiôk-hian kơ lu bơngai mă Sư lăp đon tơ ala teh âu.”
15Đang kơ lu linh jang 'lơ̆ng hơri păng wih tơ plĕnh đơ̆ng lu sư, lu bơngai wei triu ei pơma tơduă lu sư: “Bĕ bơ̆n năm tơ Pơlei Betlehem chă lăng tơdrong mă Kră Yang 'Bok Kei-Dei 'nao roi kơ bơ̆n.”
16Na lu sư kơdâu brŏk tơ Pơlei Betlehem. Lu sư chă na 'bôh Mari hăm Yôsep păng 'bôh kon nge oei 'bĭch kơpal 'nhĕt kro.
17'Bôh thoi noh boih lu bơngai wei triu ră roi đêl tơdrong linh jang 'lơ̆ng tơbăt kơ lu sư gah kon nge 'noh. 18Lu đe wang hlĭch hlăch kơtơ̆ng lu bơngai wei triu ră roi tơdrong noh. 19Mari 'blŏk hơdơ̆r tơdrong noh, klaih kơ noh tơchĕng lăm đon sư kơdih. 20Lu bơngai wei triu wih, bơnê kơkuh kơ 'Bok Kei-Dei yua kơ lu sư kơtơ̆ng hăm 'bôh tơdrong noh lei-lăi thoi linh jang 'lơ̆ng đei khan kơ lu sư.
Mĕ 'bă Yêsu pơyơ̆r Sư kơ 'Bok Kei-Dei
21Lăp nge Yêsu truh tơhngam năr boih na đe kăt tơdra akar Sư păng anăn hloi Sư Yêsu kiơ̆ kơ linh jang 'lơ̆ng pơkă ăn kơ sư hơdrol kơ nge sư tam đei lăm klak mĕ Sư sơ̆.
22Truh kơ năr mĕ Sư wă hơmet akâu kiơ̆ thoi tơdrong juăt Môis pơkă sơ̆, na mĕ 'bă Yêsu anhăk Sư năm tơ Pơlei Jêrusalem. Sư kư̆m wă pơyơ̆r Yêsu kơ Kră Yang 'Bok Kei-Dei tơ ei mơ̆n. 23Bre sư pơm thoi noh wă kơ kiơ̆ thoi đe chih lăm tơdrong juăt Kră Yang thoi âu: “Rim kon gơgơ̆l, iĕm athei pơyơ̆r kơ Kră Yang ngăl.”
24Na bre sư kư̆m soi sơmah kơ Kră Yang 'Bok Kei-Dei kiơ̆ kơ đe chih lăm tơdrong Kră Yang sơ̆ khan: “Iĕm soi sơmah kơ 'Bok Kei-Dei minh agrop sem kơmuŏl dah 'bar tŏ kon kơtơp.”
25Tơ Pơlei Jêrusalem ei đei minh 'nu bơngai anăn sư Simiôn. Sư bơngai 'lơ̆ng tơpăt kư̆m lui kơjăp păng chang gô 'Bok Kei-Dei wơh 'Bok Krist dŏng pơklaih lu bơngai Isơrael. Na Yang Bơhngol 'Lơ̆ng oei hơdai păng sư. 26Yang Bơhngol 'Lơ̆ng tơbăt ăn kơ sư, hơdrol sư lôch sư gô 'bôh 'Bok Krist mă 'Bok Kei-Dei wơh wă pơklaih kon bơngai bơ̆n. 27Na Yang Bơhngol 'Lơ̆ng athei Simiôn mơ̆t lăm hnam akŭm 'Bok Kei-Dei tơm. Lăp mĕ 'bă Yêsu anhăk Yêsu mơ̆t tơ noh boih wă pơyơ̆r Sư kơ 'Bok Kei-Dei kiơ̆ kơ tơdrong juăt Kră Yang pơkă, 28na Simiôn iŏk pôk Yêsu, krao khan bơnê kơ 'Bok Kei-Dei thoi âu:
29“Ơ Kră Yang, dang ei Ih ăn kơ inh mă đĭch Ih âu lôch achăng lê̆ teh đak âu hiôk-hian.
