Tuk 20

A-bɛ-ram kɛnɛ Ä-bi-mɛ-lɛk

1Täämɛ cu A-bɛ-ram cu jiɛɛn ɛn wa̱nɔ kä cuɛ ɣo̱th kui̱c rööl Kɛ-naan in cɔal i̱ Nɛ-gɛb, kä cuɛ wä cieŋ kam Ka-dɛc kɛnɛ Cur, kä mëë cɛ rët kɛ Gɛ-raar cuɛ li̱ep thi̱n kä mi tɔt. 2Kä guäth ëë tëë thi̱n la jiökɛ naath i̱ Thara ɛ nyiman. Ɛ jɛn inɔ, cu Ä-bi-mɛ-lɛk min la kuäär Gɛ-raar in di̱t ni jɛn raan ja̱k kɛ ɣöö ba Thara nööŋ, kä cua jɛ nöŋ jɛ. 3Min ca nöŋ jɛ cu Kuoth ben kä Ä-bi-mɛ-lɛk kɛ la̱k kɛ wäär kɛl, kä cuɛ jɛ jiök i̱, “Ji̱n duundu lia̱a̱ kɛ ɣöö ci nyam ɛmɔ ka̱n, jɛn ɛ ciek gua̱ndɛ.” 4Kä kɛ ɣöö /ke̱n Ä-bi-mɛ-lɛk ni tɔ̱ɔ̱c kɛɛl kɛ Thara, cuɛ Kuoth jiök i̱, “Aɣ, Kuäär, a bi ram mi gua̱n cuŋni ku lɛni näk? 5Jɛn wut ɛmɔ puɔ̱nydɛ larɛ jɛ ɛn ɣöö ɛ nyiman. Kä ciekdɛ puɔ̱nydɛ cɛ jɛ lar bä i̱ ɛ däman. Ɣän cä nɛmɛ la̱t kɛ buay lɔaac kä thilɛ duer mi cä la̱t.” 6Kä cu Kuoth ɛ loc rɛy läkä i̱, “Ɛpuc, ɣän ŋa̱cä jɛ ɛn ɣöö ci mɛmɛ la̱t kɛ lɔc mi gɔaa, kɛ ɣöö ɛ ɣän ɛ nëë pen ji̱ ɣöö bi ɣä duer duer. Ɛ jɛn min /ka̱n nho̱k ni ji̱ gue̱e̱r ɛ. 7Niɛ täämɛ lucni ciek ɛmɔ gua̱ndɛ, kɛ ɣöö jɛn ɛ wut mi gök, kä jɛn bɛ pal kɛ kui̱du /ci bi lɛ li̱w. Kä mi /ci ciek ɛmɔ bi luɔ̱c jɛ, ŋäcni jɛ agɔaa ɛn ɣöö bi li̱w, ji̱n yɛnɛ ji̱ dhɔaaru diaal.” 8Ɛn guäth ɛmɔ, mëë ci Ä-bi-mɛ-lɛk ke̱e̱r mëë ruɔ̱n, cuɛ ji̱ läätädɛ diaal ciöl rɔ kä cuɛ ruac ɛmɔ kuën kɛ ni kɛɛliwdɛ kä cukɛ dual ɛlɔ̱ŋ. 9Ɛ jɛ nɔ, cu Ä-bi-mɛ-lɛk A-bɛ-ram cu ciöl rɔ kä cuɛ jɛ ben thi̱ec i̱, “Ɛŋu ɛnɛ ci lät kä kɔ mi? Ɛŋu mi cä duer ji̱ ɛnɔ bi ɣä kɔnɛ wecdä naŋ dui̱rä mi duŋ di̱i̱t inɔ mɔ? Ji̱n ci ɣä ca̱p mi jiäk ɛlɔ̱ŋ.” 10Kä cuɛ jɛ lɛni thi̱ec bä i̱, “Caari jɛ i̱di ɛn ɣöö bi nɔmɔ cäp?” 11Cu A-bɛ-ram ɛ loc i̱, “La̱tdä nɔmɔ kɛ ɣöö cä ŋa̱c ni ɣöö thilɛ ram mi dëë Kuoth luɔ̱th ɛn wanɛ, kɛnɛ ɣöö dɔ̱ŋ dëë raan ɣä näk kɛ ɣöö bɛ ciekdä ka̱n. 12Kä jɛn ɛpuc ɛ nyimaar. Jɛn ɛ nya gua̱a̱r ku duundɛ la ɣöö /cakɔ maara nyuak. Cä jɛ cu kuɛn ala ciekdä. 13Kä mëë cɔl Kuoth ɣä raar rɛy cieŋ gua̱a̱ri a bä la jääl ɣɔaa, cua ciekdä jiök i̱, ‘Mi nhɔki ɣä ɛlɔ̱ŋ, la larɛ i̱ lapä dämuɔɔr gua̱thni diaal tin banɛ wä thi̱n.’ ”

14Ɛ jɛn, cu Ä-bi-mɛ-lɛk det kɛnɛ ɣɔ̱k kɛ kuaany wutni kɛnɛ män nööŋ kä cuɛ kɛ ben ka̱m A-bɛ-ram ala muc, kä cuɛ jɛ luɔ̱c ciekdɛ ni Thara. 15Cu Ä-bi-mɛ-lɛk ɛ ku jiök i̱, “Wecdä ɛ wecdu bä. Ku cieŋ guäth ɔ nhɔki mɔ.” 16Kä cuɛ Thara jiök i̱, “Nɛn ɛ, ɣän cä dämuɔɔr col kɛ yio̱w ti bathdɔɔr kɛl. Kä ji̱n puɔ̱nydu thilɛ ji̱ duer nhiam nɛɛniku diaal.” 17Kɛ kɔr ruac Ä-bi-mɛ-lɛk cu A-bɛ-ram Kuoth cu pal, kä cu Ä-bi-mɛ-lɛk kɛnɛ ciekdɛ kɛ nyi̱er läätädɛ pua̱nykiɛn gɔw a cukɛ loc dapä, 18kɛ ɣöö män diaal tëë te dhɔr Ä-bi-mɛ-lɛk ci Kuoth Nhial dapdiɛn gäk kɛ kui̱ ciëk A-bɛ-ram ni Thara.

Currently Selected:

Tuk 20: nusNHB

Highlight

Copy