Лука 2

ЯТӀОНЭРЭШЪХЬ

Исус къызэрэхъугъэр

(Маттэ 1:18-25)

1А мафэхэм Рим къэралыгъошхом зэкӀэ ис цӀыф пстэуми япчъагъэ алъытэнхэу, ацӀэхэр атхынхэу кайсар Аугуст#2:1 Аугуст – Кайсар Гай Октавиан цӀэу зэреджагъэхэм унашъо къыдигъэкӀыгъ. 2Мыр апэ дэдэу цӀыфхэр зыщалъытагъэхэр ары. Ар зыхъугъэр Сирие хэкум#2:2 Сирие хэкур – Рим къэралыгъошхом щыщ хэкугъ. Израиль хэгъэгур Сирие хэкум щыщыгъ. иӀэшъхьэтет Квириный зыцӀэм илъэхъан ары. 3Арыти, хэтрэ цӀыфи ежь ыцӀэ аригъэтхыным пае, ятэ-янэхэр зыщыщ къалэм кӀуагъэ.

4Аущтэу Юсыф пачъыхьэ Даутэ къытекӀыгъэ цӀыфхэм зэращыщым пае, Галилей хэкум ит къалэу Назарет дэкӀи, Даутэ икъалэу Иудей хэкум ит Бет-Лэхьэм#2:4 икъалэу Бет-Лэхьэм – Ерусалим километрийкӀэ пэчыжьэу, икъыблэ лъэныкъомкӀэ ит. дэкӀоягъ.

5Юсыф заригъэтхыным пае, къыщэнэу ыгъэнэфэгъэгъэ Мерэмэу сабыир зышъо хэлъыр игъусэу, Бет-ЛэхьэмкӀэ дэкӀоягъ. 6Ащ щыӀэхэу, лъфэгъу мафэр къэсыгъ. 7Джащыгъум Мерэм ыкъоу щыпэлъфыр къыфэхъугъ, хъэдэным кӀоцӀищыхьи, былымхэр зычӀэт цощым ит шхынлъэм дилъхьагъ, сыда пӀомэ, хьакӀэщым чӀыпӀэ нэкӀ иӀэжьыгъэп.

МэлэӀичыр мэлэхъохэм къазэрэфэлъэгъуагъэр

8А Ӏэгъо-благъом мэлэхъо заулэ ямэлхэм апэсхэу чэщым губгъом итыгъэх. 9Тхьэм имэлэӀич горэ ахэмэ къафэлъэгъуагъ. Зиусхьаным инэфынэ гъэшӀэгъон мэлахъохэр къызеуцухьэм, ахэр лъэшэу щтагъэх. 10Ау мэлэӀичым къариӀуагъ: – Шъумыщын, ау шъукъэдаӀу! ЗэкӀэ шъулъэпкъ пае къэбар гушӀогъошхо къышъосӀощт: 11Шъуи КъэгъэнэжьакӀо Даутэ икъалэ#2:11 Даутэ икъалэ – Бет-Лэхьэм ары. непэ къыщыхъугъ, ар Зиусхьанэу Христос ары. 12Мыр шъоркӀэ нэшанэ хъущт: сабыир хъэдэным кӀоцӀыщыхьагъэу, шхынлъэм дэлъэу къэжъугъотыщт.

13ЕтӀанэ ошӀэ-дэмышӀэу мэлэӀичым дэжь уашъом щыщэу мэлэӀич купышхо къыщылъэгъуагъ. Тхьэм щытхъушхо фашӀэу моущтэу къаӀуагъ:

14– Щытхъушхор уашъомкӀэ Тхьэм ий, чӀылъэмкӀэ цӀыфхэу Тхьэр разэ зыфэхъухэрэм гупсэфыр яй!

15МэлэӀичхэр ӀукӀыжьхи, уашъом зыдэкӀоежьхэм, мэлахъохэм зэраӀожьыгъ: – Зиусхьаным зикъэбар къытигъэӀугъэ хъугъэ-шӀагъэр тлъэгъунэу Бет-Лэхьэм тыжъугъакӀу.

16Арыти, Бет-Лэхьэм псынкӀэу кӀохи, Мерэми Юсыфи шхынлъэм дэлъ сабыйри къагъотыгъ. 17Ахэр залъэгъухэм, мэлэӀичым сабыим ехьылӀагъэу къариӀуагъэхэр аӀотэжьыгъэх. 18Мэлахъохэм къаӀуагъэхэр зэхэзыхыгъэ цӀыф пстэуми агъэшӀэгъуагъ. 19Ау Мерэм мы Ӏофхэр зэкӀэ ыгу риубытэхи, ягупшысагъ. 20Мэлахъохэм зэхахыгъэ пстэумрэ алъэгъугъэ пстэумрэ апае Тхьэр агъэлъапӀэзэ, щытхъу фашӀызэ, агъэзэжьыгъ. МэлэӀичым къызэрариӀуагъэм тетэу зэкӀэри хъугъэ.

