Math 28

Jönërɔt

(Mak 16:1-10; Luk 24:1-12; Jɔn 20:1-10)

1Na wën, aacï akööl ë Thabath guɔ thök, të kɔɔrë piny ruu ëkööl tueŋ wën aa kööl dhorou, ke Meri Magdalene bɔ̈ kekë Meri däŋ, bïk raŋ bɛ̈n tïŋ. 2Na wën, ke piny nieŋ rɔt arëët, ku bɔ̈ tunynhial ë Bɛ̈nydït piny paannhial, bï ku lɔɔr kuur wei ë raŋ thok, ku jɔ rëër ë yenɔm. 3Acït nyin wilëdeŋ, ku lupɔde aɣer ë wic cït alath, 4ago kɔc ë tïït ago ke lath gup në riɔ̈ɔ̈c wën cï kek riɔ̈ɔ̈c ë yen, abïk ciët kɔc cï thou.

5Go tunynhial bɛ̈ɛ̈r, yöök diäär an, “Duökï riɔ̈c, aŋiɛc nɔn kaar wek Yecu, raan wään cï piäät ë tim cï rïïu nɔm kɔ̈u. 6Aliu ee tënë, ë rɔt jɔt cït man wään cï en e lueel. Bäkï, tiëŋkï të wään tɔ̈ɔ̈cë Bɛ̈nydït thïn. 7Ku jakï dap lɔ, lɛ̈kkï kɔckɛn ë piööcë, ‘nɔn cï en rɔt jɔt ë kɔc cï thou yiic, ku tiëŋkï, akɔn lɔ tueŋ ë week Galili, abäk lɔ tïŋ ëtɛ̈ɛ̈n!’ Takï kë cä lɛ̈k week.”

8Gokï dap jäl ë raŋ nɔm, ariɔ̈ckï tei, ku amitkï piɔ̈ɔ̈th ayadäŋ, gokï kat lek jam lëk kɔckɛn ë piööcë.

9Na wën, aa ciɛthkï kueer, ke ke lɔ kɔckɛn ë piööcë lɛ̈k jam, ke Yecu ë räm ke keek, go lueel an, “Thieitheei ë week!” Gokï bɛ̈n ku dɔmkï cök, lamkï. 10Go Yecu ke yɔ̈ɔ̈k an, “Duökï riɔ̈c, lak lɛ̈kkï mïthëkɔckuɔ an, bïk lɔ Galili, tɛ̈ɛ̈n en abï kek a tïŋ.”

Kë cïï Kɔc ë Tït Nyooth

11Na wën, alekkï, ke kɔc kɔ̈k ë kɔc ë tïït ke ke bɔ̈ pänydït, bïk ku nyuthkï bänydït ke ka ke Nhialic ka cï röt looi kedhie. 12Na wën, aa cïk guëër në röördït ëtök, ke ke mat löŋ, gokï alathkëër gäm wëu juëc, 13ku luelkï an, “Jakï lueel an, kɔckɛn ë piööcë acïk bɛ̈n wakɔ̈u, bïkkï ku kualkï guöpde, ke wo nin. 14Ku na cï bɛ̈ny kënë piŋ, abuk wëŋ, agoku week tɔ cïn diɛɛr bä wek diɛɛr.”

15Gokï wëu nööm, ku loikï ke cït man cïï ë ke wɛ̈ɛ̈t, ku jamë acï thiëi ë Judai yiic, ku tɔ̈u aɣët cï ee köölë.

Yecu Acï Tuöl Tëde Kɔckɛn ë Piööcë

(Mak 16:14-18; Luk 24:36-49; Jɔn 20:19-23; Luɔi 1:6-8)

16 # Math 26:32; Mak 14:28. Na wën, ke kɔcpiööcë kathiëër ku tök ke ke jël lek Galili, lek të nu kuurdïït cï Yecu kɔn lɛ̈k keek. 17Na wën, aa cïk e tïŋ, ke lamkï, ku ŋït kɔc kɔ̈k piɔ̈ɔ̈th. 18Go Yecu bɛ̈n, bïï ku yöök keek an, “Riɛl ëbɛ̈n acï gäm ɛn paannhial ayï piny nɔm. 19#Luɔi 1:8. Yen la wek, lak juöör aa wɛ̈ɛ̈t kedhie, abïk a kɔcpiööcë, ku luöikï keek baptith në rin ke Wäärda, ku Wënde, ku Wëidït ɣer, 20ku yak keek wɛ̈ɛ̈t, bïk käŋ aa döt kedhie ka cä thɔ̈n week, ku ya kï, yɛn ee cool ë tɔ̈u wo week ë aköölnyïïn kedhie, aɣët thök bï piny thök. Amiin.

Currently Selected:

Math 28: dip-JPB

Highlight

Copy