Cäk 13

Puɔ̈k de Abram kekë Lɔt

1Go Abram jäl piny ë Rip ke lɔ Piny ë Kanaan thar ciëën ya, të lɔ wöuwic kekë tiiŋde, ku kakɛn nu tëde keek kedhie. Ku Lɔt aa cath ke keek. 2Abram aa kueth aläl, ade nɔm luny ë thök ku ɣɔ̈k, ku ade nɔm ateek, ku adhɛ̈p juëc. 3Ago bɛ kuëëth ëtɛ̈ɛ̈n ke lɔ Bethel. Go ɣet ë kaam de Bethel kekë Ai, tëdɛn wään tueŋ kɔn en paanyde piäät thïn. 4Të wään tueŋ cï en Bɛ̈nydït kɔn yiëk yïk thïn. Ago Abram Bɛ̈nydït jɔ lɔ̈ŋ ëtɛ̈ɛ̈n.

5Ku Lɔt ɣɔn ciɛth en ke Abram, ade nɔm luny ë thök, ku luny ë ɣɔ̈k ayadäŋ. Ku ade baai, ku kɔc luui en. 6Ku piny akën ke bɛ̈n lɛɛr kedhie kaarou, në rëër tëtök, në luɔi ë juëc ë kaken aläl. 7Wël aake ye röt looi në kaam ë kɔc ee ɣɔ̈k ke Abram tiit, në kɔc ee ɣɔ̈k ke Lɔt tiit. Ku kɔc ke Kanaan ayï kɔc ke Peridh aake ŋoot ke ke rɛ̈ɛ̈r në pinyë yic.

8Ago Abram lɛ̈k Lɔt an, “Yɛn wo yïn, wok ee kɔc tök. Kɔc luui yɛn, ku kɔc luui yïn acïkï rɔ̈ŋ bïk aa gɔ̈th ë röt. 9Kënë ëbɛ̈n alɔ, ee piny lääu, puɔ̈kku. Lɔc të kɔɔr në yïpiɔ̈u. Na cï lɔ baŋ cam, ke yɛn bï lɔ ë baŋ cuëc, ku na ee baŋ cuëc yen cï lɔc, ke yɛn bï lɔ në baŋ cam.”

10 # Cäk 2:10. Go Lɔt yenyin jat nhial, go wak ë Jordan tïŋ ke ee yic dɛ pïïu juëc ë cieŋ, cït man ë dom de Bɛ̈nydït,#13:10: dom de Bɛ̈nydïtanyoth Dom de Eden. ku cït piny ë Rip të lɔ wun cɔl Dhowar. Ku ëtɛ̈ɛ̈n, ee të ɣɔn ŋoot ë Bɛ̈nydït ke kën Thɔdom guɔ riɔ̈ɔ̈k kekë Gomoora. 11Ago Lɔt rɔt lɔ̈c wak ë Jordan ëbɛ̈n, ku jël ke cök enɔm të lɔ aköl amiäk. Yen puɔ̈k ë puɔ̈k kek ka. 12Ago Abram piɔ̈ɔ̈t piny ë Kanaan, ku le Lɔt piɔ̈ɔ̈t në kɛm ke pɛ̈ɛ̈nydït në wakic. Ku ee jɔ kuëëth agut cï Thɔdom. 13Ku kɔc ke Thɔdom aake cï göök dït ke karɛc wäc Bɛ̈nydït.

Abram ë kuɛɛth Ɣebron

14Ɣɔn cï Lɔt puɔ̈k ke Abram, ke lëk ë Bɛ̈nydït Abram an, “Jatë yïnyin nhial, ku caathë piny nɔm ëbɛ̈n në yïnyin ke yï kääc ë tëduönë. Woi të lɔ rut, ku të lɔ wöuwic, ku woi të lɔ aköl amiäk, ku të lɔ aköl athɛ̈i. 15#Luɔi 7:5. Yïn bä gäm piny lɔ tïŋ ëbɛ̈n, wekë mïthkuön bï lɔ̈ɔ̈k tɔ̈u në yïcök aɣet athɛɛr. 16Yïn bä gäm mɛnh cït abuui. Na de raan lëu en bï abuui kueen, ka bï mïthku jɔ lëu në kuɛ̈n. 17Ku ënɔɔnë, lɔ caathë piny ëbɛ̈n, në luɔi bän e gäm yïn.” 18Go Abram kuëëth, ku le nyuc të thiääk ke tiim ke ɣok ke Mameer, në piny cɔl Ɣebron. Ku yïk Bɛ̈nydït yïk ëtɛ̈ɛ̈n.

Currently Selected:

Cäk 13: dip-JPB

Highlight

Copy