Leb 23
23
Dhuëëŋ ke Nhialic nu Yithriɛl.
1Go Bɛ̈nydït Mothe yɔ̈ɔ̈k, 2an, “Jam wekë kɔc ke Yithriɛl ku yɔ̈ɔ̈kë keek, kakë ayek dhuëŋken cä lɔc, abä lɛ̈k amatnɔm nɔn ye kek dhuëŋ ɣeriic. 3#Bɛ̈n 20:8-10; 23:12; 31:15; 34:21; 35:2; Nyöŋ 5:12-14. Wek de nïïm nïn kadhetem bä wek lui thïn, ku kööl de dhorou abï aa kööl de lɔ̈ŋ. Ee kööl de män ɣeric. Acïn luɔi bä dhil looi. Ee Thabath de Bɛ̈nydït në ɣöötkun yiic ëbɛ̈n. 4Kakë ayek dhuëŋ cï Bɛ̈nydït keek lɔc, kek amɛɛt ɣeriic, abä keek caal në aköölkɛn cï mäc keek.
Winythok kekë Kuïn Cïnic Luɔu
(Kuɛ̈n 28:16-25)
5 #
Bɛ̈n 12:1-13; Nyöŋ 16:1,2. Ku Winythok de Bɛ̈nydït abï looi në kööl ye pɛɛi de tök thok thiëër ku ŋuan gɔl thëën. 6#Bɛ̈n 12:14-20; 23:15; 34:18; Nyöŋ 16:3-8. Ku Dhuëëŋ de Kuïn Cïnic Luɔu abï rɔt gɔl në kööl ye pɛɛi thok thiëër ku dhïc, në ee pɛɛiyë yic, wek bï kuïn cïn yic luɔu cam në nin kadhorou yiic. 7Ku në kööl de dhuëëŋ wek bï amat ɣeric looi. Ku acïn luɔi bäk dhil looi. 8Në nin kadhorou yiic wek bï Bɛ̈nydït yiɛ̈n miɔ̈c cï looi ë mac. Ku abï dɛ amat ɣeric në kööl de dhorou, ku yen ee köölë wek cïï luɔiduön yak looi bï dhil looi thïn.
9Go Bɛ̈nydït Mothe yɔ̈ɔ̈k, 10an, “Yɔ̈ɔ̈k kɔc ke Yithriɛl wek bï lɔ piny bä gäm week ku wek bï ka cï luɔk thïn yök, ku në ee köölë wek bï dut tueŋ de kakuön cï kɔn luɔk dhil yiɛ̈n bɛ̈ny de kake Nhialic. 11Ku bɛ̈ny de kake Nhialic abï dut gam në Bɛ̈nydït nɔm, ago Bɛ̈nydït yïn jɔ gam, ku bɛ̈ny de kake Nhialic abï dut gam në kööl lɔ ë Thabath cök. 12Ku të lee yïn dut de rap gam, gamë nyɔɔŋ amääl ee ruöön tök, ke cïn guöp tëdak, ke ee miɔ̈c ye nyop ëbɛ̈n de Bɛ̈nydït. 13Ku yïn bï miɔ̈c ë rap dhil gam aya, kilɔɔ kaarou në aɣar cï liääp në miök de olip, ke ee miɔ̈c de këcam, yen atuöm de miɔ̈cë ee kë mit ë Bɛ̈nydït piɔ̈u. Ku kë bä gam kekë miɔ̈c ye dek ee litir töŋ ë mɔ̈u. 14Du rap ë piac luɔk ee cam ëbɛ̈n, ayï rɛɛp cï thaal, aɣët të bï yïn ee miɔ̈cë yiɛ̈n Nhialic. Yen ee löŋë abïï mïthke mïthku dhil döt në aköölnyïïn kedhie aɣët akööl bï bɛ̈n.
