Luk 13
13
Puk Rɔt në Karɛcku Yiic ku nɔn bä Thou
1Ku ade kɔc ë nu ëtɛ̈ɛ̈n ëköölë guöp kɔc ë lëk Yecu në këde kɔc ke Galili, kɔc wään cïï Pilato riɛmden liääp kekë kakɛn cïk lam ku näkkï ke. 2Go Yecu bɛ̈ɛ̈r, yöök keek an, “Në wek an rac kɔc ke Galilikë, awär kɔc ke Galili kedhie, luɔi cï kek ka cït ee kakë yök? 3Wek yɔ̈ɔ̈k an, acie yen, ku të kɛ̈n wek wepiɔ̈ɔ̈th puk, ke we bï thou wedhie cït man ë kek. 4Ayï kɔckë kathiëër ku bɛ̈t, kɔc wään cï aloocdïït bäär nu Thilowam wïïk ë kenïïm, ago ke nɔ̈k ë wek an rackï awär kɔc rɛ̈ɛ̈r ë Jeruthalem kedhie? 5Wek yɔ̈ɔ̈k an, acie yen, ku të kɛ̈n wek wepiɔ̈ɔ̈th puk, ke we bï thou wedhie cït man ë kek.
Kääŋ de Ŋam cie Luɔk
6Na wën, ke luel kääŋë aya an: “Ŋadï ade ŋaap cï com domde, na wën, ke bɔ̈ bï mïthke bɛ̈n kɔɔr, ku acïn kë cï yök. 7Ku jɔ raan ee luui domic yɔ̈ɔ̈k an, ‘Tïŋ, run kadiäk yɛn ee mïth bɛ̈n kɔɔr tëde ŋaapë, ku acïn kë cä yök, yiɛpë wei, eeŋö kum en piny youyou?’ 8Go bɛ̈ɛ̈r, lueel an, ‘Bɛ̈ny, bɛyë pɔ̈l atɔ̈u ë run töŋë aya, abä wec thar, aguɔ yiëk thar wär: 9aa le luɔk, ka piɛth: na kën luɔk, ka bä jɔ yiɛp wei.”’
Yecu atɔ Tiiŋ Aduany Dem ë Thabath
10Ku aa wëët kɔc ɣön tök ë ɣööt ke Nhialic yiic ëkööl ë Thabath. 11Ku ade tiiŋ nu ëtɛ̈ɛ̈n, dï, tiiŋ cath ke jɔŋ ë ye tɔ kɔ̈c guöp ë run kathiëër ku bɛ̈t, ku acïï jɔk tot kɔ̈u, ku acï ee kɔ̈u ë lëu ë jöt. 12Na wën, aacï Yecu ye tïŋ, ke jɔ cɔɔl, yöök an, “Tiiŋë, yïn cï lony ë jɔŋdu!” 13Go ecin thany ë yeguöp: na wën, ee tëthiinë, ke jɔ yekɔ̈u rïc, ago Nhialic leec.
14 #
Bɛ̈n 20:9,10; Nyöŋ 5:13,14. Go bɛ̈ny de ɣön ë Nhialic gɔ̈th, luɔi cï Yecu raan tɔ dem ëkööl ë Thabath, ku jɔ bɛ̈ɛ̈r, yöök, an, “Akööl kadhetem anukï kööl duëërë kɔc ke luui thïn: yak bɛ̈n ë aköölkë yiic bï we bɛ̈n tɔ dem, ku duökï ë bɛ̈n ëkööl ë Thabath!” 15Go Bɛ̈nydït puk nɔm, yöök an, “Yïn raan de yäc aguk, raan ëbɛ̈n ë weyiic cïï thɔnde ë lony ayï mulde tën ee yen rem thïn ëkööl ë Thabath, ku jɔ thɛl wïïr le dek? 16Ku na tiiŋë, nyan ë Abraɣam, nyan cïï Catan mac, dï, ë run kathiëër ku bɛ̈t, cïï duëërë lony ë jonh mɛc en ëkööl ë Thabath?” 17Na wën, aacï kakë lueel, ke kɔc de ater në yen ke ke jɔ yäär: go kɔc piɔ̈ɔ̈th miɛt kedhie në ka cï looi ka deyiic dhuëëŋ kedhie.
Kääŋ de Nyin töŋ de Matharda
(Math 13:31-32; Mak 4:30-32)
18Go lueel an, “Cït ciɛɛŋ de Nhialic ŋö? Ku bä thɔ̈ŋ ŋö? 19Acït nyin töŋ de matharda, cïï raan nööm, ku cuɛt ë domde yic, ago cil, abï aa tim dït, ku jɔ diɛt nhial aa rëër ë kërke nïïm.”
