Lk 6

Pyëj kì ri Sɑbɑth

(Mt 12.1-8; Mk 2.23-28)

1 # Jølø 23.25 Cyɑ̈ng ɑ́kyel Yëso ɑ́kedh e ócyɑ̈dhø e kɑ̈ll-ɑ yethi pwödh geki jøbɑnge, cyɑ̈ngɑni ɑ́bëëd ɑ́ cyɑ̈ɑ̈ng Sɑbɑth. Akɑ̈bbi jøbɑnge ki byel, ɑnyøng ge gïn kì cinggi gen, kɑ gï nyɑm gen. 2Kɑ kwï Jøpɑresì okööbø kinni, “Wude ɑ göög wun ki gïn-ɑ bɑ ɑkerø kì cyɑ̈ɑ̈ng Sɑbɑth?”

3 # 1 Sɑm 21.1-6 Kɑ Yëso ólöggø kinni, “Wu nuti rɑ̈ngø ki gïn-ɑ ɑ́gwøg yi Debïd geki jøbɑnge keny-ɑ ɑ́mɑɑg gen yi kɑ̈j? 4#Kwɑrr 24.9 Nuti kedhi ød Jwøk, kɑ ókɑ̈bbø ki ópun-ɑ bɑ ɑkwër kɑ gø cɑme, ngö e nyi cɑm-ɑ yi ókwër, kɑ kwëe mëgge jøg-ɑ cyɑ̈dhi ki en!”

5Codhe kɑ Jøpɑresì köbbi yi Yëso kinni, “Nyɑɑr Dhɑnhø bɑ Wïi Sɑbɑth.”

Jɑl Me Cinge Dhëgø

(Mt 12.9-14; Mk 3.1-6)

6Kɑ Yëso kedh-ɑ be pwönyø kì sinɑgøg kì cyɑ̈ɑ̈ng Sɑbɑth. Ádɑ jɑl me cingi kyëje dhëgø kì kenyɑni, keny-ɑ ɑ́bëëd Yëso e ópwönyø. 7Jøpwönyi Cigg geki Jøpɑresì ɑ́bëëd ge lebb-ɑ Yëso mɑ di gööge ki tyëng-ɑ buud ki cyɑ̈ɑ̈ng Sɑbɑth, o gø di gøøny gen. 8De gïn-ɑ ɑ́rømmi yi gen ngɑ̈nyi yi Yëso. Kɑ jɑl-ɑ cinge dhëgø köbbe kinni, “Cungí kì dïdyëri ji keny.” Adhwödhi jɑlɑni mɑl kɑ ócungø kì kenyɑni. 9Kɑ Yëso jøg-ɑ lebbii köbbe kinni, “Yɑ pyëj-ɑ wun, ɑ́ ngø ɑ døj ki gwøgø kì cyɑ̈ɑ̈ng Sɑbɑth, gwøgi gïndøj wɑlɑ̀ gwøgi gïnrɑj? Yieli wëyi dhɑnhø ɑ døj, wɑlɑ̀ nɑ̈gi dhɑnhø?” 10Kɑ lïïdh-ɑ nyingi tyëng-ɑ gëddii ki ɑlɑggø ree werre’ werrø, kɑ jɑlɑni köbbe kinni, “Rïj cingí.” Kɑ jɑlɑni cinge rïïje, kɑ cinge ódönyø.

11De Jøpɑresì ɑ́bëëd pëthi gen rijjø ki mendwøng, kɑ ri gen pyënyi gen, ki gïn-ɑ ócuggi göggi Yëso yi gen.

