Luk 19

Yecu kekë Dhakayo

1Na wën, ke lɔ ku reet Jeriko yic. 2Ku ade raan, dï, raan cɔl Dhakayo, ku ye bɛ̈ny ee kɔc ë athölbö tɔ kut, ku ye raan juëc ë wëuke. 3Ku akɔɔr ë yepiɔ̈u luɔi bï en Yecu tïŋ nɔn ee yen raan yïndï, ku acïn luɔi duëër en e tïŋ ë baŋ de kut ë kɔc, në ciɛk cek en. 4Go kat, ke lɔ tueŋ, le kɛɛc ë ŋaap nɔm, ke bïï tïŋ: luɔi kɔɔr en tëëk ëtɛ̈ɛ̈n. 5Na wën, aacï Yecu ɣet ëtɛ̈ɛ̈n, ke jɔ nhial lieec, go tïŋ ku yöök an, “Dhakayo, dap bɛ̈n piny, yɛn bï dhil rëër ɣöndu ee köölë.”

6Go dap kɛɛc piny, ku jɔ loor ke mit piɔ̈u. 7Na wën, aa cïk e tïŋ ke ke ŋun ë keyäc kedhie, luelkï an, “Acï rɔt lɔ tɔ ye kaman ë raan ee kërac looi.”

8Go Dhakayo rɔt jɔt, ku yöök Bɛ̈nydït an, “Tïŋ, Bɛ̈nydït, biäk töŋ de kakï abä yɛn ke kɔc kuanynyïïn miɔɔc, ku na de këde raan däŋ cä nööm në gööny ë lueth, ka bä bɛ cuööt ë ŋuan.”

9Go Yecu lueel an, “Kunydewëi acï bɛ̈n ëköölë, luɔi ee yen wën ë Abraɣam aya. 10#Math 18:11. Wën ë Raan aa bɔ̈ bï kë cï määr bɛ̈n kɔɔr, ku bï bɛ̈n kony wëi.”

Kääŋ de Wëu

(Math 25:14-30)

11Na wën, aa piŋkï wëlkë, ke jɔ jam ŋuak lëk keek kääŋ, luɔi cï en thiɔ̈k ke Jeruthalem, agokï lueel, ë kepiɔ̈ɔ̈th an, bï ciɛɛŋ de Nhialic dap tuöl. 12Ago lueel an, “Ade bɛ̈ny cï keny paan mec, le lupɔ nööm ëtɛ̈ɛ̈n, bï aa melik de ciɛɛŋ, ku bï yenɔm bɛ lɔ dhuny. 13Na wën, ke cɔl lïïmke kathiëër, ku gëm keek jinii kathiëër, go keek yɔ̈ɔ̈k an, ‘Ɣaackï keek aɣet të bän lɔ bɛ̈n.’ 14Ku amɛɛn kɔc ke paanden, gokï kɔc tuɔɔc ë yecök, kɔc bï e lɔ lueel an, ‘Wo cïï raanë kɔɔr luɔi bï en wo cieŋ.’

15“Na wën, aacï e nɔm dhuny, ke cï aa melik de ciɛɛŋ, ku jɔ kɔc yɔ̈ɔ̈k an, bï lïïmke cɔ̈l en, kɔc wään cï yiɛ̈n wëu, ke bï kë cïk yök ë ɣööc ŋic, raan ëbɛ̈n. 16Go lïm tök kɔn bɛ̈n tueŋ, bï ku lueel an, ‘Bɛ̈ny, jinidu acï jinii bɛ̈ɛ̈i kathiëër.’ 17Go yɔ̈ɔ̈k an, ‘Apiɛth, yïn ee lïm piɛth: nɔn cï yïn këthiinakäŋ ŋiëc döt, ke yïn bï aa bɛ̈ny ceŋ pɛ̈ɛ̈nydït kathiëër.’ 18Na wën, ke lïm ee kek rou jɔ bɛ̈n, bï ku lueel an, ‘Bɛ̈ny, jinidu acï jinii bɛ̈ɛ̈i kadhïc.’ 19Go mɛnhë yɔ̈ɔ̈k aya an, ‘Yïn aya yïn bï aa bɛ̈ny ceŋ pɛ̈ɛ̈nydït kadhïc.’ 20Na wën, ke lïm däŋ bɔ̈, bï ku lueel an, ‘Bɛ̈ny, tïŋ, jinidu kï, acä duut ë lupɔ ku tääu, 21yɛn ë riɔ̈ɔ̈c ë yïn, luɔi ee yïn raan rilic, yïn ee käŋ kuany ka kɛ̈në tääu piny, ku yïn ee käŋ tem ka kɛ̈në com.’ 22Go yɔ̈ɔ̈k an, ‘Në wëlkuön cï lueel, kek abän ke löŋdu guiir, yïn ee lïm rac. Yïn cï a ŋic nɔn aa yɛn raan rilic, nɔn aa yɛn käŋ kuany ka kɛ̈n tääu piny, ku nɔn aa yɛn käŋ tem ka kɛ̈n com: 23eeŋö kën yïn wëukï yiɛ̈n kɔc ë käŋ kan na ënɔɔn cän bɛ̈në, ka dï cä kakï yök acï ke nyïïn ŋuak?’ 24Go kɔc kääc ëtɛ̈ɛ̈n yɔ̈ɔ̈k an, ‘Nämkï jinii tëde yen, ku gämkï raan wën de jinii kathiëër!’ 25Gokï lueel an, ‘Bɛ̈ny, acath ke jinii kathiëër!’ 26#Math 13:12; Mak 4:25; Luk 8:18. Wek yɔ̈ɔ̈k an, “Raan cath ke käŋ abï miɔɔc, ku raan cïn ka cath ke yen, acakaa kë cath ke yen abï nööm tëde yen. 27#Math 25:14-30. Ku jakï kɔckë bɛ̈ɛ̈i kɔc de ater në yɛn, kɔc wään reec ɛn an, cä bï aa melik bï keek cieŋ, bɛ̈ɛ̈ikï ke ku näkkï ke ë yanɔm!”’

