Luk 23
23
Naŋ Yecu nhiam Pay-lɛt
(Mɛ̈t 27:1-2,11-14, Mak 15:1-5, Jɔ̱ɔ̱n 18:28-38)
1Cu buɔ̱n kɛɛliw rɔ jiɛc, kä cukɛ Yecu naŋ nhiam Pay-lɛt. 2Cukɛ jɛ tok kɛ mi gɔanykɛ, jɛ wäkɛ i̱, “Cakɔ wut ɛmɛ jek nyonɛ do̱ra, kä penɛ kɔ ɣöö luɔ̱nykɔ Thii-thɛr tho̱lbo̱k, kä latdɛ jɛ ɛn ɣöö ɛ jɛn Mɛ-thia in la Kuäär.” 3Kä cu Pay-lɛt ɛ thiec i̱, “Ɛ ji̱n Kuäär ji̱ Juudh?” Cuɛ jɛ loc i̱, “Ci jɛ lar.” 4Cu Pay-lɛt bööth palä tin di̱t kɛnɛ buɔ̱n jiök i̱, “Thilɛ duer mi cä jek kä wut ɛmɛ.” 5Kä cukɛ jɛ kuɔk thi̱n, wäkɛ i̱, “Jɛn jakɛ naath kä nyuɔɔn, kɛ ŋi̱i̱cdɛ rɛy Ju-dia kɛɛliw, ni kä Gɛ̈-lɛ-li gua̱a̱th in tookɛ jɛ thi̱n cu mäni wanɛ mɛ.”
Yecu nhiam Ɣɛ-rod
6Mëë ci Pay-lɛt mɛmɛ liŋ, cuɛ thiec mi wut ɛmɛ ɛ raan Gɛ̈-lɛ-li. 7Mëë cɛ jɛ ŋa̱c ɛn ɣöö ɛ raan rööl Ɣɛ-rod, cuɛ jɛ jäk kä Ɣɛ-rod mëë ci ben kä Jɛ-ru-tha-lɛm ɛn ni̱ni tɔ̱tɔ̱. 8Täämɛ, mëë ci Ɣɛ-rod Yecu nɛn, cu lɔcdɛ tɛɛth ɛlɔ̱ŋ, kɛ ɣöö go̱o̱rɛ ɣöö derɛ jɛ nɛn kɛ gua̱a̱th mi bäär, kɛ ɣöö cɛ kɛ̈kdɛ liŋ. Kä go̱o̱rɛ ɣöö derɛ jɛ nɛn a lätdɛ nyuuth mi gääy naath. 9Kä cuɛ jɛ thiëc kɛ gua̱a̱th mi bäär, kä thilɛ mi ci Yecu ɛ loc. 10Kä te bööth palä tin di̱t kɛnɛ ji̱ gɔ̱rkä cuŋä ɛn wanɔ, kä gɔanykɛ jɛ. 11Cu mäni Ɣɛ-rod kɛnɛ lathkëërikɛ cukɛ jɛ la̱t a jiäk, kä cukɛ jɛ buy. Cua jɛ jäk kä jɔk kä Pay-lɛt a ca jɛ rony kɛ bi̱i̱ mi gɔaa. 12Ni ɛn cäŋ ɛmɔ cu Ɣɛ-rod kɛnɛ Pay-lɛt cua mäth, kä mëëdan kɛ ji̱ tɛ̈r.
Kuɛth Yecu li̱th
(Mɛ̈t 27:15-26, Mak 15:6-15, Jɔ̱ɔ̱n 18:39—19:16)
13Cu Pay-lɛt bööth palä tin di̱t kɛ bööth kɛnɛ naath cɔl. 14Kä cuɛ kɛ jiök i̱, “Cia wut ɛmɛ nöŋ ɣä, kɛ ɣöö ɛ ram mi bo̱th naath jɔ̱ɔ̱r. Kä kɛ kɔr kä mëë cä jɛ thɛm ni nhiamdun /ka̱n ɛ jek ɛn ɣöö te wut ɛmɛ kɛ duer kɛ ŋɔaani tin ci yɛn ɛ gɔny ni jɛ. 15Kä thilɛ mi ci Ɣɛ-rod ɛ jek kä jɛ bä, kɛ ɣöö cɛ jɛ jäk kä kɔn. Kä kɛ thuɔ̱k, thilɛ mi cɛ la̱t mi dee lia̱a̱ cop. 16Kɛ kui̱ ɛmɔ ɣän bä jɛ duäc, kä bä jɛ lony.” [ 17Täämɛ kɛ gua̱a̱th ti̱mä, la lunyɛ naath ram kɛl kä nɛy tin ca yian.]#23:17 Tha̱a̱ŋ buɔkni tëë wal cikɛ käth 17 mat thi̱n.