Kɑ̈bbi Yëso ki Tyëngwöödø

(Mt 10.1-4; Mk 3.13-19)

12Kì bøli kenyɑni, kɑ Yëso yedh-ɑ wïj kït be mɑ̈ddø. Kɑ lɑng-ɑ wɑ̈r e mɑll-ɑ Jwøk. 13Kì mwøl keny-ɑ ɑ́ru wøw, ɑcwööle jøbɑnge yïe, kɑ oyïënyø ki pyɑ̈rø wïdɑ́ryew kì kelli gen, kɑ gï cɑge gɑ tyëngwöödø, 14Sɑymøn (ɑ ɑ́cɑg yi Yëso ɑ́ Pïtør) kí Ándrø ómï Sɑymøn, kí Yɑgob, kí Jøn, kí Pïlïp, kí Bɑrthølømɑøs 15kí Mɑthyëw, kí Tömɑs, kí Yɑgob wɑ̈d Alpɑ̀, kí Sɑymøn (ɑ nyi cwøl ɑ́ Lunø,) 16kí Yeudɑ̀ wɑ̈d Yɑgob, kí Yeudɑ̀ Iskɑryøt jɑl-ɑ ɑ́twɑny Yëso.

Pwönyi Yëso geki Yïëne

(Mt 4.23-25)

17Kɑ Yëso yïnh-ɑ piny kì wïj kït geki tyëngwöödø, kɑ ócungø kì dïthwørø. Ji mø gïïr kì kelli jøbɑnge ɑ́bëëd ge nud kì kenyɑni, kí ji mø gïïr cɑrø mø kɑ̈ɑ̈l myërri Yeudiyɑ̀, kí Yerusɑlem, kí myërri kömi nɑɑm omelø, ɑ løg Suur kí Sïdön. 18Ge ɑ́bï-ɑ be lïngi pwönye, o ge yiel ki rɑ̈ɑ̈m dëlli gen. Kɑ tyëng-ɑ köthi gen buudh yi wëyrijjø, yiele ki wëyɑni. 19Ji bënn ɑ́dwɑdd-ɑ nywɑli Yëso, mɑ́ e ɑ́dɑ tegø me nyi bï wɑ̈g kì ree, kɑ ngɑn-ɑ nywɑlii nyii dönyø.

Medi Pyëw geki Kïïmø

(Mt 5.1-12)

20Kɑ Yëso lïïdh-ɑ yï jøbɑnge, ɑkööbe kinni,

“Wu tyëng-ɑ nyingi wun cɑn, ri wun dɑ gyëdh;

mɑ́ Pödhi Jwøk bɑ mi wun!

21Wu tyëng-ɑ ri wun di kɑ̈j ɑnɑn, ri wun dɑ gyëdh,

mɑ́ wu óyɑ̈ng!

Wu tyëng-ɑ ywöngi ɑnɑn, ri wun dɑ gyëdh,

mɑ́ wu óngedhi ki medi pyëw!

22 # 1 Pït 4.14 “Ri wun dɑ gyëdh keny-ɑ ómɑɑn wun yi ji, kɑ wu bɑny yi gen, kɑ wu gwɑddi yi gen, kɑ ge okööbø i wu bɑ tyëngrijjø kipe kɑ̀ cyɑ̈dhi wun kì bɑng Nyɑɑr Dhɑnhø. 23#2 Kwøb 36.16; Gwøg 7.52 Mïni pëthi wun dicyɑ̈ngɑni, mɑ́ köögi mi wun dwøng kì mɑl, mɑ́ gïg ni møgɑni ɑ ɑ́bëëd ge nyi gögg-ɑ jøtöng yi kweyyi gen.

24“De wun ɑ tyëngkɑ̈rì, ri wun dɑ cyën,

mɑ́ jɑmm-ɑ ɑ́tyer yi pëthi wun ɑ́yod yi wun!

25Wu tyëng-ɑ yɑ̈ngø ɑnɑn ri wun dɑ cyën,

mɑ́ wu ómɑg yi kɑ̈j!

Wu tyëng-ɑ ngedhi ɑnɑn, ri wun dɑ cyën,

mɑ́ wu óywöngi kɑ wu okïïmø.

