Bɛ̈n 10
10
Gɔɔt
1Go Bɛ̈nydït lɛ̈k Mothe an, “Lɔ tëde melik. Acä tɔ ril nɔm kekë bänyke ke ya bï göökkï nyuɔɔth ë kenïïm, göök ke gäi. 2Gök ke gäi abä keek looi, ke bäk lɔ̈ɔ̈k aa lɛ̈ŋ mïthkun, ku mïth ke mïthkun, nɔn cän kɔc ke Rip leeŋ wëi. Abäk jɔ ŋic wedhie nɔn Yan Bɛ̈nydït.”
3Go Mothe lɔ tëde melik kekë Aron, ku lek lɛ̈k en an, “Acïï Bɛ̈nydït Nhialic de Ɣeberuu lueel an, ‘Bä jamdï jɔ rɛɛc piŋ agut cï nɛn? Tɔ kɔckï jäl lek A lam. 4Na lɔ ŋoot ke yï jai, yɛn bï gɔt bɛ̈ɛ̈i pinydu miäk. 5Abïk juëc aläl ka bïk piny kum nɔm. Ku abïk këriëëc cam ëbɛ̈n, kë wään cïï deŋ ë kɔɔi both ke kën riɔ̈ɔ̈k, ayï tiim roor wään cï döŋ. 6Ku abïk ɣöndu thiɔ̈ɔ̈ŋ ku thiäŋkï ɣööt ke bänyku kedhie, ku ɣööt ke kɔc ke Rip ayadäŋ. Abïk aa kërɛɛc cïn kë thöŋ ke yen cïï kuarkun kɔn tïŋ ë caŋ thɛɛr aɣët cï wälë.’ ” Go Mothe rɔt puk, ku jël në melik lɔ̈ɔ̈m.
7Go bäny ke melik e lɛ̈k melik an, “Raanë bï jɔ cieŋ ke yïn wo karɛc agut cï nɛn? Tɔ kɔc ke Yithriɛl jäl, lek Bɛ̈nydït Nhialicden lɔ̈ŋ. Kɛ̈në tïŋ luɔi cïï Rip riääk?”
8Go melik Mothe tɔ puk e nɔm kekë Aron, ku lëk keek an, “Wek cä päl jäl lak läŋkï Bɛ̈nydït Nhialicdun. Ee yï ŋa bï lɔ në weyiic?”
9Go Mothe bɛ̈ɛ̈r an, “Ee wook wodhie wok lɔ, kɔcdït ku mïth. Mïthwät ku duet, ku ɣɔ̈k, ku thök. Në baŋ bï wok dhuëëŋ lɔ looi ëtɛ̈ɛ̈n, door wok Bɛ̈nydït.”
10Go melik lueel an, “Yɛn ë kuëëŋ në Bɛ̈nydït, diäärkun, ayï mïth acïkï bï lɔ në week! Adhil dɛ kërɛɛc cäk tak në wepiɔ̈ɔ̈th. 11Yɛn ë jai taitai, röör kek lɔ kapäc, lek Bɛ̈nydït lɔ̈ŋ na ee yen kaarkï.” Ku ëtɛ̈ɛ̈n, yï Mothe acï ke bɛ̈n cuɔp wei në melik lɔ̈ɔ̈m.
12Go Bɛ̈nydït lɛ̈k Mothe an, “Yaakë yïcin nhial piny ë Rip, ke gɔt ë bï bɛ̈n. Abïk këriëëc ee cil cam ëbɛ̈n, kë cïï deŋ ë kɔɔi both.” 13Na wën, ke Mothe yɔɔk thienyde nhial, go Bɛ̈nydït yom aköl amiäk tɔ put në cool de ee köölë, ku wɛ̈ɛ̈rde. Na ɣɔn amiäk, ke bïï gɔt. 14#Nyu 9:2,3. Gɔt aa bɔ̈ ke ye luny, ku nyuuc piny ë Rip ëbɛ̈n. Aa ye luny dïït ë gɔt, luny kënë kɔn tïŋ ë caaŋde, ku acïï bï bɛ nyɔk ë tïŋ ë yen. 15Aake cï piny kum abïï piny cuɔl ke keek. Ku camkï tiim, ku këriëëc wään cïï deŋ ë kɔɔi both ëbɛ̈n. Acïn töŋ ë këtɔ̈c cï bɛ̈n döŋ piny ë Rip ëbɛ̈n, nɔn yen tim, ku nɔn yɛn wäl roor.
