Bɛ̈n 8
8
Agueek
1Ke lëk ë Bɛ̈nydït Mothe an, “Lɔ tëde melik, lɔ lɛ̈kë yen an acïï Bɛ̈nydït lueel an, ‘Tɔ kɔckï jäl lek A lam. 2Na lɔ jai, agueek abä ke tɔ thiäŋ piny. 3Kiir abï thiäŋ kekë agueek, ka abïk Kiir nyääŋ piny, ku lek baaidu. Kɔ̈k abïk ɣet ɣöt thïn të yïn niinë, ku lek lɔ nhial agendu nɔm. Ku kɔ̈k abïk lɔ në ɣööt ke bänyku yiic, ku lɔ kɔ̈k në ɣööt ke kɔcku yiic. Ku kɔ̈k abïk kɛɛc në purundu yic, ku kɛɛc kɔ̈k në guölkuön ke wuööriic. 4Abïk aa kɛɛc ë yïguöp, ku kɛɛckï në kɔcku gup, ku kɛɛckï në bänyku gup.’ ”
5Ago Bɛ̈nydït lɛ̈k Mothe an, “lɛ̈kë Aron, tɔ yɛɛk thienyde nhial në pïïu nïïm, pïïu ke aleel ku awuul, ku ë tɔ agueek bɔ̈ bei bïk piny ë Rip bɛ̈n thiɔ̈ɔ̈ŋ.” 6Ago Aron thieec yaak nhial në pïïu nïïm ëbɛ̈n, go agueek bɛ̈n bei wïïr ë ke juëc, ku thiäŋkï piny ë Rip ëbɛ̈n. 7Ago tït tïïtden looi ayadäŋ, agokï agueek tɔ bɔ̈ bei wïïr ayadäŋ.
8Ago melik Mothe cɔɔl kekë Aron ku lëk keek an, “Läŋkï Bɛ̈nydït ke bï agueek nyaai, ku yɛn bï kɔckun puɔ̈l ajäl lek Bɛ̈nydït näk.”
9Go Mothe puɔ̈k nɔm en an, “Apiɛth aläl, yɛn bï lɔ në biäkdu. Thaar yen nyuöthë yɛn thar bän lɔ̈ŋ në biäkdu, ku në biäk de bänyku, ku në biäk de kɔcku. Ku agueek abïk nyaai abï ciën agueŋ bï döŋ, aa agueek nu Kiir kapäc.”
10Go melik lɛ̈k en an, “Läŋë në biäkdï miäk.”
Go Mothe lɛ̈k en an, “Apiɛth, yɛn bï lɔ̈ŋ në biäkdu miäk, ke bä jɔ ŋic nɔn cïn en Bɛ̈nydït däŋ kït ke Nhialicda. 11Agueek abï ke nyaai ɣöndu, ku nyɛɛiyë ke në ɣööt ke bänyku yiic, ayï ɣööt ke kɔcku. Ka acïn agueŋ däŋ bï bɛ nu, abï döŋ ke ye agueek nu Kiir kapäc.” 12Ago Mothe jäl në melik lɔ̈ɔ̈m kekë Aron. Na wën, ke Mothe ë läŋ Bɛ̈nydït, luɔi nyɛɛi yen agueek, cït man cïï melik e lɛ̈k en. 13Go Bɛ̈nydït agueek nyaai cït man cïï Mothe ye lueel. Go agueek nu në ɣöötiic thou, ku thou agueek nu në kɛ̈liic, ayï agueek nu në duumiic. 14Ago kɔc ke Rip ke thɔɔc nïïm në akuut dït. Gokï piny tɔ ŋuäc ëbɛ̈n. 15Na wën, aa tïŋ ë melik agueek acï thou, ke be nɔm riɛlde ŋak, cït man cïï Bɛ̈nydït e lueel an melik acïï jam de Mothe bï piŋ kekë Aron.