Юсыфрэ Мерэмрэ сабыеу Исус Зиусхьаным ыпашъхьэ зэрэрахьагъэр

21Мэфий тешӀагъэу сабыир сунэт ашӀын фаеу зэхъум, Мерэм ышъо хидзэным ыпэкӀэ, мэлэӀичым ащ къызэрэриӀогъагъэм тетэу Исус фаусыгъ.

22Пегъымбар Мусэ и Тэурат хабзэ иунашъо тетэу#2:22 пегъымбар Мусэ и Тэурат хабзэ иунашъо тетэу – еплъ Пегъымбар Мусэ ящэнэрэ тхылъэу ытхыгъэм 12:2-4. Юсыфрэ Мерэмрэ зызщагъэкъэбзэжьын фэе мафэхэр зыблэкӀхэм, сабыир Зиусхьаным ыпашъхьэ рахьаным пае, Ерусалим ахьыгъ, 23мы унашъоу Зиусхьаным ихабзэ итым тетэу#2:23 Зиусхьаным ихабзэ итым тетэу – еплъ Пегъымбар Мусэ ятӀонэрэ тхылъэу ытхыгъэм 13:2.: «Хэтрэ хъулъфыгъэ щыпэлъфыр Зиусхьаным иен фае». 24Ащ нэмыкӀэуи Ерусалим зыкӀэкӀуагъэхэр Зиусхьаным иунашъо тетэу#2:24 Зиусхьаным иунашъо тетэу – еплъ Пегъымбар Мусэ ящэнэрэ тхылъэу ытхыгъэм 12:8., ежьхэр къабзэ хъунхэм пае, «губгъо тхьэркъо цӀыкӀуитӀу е тхьэркъо щыритӀу» къурмэныпхъэу ахьыныр ары.

25А мафэхэм Симеон зыцӀэ лӀы горэ Ерусалим дэсыгъ. Ар шъыпкъагъэ зиӀэу, Тхьэм шӀолӀыкӀ фызиӀэ лӀыгъ. Израиль игукъао Тхьэм тырихыжьыным ежэщтыгъ. Тхьэм ы Псэ ЛъапӀи ыгу илъыгъ. 26Тхьэм ы Псэ ЛъапӀэ Симеон зэхыригъэшӀыкӀыгъагъ, Зиусхьаным дэжь къикӀын фэе Христос#2:26 Христос – пачъыхьэ Даутэ илъэпкъ къытекӀыгъэу, пегъымбархэм къызэраӀуагъэм тетэу, израиль цӀыфхэм шъхьафитыныгъэрэ мамыр тетыгъомрэ аригъэгъотынхэу Тхьэм ахэр къызэригъэгугъэгъэ пщы лъапӀэр ары. ылъэгъуным ыпэкӀэ, лӀэныгъэр къызэрэлъымыӀэсыщтыр. 27Аущтэу Тхьэм ы Псэ ЛъапӀэ Симеон Тхьэм иунэшхо чӀищагъ. Тэурат хабзэм иунашъо тетэу, сабыир Тхьэм ыпашъхьэ рахьаным пае янэрэ ятэрэ сабыеу Исус Тхьэм иунэшхо къызычӀахьэм, 28Симеон сабыир ӀаплӀыкӀэ къышти, мы гущыӀэхэр ыӀохэзэ, Тхьэм щытхъу фишӀыгъ:

29– Зиусхьан, сызэрэбгъэгугъагъэм тетэу, сэ о уиӀорышӀэр гупсэф сыгу илъэу джы дунаим серэхыжь;

30,31сыда пӀомэ, цӀыф лъэпкъ пстэуми апашъхьэ о щыбгъэхьазырыгъэу, цӀыфхэр мыкӀодхэу Къэзгъэнэжьыщтыр сэ сынэхэмкӀэ слъэгъугъэ.

32Ар нэфынэу хымэ лъэпкъхэм шъыпкъагъэр язгъэшӀэщтыр ары, о плъэпкъ Израиль щытхъушхо иӀэ зыгъэхъущтри ары.

33Сабыим ехьылӀагъэу Симеон къыӀогъэ гущыӀэхэр Юсыфрэ сабыим янэрэ агъэшӀэгъуагъэх. 34ЕтӀанэ ахэмэ ынэшӀу къащифэнэу Симеон Тхьэм афелъэӀуи, сабыим янэ Мерэм риӀуагъ: – Израиль щыщ цӀыфыбэхэр мы сабыим текӀодэнхэм паий, цӀыфыбэхэри мыкӀодхэу къыгъэнэжьынхэм паий, нэшанэу цӀыфхэр къызпэуцущтыр хъуным паий, Тхьэм ар къыгъэкӀуагъ. 35Аущтэу цӀыфыбэмэ агухэм арылъхэр нафэ къэхъущтых. Чатэм фэдэу гукъэошхом о угуи къыуӀэщт.