16Na wën, ke melik ë dap Mothe tɔ cɔl kekë Aron, ku lëk keek an, “Yɛn ë Bɛ̈nydït Nhialicdun luöi kërac, ku luöi week kërac aya. 17Ku ënɔɔnë, pälkï yɛn ee kërɛɛcdiënë, ku läŋkï Bɛ̈nydït Nhialicdun takï nyɛɛi këtuucë tëde yɛn, ee kë nɛ̈k.” 18Na wën, ke Mothe ë jäl ë melik lɔ̈ɔ̈m, ku le Bɛ̈nydït lɔ̈ŋ. 19Go Bɛ̈nydït yom aköl amiäk puk nɔm në amaŋdïït bɔ̈ të lɔ aköl athɛ̈i. Go amaŋ gɔt gɔp, le luöp ë Wɛ̈ɛ̈r Thithic#10:19: Wɛ̈ɛ̈r de Thuedh: Tïŋ Wɛ̈ɛ̈r Thith 13:18. abï ciɛ̈n gɔn töŋ dɔ̈ŋ piny ë Rip taitai. 20Go Bɛ̈nydït melik tɔ ril nɔm, go melik mïth ke Yithriɛl pɛ̈n jäl.
Mɔ̈ɔ̈th
21Go Bɛ̈nydït bɛ lɛ̈k Mothe an, “Yaakë yïcin nhial, ku mɔ̈ɔ̈th dïït lɔ cɔ̈t abï bɛ̈n piny ë Rip, mɔ̈ɔ̈th dïït duëërë jak.” 22#Diɛt 105:28; Nyu 16:10. Na wën, ke Mothe ë yɔɔk yecin nhial, go piny aa mɔ̈ɔ̈th lɔ kudum paan ë Rip ëbɛ̈n në nïn yiic kadiäk. 23Go kɔc ke Rip röt cuök tïŋ, ku cïn raan jäl baaide në ee nïnkë yiic. Ku ɣään rëër ë kɔc ke Yithriɛl thïn kedhie ariaukï yiic.
24Na wën, ke melik ë cɔl Mothe, ku lëk en an, “Lak läŋkï Bɛ̈nydït wedhie në diäärkun, ayï mïthkun. Ku nyääŋkï ɣɔ̈kkun piny eenë, ayï thökkun.”
25Go Mothe gam lɛ̈k en an, “Yïn bï wo päl ka buk lɔ nɔ̈k, ayï miɔ̈c ye nyop ëbɛ̈n. Ke wo bï Bɛ̈nydït Nhialicda lɔ näk. 26Ei, ɣɔ̈kka abuk keek kuaath kedhie, acïn töŋ bï döŋ. Ku wook gupkuɔ, ee wok abï ka bïï lɔ näk Bɛ̈nydït Nhialicda lɔc. Ku të kën wok kɔn ɣet ëtɛ̈ɛ̈n, acïn luɔi duëër wok kë bï lɔ näk Bɛ̈nydït ŋic.”
27Go Bɛ̈nydït melik tɔ ril nɔm, ago ke kɛ̈n tɔ jël. 28Go melik lɛ̈k Mothe an, “Jël në yanyin! Du rɔt be tɔ tiëŋ! Na la yï tïŋ, yïn bï thou!”
29Go Mothe puk nɔm an, “Jamdu ee yic, yïn cïï ya bï bɛ nyɔk ë tïŋ.”
Currently Selected:
Bɛ̈n 10: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