18Kä cu kɛn diaal rɔal kɛɛl kɛ jɔw mi di̱i̱t i̱, “Naŋɛ wut ɛmɛ, kä luɔ̱nyɛ kɔ Bä-ra-bäth!” 19(Ɛ jɛn wut ëë ca la̱th dueel yieenä kɛ kui̱ rɔlä mi ci tuɔɔk rɛy wec, kɛnɛ luc ran.) 20Kä cu Pay-lɛt rɔ nyɔk kɛ ruac kɛ naath, kɛ ɣöö go̱o̱rɛ luɔ̱ny Yecu. 21Kä cukɛ wak kɛ jɔw mi di̱i̱t ɛlɔ̱ŋ i̱, “Pua̱tdɛ jɛ jiaath, pua̱tdɛ jɛ jiaath!” 22Cuɛ kɛ jiök kɛ diɔ̱ɔ̱kdiɛn, “Ɛŋu, mi jiääk ɛnɔ cɛ la̱t ɔ? /Ka̱n duer mi dee lia̱a̱ cop kä jɛ jek. Kɛ kui̱ ɛmɔ, ɣän bä jɛ duäc, kä bä jɛ lony.” 23Cukɛ ŋot kɛ mi rɔalkɛ kɛ jɔw mi di̱i̱t ɛn ɣöö a jɛ pua̱tkɛ jiaath. Kä cua rɔaliɛn liŋ. 24Kä cu Pay-lɛt ruac lat ɛn ɣöö ba min cikɛn ɛ thiec ka̱m kɛ. 25Cuɛ wut in ca thiec luɔ̱nykɛ, mëë ca yian kɛ kui̱ rɔlä kɛnɛ luc ran. Kä cuɛ Yecu ka̱m kɛ, kɛ ɣöö dee kɛn ɛ lät kä min go̱o̱r kɛn ɛ.
Puɔ̱t Yecu jiaath
(Mɛ̈t 27:32-44, Mak 15:21-32, Jɔ̱ɔ̱n 19:17-27)
26Kä min naŋkɛ Yecu raar, cukɛ raan Thay-rin mi cɔal i̱ Thay-mɔn mi bëë rɛy ciëŋ käp, kä cukɛ jiath la̱th jɔɔkdɛ kɛ ɣöö bɛ jɛ kap kɔɔr Yecu. 27Kä cu buɔ̱n nath mi di̱i̱t ɛ guɔ̱ɔ̱r kä te män rɛydiɛn ti pa̱tkɛ lo̱ckiɛn, kä parkɛ jɛ. 28Kä cu Yecu rɔɔdɛ rietkɛ, cuɛ kɛ jiök i̱, “Yɛn nyier Jɛ-ru-tha-lɛm, /cuarɛ wiee kɛ kui̱dä wieeɛ kɛ kui̱dun kɛnɛ gaatkun. 29Kɛ ɣöö bi ni̱n ben ti bikɛ wee i̱, ‘Ca rol poth kɛnɛ män ti /ka̱n gaat met dap, kɛ thi̱n ti /ka̱n met luɛth.’ 30Bikɛ jɛ tok kɛ mi jiökɛ pääm i̱, #23:30 Ɣocä 10:8.‘Tɛ̈thɛ wi̱i̱da kä kuɔ̱mɛ kɔ piny.’ 31Kɛ ɣöö mi lätkɛ inɔ min ŋot jiath a tɔ̱c, ɛŋu mi bi tuɔɔk mi wä jiath wä kööt?”
32Cua nɛy da̱ŋ rɛw ti ji̱ dueeri naŋ, kɛ ɣöö bakɛ wä näk kɛ jɛ kɛɛl. 33Mëë cikɛ cop guäth mi cɔal i̱, “Pöör”, cukɛ jɛ pua̱t jiaath kɛnɛ ji̱ dueeri, te ram kɛl cueecdɛ, kä te ram min dɔ̱ŋ caamdɛ. [ 34Cu Yecu wee i̱,#23:34 Diit 22:18. “Gua̱di̱n, päli kɛ ikä, kɛ ɣöö kui̱c kɛn min lät kɛn ɛ.”]#23:34 Tha̱a̱ŋ buɔkni tëë wal thilɛ kɛ riet kä ɣöö pälikɛ ikä kɛ ɣöö kui̱c kɛn min lät kɛn ɛ. Kä cukɛ bieynikɛ da̱a̱k kamnikiɛn kɛ yor gaakni. 35Cu naath cuɔ̱ŋ gekä, guɛckɛ jɛ. Kä cu bööth ɛ buy wäkɛ i̱, “Cɛ nɛy kɔ̱kiɛn kän. A jɛ kään rɔ, mi ɛ Mɛ-thia Kuɔth in cɛ mɛk.” 36Cu lathkëëri jɛ buy bä, cukɛ ben ka̱mkɛ jɛ kɔaŋ mi wac wac, 37kä jiökɛ jɛ i̱, “Mi ɛ ji̱n Kuäär ji̱ Juudh, kän rɔɔdu!” 38Tëëkɛ mi ca gɔ̱r nhial wi̱i̱dɛ i̱, “Mɛmɛ ɛ Kuäär ji̱ Juudh.”