Yecu alɔ Jeruthalem ke cï Tiam

(Math 21:1-11; Mak 11:1-11; Jɔn 12:12-19)

28Na wën, aacï kakë lueel, ke lɔ ë kenïïm tueŋ, kuany kueer lɔ Jeruthalem. 29Na wën, aacï thiɔ̈k ke Bethpage kekë Bethani, në kuurdïït cɔl kuur ë Olip, ke jɔ kɔckɛn ë piööcë tooc kaarou, 30Ku lueel an, “Lakï paan nu ë wenïïm tueŋ, ku të cä we lɔ thïn, ke we bï mɛnh ë muul yök ke mac, mɛnh cïn raan cï kɔn cath ë yekɔ̈u: luɔnykï, ku bɛ̈ɛ̈ikï ee tënë. 31Ku na de raan thiëc week an, eeŋö luönykï yen? Ka bäk pɔ̈k nɔm en alë an, ee luɔi kɔɔrë#19:31: Bɛ̈nydït; nɔn raan de yen. Bɛ̈nydït en.” 32Go kɔc wën cï tooc lɔ, lek ku yökkï ke cït man wën cï en e lueel. 33Na wën an, lonykï ye, ke ke jɔ kɔc de mɛnh ë muul thiëëc an, “Eeŋö luönykï mɛnh ë muul?”

34Gokï lueel an, “Ee Bɛ̈nydït en akɔɔr en.” 35Gokï bɛ̈ɛ̈i tëde Yecu: ku jɔkï lupɔɔken cuat ë mɛnh ë muul kɔ̈u, ku tɛ̈ɛ̈ukï Yecu ë yekɔ̈u. 36Na wën, të ciɛth en, ke ke jɔ lupɔɔken aa thiɛth piny kueer.

37Ku të cï en guɔ thiɔ̈k ke pänydït, ku cï ɣet ë kuur ë Olip thar, ke kut dïït ë kɔc piööcë ëbɛ̈n ke ke jɔ piɔ̈ɔ̈th miɛt ku leckï Nhialic ë röl dït në baŋ de luɔi dït ëbɛ̈n luɔi cïk tïŋ, 38#Diɛt 118:26. luelkï an, “Thieithieei Melik bɔ̈ në rin ke Bɛ̈nydït! Ë mät tɔ̈u paannhial, ku tɔ̈u dhuëëŋ tënhial ya!”

39Go kɔc kɔ̈k ke Parithai nu ë kut ë kɔc yiic, gokï lueel an, “Bɛ̈ny, jäny kɔckuön ë piööcë!”

40Go pɔ̈k nɔm keek an, “Wek yɔ̈ɔ̈k an, të miimë kɔckë, ke kɔi gup aduëërkï cööt ënɔnthiinë.”

Yecu Adhiëëu Jeruthalem

41Na wën, aacï guɔ thiɔ̈k, ke woi pänydït, ke jɔ dhiau, 42Lueel an, “Tëë yï cï ka ke mändu guɔ ŋic oou, yïn guöp, ëköölduönë yoou! Ku ënɔɔnë, acï ke guɔ thiaan ë yïnyin. 43Akööl abïk bɛ̈n tëde yïn, akööl bï kɔc dɛ wek ater yï geeu në rek, agokï yï tuɔɔk, ku jɔkï yï pɛ̈n lɔ biic ë wut këc ëbɛ̈n. 44Ku abïk yï rai piny abä nɔm kït we piny, yïn wekë mïthkuön nu ë yïyic, ku acïn kuur töŋ bïk nyääŋ piny ë kuur däŋ nɔm ë yïyic, luɔi kuc yïn kööl ë nɛ̈mduön cï yï neem!”

Yecu alɔ në Luaŋdïtic

(Math 21:12-17; Mak 11:15-19; Jɔn 2:13-22)

45Go lɔ ë Luaŋdïtic, le ku cieec kɔc wën ee käŋ ɣaac thïn, ayï kɔc wën ee käŋ ɣɔɔc, 46#Yith 56:7; Jer 7:11. ku yöök keek an, “Ë gɔ̈ɔ̈r an, ‘Luaŋdiën dït ee ɣön de lɔ̈ŋ.’ Ku week, acäk tɔ ye ɣön ë cuɛ̈ɛ̈r.”

47 # Luk 21:37. Go kɔc aa wɛ̈ɛ̈t ë Luaŋdïtic ë aköölnyïïn. Ku bänydït ke ka ke Nhialic ku kɔc ee löŋ gɔ̈ɔ̈r ku röördït ë kɔc yiic akɔɔrkï näŋ bï kek e nɔ̈k. 48Ku acïn kë cïk yök kë bïk looi: kɔc ëbɛ̈n ayek gɛ̈ɛ̈k ë yelɔ̈ɔ̈m, ke ke piŋ wëlke.

Currently Selected:

Luk 19: dip-JPB

Highlight

Copy