Dhuëëŋ de Tëm
(Kuɛ̈n 28:26-31)
15 #
Bɛ̈n 23:16; 34:22; Nyöŋ 16:9-12. Kuen dhorou raan dhorou ë gɔk gɔl në kööl ë bɔ̈ në thabath cök, thabath wään leer yïn miɔ̈c de anyuɔɔk ë kakuön cï luɔk ë Bɛ̈nydït nɔm. 16Ku në kööl de thiërdhïc në kööl lɔ në dhorou de thabath cök, gämë Bɛ̈nydït miɔ̈c ë rap në rɛɛp ë piac luɔk yiic. 17Në ë köölë bɛ̈ɛ̈i yë kuïïn cï pam kaarou në kuïïn paandu yiic bï bɛ̈n gam ke ee miɔ̈c abïk aa kilɔɔ kaarou de aɣar piath, cï thaal në luɔu, ke ee miɔ̈c ee nyuɔɔth de rɛɛp cï kɔn luɔk këde Bɛ̈nydït. 18Ku wek bï nyök kadhorou gam në kuïn cï pam ëtök, nyɔɔŋ ee ruöön tök, ku thɔn tök, ku nyök bɔɔth kaarou, ke cïn tëdak në kegup, abï keek dhil gam ke ke ye miɔ̈c ye nyop ëbɛ̈n de Bɛ̈nydït. Keek kedhie mɛ̈tkï në miɔ̈c ë rap ku miɔ̈c de mɔ̈u, atuɔ̈m de miɔ̈cë abï miɛt ë Bɛ̈nydït piɔ̈u. 19Ku wek bï nyɔɔŋ bou tök gam ke ee miɔ̈c de kërac ku nyök amɛ̈l kaarou ke ee miɔ̈c de mät. 20Ku bɛ̈ny de kake Nhialic abï nyök amɛ̈l kaarou nyuɔɔth ë Bɛ̈nydït nɔm, ke ee miɔ̈c de anyuɔɔk, keek kedhie, ayï kuïn cï pam de rɛɛp cï kɔn luɔk aya. Ayek ka ɣeriic tëde Bɛ̈nydït në biäk ë bɛ̈ny de kake Nhialic. 21Ku yen ee köölë manë guöp wek bï lɔ̈ŋ ɣeric looi, ku duökï lui thïn, kënë ee kë bïï lɔ̈ɔ̈k aa looi alɔ gut rem bï lɔ̈ɔ̈k bɛ̈n, abäk aa looi në ɣäänkuön rɛ̈ɛ̈r wek thïn.
22 #
Leb 19:9,10; Nyöŋ 24:19-22. Ku të tem yïn domdu, du ee tem ayï dom këc. Ayï ka cï lööny piny të tëm yïn du keek kuany. Päl ë keek kɔc kuanynyïïn kekë alɛi. Ee yɛn Bɛ̈nydït Nhialicdun.
Dhuëëŋ de Ruöön ë Piac bɛ̈n.
(Kuɛ̈n 29:1-6)
23Go Bɛ̈nydït Mothe yɔ̈ɔ̈k, an, 24“lɛ̈kë kɔc ke Yithriɛl an, ‘Në kööl tueŋ de pɛɛi ë dhorou, wek bï nïïm dhiɛl dɛ kööl de lɔ̈ŋ ɣeric. Kɔc abïk dhil guëër të töŋ de lɔ̈ŋ, ku jɔ gɔl thar ë kɛŋ bï keek kooth. 25Duökï lɔ në luɔɔi yic, ku gamkï miɔ̈c ee looi në mac Bɛ̈nydït.
Kööl de Wɛ̈ɛ̈r
(Kuɛ̈n 29:7-11)
26 #
Leb 16:29-34. Go Bɛ̈nydït Mothe yɔ̈ɔ̈k an, 27“Kööl de thiëër në ee pɛɛiyë yic, ee kööl de atɛɛm. Yak lɔ̈ŋ ɣeric looi tëtök, ku duökï cäm ee köölë, ku gämkï Bɛ̈nydït miɔ̈c ee looi në mac. 28Duökï lui në ee köölë, në biäk ee yen kööl de atɛɛm. Në biäk bï ë week teem gup ë Bɛ̈nydït Nhialicdun nɔm. 29Ku raan lɔ cam ë köölë abï nyaai në kɔcke Bɛ̈nydït yiic. 30Ku raan lɔ dɛ këdɛn looi në ee köölë abï Bɛ̈nydït nɔ̈k. 31Kek ee lööŋkë, abïk aa kakë kuatdun ëbɛ̈n, agut cï rem bï lɔ̈ɔ̈k bɛ̈n tëduön bä wek rɛ̈ɛ̈r thïn ëbɛ̈n. 32Ee kööl de löŋ de dhoŋuan ë pɛɛi agut cï lɔ piny de aköl në kööl ë thiëër. Yak ee köölë döt ke ee kööl de Thabath ë lɔ̈ŋ, ku ee köölë acïn kë bï cam.
