Tuk 18

Muɔ̱c Kuɔth kɛ A-bɛ-ram kɛnɛ Thara Gat

1Täämɛ cu Kuoth Nhial rɔ cu nyuɔ̱th A-bɛ-ram thäri jiɛn Ma-mɛ-ri, inɛ. A-bɛ-ram tëë nyuurä thok kɛmɛkädɛ kɛ cäŋdäär min ci ɣɔw le̱e̱th ɛ le̱th. 2Min cɛ wi̱cdɛ kap nhial cuɛ wutni da̱ŋ diɔ̱k nɛn cuŋä gekä dhɔaarɛ. Ɛ niɛ min cɛ kɛ nɛn, cuɛ rɔ yuth ni thok kɛmɛkädɛ kä cuɛ riŋ wëë kɛ ne̱r. Kä min cɛ cop kä kɛ cuɛ rɔ goŋ luthä, 3kä cuɛ kɛ ku jiök i̱, “Kua̱rkä, mi nhɔakɛ jɛ, dërɛ gua̱a̱th mi tɔt gui̱k kɛɛl kɛ ɣä. 4A yɛ ciölä ram mi bi yɛ wä nöŋ pi̱ ti bia ben lak ni ciökun, kä bia cu lɔ̱ŋ thaar jiaath. 5Kä min cia cu ben nikɛ dhɔrä a yɛ la̱tkɛ kä mi̱eth mi bia bum ni pua̱nykun, dërɛ ja̱lun kulɛ cuɔ̱p.” Cukɛ jɛ loc i̱, “Gɔaaɛ.” 6Min cikɛ jɛ cu nhɔk, cu A-bɛ-ram loc kɛmɛkä nikɛ wuɔ̱r wee kä Thara kä cuɛ jɛ jiök i̱, “Mal theemni nuɔ̱p da̱ŋ diɔ̱k pɛ̈th kɛ nyiöp, kä bul jurayni.” 7Kä jɛn A-bɛ-ram puɔ̱nydɛ cuɛ riŋ rɛy ɣɔ̱ɔ̱k, kä cuɛ ruath mi tɔt mi puɔth puɔth wä nööŋ, cuɛ jɛ ben ka̱m läät mi cu jɛ ben pɛ̈th kɛ rial ikä. 8Ɛ jɛ nɔ cu A-bɛ-ram cak ti ruɔt kɛnɛ cak ti pi̱w, kɛ jɛn ri̱ŋ ruaath indaan in cɛ na̱k kɛ nööŋ, kä cuɛ kɛ ben la̱th nhiamdiɛn, kä cuɛ cuɔ̱ŋ gekädiɛn mëë mi̱thkɛ.

9Ɛn guäth ɛmɔ cukɛ jɛ thi̱ec i̱, “Ciekdu ni Thara a ni?” Cuɛ kɛ loc i̱, “Jɛn a rɛy kɛmɛkä.” 10Kä cu Kuoth Nhial ɛ ku jiök i̱, “Ɛpuc, ɣän i̱ thaar bä luny dhɔru kä bi ciekdu ni Thara ji̱ da̱p gat mi dho̱o̱l.” Ɛn guäth ɛmɔ Thara tëë cuŋä jɔkdɛ thok kɛmɛkä liŋɛ min latkɛ. 11Nɛ̈nɛ jɛ täämɛ Thara kɛnɛ A-bɛ-ram cikɛ dɔŋ, kä Thara cɛ ŋuɔɔt dapä. 12Kɛ kui̱ kä nɔmɔ cu Thara to̱k dɔl kɛ lɔcdɛ, kä wëë i̱, “Täämɛ ɣän cä dɔŋ, dëë lɛni ŋot kɛ mi dapä, kä ci cɔwdä dɔŋ kɛ dɔŋ ɛmɔ?” 13Min ci Thara to̱k cu dɔl, cu Kuoth Nhial A-bɛ-ram thi̱ec i̱, “Ɛŋu mi dɔl Thara jɛ, ɛ laarɛ jɛ i̱, ‘Derɛ dap kɛ thuɔ̱k kä cɛ dɔŋ inɔ?’ 14Cuɛ jɛ lɛni thi̱ec bä i̱, ‘Ɛ kuɛ tekɛ mi dhal Kuoth Nhial? Ɣän bä yɛ ben nyɔk kɛ gui̱l cɔ̱tdä nɛ ithaar, kä Thara bɛ gat mi dho̱o̱l dap ɛn guäth ɔ.’ 15Kɛ dual cu Thara jɛ gak wëë i̱, ‘Ɣän /ka̱n to̱k dɔl.’ Cuɛ jɛ loc i̱, ‘Eey, kä min ci to̱k dɔl.’ ”