Kiơ̆ thoi Ih khan kơ inh sơ̆,
30-31na dang ei inh 'bôh boih bơngai mă Ih wơh wă dŏng pơklaih đĭ-đăng kơ khŭl kon bơngai nhôn.
32Sư dang pơchrang tơdrong hơdah kơ đĭ-đăng kơ khŭl bơngai tam mă lui kơ Ih, 'noh wă tơbăt ăn kơ lu sư tơdrong Ih.
Sư gô ăn kơ lu đe Isơrael, bơngai mă kiơ̆ Ih, jing hiôk tơpă.”
33Na mĕ 'bă Yêsu kơtơ̆ng Simiôn roi gah tơdrong Yêsu hơdrol na bre sư hlĭch hlăch kơ đon tơpă. 34Đơ̆ng noh Simiôn apinh 'Bok Kei-Dei tơgŭm bre sư. Sư kư̆m khan kơ Mari thoi âu: “'Bok Kei-Dei ăn kơ bơ̆n kon nge âu wă tơgŭm lu bơngai Isơrael jing hiôk, mă-lei lu bơngai kuă kơ lui kơ Sư jing răm. Sư bơngai 'Bok Kei-Dei ăn wă tơgŭm bơ̆n ră mă-lei đei lơ bơngai gô pơjĭp pơjăm Sư. Yua kơ thoi noh na bơ̆n gô băt jơhngơ̆m lu đe ei kơnê̆ tơpă. 35Păng ih kư̆m gô tơ'bơ̆p lơ tơdrong sơ'ngon tơpă mơ̆n ning-mônh, yua kơ dôm tơdrong đe pơm kơnê̆ kơ kon ih.”
36Na đei minh 'nu yă kră khŭl bơngai Isơrael. Sư kư̆m juăt kơ pơtruh nơ̆r 'Bok Kei-Dei mơ̆n. Anăn sư Anna, kon Phanwel. Sư adrĕch adrung Aser. Sư kră tơpă boih. Sơ̆ sư oei hơdai klo sư tơpơh sơnăm, klaih kơ noh klo sư lôch. 37Na sư adro oei oăi minh drô̆ truh kơ sư tơhngam-jĭt puăn sơnăm boih. Na sư ưh pă đei lĕch ngôi đơ̆ng hnam akŭm 'Bok Kei-Dei tơm boih. Sư oei lăm noh, sư ơ̆t kơ por krao khan măng năr. 38Na sư kư̆m năm tơ mĕ 'bă Yêsu mơ̆n. Sư bơnê kơ 'Bok Kei-Dei păng roi lê̆ hơdrol gah tơdrong Yêsu kơ đĭ-đăng lu bơngai mă chang gô 'Bok Kei-Dei pơklaih lu kon pơlei Jêrusalem.
Yêsu păng mĕ 'bă Sư wih tơ Pơlei Nasaret
39Lăp mĕ 'bă Yêsu pơm tôm tơdrong kiơ̆ kơ tơdrong juăt 'Bok Kei-Dei pơkă boih, na lu sư brŏk tơ Pơlei Nasaret, pơlei sư kơdih tơ dêh char Galilê. 40Na Yêsu rai đunh rai wơ̆ kư̆m đei jơhngơ̆m pran. Sư kư̆m 'bơ̆r đon hlôh wao tôm tơdrong. 'Bok Kei-Dei lăp đon kơ Sư tơpă tơgŭm Sư ling-lang.
