Kuɛ̈n 19
19
Ŋenh de Weŋ Aluɛɛl
1Go Bɛ̈nydït lɛ̈k Mothe kekë Aron an, 2“Löŋ cïï Bɛ̈nydït lueel kï: an yɔ̈ɔ̈kë kɔc ke Yithriɛl ë kë bïï weŋ aluɛɛl ke cïn ke dak në yeguöp, ku kënë kɔn tɔ lui. 3Abïk gäm Eleyadhar, bɛ̈ny de kake Nhialic. Ku abï lɛɛr biic në wut këc, ku näk ke nu yen.#19:3: Yen...tɔ̈u; nɔn Bïï lɛɛr në paany këc biic të lɔ aköl amiäk ku nɛ̈k. 4Ku ëtɛ̈ɛ̈n, Eleyadhar abï yeriöp juɔɔl në riɛm, ku yoor të lɔ paany de mät raan dhorou. 5Ku weŋ ë nyop në mac ëbɛ̈n, kekë dɛ̈lde, ku rïïŋde, ku riɛmde, ku cïïnke ke bɛ̈ny de kake Nhialic ë nu. 6Ku ëtɛ̈ɛ̈n, bɛ̈ny de kake Nhialic ë nöm tim ë thidar, ku ɣathop, ku alanh thith, ku cuɛt keek mɛɛc. 7Ku ëtɛ̈ɛ̈n, abï lupɔɔke waak, ku wɛɛk ë pïïu ku jɔ bɛ̈n lɔ wut. Ku abï rëër ke de guöp acuɔl agut cï thëën. 8Ku raan wën ë ɣɔɔk weŋ abï lupɔɔke waak ayadäŋ, ku wɛ̈l e guöp pïïu. Ku abï rëër ke cïï guöp ɣer agut cï thëën. 9#Ɣeb 9:13. Ku raan ɣer guöp yen abï ŋenh ë weŋ jok, ku le tɔ̈ɔ̈u tëɣeric ë wut këc bïï akutnɔm de kɔc ke Yithriɛl pïïu ka aɣɛɛr aa looi wɛɛkë acuɔl wei, në biäk bïï ë kërac nyaai. 10Ku raan ë jok ŋeth abï lupɔɔke waak, ku abï tɔ̈u ke cïï guöp ɣer agut cï thëën. Kek ee lööŋkë abïk tɔ̈u ananden, ke ke ye lööŋ ke Yithriɛl, ku yek lööŋ ke kɔclɛn rɛɛr në keek.
Jäŋ de Guöp de Raan cï Thou
11Raan ëbɛ̈n, raan cï guöp de raan cï thou jak, abï rëër ke de guöp acuɔl në nïn kadhorou. 12Ku abï yeyic tɔ ɣer në wɛ̈k wɛɛk en në pïïu ee kɔc tɔ ɣer në kööl de diäk, ku kööl de dhorou, ku abï yic jɔ ɣɛɛr. Ku na cïï rɔt lɔ waak në kööl ë diäk ku kööl ë dhorou, ka acïï guöp piɛth. 13Raan ëbɛ̈n, raan cï guöp de raan cï thou jak, ku rëër ke cïï waak, abï rëër ke cïï yic ɣer. Në baŋ kënë ye wäl guöp pïïu ka aɣɛɛr. Abï paany de Bɛ̈nydït riɔ̈ɔ̈k, ku acï bï bɛ kuɛɛn në kɔc ke Bɛ̈nydït yiic.
14Të thou ë raan në Paanyic ke de raan nu thïn, ku nɔn ee raan ë bɔ̈ ɣöt ke raan ë cï thou, raanë abï tɔ̈u ke cïï yic ɣer në nïn kadhorou. 15Ku töny nu ɣööt, ayï thɛ̈k kënë kum nïïm,#19:15: cïn akum; nɔn kënë kum nïïm. acïkï yiic bï ɣɛɛr ayadäŋ. 16Ku të cïï raan raan cï nɔ̈k jak roor, ku nɔn ee raan ë thou, ku nɔn cï yuɔɔm de raan jak, ku nɔn ë jak raŋ, raanë abï guöp dɛ acuɔl në nïn kadhorou.
17Ku në luɔi bï raan cïï yic ɣer tɔ ɣeric, ŋenh thiinakäŋ ë nöm në ŋenh ë weŋ de miɔ̈c de kërac yic, ku tɛ̈ɛ̈uwë në gul yic, ku wɛ̈lë kɔ̈u pïïu piɛth. 18Ku ëtɛ̈ɛ̈n, raan ɣeric ë nöm ɣathop, ku jool në pïïu, ku yoor paany, ku këriëëc tɔ̈u thïn ëbɛ̈n, ayï kɔc tɔ̈u thïn. Ku nɔn ee raan ë jak yuɔɔm ë raan, ku nɔn ë jak raŋ. 19Raan ɣeric abï raan de guöp acuɔl yuöör pïïu në kööl ë diäk, ku kööl ë dhorou. Ku në kööl ë dhorou abïï keek tɔ ɣeriic. Abïk lupɔɔken waak, ku yuur keek pïïu, ku abïk gup piɛth thëën të le akɔ̈l piny.
20Ku raan de guöp acuɔl na kën waak, ka abï rëër ke cïï yic ɣer, në baŋ kënë ë pïïu ka aɣɛɛr wäl në yeguöp. Abï tëɣeric de Bɛ̈nydït riɔ̈ɔ̈k, ku acïï bï bɛ kuɛɛn në amatnɔm de Bɛ̈nydït yic. 21Löŋë abäk döt anandun. Ku raan ee kɔc yuöör pïïu ka aɣɛɛr, abï lupɔɔke waak ayadäŋ. Ku raan cï pïïu ka aɣɛɛr jak, abï rëër ke cïï guöp piɛth agut cï thëën. 22Ku këriëëc cï raan de guöp acuɔl jak, acïï yic bï ɣɛɛr ayadäŋ. Ku raan däŋ lɔ ee kënë jak, abï rëër ke cïï guöp piɛth agut cï thëën.
Currently Selected:
Kuɛ̈n 19: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.