Luk 19

Yecu kɛnɛ Dhɛ̈-ki-yäth

1Cu Yecu wä kä Jɛ-ri-ko, kä cuɛ rët kɛ jɛ. 2Kä te kuäär thuɔ̱l tho̱lbo̱kä mi cɔal i̱ Dhɛ̈-ki-yäth mi riäŋ riäŋ thi̱n. 3Kä cuɛ go̱r ɛn ɣöö bɛ Yecu nɛn mi ɛ ram mi te di, kä kui̱ bunä, kɛ ɣöö ɛ wut mi ciɛk ciɛk. 4Inɔ cuɛ riŋ nhiam, kä cuɛ wä kɔt wi̱i̱ jiaath, kɛ ɣöö bɛ Yecu nɛn, kɛ ɣöö bɛ rët kɛ jɛn duɔ̱ɔ̱p ɛmɔ. 5Mëë ci Yecu cop ɛn guäth ɛmɔ, cuɛ nhial liɛc kä cuɛ jɛ jiök i̱, “Dhɛ̈-ki-yäth, bër piny kɛ pɛ̈th, kɛ ɣöö bä dhil wä te cieŋdu ɛn walɛ.” 6Cuɛ ben piny kɛ pɛ̈th, kä cuɛ jɛ nyuɔ̱ɔ̱r kɛ tɛ̈th lɔaac. 7Kä cu nɛy diaal tëë ca jɛ nɛn, ɛ tok kɛ mi kɛ wäkɛ i̱, “Jɛn bɛ wa̱a̱ ja̱l raam mi gua̱n dueeri.” 8Cu Dhɛ̈-ki-yäth cuɔ̱ŋ ɛn wi̱ni, kä cuɛ Kuäär ni Yecu jiök i̱, “Nɛn ɛ, Kuäärä, bä kui̱c kɛl kä nyinkä diaal ka̱m nɛy ti can. Kä mi cä raan mac kɛ duɔ̱ɔ̱r, bä jɛ cuɔ̱lɛ ni kä ŋuaan.” 9Kä cu Yecu ɛ jiök i̱, “Walɛ ci ka̱n teekä ben cieŋ ɛmɛ, kɛ ɣöö jɛn bä ɛ gat A-bɛ-ram. 10Kɛ ɣöö bä Gat Ran kɛ ɣöö bɛ nɛy ti ci bath ben go̱r, kä bɛ kɛ kän.”

Cäät yio̱o̱ni dääpä

(Mɛ̈t 25:14-30)