41Rim sơnăm trŏ kơ năr giĕng mă đe anăn Giĕng Năm Brih na bre mĕ 'bă Yêsu juăt kơ năm tơ Pơlei Jêrusalem. 42Lăp Yêsu truh tơ mơjĭt-'bar sơnăm boih Sư kư̆m hơdai kiơ̆ mĕ 'bă Sư năm tơ Pơlei Jêrusalem wă kơ pơm rok kiơ̆ tơdrong juăt Năr Giĕng Năm Brih ei. 43Lăp đe pơm giĕng đang boih na mĕ 'bă Yêsu pơtơm brŏk tơ Pơlei Nasaret, mă-lei Yêsu oei ngôi tơ Pơlei Jêrusalem. 44Na mĕ 'bă Sư ngêh kơ Yêsu kư̆m brŏk hơdai păng lu bôl buăl 'nhŏng oh Sư. Na bre sư yak prăt năr rok trong brŏk tơ pơlei. Truh kơsơ̆ boih bre sư chă ră Yêsu tơ buôl buăl sư, 45mă-lei ưh kơ 'bôh. Na năr dơning bre sư hơlơ̆k năm chă tơ Pơlei Jêrusalem dơ̆ng, mă-lei ưh kơ 'bôh. 46Na lăp năr đơ̆ng rŏng dơ̆ng na bre sư 'bôh Sư tơ lăm hnam akŭm 'Bok Kei-Dei tơm tơ Pơlei Jêrusalem. Sư oei hơdai păng lu 'bok thây wă kơ mơ̆ng lu sư bơtho, na Sư kư̆m jet lu đe noh mơ̆n. 47Na đĭ-đăng lu bơngai oei 'bơ̆t ei mơ̆ng Yêsu sơleng kơ đon yua kơ Yêsu tơl lu sư hơgei tơpă.
48Lăp mĕ 'bă Yêsu 'bôh Sư tơ noh na bre sư chrêu kơ đon, na mĕ Sư khan kơ Sư thoi âu: “Ơ dăm, yua kơ kiơ Ih pơm kơ nhi thoi âu? Nhi 'bă Ih chă Ih tôch đon hli kơ Ih hiong.”
49Na Yêsu khan kơ mĕ 'bă Sư: “Biĕm chă kiơ kơ Inh jơ̆p-jang? Biĕm ưh kơ băt kơ Inh wă hăt kơ jang tơdrong 'Bă Inh âu dah kiơ?”
50Mă-lei bre sư ưh kơ hlôh Yêsu wă pơma kiơ.
51Đơ̆ng rŏng kơ 'nei na Yêsu brŏk kiơ̆ mĕ 'bă Sư tơ Pơlei Nasaret. Sư chu yom kơ mĕ 'bă Sư ling-lang. Na mĕ Sư oei tơchĕng 'blŏk ling-lang kơ tơdrong noh hei păng dôm tơdrong đe khan lê̆ hơdrol gah kon sư, mă đơ̆ng sơ̆.
52Na Yêsu 'brư̆ kơ khei 'brư̆ kơ sơnăm rai 'lŏ rai hơgei, mă 'Bok Kei-Dei mă kon bơngai kư̆m lăp đon kơ Sư ngăl.
Yôhan bơtho đe
Currently Selected:
Luk 2: bdq
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.
Luk 2
2
1Lăm sơnăm noh 'bok pơtao tơm đe Rôm, anăn sư Ôgut, chih hla bơar athei đe chă chih măt rim kon bơngai jơ̆p kơ tơring sư pơgơ̆r. 2'Nâu mă blŭng-a đe chih anăn tơ lăm hla bơar, kơplah Krinus oei pơm 'bok tih lăm dêh char Siri. 3Lu đe wang brŏk tơ pơlei sư kơdih wă chih tơmơ̆t anăn lu sư.
4Yôsep yak đơ̆ng Pơlei Nasaret, dêh char Galilê, năm tơ Pơlei Betlehem, dêh char Juđê, pơlei Đawit sơ̆, yua kơ sư kon sâu adrĕch adrung Đawit. 5Thoi noh sư năm chih tơmơ̆t anăn sư tơ lăm sơ̆p hla bơar hơdai hăm Mari bơngai mă sơkơ̆t hăm sư, sư oei anăp.
6Lăm năr bre sư oei tơ noh, truh kơ khei 'năr Mari boih, 7klaih kơ noh sư tơpŭ kơ minh 'nu kon kơdră sư. Sư tơsu kơ kon sư minh blah khăn, klaih kơ noh tơ'bĭch kơpal 'nhĕt kro tơ lăm war rơmo yua kơ ưh kơ đei anih boih lăm hnam 'bĭch tơmoi.