26“Ri wun dɑ cyën keløg wu ceg kɑ lenhø yi teedø bëne, mɑ́ kweyyi gen ɑ́bëëd ge nyi lenh-ɑ jøtöng møg-ɑ pɑ nyi töng dyër.

Mɑɑri Tyëngmɑ̈ɑ̈nø

(Mt 5.38-48; 7.12ɑ)

27“De yɑ köbb-ɑ wun, wu tyëng-ɑ lïngø èn kinni, mɑɑru tyëngmɑ̈ɑ̈nø. Nyi göggu tyëng-ɑ mɑɑn wun ki gïndøj. 28Nyi kwɑjji wun gyëdh kipe tyëng-ɑ nyi lɑ̈mmi wun cyën, geki tyëng-ɑ guud nyingi wun. 29Ke di ngɑn gøj yïn kì thɑ̈ngí, lugí thɑ̈ng-ɑ kyeelø thyew, o gø gøje. Keløg e dɑ ngɑn kwɑny lɑwí ko mɑ̈ɑ̈n ɑ́ywödhí thyew. 30Nyi thödhí ngɑn-ɑ kwɑ̈jji kì yïí. Kɑ ngɑn-ɑ kwɑny gïí ko piir. 31#Mt 7.12 Bëëd ki ji ki bëën-ɑ di dwɑddi yi yïn kì yï gen.

32“Keløg yï mɑɑr-ɑ tyëng-ɑ mɑɑr yïn keti gen, dɑ gyëdh kì ri mɑ̈ɑ̈dø menɑni? Cɑgg ɑ́ tyëngorøg, ɑ́ ngø ge nyii göögø kinøw! 33Keløg ɑ́ tyëng-ɑ nyi göggi yïn ki gïndøj, ɑ nyi göggi yi yïn ki gïndøj, dɑ gyëdh kì ri gwøng ni menɑni? Cɑgg ɑ́ tyëngorøg, ɑ́ ngø ge nyii göögø kinøw! 34Keløg wu nyi wïdh-ɑ tyëng-ɑ rømmi yi wun kinni wu ócuggø cudø yi gen, dɑ gyëdh kì ri menɑni? Cɑgg ɑ́ tyëngorøg, ɑ́ ngø ge nyi wïdh-ɑ ji-ɑ ni gen kipe kinni o gïn-ɑ widh ócol! 35De mɑɑru tyëngmɑ̈ɑ̈nø. Nyi göggu gen ki gïndøj, kɑ ge nyi wïdhi wun wu pɑ rumø kinni wu ócuddi, o wu óyïddi wun ki köögi me dwøng, kɑ wu ogöögø ki nyigi Jwøng-ɑ Pëddi Döng, mɑ́ en kiree, pyëwe nyii lɑ̈ɑ̈mø ki ji, cɑgg gɑ ji mø kwïj pwøj, o pëthi gen pɑ̈ng yi orøg. 36Nyi lɑ̈ɑ̈m pëthi wun, ni kenyi lɑ̈ɑ̈m pyëw Wïyi wun ceth.

Cɑyyi Tyëng-ɑ Kyeelø

(Mt 7.1-5)

37“Wu ko nyi cɑ̈ɑ̈y ki tyëng-ɑ kyeelø kipe wu ócɑy. Tyëng-ɑ kyeelø ko nyi gøøny wun kinni i ge bɑ̈jjø, o wu ócög wun wu pɑ gøøny thyew. Nyi wiy wun tyëng-ɑ cɑɑg wun piny, o wu ówiy keny-ɑ ócɑ̈gi wun piny. 38Nyi nëngu ji møøgø, o wu ónëngi yi Jwøk. Wu ónëngi ki mø ngenyø; gïn-ɑ yije órummi óyeg kɑ rɑɑr-ɑ piny, kɑ køny yethi cinggi wun. Mɑ́ gïn-ɑ́ yije ɑ́muuj yi wun, en ɑ yije óthödhi wun yi Jwøk. Wu óthödhi yi Jwøk, kɑ yuu-ɑ nyi muuj yi wun.”

