Mak 4
4
Kääŋde Raan Cum
(Math 13:1-9; Luk 8:4-8)
1 #
Luk 5:1-3. Na wën, ke be wëët gɔl ë Baar ë Galili yɔu. Ku kut dïït ë kɔc acïk guëër të nu yen, ago lɔ ë abëlic, ku rëër ë abëlic wïïr, ku nu kut dïït ë kɔc ëbɛ̈n ë wɛ̈ɛ̈r yɔu biic. 2Go ke wɛ̈ɛ̈t ë kajuëc në kɛ̈ŋ, ku yöök keek në wëëtde yic an,
3“Piɛŋkï: raan cum, dï, ë lɔ biic le com: 4na wën, aa cum, ke nyïïn kɔ̈k ë ke lööny ë kueer këc, ku bɔ̈ diɛt nhial bïkkï ku camkï ke. 5Ku lööny kɔ̈k piny de kuur, të cïn tiɔɔm dït, gokï dap goŋ ku në luɔi cïn en tiɔɔm dït. 6Na wën, aacï akɔ̈l ɣëët nhial, ke ke biɔɔr, gokï yom, luɔi cïn kek mei. 7Ku lööny kɔ̈k ë kuɔɔth yiic, go kuɔɔth cil, gokï ke nyiɛɛc, agokï cuö lok. 8Ku lööny kɔ̈k ë tiɔɔm piɛthic, gokï luɔk, acïk cil agokï kenyïïn ŋuak, ku jɔkï luɔk abï nyin tök thiërdiäk aa bɛ̈ɛ̈i, ku bïï nyin däŋ thiërdhetem, ku bïï nyin däŋ bɔt.”
9Go lueel an, “Raan de yïth ee yen ke piŋ, ke piŋ.”
Kë Lueel ë Kääŋ
(Math 13:10-17; Luk 8:9-10)
10Na wën, aacï döŋ etök, ke kɔc rɛ̈ɛ̈r ë yelɔ̈ɔ̈m ku kɔc kathiëër ku rou ke thiëckï në këde kääŋ awën. 11Go ke yɔ̈ɔ̈k an, “Acï gäm week luɔi bä wek këcïthiaan ŋic, këde ciɛɛŋ de Nhialic: ku tëde kɔc nu biic, käŋ kedhie aye ke looi në kɛ̈ŋ: 12#Yith 6:9,10 (LXX). ‘luɔi bï kek aa daai,
ku cïkï käŋ ë gɔɔk apiɛth,
ku luɔi bï kek aa piŋ,
ku cïkï käŋ ë yök yiic,
ke cïï bï dɛ të bï kek kepiɔ̈ɔ̈th puk,
abï karɛcken päl keek.”’
Yecu Awer Kë Lueel ë Kääŋic
(Math 13:18-23; Luk 8:11-15)
13Go ke thiëëc an, “Kuöckï kääŋë? Ku bäk kɛ̈ŋ kedhie ŋic adï? 14Raan cum ee jam en com. 15Ku kɔc ee ka nu ë kueer këc, të ye jam com thïn, na wën, acïk piŋ, ke Catan bɔ̈ ënɔnthiinë, bï ku jɔt jam wën cï com ë kepiɔ̈ɔ̈th. 16Ku kɔckë aya ee ka cï com ë piny de kuur, kɔcke, të cï kek jam piŋ, ke ke dap gam ke ke mit piɔ̈ɔ̈th, 17ku acïnkï thäär mei, gokï yök ë ke tɔ̈u ë nïnkë, na miäk, të bï këtuc dhal keek ayï yöŋ në baŋ de jam, ke ke dɔk röt ciëën ënɔnthiinë. 18Ku kɔc kɔ̈k ee ka cï com ë kuɔɔth yiic, kɔckë ee kɔc cï jam piŋ, 19na wën, ke diɛɛr ee kek diɛɛr ë ka ke piny nɔm, ayï mɛth ee juëc de wëu keek math, ayï ŋɔ̈ɔ̈ŋ de ka kɔ̈k, ke ke lɔ thïn, ku nyiickï jam, agokï cuö lok. 20Ku kɔc kɔ̈k ee ka cï com ë tiɔɔm piɛthic, ayek kɔc ë jam piŋ, ku gamkï, ku lokkï, tök abï thiërdiäk bɛ̈ɛ̈i, ku bïï tök thiërdhetem, ku bïï tök bɔt.