Linh jang 'lơ̆ng roi kơ bơngai wei triu tơdrong đe tơpŭ kơ Yêsu
8Jê̆ pơlei noh đei lu bơngai wei triu kral kơmăng wei-lăng triu sư tơ bri. 9Minh 'nu linh jang 'lơ̆ng Kră Yang năm tơ'bôh kơ lu sư. Tơdrong mơsêh mơyang pơchrang hơdah tăp dăr kơ lu sư. Lu sư hli tơtey. 10Linh jang 'lơ̆ng khan kơ lu sư: “Iĕm 'nĕ kơ hli, yua kơ inh wă roi kơ iĕm tơdrong 'lơ̆ng, tơdrong mă đĭ-đăng kon bơngai 'nă hal. 11Măng 'nâu tơ pơlei Đawit, đe tơpŭ kơ minh 'nu 'Bok Dŏng Pơklaih, 'Bok Kră Yang, Krist. 12Tơdrong 'nâu wă tơbăt kơ iĕm chă Sư: Iĕm gô 'bôh minh 'nu kon nge tơsu khăn, tơ'bĭch kơpal 'nhĕt kro lăm war rơmo.”
13Klaih kơ noh lu sư 'bôh blư bla linh jang 'lơ̆ng lơ tơpă dơ̆ng hơdai păng buăl sư mă jur hơdrol. Lu sư hơri bơnê kơ Kră Yang 'Bok Kei-Dei thoi âu:
14“Ư-ang kơ 'Bok Kei-Dei mă oei tơ plĕnh ti.
Sư wă ăn hiôk-hian kơ lu bơngai mă Sư lăp đon tơ ala teh âu.”
15Đang kơ lu linh jang 'lơ̆ng hơri păng wih tơ plĕnh đơ̆ng lu sư, lu bơngai wei triu ei pơma tơduă lu sư: “Bĕ bơ̆n năm tơ Pơlei Betlehem chă lăng tơdrong mă Kră Yang 'Bok Kei-Dei 'nao roi kơ bơ̆n.”
16Na lu sư kơdâu brŏk tơ Pơlei Betlehem. Lu sư chă na 'bôh Mari hăm Yôsep păng 'bôh kon nge oei 'bĭch kơpal 'nhĕt kro.
17'Bôh thoi noh boih lu bơngai wei triu ră roi đêl tơdrong linh jang 'lơ̆ng tơbăt kơ lu sư gah kon nge 'noh. 18Lu đe wang hlĭch hlăch kơtơ̆ng lu bơngai wei triu ră roi tơdrong noh. 19Mari 'blŏk hơdơ̆r tơdrong noh, klaih kơ noh tơchĕng lăm đon sư kơdih. 20Lu bơngai wei triu wih, bơnê kơkuh kơ 'Bok Kei-Dei yua kơ lu sư kơtơ̆ng hăm 'bôh tơdrong noh lei-lăi thoi linh jang 'lơ̆ng đei khan kơ lu sư.
Mĕ 'bă Yêsu pơyơ̆r Sư kơ 'Bok Kei-Dei
21Lăp nge Yêsu truh tơhngam năr boih na đe kăt tơdra akar Sư păng anăn hloi Sư Yêsu kiơ̆ kơ linh jang 'lơ̆ng pơkă ăn kơ sư hơdrol kơ nge sư tam đei lăm klak mĕ Sư sơ̆.
22Truh kơ năr mĕ Sư wă hơmet akâu kiơ̆ thoi tơdrong juăt Môis pơkă sơ̆, na mĕ 'bă Yêsu anhăk Sư năm tơ Pơlei Jêrusalem. Sư kư̆m wă pơyơ̆r Yêsu kơ Kră Yang 'Bok Kei-Dei tơ ei mơ̆n. 23Bre sư pơm thoi noh wă kơ kiơ̆ thoi đe chih lăm tơdrong juăt Kră Yang thoi âu: “Rim kon gơgơ̆l, iĕm athei pơyơ̆r kơ Kră Yang ngăl.”
24Na bre sư kư̆m soi sơmah kơ Kră Yang 'Bok Kei-Dei kiơ̆ kơ đe chih lăm tơdrong Kră Yang sơ̆ khan: “Iĕm soi sơmah kơ 'Bok Kei-Dei minh agrop sem kơmuŏl dah 'bar tŏ kon kơtơp.”
