Cɑ̈gø 28

1Kɑ Yɑgob cwøl yi Isɑɑk kɑ gø kwënge, ɑköbbe gøn kinni, “Yï ko nyömi ki dhɑjø kì kelli nyigi Kɑnɑɑn. 2Dhwöödh, kedhí Töör Arɑm gøl Bethuel wïyi meyí, kɑ yï nyömí kì kelli nyigi Lɑbɑn ómï meyí. 3Yï ógyëdh yi Jwøk Áyïmø, kɑ yï nënge ki nywøl mø ngenyø, møg-ɑ ógöögø ki jurrì mø gïïr. 4#Cɑ̈gø 17.4-8 Kɑ gyëdhhi Abrɑhɑm mëgge yïn, wuki nyigí. Piny-ɑ bëëd yi yïn ɑnɑn yï bɑ wëdh, ólɑg yi yïn, eni piny-ɑ ɑ́mëggi Abrɑhɑm yi Jwøk.” 5Aör Yɑgob yi Isɑɑk, kɑ kedh-ɑ Töör Arɑm kun-ɑ bëëd yi Lɑbɑn wɑ̈d Bethuel ómï Rebekɑ̀, meyi Yɑgob geki Isøø.

Cigi Isøø Nyömø ki Dhɑjø Megø

6Kɑ yod yi Isøø kinni Isɑɑk Yɑgob ɑ́gyëdhe kɑ gø öre Töör Arɑm be nyömø ki dhɑjø. Áyod yi en thyew kinni Yɑgob ɑ́cege kinni ko nyömi kì kelli nyigi Kɑnɑɑn. 7Áyode thyew kinni Yɑgob kwøbbi wïye geki meye lïng en kɑ kedh-ɑ Töör Arɑm. 8Codhe, ɑyode gøn kinni Isɑɑk wïye pɑ dwɑddi kinni o wɑ̈dde nyömi gen ki nyigi Kɑnɑɑn. 9Codhe, kɑ Isøø kedh-ɑ yï Icmɑil, ɑnywøme nyimï Nebɑyoth, nyɑn-ɑ cwøl ɑ́ Mɑlɑɑth nyɑɑr Icmɑil wɑ̈d Abrɑhɑm, e gø nywøøme’ kömi mɑ̈nn-ɑ yïe.

Lɑ̈gi Yɑgob kì Betiil

10Kɑ Yɑgob odhwödhø kì Bircebɑ̀ e kedh-ɑ Arɑn. 11#Jn 1.51 Keny-ɑ ɑ́wɑ̈dhe keny megø ɑbudde, mɑ́ cɑ̈ng ɑ́kedhi piny. Kɑ ókɑ̈bbø ki tungi kït me thɑ̈ɑ̈nhe wïje, ɑnene. 12Kɑ Yɑgob ólɑ̈gø, e lidh-ɑ yïdhi men-ɑ ócwöödh piny, wïje nywɑ̈ddø ki mɑl, ɑlidhe wëywöddi Jwøk ge nyi yedh-ɑ mɑl kɑ ge nyi yïnh-ɑ piny kì wïj yïnhɑni. 13#Cɑ̈gø 13.14-15 Aliidh Jwøng-ɑ Ácwɑ̈ɑ̈j yi Yɑgob e ócungø kì wïj yïdhi, ɑkööbe kinni, “Bene yɑn Jwøng-ɑ Ácwɑ̈ɑ̈j, Yɑ Jwøøg Abrɑhɑm kweyí, o bene yɑn Jwøøg Isɑɑk. Yï ómëggɑ piny-ɑ buud yi yïn èn, wuki kwɑrrí. 14#Cɑ̈gø 12.3; 22.18 Kwɑrrí ógöögø ge nɑ tør kɑ wɑ̈thi tùngi piny bënn pɑ̈ng yi gen. Kɑ jurri kömi piny bënn óyïddø ki gyëdh kì bɑngí wuki kwɑrrí. 15Yɑ ócyɑ̈dhi ki yïn kì kɑ̈jj-ɑ kedhi yi yïn bënn, kɑ yï dwöögɑ piny men. Yï pɑ pɑ̈nyɑ’ wiyø gïti keny-ɑ ógwøgɑ gïg-ɑ ɑ́köbbɑ yïn bënn.”

16Codhe, kɑ Yɑgob ócyëwø, ɑkööbe kinni, “Jwøng-ɑ Ácwɑ̈ɑ̈j nud kì keny kidyër, de yɑ bëëdø yɑ kwïj wøw.” 17Kɑ obwøgø, ɑkööbe kinni, “Yɑ óböggø yi keny! Bɑ ød Jwøk kidyër, o men bɑ dhø yuu mɑl.”

18Kɑ Yɑgob jwɑn-ɑ dhwödhø kì mwøl, kɑ tungi kïn-ɑ ɑ́thɑ̈ɑ̈nhe wïje kwɑnye, kɑ gø cwöödhe piny, ɑkunye köme ki møw. 19Kenyɑni ɑ́bëëd e cwøl ɑ́ Ludh, de ɑ́døøg ki cɑgø yi Yɑgob ɑ́ Betiil (ød Jwøk). 20Kɑ Yɑgob óköngø kinni, “Keløg Jwøk ócyɑ̈dhi ki yɑn, kɑ yɑ kor yi en ki yuu-ɑ cyɑ̈dhi yi yɑn èn, kɑ yɑ thödhe ki gïncɑm men cɑm yi yɑn, ki ógudh møg rug yi yɑn, 21kɑ yɑ dwööge gøl wïyɑ ki tɑrø, Jwøng-ɑ Ácwɑ̈ɑ̈j óbëëd ɑ́ Jwøgɑ ceth. 22Kït men-ɑ ɑ́cwöödhɑ piny èn, óbëëd ɑ́ ød Jwøk. Pyɑ̈ri wɑ̈thi jɑmmɑ bënn møg-ɑ ómëggi yɑn yi Jwøk, ójwödhɑ en.”

Currently Selected:

Cɑ̈gø 28: shkDCB

Highlight

Copy