36Ащ дэжьым Ашер лӀакъом щыщэу, Фануил ыпхъоу Аннэ ыцӀэу пегъымбар бзылъфыгъэ горэ щыӀагъ. ЫныбжькӀэ лъэшэу хэкӀотэгъагъ. ЗыдэкӀо ужым илъэсиблэ илӀ игъусагъ. 37ЕтӀанэ лӀыр зэлӀэм, бзылъфыгъэр зэрэшъузэбэу ыныбжь тӀокӀиплӀырэ плӀырэ хъугъэ. Тхьэм иунэшхо къычӀэмыкӀэу, ынэкӀэу, Тхьэм елъэӀоу, чэщи мафи Тхьэр ыгъэлъапӀэщтыгъ. 38А ныор а сыхьат дэдэм Мерэмрэ Юсыфрэ абгъодахьи, Тхьэм щытхъу фишӀыгъ. Тхьэм Ерусалим шъхьафитыныгъэ къызэрэритыщтым паплъэщтыгъэ цӀыфхэм сабыим игугъу афишӀ зэпытыгъ.

39Мерэмрэ Юсыфрэ Зиусхьаным ихабзэ иунашъо тетэу, зэкӀэри загъэцэкӀэ ужым, Галилей хэкум ит якъалэу Назарет агъэзэжьыгъ. 40Сабыим зыкъыӀэтыщтыгъ, ыгукӀи ыпсэкӀи хахъощтыгъ, акъылышӀу иӀэ хъущтыгъ, Тхьэм ынэшӀуи къыщифэщтыгъ.

Исус кӀалэр Тхьэм иунэшхо зэрэкӀуагъэр

41Илъэс къэс Исус янэ-ятэхэр ӀутӀыжъ мэфэкӀ мэфэшхом#2:41 ӀутӀыжъ зыцӀэ мэфэшхор – ӀутӀыжъ зыцӀэ мэфэкӀ мэфэшхомрэ Хьалыгъу мыкӀу-мыпшэ зыщашхырэ мэфэкӀ мэфэшхохэмрэ зэдагъэлъапӀэхэзэ, Тхьэм Мысырым къызэрэригъэкӀыжьыгъагъэхэр джуртхэм агъэлъапӀэ. ӀутӀыжъ ехъулӀэу Ерусалим кӀощтыгъэх. 42КӀалэр илъэс пшӀыкӀутӀу зэхъум, хабзэм тетэу, мэфэкӀ мэфэшхом тефэу Ерусалим кӀуагъэх. 43МэфэкӀ мэфэшхохэр зыблэкӀхэм, янэ-ятэхэм якъалэ загъэзэжьым, ахэмэ амышӀахэу кӀалэу Исус Ерусалим къыдэнагъ. 44Адрэ ягъусэхэм ахэтэу гугъэхэзэ, янэ-ятэхэр зы мафэ гъогум тетыгъэх. ЕтӀанэ яблагъэхэмрэ яныбджэгъухэмрэ адэжь кӀалэм щылъыхъухэу аублагъ. 45Къызамыгъотыжьым, лъыхъунхэу Ерусалим къагъэзэжьыгъ. 46Мэфищ ужым Тхьэм иунэшхо чӀэсэу къагъотыжьыгъ, дин гъэсакӀохэм ахэсэу, ахэмэ къаӀорэм едэӀоу, яупчӀэу. 47КӀалэм ыӀорэм къедэӀущтыгъэ пстэуми игубзыгъагъэрэ ипэгъокӀхэмрэ агъэшӀагъощтыгъэх. 48Янэ-ятэхэм кӀалэр залъэгъум, агъэшӀэгъуагъ. – А кӀал, сыда къытэпшӀагъэр? – къыриӀуагъ янэ. – Уяти сэри гумэкӀыгъом тыхэтэу тыкъыплъэхъу.

49– Сыд пае шъукъыслъыхъура? – къариӀожьыгъ кӀалэм. – Сэ ся Тэ иунэшхо сычӀэсын зэрэфаер шъушӀэрэба?

50Ау кӀалэм гущыӀэхэу къариӀуагъэхэр къагурыӀуагъэп.

51ЕтӀанэ янэ-ятэхэм ягъусэу Исус НазареткӀэ ехыжьыгъ, афэӀорышӀэуи щытыгъ. Янэ мы Ӏофхэр зэкӀэ ыгу риубытагъэх. 52Исус зыкъыӀэтыщтыгъ, нахь акъылышӀуи хъущтыгъ, Тхьэми цӀыфхэми агу къеӀущтыгъ.

Currently Selected:

Лука 2: AdgNT14

Highlight

Copy