Luk 3

Wëët de Jɔn Baptith

(Math 3:1-12; 1:1-8; Jɔn 1:19-28)

1Na ɣɔn, ë ruöön ë ciɛɛŋ de Tibero Kaithar, ruöön ee kek thiëër ku dhïc, ruöön nu Pontio Pilato ke ye bɛ̈ny ë Juda, ku ye Ɣerod bɛ̈ny de Galili, ku ye Pilip mänhë bɛ̈ny de Yituria, ku piny de Tarakoniti, ku ye Luthanio bɛ̈ny de Abilini, 2Ku ye yï Anath kekë Kayapath bänydït tueŋ ke ka ke Nhialic, go jam ë Nhialic bɛ̈n tëde Jɔn wën ë Dhekaria ë jɔ̈ɔ̈ric. 3Ku jɔ cath ë piny nu ë Jordan yɔu ëbɛ̈n, ee kɔc guiëër baptinh ë puŋdepiɔ̈u në nyiɛɛi bï karɛc nyaai. 4#Yith 40:3-5 (LXX). Acït man cï e gɔ̈ɔ̈r ë këcïgɔ̈ɔ̈r de tiët Yithaya yic an,

“Röl ë raan cöt ë jɔ̈ɔ̈ric,

‘Luɔikï kueer ë Bɛ̈nydït,

takï kuɛɛrke lɔ cit!

5Wak ëbɛ̈n abï juök,

ku kuurdït ëbɛ̈n ayï kuurthii abï ke rai piny,

ɣään ŋɔl abï ke rïc,

6Ku jɔ jäŋ ëbɛ̈n kuny de Nhialic tïŋ.”’

7 # Math 12:34; 23:33. Na wën, aacï kuut dïït ë kɔc bɛ̈n, bï ke bɛ̈n baptith në yen, ke jɔ keek yɔ̈ɔ̈k an, “Wek mïth ke karɛc! Eeŋa ë yöök week an, bäk kat agönh bï bɛ̈n? 8#Jɔn 8:33. Jakï luɔk ë luɔi piɛth luɔi bï röŋ ke puŋdepiɔ̈u, ku duökï jam gɔl ë wepiɔ̈ɔ̈th an, wo de wäärda Abraɣam, wek yɔ̈ɔ̈k an, Nhialic aduëër mïth ke Abraɣam cak në kɔikë! 9#Math 7:19. Ku ënɔɔnë, yiëp ë guɔ tääu të nu mei ke tiim: tim ëbɛ̈n tim reec luɔk ë mïth piɛth abï jɔ yiɛp piny, ku cuɛtë mɛɛc.”

10Go kuut dïït ë kɔc thiëëc an, “Eeŋö buk jɔ looi?”

11Go bɛ̈ɛ̈r, yöök keek an, “Raan de aluluut kaarou, ke gɛm tök raan cïn aluluut, ayï raan de këcam, ke looi aya.”

12 # Luk 7:29. Go kɔc kɔ̈k ë athölbö tɔ kut bɛ̈n bïï ke bɛ̈n baptith, ku thiëckï an, “Bɛ̈ny ee wëët, eeŋö buk looi?”

13Go keek yöök an, “Duökï käŋ ë kɔɔr tëde kɔc kë wär kë cï lɛ̈k week.”

14Go alathkëër thiëëc an, “Na wook, eeŋö buk looi?”

Go ke yɔ̈ɔ̈k an, “Ë cïn raan ruöm wek këde, ku ë cïn raan cäkï thok, ku yak piɔ̈ɔ̈th miɛt në ariöpdun.”