La̱ŋ A-bɛ-ram kɛ kui̱ Thɔ-dɔm

16Kä mëë ci ja̱a̱l jiɛɛn, cu A-bɛ-ram kɛ na̱a̱m, kä mëë ci wec Thɔ-dɔm jɔɔc cukɛ jɛ di̱el guec nänä. 17Ɛn guäth ɛmɔ cu Kuoth Nhial rɔ thi̱ec i̱, “Dëë min göörä lätnidɛ cu te̱e̱ kɛ A-bɛ-ram? 18Ni ɛ jɛn ram in bä jak kä do̱r mi bum bum mi duŋ di̱i̱t. Kä ɛ jɛn ram in bi döör diaal wi̱i̱ muɔ̱ɔ̱n puɔ̱th jek kɛ ciötdɛ. 19Eey, kɛ ɣöö ɛn ram in cä mɛk kɛ ɣöö bɛ gaatkɛ kɛnɛ kuaykiɛn luek kɛ ɣöö bikɛ ciɛŋkä guɔ̱ɔ̱r kɛ lätni cuŋni kɛnɛ thuɔ̱ɔ̱k. Kɛ ɣöö inɔ, dëë kɔ mëë cakɔ gok kamäda cuɔ̱p.” 20Ɛ jɛ nɔ, cu Kuoth Nhial ɛ ku jiök i̱, “Ci go̱o̱nyni kɛ kui̱ Thɔ-dɔm kɛnɛ Go-mo-ra ŋuan, kä ci ciaŋ nyuɔɔnikiɛn dit. 21Göörä jɛ ɛn ɣöö bä jɛ wä nɛn kɛ waŋdä mi go̱o̱nyni tɔ̱tɔ̱ kɛ thuɔ̱ɔ̱k kiɛ /cikɛ thuɔ̱ɔ̱k. Bä mɔmɔ tharɛ wä dhil jek.”

22Niɛ wa̱nɔ cu wutni tin kɔŋ rɔ̱ ri̱t kä cukɛ wä kä Thɔ-dɔm, kä cu A-bɛ-ram duɔth kɛnɛ Kuoth Nhial. 23Min cikɛ wä cu A-bɛ-ram wä gekädɛ kä cuɛ jɛ jiök i̱, “Ji̱n ɛ thuɔ̱k bi nɛy tin gɔw riam kɛɛl kɛ nɛy tin jiäk? 24Kuɛ lar i̱ ɛn rɛk te rɛydɛ kɛ nɛy ti ji̱ cuŋni ti jiɛn da̱ŋ dhieec. Ɛn wa̱nɔ de̱ri rɛk ɛmɔ däk, /ci däkdɛ dëë päl kɛ kui̱diɛn kɛn ji̱ cuŋni ti jiɛn dhieec tin te rɛydɛ? 25A jɛ na̱n kɛ ji̱, /cu mi ce̱tkɛ nɛmɛ lät, kɛ ɣöö de̱ri ji̱ cuŋni näk kɛɛl kɛnɛ ji̱ nyuɔɔni, a dëë gua̱n cuŋni kua̱ kɛl kɛnɛ gua̱n nyuɔɔni! Ɛpuc /ci mɔmɔ dëë tuɔɔk inɔ. A ci Kuäär in luk ɣɔw kɛɛliw dëë cu la̱t ni cuɔ̱ŋ?” 26Cu Kuoth Nhial ɛ loc i̱, “Mi wa̱a̱ nɛy ti ji̱ cuŋni ti jiɛn da̱ŋ dhieec wä jek kä Thɔ-dɔm, bä rɛk ɛmɔ ni kɛɛliwdɛ päl kɛ kui̱diɛn.” 27Cu A-bɛ-ram ɛ lɛni nyɔk kɛ jio̱k i̱, “Cäŋ lapä cɔ̱k, cä lɔcdä bum a bä di̱l ni ruac kɛ ji̱n Kuäär. 28Ku wee ci nɛy da̱ŋ dhieec ben raar kä kɛn ji̱ cuŋni ti jiɛn dhieec? Ji̱n bä, de̱ri rɛk ɛmɔ ni kɛɛliwdɛ däk kɛ ta̱a̱ nɛɛni da̱ŋ dhieec jɔ̱ɔ̱r?” Cuɛ jɛ loc i̱, “/Cä jɛ bi däk mi wa̱a̱ nɛy ti jiɛn ŋuaan wi̱cdiɛn nɛɛ dhieec jek rɛydɛ.” 29Cu A-bɛ-ram ɛ lɛni nyɔk kɛ thi̱ec i̱, “Bɛ tëë di mi te ni jiɛn ŋuaan thi̱n?” Cu Kuoth ɛ loc i̱, “/Cä jɛ bi la̱t mi de̱rɛ tekɛ nɛy ti jiɛn ŋuaan rɛydɛ.” 30Cu A-bɛ-ram ɛ ku jiök. “A lɔcdu /ci jiäk, Kuäär, kä a ji̱ nyɔakä kɛ thiecni. Ku wee te ni nɛy ti jiɛn diɔ̱k thi̱n?” Cuɛ jɛ lɛni loc bä i̱, “Mi wa̱a̱ nɛy ti jiɛn diɔ̱k wä jek, thilɛ mi bä la̱t.” 31Cu A-bɛ-ram wee i̱, “Bum lɔcdä a bä ruac kɛ ji̱ Kuäär, ku wee te ni nɛy ti jiɛn da̱ŋ rɛw thi̱n?” Cuɛ jɛ lɛni loc bä i̱, “/Cä jɛ bi däk mi dëë nɛy ti jiɛn da̱ŋ rɛw te thi̱n.” 32Cu A-bɛ-ram ɛ jiök i̱, “A lɔcdu /ci jiäk, Kuäär, kä a kua̱ rɔ nyɔk kɛ thi̱ec kä kɛɛl. Ku wee te ni nɛy ti jiath kɛl thi̱n?” Cuɛ jɛ loc i̱, “/Cä jɛ bi däk mi dëë nɛy ti jiath kɛl te rɛydɛ.” 33Mëë ci Kuoth Nhial thuɔ̱k kɛ ruac kɛnɛ A-bɛ-ram, cuɛ jiɛɛn, kä cu A-bɛ-ram luny cieŋ.

Currently Selected:

Tuk 18: nusNHB

Highlight

Copy