Cäk 11

Ɣön bɛ̈ɛ̈r ë Babilon

1Piny nɔm ëbɛ̈n, aa de thoŋ tök. Ku kɔc aake ye jam ë jam tök. 2Na ɣɔn, acïk kuɛɛth të lɔ aköl amiäk, ke ke yök riaaŋ cï rɔt rai ke kït nɔm në Babilonia. Agokï piɔ̈ɔ̈t thïn ëtɛ̈ɛ̈n. 3Na wën, ke jɔkï lɛ̈k röt kapäc an, “Loiku thoop ku nyopku keek.” Agokï dɛ thom ë yïk, ku kë col nyin lɔ duäkduäk bï thoop muk. 4Agokï lueel an, “Yïkku wundït, ku aloocdïït bäär, aloocdïït bï nɔm ɣet paannhial. Ku tɔku rinkuɔ tiëc, ke wo cï bï thiëi ë piny nɔm ëbɛ̈n.”

5Ago Bɛ̈nydït bɛ̈n piny, bï wun dït bɛ̈n tïŋ kekë aloocdïït bäär, ɣön cïï kɔc ke piny nɔm yïk. 6Go Bɛ̈nydït lueel an, “Kɔckë ayek tök, ku adekï nïïm thoŋ tök kedhie. Ku kë cïk gɔl në luɔi kï, acïn kë bï keek aa pɛ̈n kë cïk tak në luɔi. 7Bäkï, ya lɔ piny, la thoŋden liääpic ke ke cïï bï bɛ piŋ ë röt.” 8Go Bɛ̈nydït ke thiäi ë piny nɔm ëbɛ̈n, gokï yïŋ ë wun dït puɔ̈l. 9Ku ëtɛ̈ɛ̈n, yen aa jɔ rin ke ee wunë bɛ̈n aa cɔɔl an Babel.#11:9: Babilon: Rinkë në Ɣeberuu acït “liääpic.” Në luɔi cï Bɛ̈nydït thoŋ ë kɔc ke piny nɔm ëbɛ̈n liääpic ëtɛ̈ɛ̈n. Ku thiëi keek ë piny nɔm ëbɛ̈n.

Käu de Cem

(1 Lëk 1:24-27)

10Kakë ee käu de Cem. Na ɣɔn, aacï run ka amool aa rou, run ë thöök en, ku cï run ke Cem aa bɔt, ke Cem ë dhiëth wëndɛn Arapakad. 11Ku Cem ë bot kadhïc ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

12Ɣɔn cï run ke Arapakad aa thiërdiäk ku dhïc, ke dhiëth wëndɛn Cila. 13Ku Arapakad ë bot kaŋuan ku diäŋ ë run bɛ̈n lɔ̈ɔ̈k thöl ke pïïr në dhiënh ë Cila cök, go mïth kɔ̈k dhiëëth, mïthwät ku duet.

14Ɣɔn cï run ke Cila aa thiërdiäk, ke dhiëth wëndɛn Eber. 15Ku Cila ë bot kaŋuan ku diäŋ ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

16Ɣɔn cï run ke Eber aa thiërdiäk ku ŋuan, ke dhiëth wëndɛn Pelek. 17Ku Eber ë bot kaŋuan ku thiërdiäŋ ë run bɛ̈n lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

18Ɣɔn cï run ke Pelek aa thiërdiäk, ke dhiëth wëndɛn Riu. 19Ku Pelek acï bot kaarou ku dhoŋuan ë run lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

20Ɣɔn cï run ke Riu aa thiërdiäk ku rou, ke dhiëth wëndɛn Thiruk. 21Ku be Riu bot kaarou ku dhorou ë run thöl ke pïïr, go mïth kɔ̈k dhiëëth, mïthwät ku duet.

22Ɣɔn cï run ke Thiruk aa thiërdiäk, ke dhiëth wëndɛn Naɣor. 23Ku Thiruk ë bot kaarou ë run lɔ̈ɔ̈k thöl ke pïïr, go mïth kɔ̈k dhiëëth, mïthwät ku duet.

24Ɣɔn cï run ke Naɣor aa thiërrou ku dhoŋuan, ke dhiëth wëndɛn Tera. 25Ku Naɣor acï bɔt ë run ku thiëër ku dhoŋuan lɔ̈ɔ̈k thöl ke pïïr. Go mïth kɔ̈k dhiëëth, mïthwät ku duet.

26Ɣɔn cï run ke Tera aa thiërdhorou, ke dhiëth wëndɛn Abram kekë Naɣor ku Ɣaran.

Käu de Tera

27Kakë ee käu de Tera, wun Abram, kekë Naɣor ku Ɣaran. Ku Ɣaran ee yen ee wun Lɔt. 28Ku Ɣaran ëbɛ̈n guɔ thou ë Ur, wun man ë dhiëëthë ye thïn. Wun tɔ̈u piny ë Babilonia. Ku wun aa ŋoot ke pïïr. 29Ago Abram thiëëk kekë Naɣor. Tiiŋ ë Abram acɔl Tharai, ku tiiŋ ë Naɣor acɔl Milka. Ku Milka kekë Yithka ee duet ke Ɣaran. 30Ku Tharai aaye rol, acïn mɛnh ë cï dhiëëth.

31Ago Tera jäl ë Ur kekë Abram wënde, ku Lɔt wën ë wëndɛn Ɣaran, ku lɔ Tharai tiiŋ de Abram wënde. Jëlkï piny ë Babilonia lek piny ë Kanaan. Na wën, aa lek ɣet wun cɔl Ɣaran, ke ke piäät thïn ëtɛ̈ɛ̈n. 32Run ke Tera aake cï aa bot kaarou ku dhïc, ku jɔ bɛ̈n thou në Ɣaran ëtɛ̈ɛ̈n.

Currently Selected:

Cäk 11: dip-JPB

Highlight

Copy