11Mëë liŋ naath ŋɔaani ti̱ti̱, cu Yecu ruac cäätdä lat, kɛ ɣöö cɛ thia̱k kɛ Jɛ-ru-tha-lɛm, kɛnɛ ɣöö cukɛ jɛ car bi ciaŋ kuäärä Kuɔth mal ben ni ɛn guäth ɛmɔ. 12Kɛ kui̱ ɛmɔ cuɛ wee i̱, “Ci wut mi luɔ̱thkɛ jiɛɛn, wëë ro̱o̱l mi na̱n, kɛ ɣöö bɛ buɔ̱m kuäärä wä jek kä bɛ luny jɔk. 13Cuɛ kuaanykɛ da̱ŋ wäl cɔl, kä cuɛ kɛ ka̱m yio̱w dääpä da̱ŋ wäl. Kä cuɛ kɛ jiök i̱, ‘La̱a̱tdɛ yio̱w ti̱ti̱ amäni mi cä luny jɔk.’ 14Kä duundɛ ɣöö cu ji̱ röölɛ jɛ nyir kä cukɛ naath jäkä kɔɔrɛ, wäkɛ i̱, ‘Cakɔ jɛ go̱r ɛn ɣöö bi wut ɛmɔ a kuäära.’ 15Mëë cɛ luny jɔk, kä cɛ buɔ̱m kuäärä jek, cuɛ la̱a̱tkɛ tëë cɛ ka̱m yio̱w cɔl, kɛ ɣöö bɛ jɛ ben ŋa̱c ɛŋu mi ca jek ala rëp kɛ läätni yio̱o̱ni. 16Cu ram in nhiam ben nhiamdɛ, wëë i̱, ‘Kuäär, yiëëth dääpädu cɛ yio̱w da̱ŋ wäl.’ 17Kä cuɛ jɛ jiök i̱, ‘Gɔaaɛ ɛlɔ̱ŋ. Ɛ ji̱n läät mi gɔaa. Kɛ ɣöö ŋa̱a̱thä ji̱ kɛ yuɔ̱p kä min tɔt, bi a kuäär wi̱i̱ni da̱ŋ wäl.’ 18Kä cu ram in rɛwdɛ ben bä, cuɛ wee i̱, ‘Kuäär, yiëëth dääpädu cɛ yio̱w da̱ŋ dhieec kɔ̱kiɛn nööŋ.’ 19Kä cuɛ jɛ jiök i̱, ‘Bi ji̱n a rueec wi̱i̱ni da̱ŋ dhieec.’ 20Cu ram in dɔ̱diɛn ben, kä cuɛ wee i̱, ‘Kuäär, yiëëth dääpädu mɛn. Cä jɛ yiɛn kɛ bi̱i̱. 21Cä dual kɛ ji̱, kɛ ɣöö ɛ ji̱n ram mi tekɛ ruac mi jiääk. Kä la käni ti /ci tɔ̱ a nyinku, kä la ŋɛɛri ti /keni pith.’ 22Cuɛ jɛ jiök i̱, ‘Bä ji̱ luk nikɛ ruaacni thuɔkdu pa̱ny lö kuany mi jiääk! Ɛpuc, ci jɛ ŋa̱c ɛn ɣöö ɛ ɣän ram mi bɛc ruacdɛ, kä ka̱nä ti /ci tɔ̱ a nyinkä, kä ŋɛ̈ɛ̈rä ti /ka̱n pith? 23Kä kuɛ la ŋu /keni yio̱o̱kä la̱th guäth tɔ̱wä yio̱o̱ni mɔ? Kɛ ɣöö mi ca luny jɔk dëë kɛ ka̱n kɛ rëpdiɛn.’ 24Kä cuɛ nɛy ti cuŋ gekädɛ jiök i̱, ‘Ka̱nɛ yiëëth dääpä kä jɛ, kä ka̱mɛ jɛ ram in tekɛ yio̱w da̱ŋ wäl.’ 25Kä cukɛ jɛ jiök i̱, ‘Kuäär, jɛn akɛ yio̱w da̱ŋ wäl!’ 26‘Kä ɣän la̱rä jɛ yɛ, ram mi tekɛ ti ŋuan ba jɛ ma̱t ti ŋuan. Kä ram mi thil ŋu, a cäŋɛ ni min tekɛ jɛ, ba ka̱n kä jɛ. 27Kä kɛ kui̱ ji̱ tɛ̈rä ti̱ti̱, tin lökɛ ɣöö bäkɛ ruac, nööŋɛ kɛ wanɛ mɛ, kä na̱kɛ kɛ nhiamdä.’ ”

Cuɔ̱p Yecu kä Jɛ-ru-tha-lɛm

(Mɛ̈t 21:1-11, Mak 11:1-11, Jɔ̱ɔ̱n 12:12-19)

28Mëë ci Yecu mɛmɛ lar, cuɛ wä nhiam kä kɛ, wëë kä Jɛ-ru-tha-lɛm.

