Kuɛ̈n 4
4
Luɔi de Lebai Dhiën ë Koɣath
1Go Bɛ̈nydït lɛ̈k Mothe kekë Aron an, 2“Kuen dhiën ë Koɣath në Lebai yiic në ɣöötken thook. 3Gɔl në raan ee run thiërdiäk ku lee në thiërdhïc, kɔc lëu luɔi de paany de mät. 4Kënë ee luɔi de wɛ̈ɛ̈t ke Koɣath në paany de mätic: Kek kadït ɣeric aläl.
5Të kuëëth ë wut, Aron kekë wɛ̈ɛ̈tke abïk aa lɔ në paanyic thïn, ku dɛ̈kkï gëlgël bei në Athänduŋ de mät nɔm tueŋ, ku kum kek athänduk kɔ̈u 6ku kumkï kɔ̈u ayadäŋ në dɛ̈l lɔ mot, ku pätkï kɔ̈u lupɔ amujuŋ. Ku jɔkï wai ye athänduk ɣääc bɛ̈n ɣaak tëden.
7“Ku abïk lupɔ amujuŋ ee thiɛth në pam nɔm, ku tɛ̈ɛ̈ukï aduuk ë yenɔm ku thɛ̈k ke wal ŋïr ye nyop, ku guöl ku abïïny ke miɔ̈c ye dek. Ku kuïn cï pam ɣeric abï ya tɔ̈u në pam nɔm aköölnyïïn. 8Abïk lupɔ thith paat në ee kakë nïïm kedhie, ku kekɔ̈ɔ̈th në dɛ̈l lɔ mot. Ku jɔkï wai ye paam ɣääc bɛ̈n luöt në ɣäänken yiic.
9“Ku abïk cök ke manyalath kuöm piny në lupɔ aräu, kekë mɛ̈ckealath ë tök, ku ka ye mac kuany, ku atɛ̈ny, ku kake miök de olip. 10Abïk deer në dɛ̈l de bɔu kekë kake ëbɛ̈n, ku tɛ̈ɛ̈ukï në paam ye ɣɔ̈ɔ̈c kɔ̈u.
11Ku abïk yïïŋ de adhääp kum kɔ̈u në lupɔ aräu, ku kumkï kɔ̈u në dɛ̈l lɔ mot. Ku lutkï wai ye ke ɣääc tëden. 12Abïk abïïny ke luɔi de tëɣeric nööm kedhie, ku duutkï keek në lupɔ aräuwic, ku kumkï kekɔ̈ɔ̈th piny në dɛ̈l lɔ mot. Ku tɛ̈ɛ̈ukï keek në paam de ɣɔ̈ɔ̈c kɔ̈u. 13Ku ë ke nöm ŋenh në yïk nɔm, ku dutkï në lupɔ amujuŋ. 14Ku tɛ̈ɛ̈ukï kake luɔi ëbɛ̈n në yïk nɔm ëbɛ̈n. Abɔ̈c ke mac, ku thialtuŋ, ku ka ye mac jok, ku thɛ̈k, ku ka ke yïk ëbɛ̈n, ku abïk keek kum kɔ̈ɔ̈th në dɛ̈l lɔ mot, ku tɛ̈ɛ̈ukï wai ke ɣɔ̈ɔ̈c thïn. 15Ku të cïï Aron kekë wɛ̈ɛ̈tke thök në kum kum kek tëɣeric kɔ̈u ku kaɣeriic kedhie, ka kɔc akuëthkï, ke dhiën ë Koɣath ë bɔ̈ ku kɛ̈p keek. Ku ë ke cïï kaɣeriic ke paany de mät jak.
Na lek keek jak, abïk thou. Ee dhiën ë Koɣath yen abï kake paany de mät aa ɣääc.
16“Ku Eleyadhar wën ë Aron, bɛ̈ny de kake Nhialic, yen abï nɔm aa miök de manyalath, ku wɛ̈ɛ̈l ŋïr, ku miɔ̈c ë rap, ku miök de tɔc. Ku ee yen abï paany de mät aa döt kekë këriëëc tɔ̈u tëɣeric ëbɛ̈n.