39Cu gua̱n dui̱rä kɛl mi ca pua̱t jiaath jɛ kuëth wëë i̱, “/Ciɛ ji̱n Mɛ-thia? Kän rɔɔdu, amäni kɔn!” 40Kä cu wut in dɔ̱diɛn jɛ gak, wëë i̱, “Thilɛ ji̱ dual kɛ Kuoth, cäŋ nɛni jɛ i̱ ca ji̱ kuɛ̈th li̱th ce̱tkɛ jɛ? 41Kä ɛ cuɔ̱ɔ̱ŋ ɛn kuɛthdan li̱th, kɛ ɣöö jek kɔn ni min ro̱ŋ kɛ lätkɔn, kä thilɛ mi jiääk mi ci wut ɛmɛ jɛ la̱t.” 42Kä cuɛ Yecu jiök i̱, “Yecu tim ɣä mi wi̱i̱ wä cop rɛy kuäärädu.” 43Kä cu Yecu jɛ jiök i̱, “Ɛpuc, ɣän la̱rä jɛ ji̱, ɛn walɛ bi tekɛ ɣä kɛɛl cieŋ Kuɔth mi gɔaa.”
Lia̱a̱ Yecu
(Mɛ̈t 27:45-56, Mak 15:33-41, Jɔ̱ɔ̱n 19:28-30)
44Mëë ci ɣɔw a cäŋ däär, cu piny kɛɛliw cuɔl cu mäni bua̱k ca̱ŋ. 45Kä min ci cäŋ kony däär, cu bi̱i̱ luaak Kuɔth in di̱i̱t rɛ̈ɛ̈t ni däär. 46Kä cu Yecu wak kɛ jɔw mi di̱i̱t, wëë i̱,#23:46 Diit 31:5. “Gua̱di̱n, ɣän kuëŋä yiëëdä tetädu.” Mëë cɛ nɔmɔ lar, cuɛ yiëëdɛ in jɔakdiɛn cu ŋök raar. 47Mëë ci kuäär rɛ̈m min ci tuɔɔk nɛn, cuɛ Kuoth liak, kä cuɛ wee i̱, “Ɛpuc, wut ɛmɛ thilɛ jɛ duer.” 48Kä mëë ci buɔ̱n kɛɛliw mëë ci rɔ dol min ci tuɔɔk nɛn, cukɛ loc ciëëŋnikiɛn a pa̱tkɛ kathkiɛn. 49Cu nɛy diaal tëë ŋa̱ckɛ Yecu amäni män tëë guɔ̱ɔ̱rkɛ jɛ kä Gɛ̈-lɛ-li cuɔ̱ŋ ɛ na̱n, guɛckɛ ti̱ti̱ diaal.
Kuɔ̱ny Yecu
(Mɛ̈t 27:57-61, Mak 15:42-47, Jɔ̱ɔ̱n 19:38-42)
50Täämɛ tëëkɛ wut mi gɔaa kä gua̱n cuŋni mi cɔali Jo-thɛp, cäŋ ni mëë ɛ ram kɛl kä bööth luɔ̱k. 51Jɛn /kenɛ ca̱a̱pkiɛn lätkiɛn nhɔk. Kä bëë wi̱c ji̱ Juudh mi cɔali A-ri-ma-thia kä liipɛ ni ben kuäärä Kuɔth. 52Cu wut ɛmɔ wä kä Pay-lɛt, kä cuɛ puɔ̱ny Yecu wä thiec kä jɛ. 53Cuɛ jɛ wä luɔny piny, kä cuɛ jɛ rith kɛ bi̱i̱ mi puɔth puɔth. Kä cuɛ jɛ tɔa̱a̱c rɛy kɔ̱kä pa̱a̱m mi ca guaŋ kä /ka̱n raan met kony thi̱n. 54Kä ɛ cäŋ riali ŋɔaani ikä, kä ci cäŋ lɔ̱ŋä tuɔɔk. 55Cu män tëë bä kɛɛl kɛ Yecu kä Gɛ̈-lɛ-li wä kɔɔr. Cukɛ gua̱a̱th kunyädɛ wä nɛn kɛnɛ tɔ̱ɔ̱c ëë ca tɔ̱ɔ̱c ni puɔ̱nydɛ. 56Cukɛ loc jɔk, kä cukɛ wal kɛnɛ liɛɛth yi̱i̱rä wä rialikä.
Kä cukɛ lɔ̱ɔ̱ŋ kɛ cäŋ lɔ̱ŋä, ce̱tkɛ ŋut.
Currently Selected:
Luk 23: nusNHB
Highlight
Share
Copy
Want to have your highlights saved across all your devices? Sign up or sign in
Nuer Bible © Bible Society in South Sudan 1998,2012.