25Tơ Pơlei Jêrusalem ei đei minh 'nu bơngai anăn sư Simiôn. Sư bơngai 'lơ̆ng tơpăt kư̆m lui kơjăp păng chang gô 'Bok Kei-Dei wơh 'Bok Krist dŏng pơklaih lu bơngai Isơrael. Na Yang Bơhngol 'Lơ̆ng oei hơdai păng sư. 26Yang Bơhngol 'Lơ̆ng tơbăt ăn kơ sư, hơdrol sư lôch sư gô 'bôh 'Bok Krist mă 'Bok Kei-Dei wơh wă pơklaih kon bơngai bơ̆n. 27Na Yang Bơhngol 'Lơ̆ng athei Simiôn mơ̆t lăm hnam akŭm 'Bok Kei-Dei tơm. Lăp mĕ 'bă Yêsu anhăk Yêsu mơ̆t tơ noh boih wă pơyơ̆r Sư kơ 'Bok Kei-Dei kiơ̆ kơ tơdrong juăt Kră Yang pơkă, 28na Simiôn iŏk pôk Yêsu, krao khan bơnê kơ 'Bok Kei-Dei thoi âu:
29“Ơ Kră Yang, dang ei Ih ăn kơ inh mă đĭch Ih âu lôch achăng lê̆ teh đak âu hiôk-hian.
Kiơ̆ thoi Ih khan kơ inh sơ̆,
30-31na dang ei inh 'bôh boih bơngai mă Ih wơh wă dŏng pơklaih đĭ-đăng kơ khŭl kon bơngai nhôn.
32Sư dang pơchrang tơdrong hơdah kơ đĭ-đăng kơ khŭl bơngai tam mă lui kơ Ih, 'noh wă tơbăt ăn kơ lu sư tơdrong Ih.
Sư gô ăn kơ lu đe Isơrael, bơngai mă kiơ̆ Ih, jing hiôk tơpă.”
33Na mĕ 'bă Yêsu kơtơ̆ng Simiôn roi gah tơdrong Yêsu hơdrol na bre sư hlĭch hlăch kơ đon tơpă. 34Đơ̆ng noh Simiôn apinh 'Bok Kei-Dei tơgŭm bre sư. Sư kư̆m khan kơ Mari thoi âu: “'Bok Kei-Dei ăn kơ bơ̆n kon nge âu wă tơgŭm lu bơngai Isơrael jing hiôk, mă-lei lu bơngai kuă kơ lui kơ Sư jing răm. Sư bơngai 'Bok Kei-Dei ăn wă tơgŭm bơ̆n ră mă-lei đei lơ bơngai gô pơjĭp pơjăm Sư. Yua kơ thoi noh na bơ̆n gô băt jơhngơ̆m lu đe ei kơnê̆ tơpă. 35Păng ih kư̆m gô tơ'bơ̆p lơ tơdrong sơ'ngon tơpă mơ̆n ning-mônh, yua kơ dôm tơdrong đe pơm kơnê̆ kơ kon ih.”
36Na đei minh 'nu yă kră khŭl bơngai Isơrael. Sư kư̆m juăt kơ pơtruh nơ̆r 'Bok Kei-Dei mơ̆n. Anăn sư Anna, kon Phanwel. Sư adrĕch adrung Aser. Sư kră tơpă boih. Sơ̆ sư oei hơdai klo sư tơpơh sơnăm, klaih kơ noh klo sư lôch. 37Na sư adro oei oăi minh drô̆ truh kơ sư tơhngam-jĭt puăn sơnăm boih. Na sư ưh pă đei lĕch ngôi đơ̆ng hnam akŭm 'Bok Kei-Dei tơm boih. Sư oei lăm noh, sư ơ̆t kơ por krao khan măng năr. 38Na sư kư̆m năm tơ mĕ 'bă Yêsu mơ̆n. Sư bơnê kơ 'Bok Kei-Dei păng roi lê̆ hơdrol gah tơdrong Yêsu kơ đĭ-đăng lu bơngai mă chang gô 'Bok Kei-Dei pơklaih lu kon pơlei Jêrusalem.