Kääŋ de Luɔu
(Math 13:33)
20Go bɛ lueel an, “Bä ciɛɛŋ de Nhialic thɔ̈ŋ ŋö? 21Acït luɔu cïï tik nööm, ku jɔ tääu ë aköp wacic, cït aduuk kadiäk, aɣet të bï en tuak ëbɛ̈n.”
Kal Koor Thok
(Math 7:13-14,21-24)
22Go wuöt caath yiic ayï bɛ̈i yiic, ke jɔ cath ke wëët kɔc, ke lɔ Jeruthalem. 23Go raan tök thiëëc an, “Bɛ̈nydït, kɔc bï kony wëi, kek lik?”
Go ke yɔ̈ɔ̈k an, 24“Yak cök ë thɛm wek en arëët luɔi bä wek tëëk ë kalthok thoŋ kooric: wek yɔ̈ɔ̈k an, kɔc juëc abïk lɔ thïn kɔɔr, ku acïkï bï lëu. 25Rial, të cï bɛ̈ny de ɣöt rɔt guɔ jɔt ku jɔ ɣöt thiöök thok, ku we bï jɔ kɔ̈ɔ̈c biic, ku taŋkï ɣöt thok, ku luɛlkï an, ‘Bɛ̈nydït, liëpë we ɣöt!’ Ku abï bɛ̈ɛ̈r, yöök week an, ‘Wek kuöc të bä wek thïn!’ 26Ku abäk jɔ lueel an, ‘Wok a ye cam ku yok dek ë yïnɔm, ku yïn aaye wëët ë kuɛɛrkuɔ yiic!’ 27#Diɛt 6:8. Ku abï lueel an, ‘Wek yɔ̈ɔ̈k an, wek kuöc të bä wek thïn, jälkï ë yalɔ̈ɔ̈m, wek kɔc ë kërac looi wedhie!’ 28#Math 22:13; 25:30. #Math 8:11,12. Të cä wek Abraɣam tïŋ, ku tiëŋkï Yithaak, ku Jakop, ku tït kedhie, ë ciɛɛŋ de Nhialic yic, ku wegup ku cï we ciɛɛc biic, ke dhiëëu abï nu kekë ŋëny de lec! 29Ku kɔc abïk bɛ̈n të lɔ aköl amiäk ku bïkkï të lɔ aköl athɛ̈i, ku rut, ku wöuwic, bïk ku nyuckï ë ciɛɛŋ de Nhialic yic. 30#Math 19:30; 20:16; Mak 10:31. Ku tiëŋkï, ade kɔc nu ciëën ënɔɔnë kɔc bï lɔ tueŋ, ku de kɔc nu tueŋ ënɔɔnë kɔc bï lɔ ciëën.”
Nhiëër Nhiɛɛr ë Yecu Jeruthalem
(Math 23:37-39)
31Na ɣɔn, ëkööl manë guöp, ke kɔc kɔ̈k ë Parithai ke ke bɔ̈, bïk ku yöökkï an, “Nyai, jël ee tënë: Ɣerod ade piɔ̈u luɔi bï en yï nɔ̈k.”
32Go keek yɔ̈ɔ̈k an, “Lakï, yɔ̈ɔ̈kkï awantui an, ‘Tïŋ, yɛn ciec jɔɔk rac ku ja kɔc tɔ dem ëköölë ku miäk, ku na ëkööl ee kek diäk ke yɛn ë guɔ thök.’ 33Ku yɛn bï dhil cath ëköölë ku miäk ku miäk ruu: acïn tiët duëër thou roor ku cïï thou ë Jeruthalem.
34Jeruthalem oou, Jeruthalem oou, paan ë tït nɔ̈k, ku biöök kɔc në kur kɔc cï tuöc yïn, ee nïn kadï cän piɔ̈u dɛ kum kuöm ɛn mïthku, cït man ee ajïth mïthke kum ë yewuök, ku acäk rɛɛc! 35#Diɛt 118:26. Tiëŋkï, ɣöndun acï nyäŋ week ke yäär. Ku wek yɔ̈ɔ̈k ëyic an, we cïï a bï bɛ tïŋ, aɣet kööl bä wek e lueel an, ‘Thieithieei raan bɔ̈ në rin ke Bɛ̈nydït.”’
Currently Selected:
Luk 13: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