17Go Bɛ̈nydït lɛ̈k Mothe kekë Aron an, 18“Duökï dhiën ë Koɣath bï tɔ thou, 19në bɛ̈n bï kek bɛ̈n në kaɣeriic lɔ̈ɔ̈m. Kë bäk luöi keek kï: Aron abï ee lɔ në paanyic tëɣeric kekë wɛ̈ɛ̈tke, lek ŋɛk në dhiën ë Koɣath ee nyuöth kë bï looi ku kë bï ɣääc 20Na lɔ dhiën ë Koɣath lɔ në paanyic baaŋ, le bäny ke kake Nhialic tïŋ të dut kek kaɣeriic, në baŋ ë kuɛ̈th,#4:20: tïŋ...kuɛ̈th; nɔn tïŋ kaɣeriic cakaa kaam thiin akäŋ. abïk thou.
Luɔi de Lebai Dhiën ë Gercon
21Go Bɛ̈nydït lɛ̈k Mothe an, 22“Kuen Lebai ke dhiën ë Gercon kedhie në ɣöötken thook. 23Kuen röör kedhie, röör ee run thiërdiäk ku le thiërdhïc, kɔc rɔ̈ŋ në luɔi de paany de mät.
24Ku luɔidɛn bïk aa looi kï 25abïk paany aa ɣääc kekë akum de paany de mätic thïn ku akum de yekɔ̈u biic, ku dɛ̈l lɔ mot ye ke ye kum nɔm nhial, ku gëgël de paany de mät thok, 26ku gëlgël kekë awiɛɛth ke kal biic, kal gël paany kekë yïk, ku gëlgël de kal thok, ku këriëëc ye keek dhɔ̈ɔ̈r thäär ëbɛ̈n. Ku abïk luɔi kɔɔr rɔt ëbɛ̈n ee looi, luɔi de ee kakë. 27Ku luɔiden ëbɛ̈n, nɔm yen luɔi ɣɔ̈ɔ̈c, ku nɔn yen luɔi däŋ, abïk aa looi cït man ë kë cïï Aron e lɛ̈k keek kekë wɛ̈ɛ̈tke. 28Yen luɔi de dhiën ë Gercon ka në paany de mätic. Ku Yithamar wën ë Aron, bɛ̈ny de kake Nhialic yen abï aa tɔ̈u në luɔiden nɔm.
Luɔi de Lebai Dhiën ë Merari
29“Kuen Lebai ke dhiën ë Merari kedhie në ɣöötken thook. 30Kuen röör kedhie, röör ee run thiërdiäk ku le në thiërdhïc, kɔc rɔ̈ŋ në luɔi de paany de mät. 31Abïk këŋ aa ɣääc, ku ɣɛ̈ɛ̈ckï, wai, ku mën, ku këërkëër de paany de mät. 32Ku abïk këŋ aa ɣääc, ku ɣɛ̈ɛ̈c, ku ɣɛ̈ɛ̈c këërkëër de kal, ayï lɔ̈c ke, ku awiɛɛthke, ayï ka ye këŋ dhɔ̈ɔ̈r thäär kedhie. Ku ŋɛk ëbɛ̈n në keyiic abï nɔm dɛ këdɛn ye ɣääc. 33Yen luɔi de dhiën ë Merari ka në paany de mätic. Ku Yithamar wën ë Aron, bɛ̈ny de kake Nhialic yen abï atɔ̈u në luɔiden nɔm.
Kuɛ̈n de Lebai
34-48Mothe kekë Aron, ku bäny ke akutnɔm de kɔc ke Yithriɛl, acïk kuën ke dhiëën ke Lebai kadiäk bɛ̈n nööm, dhiën ë Koɣath, ku dhiën ë Gercom, ku dhiën ë Merari. Aake loi ee kënë në ɣööt thook, ku bɛ̈i thook, ku kuenkï röör kedhie, röör ee run thiërdiäk ku le ë thiërdhïc, kɔc rɔ̈ŋ në luɔi de paany ë mätic alë:
| Dhiën | Kuën |
|---|---|
| Koɣath | 2,750 |
| Gercon | 2,630 |
| Merari | 3,200 |
| Kuënden ëbɛ̈n | 8,580 |
49Raan ëbɛ̈n në keyiic acï bɛ̈n nyuöth luɔide ku kë bï ya ɣääc cït man cïï Bɛ̈nydït ye lɛ̈k Mothe. Yen luɔi ë kueen ë keek ka cït man cïï Bɛ̈nydït ye lɛ̈k Mothe.
Currently Selected:
Kuɛ̈n 4: dip-JPB
Highlight
Copy
Compare
Share
Want to have your highlights saved across all your devices? Sign up or sign in
The Bible in Jieeng de Padang © The Bible Society in South Sudan, 2011.