39 # Mt 15.14 Aköbbi gen yi Yëso kinni, “Dɑ cwør me cuggi pyejji cwør-ɑ kyeelø? Pɑ cuggi! Ge pɑ̈dh-ɑ yij wøl ryeet. 40#Mt 10.24-25; Jn 13.16; 15.20 Nyiigwed pɑ lɑ̈w kibøli jɑlpwönye, de nyiigwed men-ɑ ópwönyø kidøøj, ceg-ɑ gwøg e pɑ̈r ki jɑlpwönye.

41“Yïde ɑ nenní nyɑ wëëlø kì wɑɑng wɑɑd wun, o yï cöög duli yɑdh men-ɑ wɑngí pɑ nenni yi yïn? 42Wɑɑd wun óköbbi yi yïn kidï kinni, ‘Mɑ̈dh, wiy yɑ kɑ̈ɑ̈l-ɑ nyɑ wëëlø men wɑ̈g kì wɑngí,’ e duli yɑdh men-ɑ wɑngí pɑ nenni yi yïn? Yïn, wëny! Kɑ̈ɑ̈l duli yɑdh men-ɑ wɑngí wɑ̈g møti, codhe o yï nëën kidøøj, o wëël-ɑ wɑɑng ngɑn-ɑ kyeelø kɑ̈ɑ̈l yi yïn wɑ̈g cyee.

Yɑdh kí Nywøle

(Mt 7.16-20; 12.33-35)

43“Yɑdh men-ɑ døj pɑ nyi nywøl ki nywøl mø rijjø, nɑ kɑ̀ pɑ nyi nywøl yɑnh rɑj ki nywøl mø døøj. 44#Mt 12.33 Yɑdh nyi ngij-ɑ ri nywøle. Ji pɑ nyi punø ki nywøli ólɑm kì ri ɑ́lɑl, nɑ kɑ̀ pɑ nyi pøn nywøli oløg kì kö but. 45#Mt 12.34 Tyëngdøj nyi kɑ̈ɑ̈l-ɑ gïgdøj wɑ̈g kì ri døøjø men-ɑ mïdhi yi gen kì yethi pëthi gen. De tyëngrijjø nyi kɑ̈ɑ̈l-ɑ gïgrijjø wɑ̈g kì ri rɑ̈jø men-ɑ mïdhi yi gen kì yethi pëthi gen. Ji nyi kømm-ɑ gïg-ɑ pëthi gen.

Bödhhi Gyer Áryew

(Mt 7.24-27)

46“Wude ɑ nyi cwøllu yɑn kinni ‘Wuö, Wuö’ o gïn-ɑ kwøb yi yɑn pɑ gwøg yi wun? 47Wu ónyudhɑ ki ngɑn-ɑ pɑ̈r ki ngɑn bï be lïngi kwøbbɑ, kɑ ogöögø kì ri kwøbbɑni. 48Ngɑnɑni nɑ jɑl mɑ ɑ́gëëd ki ød. Kɑ tyelli ød konye, kɑ ge niyeeng-ɑ piny keny-ɑ bɑ kït. Keny-ɑ ɑ́bëën bɑɑyø, kɑ thew ree pɑ̈nye ki wøji ønɑni, de ød nuti wöl onhɑ̈nh, mɑ́ e ókëël-ɑ kömi kït. 49De ngɑn-ɑ lïngi kwøbbɑ, kɑ ocögø e pɑ göögø kì ri kwøbbɑni, nɑ jɑl mɑ ɑ́gëëd ki ød, e tyelli gøn nuti niyengø. Keny-ɑ ɑ́bëën bɑɑyø, ønɑni ɑ́jwɑn pɑ̈ɑ̈dhø, kɑ órënyø ki mendwøng!”

Currently Selected:

Lk 6: shkDCB

Highlight

Copy