Dhuëëŋ de Kɛ̈ɛ̈t
(Kuɛ̈n 29:12-40)
33 #
Nyöŋ 16:13-15. Go Bɛ̈nydït Mothe yɔ̈ɔ̈k an, 34“lɛ̈kë kɔc ke Yithriɛl an, ‘Në kööl de thiëër ku dhïc në pɛɛi de dhorou, Dhuëëŋ de Kɛ̈ɛ̈t abï rɔt gɔl, ku abï nïn kadhorou lɛɛr. 35Kööl tueŋ abï dɛ lɔŋ ɣeric de amatnɔm, duökï lui thïn. 36Në nïniic kadhorou wek bï miɔ̈c gäm Bɛ̈nydït miɔ̈c ee looi ë mac. Ku kööl ë bɛ̈t luɔikï lɔ̈ŋ ɣeric de amatnɔm, ku gämkï Bɛ̈nydït miɔ̈c ee nyop ë mac, ee kööl thiöökë lɔ̈ŋ de amatnɔm, duökï lui thïn.
37(Kakë ayek dhuëëŋ cïï Bɛ̈nydït keek lɔc, dhuëëŋ bä wek lɔ̈ŋ ɣeric de amatnɔm aa looi ku gämkï Bɛ̈nydït miɔ̈c ye nyop ëbɛ̈n ë mac, ku miɔ̈c ë rap, ku miɔ̈c ee nɔ̈k ku miɔ̈c ee dek, ka ye keek gam ë aköölnyïïn. 38Kek ee miɔ̈ckë amɛ̈tkï në miɔ̈c ee gam ë kööl de löŋ ë Bɛ̈nydït, ku mɛ̈tkï në miɔ̈cdun, ku kakuön ya wek ke kuëëŋ, ku miɔ̈c de miɛtëpiɔ̈u yak gäm Bɛ̈nydït.)
39Yeka, gɔl në köölë thiëër ku dhïc de pɛɛi ë dhorou, të cä wek rɛɛp kë pinydun thöl në tëm, jakï dhuëëŋ luɔi Bɛ̈nydït në nin kadhorou. Kööl tueŋ ee kööl de lɔ̈ŋ, ku kööl de bɛ̈t ee kööl de lɔ̈ŋ aya. 40Në kööl tueŋ wek bï mïth ke tiim piath nööm, ku nämkï yïth ke akööt ku yïth ke tiim dït, ku jakï piɔ̈ɔ̈th miɛt ë Bɛ̈nydït Nhialicdun nɔm në nin kadhorou. 41Guiɛɛrkï dhuëëŋ ke ee këde Bɛ̈nydït në nïn kadhorou ë ruöön yic ëbɛ̈n. Kënë abï kuatdun aa looi agut cï rem bï lɔ̈ɔ̈k bɛ̈n. Yak looi në pɛɛi de dhorou. 42Kɔc ke Yithriɛl kedhie abïk aa rɛ̈ɛ̈r në pɛɛi yic në nin kadhorou. 43Ago kuatdun ŋic nɔn cän Yithriɛl tɔ rɛ̈ɛ̈r në kɛ̈ɛ̈t yiic, wään bɛ̈ɛ̈i Yɛn keek bei paan ë Rip. Ee Yɛn Bɛ̈nydït Nhialicdun.
44Në ee kueerë yen aa jɔ Mothe kɔc ke Yithriɛl lɛ̈k lööŋ ke dhuëŋ cïï Bɛ̈nydït keek lɔc.
Currently Selected:
Leb 23: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.