29Mëë cɛ ben thiekä Beth-pac kɛnɛ Beth-ani guäth mi cɔal i̱ Päm Ɔ-lip. Cuɛ ji̱ kɔaarɛ da̱ŋ rɛw ja̱k, 30wëë i̱, “Wiaa rɛy ciëŋ mia̱ nhiamdun, kä niɛ wädun rɛc bia ruath muɔ̱l mi ca yian piny jek, mi /ken raan met kɔt jɔɔkdɛ. Luɔnyɛ jɛ kä nööŋɛ jɛ wanɛ mɛ. 31Mi tëëkɛ ram mi wä yɛ thiec i̱, ‘Ɛŋu luɔnyɛ jɛ mɔ?’ bia luɔ̱c jɛ i̱, ‘Go̱o̱r Kuäär ɛ.’ ” 32Cu nɛy tin ca ja̱k wä, kä cukɛ jɛ jek ce̱tkɛ min cɛ la̱r kɛ. 33Kä min luɔnykɛ ruath muɔ̱l, cu ji̱kɛ kɛ thiec i̱, “Ɛŋu luɔnyɛ ruath muɔ̱l ɔ?” 34Cukɛ wee i̱, “Go̱o̱r Kuäär ɛ.” 35Kä cukɛ jɛ nöŋ Yecu, kä mëë cikɛ bieynikiɛn pap jɔk muɔ̱l, cukɛ Yecu jakä nyuur jɔɔkdɛ. 36Kä min jälɛ jɔkdɛ, cu naath bieynikiɛn ɣa̱r dup. 37Kä min wëë dup in wä piny kɛ Päm Ɔ-lip, cu ji̱ kɔaarɛ ti ŋuan ɛ tok kɛ mi liakɛ Kuoth kɛ tɛ̈th lɔaac kɛ jɔw mi di̱i̱t kɛ kui̱ lätni bumä diaal tëë ci kɛn kɛ nɛn, 38wäkɛ i̱,#19:38 Diit 118:26.

“A puɔ̱th tekɛ kuäär

min bëë kɛ ciöt

Kua̱r ni Kuɔth!

A mal te nhial

kä a buay te ni

puɔ̱ɔ̱rä nhial!”

39Kä cu tha̱a̱ŋ ji̱ Pa-ri-thii ti te rɛy bunä jɛ jiök i̱, “Ŋi̱i̱c, luek ji̱ kɔaaru kɛ ɣöö bikɛ biɛt.” 40Cuɛ kɛ loc i̱, “Ɣän la̱rä jɛ yɛ, mi ci nɛy ti̱ti̱ biɛt, bi pääm pua̱nykiɛn ɛ tok kɛ mi rɔalkɛ.”

Wiee Yecu kɛ kui̱ Jɛ-ru-tha-lɛm

41Mëë ci Yecu ben thiekä wec, kä cɛ wec nɛn, cuɛ wiee kɛ kui̱dɛ, 42wëë i̱, “Duŋ mi deri jɛ ŋa̱c a cäŋɛ walɛ kɛn tin nööŋkɛ mal! Kä täämɛ cakɛ tey kä ji̱. 43Kɛ thuɔ̱k bi ni̱n ben, ti bi ji̱ tɛ̈ru ji̱ göl piny kɛ ko̱o̱tni kui̱cni diaal. 44Kä bikɛ ji̱n Jɛ-ru-tha-lɛm da̱k piny, yɛnɛ gaatku tin cieŋ rɛydu, kä /ca päm kɛl mi ca täth rɛydu bi pa̱l wi̱i̱ pa̱a̱m mi dɔ̱diɛn. Kɛ ɣöö /keni gua̱a̱th ëë gui̱l Kuoth ɛ ni ji̱ ŋa̱c.”

Wä Yecu rɛy luaak Kuɔth

(Mɛ̈t 21:12-17, Mak 11:15-19, Jɔ̱ɔ̱n 2:13-22)

45Kä cu Yecu wä rɛy luaak Kuɔth, kä cuɛ tok kɛ mi tuk nɛy tin kɔakɛ ŋɔak ɛn wi̱ni raar. 46Kä cuɛ wee i̱, “Ca jɛ gɔ̱r i̱,#19:46a Ica 56:7b.

‘Luaakdä bɛ a luaak palä,’

# 19:46b Yir 7:11. kä cia jɛ jakä gua̱a̱th

dolä ma̱a̱cni nath.”

47Ni ciaŋ la ŋi̱i̱cɛ naath rɛy luaak Kuɔth. Cu bööth palä tin di̱i̱t kɛnɛ ji̱ gɔ̱rkä kɛ bööth nath duɔ̱ɔ̱p go̱r ɛn ɣöö bikɛ jɛ näk. 48Kä cuɛ thil gua̱a̱th mi cu kɛn ɛ jek mi dëë gueer ni jɛ, kɛ ɣöö ci nɛy diaal rɔ̱ mat kɛ ɣöö liɛŋkɛ min latdɛ.

Currently Selected:

Luk 19: nusNHB

Highlight

Copy