Yêsu păng mĕ 'bă Sư wih tơ Pơlei Nasaret
39Lăp mĕ 'bă Yêsu pơm tôm tơdrong kiơ̆ kơ tơdrong juăt 'Bok Kei-Dei pơkă boih, na lu sư brŏk tơ Pơlei Nasaret, pơlei sư kơdih tơ dêh char Galilê. 40Na Yêsu rai đunh rai wơ̆ kư̆m đei jơhngơ̆m pran. Sư kư̆m 'bơ̆r đon hlôh wao tôm tơdrong. 'Bok Kei-Dei lăp đon kơ Sư tơpă tơgŭm Sư ling-lang.
41Rim sơnăm trŏ kơ năr giĕng mă đe anăn Giĕng Năm Brih na bre mĕ 'bă Yêsu juăt kơ năm tơ Pơlei Jêrusalem. 42Lăp Yêsu truh tơ mơjĭt-'bar sơnăm boih Sư kư̆m hơdai kiơ̆ mĕ 'bă Sư năm tơ Pơlei Jêrusalem wă kơ pơm rok kiơ̆ tơdrong juăt Năr Giĕng Năm Brih ei. 43Lăp đe pơm giĕng đang boih na mĕ 'bă Yêsu pơtơm brŏk tơ Pơlei Nasaret, mă-lei Yêsu oei ngôi tơ Pơlei Jêrusalem. 44Na mĕ 'bă Sư ngêh kơ Yêsu kư̆m brŏk hơdai păng lu bôl buăl 'nhŏng oh Sư. Na bre sư yak prăt năr rok trong brŏk tơ pơlei. Truh kơsơ̆ boih bre sư chă ră Yêsu tơ buôl buăl sư, 45mă-lei ưh kơ 'bôh. Na năr dơning bre sư hơlơ̆k năm chă tơ Pơlei Jêrusalem dơ̆ng, mă-lei ưh kơ 'bôh. 46Na lăp năr đơ̆ng rŏng dơ̆ng na bre sư 'bôh Sư tơ lăm hnam akŭm 'Bok Kei-Dei tơm tơ Pơlei Jêrusalem. Sư oei hơdai păng lu 'bok thây wă kơ mơ̆ng lu sư bơtho, na Sư kư̆m jet lu đe noh mơ̆n. 47Na đĭ-đăng lu bơngai oei 'bơ̆t ei mơ̆ng Yêsu sơleng kơ đon yua kơ Yêsu tơl lu sư hơgei tơpă.
48Lăp mĕ 'bă Yêsu 'bôh Sư tơ noh na bre sư chrêu kơ đon, na mĕ Sư khan kơ Sư thoi âu: “Ơ dăm, yua kơ kiơ Ih pơm kơ nhi thoi âu? Nhi 'bă Ih chă Ih tôch đon hli kơ Ih hiong.”
49Na Yêsu khan kơ mĕ 'bă Sư: “Biĕm chă kiơ kơ Inh jơ̆p-jang? Biĕm ưh kơ băt kơ Inh wă hăt kơ jang tơdrong 'Bă Inh âu dah kiơ?”
50Mă-lei bre sư ưh kơ hlôh Yêsu wă pơma kiơ.
51Đơ̆ng rŏng kơ 'nei na Yêsu brŏk kiơ̆ mĕ 'bă Sư tơ Pơlei Nasaret. Sư chu yom kơ mĕ 'bă Sư ling-lang. Na mĕ Sư oei tơchĕng 'blŏk ling-lang kơ tơdrong noh hei păng dôm tơdrong đe khan lê̆ hơdrol gah kon sư, mă đơ̆ng sơ̆.
52Na Yêsu 'brư̆ kơ khei 'brư̆ kơ sơnăm rai 'lŏ rai hơgei, mă 'Bok Kei-Dei mă kon bơngai kư̆m lăp đon kơ Sư ngăl.
Yôhan bơtho đe
Currently Selected:
:
Highlight
Share
Copy
Want to have your highlights saved across all your devices? Sign up or sign in
©Bahnar Bible Association. All rights reserved.