15Na ɣɔn, ke kɔc kedhie ë ke jɔ ŋɔ̈th, ku jɔkï kepiɔ̈ɔ̈th cät në Jɔn, nɔn ee yen Kërtho, ku nɔn cïï en ee yen. 16Go Jɔn bɛ̈ɛ̈r, yöök keek kedhie an, “Ya kï, wek aa baptith ë pïïu, ku ade raan bɔ̈ raan ril ë yɛn, raan cä yɛn röŋ në luɔi bän thiönh ë wɛɛrke dɔ̈k, yen abï week baptith në Wëidït ɣer ku në mac. 17Amuk kën ee yen rap kɔ̈l ë yen, ku abï yiɛɛude nap abï lipëlip, ago agamɔde kuöt ë adhaande yic, ku nyop ayiɛl ë many cie lëu në näk.”

18Ago kɔc lɛ̈k wël juëc kɔ̈k në guiëër ee yen keek guiëër. 19#Math 14:3,4; Mak 6:17,18. Ku Jɔn aacï bɛ̈ny Ɣerod bɛ̈n jɔ̈ɔ̈ny në këde Ɣerodiath tiiŋ de Pilip mänhë, ku në biäk de karɛc ëbɛ̈n ka cïï ke looi, 20Go Ɣerod karɛc kedhie jɔ ŋuak nyïïn, në mäny cï en Jɔn mac në alooc yic.

Jool de Yecu

(Math 3:13-17; 1:9-11)

21Na wën, aacï kɔc thök ë baptith kedhie, ke Yecu jɔ baptith aya, ku jɔ lɔ̈ŋ, go tënhial e yic liep 22#Cäk 22:2; Diɛt 2:7; Yith 42:1; Math 3:17; Mak 1:11; Luk 9:35. go Wëidït ɣer lööny ë yeguöp, ke cït guöp guuk, ku bɔ̈ röl paannhial, röl lueel en an, “Yïn ee Wëndiën nhiaar, yɛn mit piɔ̈u wokë yïn arëët.”

Kuarken ke Yecu

(Math 1:1-17)

23Ɣɔn gɔlë Yecu wëët, ke runke acïk ciët thiërdiäk, ku ye wën ë Jothep (cït man ee kɔc e lueel), Jothep de Eli 24Eli de Mathat, Mathat de Lebi, Lebi de Melki, Melki de Janai në Jothep, 25Jothep de Matathiath, Matathiath de Amoth, Amoth de Naɣum, Naɣum de Ethli, Ethli de Nagai, 26Nagai de Maath, Maath de Matathiath, Matathiath de Themein, Themein de Jothek, Jothek de Joda, 27Joda de Joana, Joana de Retha, Retha de Dherubabel, Dherubabel de Caltiɛl, Caltiɛl de Neri 28Neri de Melki, Melki de Adi, Adi de Cotham, Cotham de Elmadam, Elmadam de Er, 29Er de Yecu, Yecu de Eliedher, Eliedher de Jorim, Jorim de Mathat, Mathat de Lebi, 30Lebi de Thimion, Thimion de Judath, Judath de Jothep, Jothep de Jonam, Jonam, de Eliakim, 31Eliakim de Melea, Melea de Mena, Mena de Matath, Matath de Nathan, Nathan de Debid, 32Debid de Jethe, Jethe de Obed, Obed de Bowadh, Bowadh de Thalmon, Thalmon de Nacon, 33Nacon de Aminadab, Aminadab de Aram, Aram de Ɣedheron, Ɣedheron de Peredh, Peredh de Juda, 34Juda de Jakop, Jakop de Yithaak, Yithaak de Abraɣam, Abraɣam de Tera, Tera de Naɣor, 35Naɣor de Thiruk, Thiruk de Riu, Riu de Pelek, Pelek de Eber, Eber de Cela, 36Cela de Cainan, Cainan de Arpakad, Arpakad de Cem, Cem de Nowa, Nowa de Lamek, 37Lamek de Mathuthela, Mathuthela de Eenok, Eenok de Jared, Jared de Maɣalaleel, Maɣalaleel de Kenan, 38Kenan de Enoth, Enoth de Theth, Theth de Adam, Adam de Nhialic.

Currently Selected:

Luk 3: dip-JPB

Highlight

Copy