Manyëalanh nu në Aduök Thar
(Luk 8:16-18)
21 #
Math 5:15; Luk 11:33. Go ke yɔ̈ɔ̈k an, “Manyëalath bï ya bɛ̈ɛ̈i ku tɛ̈ɛ̈uwë ë diöny thar, ayï agen thar, ku cïï bï aa tääu ë këdäŋ nɔm nhial? 22#Math 10:26; Luk 12:2. Acïn kë cï thiaan, ke cïï bï tïc rial, ku acïn kë cï looi ëcuëër, ke cïï bï tïc ë gai. 23Na de raan de yïth ee yen ke piŋ, ke piŋ.”
24 #
Math 7:2; Luk 6:38. Go ke yɔ̈ɔ̈k an, “Yak röt tiit në kë yak piŋ: thëm aa wek käŋ them, en abï aa thɛ̈m week: ku wek kɔc ee käŋ piŋ, we bï ŋuak ë käŋ. 25#Math 13:12; 25:29; Luk 19:26. Raan de nɔm kake, abï miɔɔc: ku raan cïn nɔm kake, acakaa kë cath ke yen abï nööm tëde yen.”
Kääŋ de Kɔ̈th Lok
26Go lueel an, “Ciɛɛŋ de Nhialic acït weer cï raan kɔ̈th wɛɛr piny, 27ku ye niin ku ye rɔt jɔt wakɔ̈u ku aköl, go kɔ̈th cil, ku dïtkï, ke kuc dït dïït kek. 28Piny ee rap bɛ̈ɛ̈i yetök, ee thok kɔn goŋ, aa miäk ke guäth, na miäk, ke rap dït nyin lok ë yenɔm. 29#Jol 3:13. Na wën, aacï rap guɔ luɔk, ke dap menyjel tɔ lɔ, luɔi cï kööl ë tëm bɛ̈n.
Kääŋ de Nyin Töŋ de Matharda
(Math 13:31-32,34; Luk 13:18-19)
30Go lueel an, “Buk ciɛɛŋ de Nhialic thɔ̈ɔ̈ŋ ke ŋö? Ku buk thɔ̈ɔ̈ŋ ë kääŋ ŋö? 31Acït nyin töŋ de matharda, nyin koor ë kɔ̈th kedhie ë piny nɔm, të comë ye, 32ku të cï e com, ke cil, abï dït, abï wal wöör kedhie, go këër dït tany, arëk abï diɛt nhial aa rëër e atiëpde yic.”
33Go keek aa guiëër në kɛ̈ŋ juëc cït ee kake, cït man lëu kek keek ë piŋ: 34ku acïn wël cï guiëër keek wël cïn yiic kääŋ: na wën, ke wëër kɔckɛn ë piööcë kɛ̈ŋ thäär kedhie kapäc pei.
Yecu Atɔ Apiöök lɔ Lik
(Math 8:23-27; Luk 8:22-25)
35Na wën, ëköölë guöp, të cï akɔ̈l thëi, ke yöök keek an, “Lok teemku lɔŋtui.” 36Gokï kut ë kɔc tɔ jël, ku jɔkï tɔ cath ke keek ë abëlic ë guöpdɛnë. Ku nu abëël thii kɔ̈k në yen ëtök aya. 37Na wën, ke gök de amaŋ dït bɔ̈, go apiöök thɛc ë abëlic, arëk abï abël duɛ̈ɛ̈r thiäŋ. 38Ku yen guöp atɔ̈u ë abël thar ciëën, anin ë kɔm nɔm: agokï pɔ̈ɔ̈c, ku thiëckï an, “Bɛ̈ny, thon thou wok cïn këdu thïn?”
39Go pääc, go yom jɔ̈ɔ̈ny, ku yöök wɛ̈ɛ̈r an, “Lɔ lik, pälë rɔt piny!” Go yom kɔ̈ɔ̈c, ku lɔ wɛ̈ɛ̈r dïu arëët. 40Go Yecu Kɔckɛn ëpiööcë thiëëc an, “Eeŋö riääc wek wäkya? Ŋuɔɔtkï ë we cïn gäm?”
41Gokï riɔ̈ɔ̈c ë riɔ̈ɔ̈c dït, ku thiëckï röt kapäc an, “Ee raan cït ŋö ee raanë, raan piŋë yom këde ayï wɛ̈ɛ̈r!”
Currently Selected:
Mak 4: dip-JPB
Highlight
Share
Copy
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.