Dhiëër
16Go Bɛ̈nydït lɛ̈k Mothe an, “lɛ̈kë Aron ë yup piny në thienyde, ku të lɔ aköl athɛ̈i abï rɔt puk ke ye dhiëër piny ë Rip ëbɛ̈n.” 17Ago Aron piny yup në thienyde, go të lɔ aköl athɛ̈i rɔt puk ëbɛ̈n ke ye dhiëër ë kɔc paat gup, ku pɛɛt läi. 18Ago tït e them nɔn tɔ kek të lɔ aköl athɛ̈i puk rɔt aye dhiëër, gokï kɛ̈n lëu. Dhiëër ë piny ë Rip bɛ̈n paat ëbɛ̈n. 19#Luk 11:20. Go tït lɛ̈k melik an, “Ee Nhialic yen ë loi ee kënë!” Go melik nɔm riɛl bɛ ŋoot ke ŋɛk cït man cïï Bɛ̈nydït e lueel an melik acïï jam de Mothe bï piŋ kekë Aron.
Luaŋ
20Go Bɛ̈nydït lɛ̈k Mothe an, “Miäk aduduur, ke yï lɔ tëde melik, të yen lɔ në wɛ̈ɛ̈r yɔu. Lɔ lɛ̈kë yen an acïï Bɛ̈nydït lueel an, ‘Tɔ kɔckï jäl lek A lam. 21Na cïï keek tɔ ajäl, wek bä tuöc luaŋ ɣöndu, ayï ɣööt ke bänyku, ayï ɣööt ke kɔcku. Ka ɣööt ke kɔc ke Rip abïk thiäŋ në luaŋ ëbɛ̈n, alɔ pëk në piny kɛ̈ɛ̈c kek në yenɔm. 22Ku piny ë Gocen nu kɔckï thïn, abä gël ka acïn luaŋ bï lɔ thïn. Abä luöi week aya, ke bäk jɔ ŋic nɔn Yan Bɛ̈nydït, ku ŋiɛckï nɔn nuö Yɛn ee pinyë. 23Ku kɔckï abïk dɛ akeu#8:23: Gäär thɛɛr däŋ akeu; Ɣeberuu wɛ̈ɛ̈r. në kɔcku. Ku kënë abï rɔt looi miäk.’ ”
24Na wën, ke Bɛ̈nydït ë tɔ athuŋ ë luaŋ lëu Rip, thiëëŋ ɣöndïït ë melik, ku thiɔ̈ɔ̈ŋ ɣööt ke bäny ke melik. Go luaŋ piny ë Rip riɔ̈ɔ̈k ëbɛ̈n.
25Go melik Mothe cɔɔl kekë Aron, ku lëk keek an, “Lak näkkï Nhialic piny ë Rip eenë.”
26Go Mothe puk nɔm an, “Acïï rɔt bï lëu buk Bɛ̈nydït näk eenë. Kɔc ke Rip abïk piɔ̈ɔ̈th diu në kakan buk näk Bɛ̈nydït, Nhialicda. Na lek piɔ̈ɔ̈th diu, abïk wook biɔ̈ɔ̈k në döt ku näkkï wook. 27Ka aŋuɛ̈ɛ̈n ë luɔi jël wok, nömku nïn kadiäk ë jɔ̈ɔ̈ric ke wo cath lok Bɛ̈nydït Nhialicda näk ëtɛ̈ɛ̈n, cït man cïï En e lɛ̈k wook.”
28Go melik lɛ̈k keek an, “Të cä wek en bï lɔ baaric tëmec, ke we bä tɔ jäl lak Bɛ̈nydït Nhialicdun näk ë jɔ̈ɔ̈ric. Ku ënɔɔnë, läŋkï në biäkdï.”
29Go Mothe lueel an, “Bɛ̈nydït abä lɔ lɔ̈ŋ të lan lɔ biic eenë, luɔi bï Yen luaŋ nyaai tëde yï miäk, ku nyɛɛi tëde bänyku, ku tëde kɔcku kedhie. Ku duk wo be math, ku bä kɔc bɛ pɛ̈n jäl lek Bɛ̈nydït näk.”
30Na wën, ke Mothe jäl në melik lɔ̈ɔ̈m, ku le Bɛ̈nydït lɔ̈ŋ. 31Go Bɛ̈nydït luaŋ nyaai cït man cïï Mothe ye lueel. Go luaŋ jäl tëde melik, ku jël tëde bäny ke melik, ku jël tëde kɔcke. Acïn luaŋ töŋ cï bɛ̈n döŋ. 32Go melik nɔm riɛlde bɛ ŋoot ke ŋɛk, go kɔc bɛ pɛ̈n jäl.
Currently Selected:
Bɛ̈n 8: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
