Лука 4
4
ЯПЛӀЭНЭРЭШЪХЬ
Исус псэкӀод ригъэшӀэнэу шэйтаныр ыуж зэритыгъэр
(Маттэ 4:1-11; Марк 1:12-13)
1Тхьэм ы Псэ ЛъапӀэ инэу ыгу илъэу, Исус Иордан псыхъом къыӀукӀыжьыгъ. 2Тхьэм ы Псэ ЛъапӀэ ар шъоф нэкӀым ыщагъ. А чӀыпӀэм шэйтаныр ащ псэкӀод ригъэшӀэным мэфэ тӀокӀитӀурэ ыуж итыгъ. А мафэхэм Исус зи ышхыгъэп, ахэри зытешӀэхэ ужым, къэмэлэкӀагъ.
3Джащыгъум шэйтаным Исус къыриӀуагъ: – О Тхьэм ури Къомэ, мы мыжъор хьалыгъу хъунэу унашъо фэшӀ.
4– Тхьэм игущыӀэ тхыгъэхэм арыт#4:4 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 8:3., – риӀожьыгъ Исус, – «Хьалыгъу закъор арэп цӀыфыр зэрыпсэущтыр, сыдрэ гущыӀэу Тхьэм дэжь къикӀырэр ары нахь».
5ЕтӀанэ шэйтаным Исус чӀыпӀэ лъагэ горэм дищаий, зы нэплъэгъукӀэ дунаим тет пачъыхьагъу пстэури къыригъэлъэгъугъ. 6Ащ Исус къыриӀуагъ: – Мы пачъыхьагъухэм ятетыгъо пстэумрэ щытхъушхоу яӀэмрэ остыщтых, сыда пӀомэ, сӀэ илъых, сызфаем естын сыфит. 7ЛъэгонджэмышъхьэкӀэ укъэтӀысэу сыбгъэлъапӀэмэ, ахэр зэкӀэ о уие хъущт.
8– Тхьэм игущыӀэ тхыгъэхэм арыт#4:8 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 6:13., – риӀожьыгъ Исус, – «Зиусхьанэу уи Тхьэ бгъэлъапӀэзэ, ежь изакъоу уфэлэжьэн фае».
9Ащ ыуж шэйтаным Исус Ерусалим ыщи, Тхьэм иунэшхо нахь лъэгапӀэу иӀэм тыригъэуцуи, къыриӀуагъ: – О Тхьэм ури Къомэ, мыщ дэжьым зыщедзых; 10,11сыда пӀомэ, Тхьэм игущыӀэ тхыгъэхэм арыт#4:10-11 Тхьэм игущыӀэ тхыгъэхэм арыт – яплъ Орэд ЛъапӀэхэм 90:11-12.: «Тхьэм имэлэӀичхэм укъаухъумэнэу унашъо къафишӀыщт, о плъакъокӀи мыжъом уемыутэкӀыным пае, аӀэхэмкӀэ уаӀэтыщт».
12– Тхьэм игущыӀэ тхыгъэхэм арыт#4:12 Тхьэм игущыӀэ тхыгъэхэм арыт – еплъ Пегъымбар Мусэ ятфэнэрэ тхылъэу ытхыгъэм 6:16., – риӀожьыгъ Исус, – «Зиусхьанэу уи Тхьэ умыушэты».
13ЕтӀанэ шэйтаным Исус псэкӀод зэрэригъэшӀэн Ӏэмал пстэури зеухым, игъо ифэмэ, къыгъэзэжьынэу ӀукӀыжьыгъ.
Исус иӀоф Галилей хэкум зэрэщиублагъэр
(Маттэ 4:12-17; Марк 1:14-15)
14ЕтӀанэ Тхьэм ы Псэ ЛъапӀэ илъэкӀыкӀэ Исус Галилей хэкум ыгъэзэжьыгъ. Исус икъэбар а хэкум зэкӀэ щыӀугъ. 15ЦӀыф пстэуми щытхъу къыфашӀэу, Исус ахэмэ ясинэгогухэм Тхьэм игущыӀэхэр щаригъашӀэщтыгъ.
Назарет дэс цӀыфхэм Исус зэрамыштагъэр
(Маттэ 13:53-58; Марк 6:1-6)
16Исус зыщапӀугъэ Назарет къэкӀуагъ. Зэрихабзэу, шэмбэт мафэм#4:16 шэмбэт мафэр – джуртхэм ямэфэ лъапӀ ары. А мафэм хэти Ӏоф ышӀэн фитэп. синэгогум чӀэхьагъ. Ащ Тхьэм игущыӀэ тхыгъэхэм ащыщхэм къафеджэнэу апашъхьэ къиуцуагъ. 17Пегъымбар Ешайа итхылъ къыратыгъ. Тхылъыр къызэгуихи, моущтэу зэрытхэгъэ чӀыпӀэр къыгъотыгъ#4:17-19 зэрытхэгъэ чӀыпӀэр къыгъотыгъ – еплъ Пегъымбар Ешайа тхылъэу ытхыгъэм 61:1-2; 58:6.:
18«Зиусхьаным ы Псэ ЛъапӀэ сыгу илъ хъугъэ; сыда пӀомэ, Тхьэм дэгъэ лъапӀэр къысщифагъ. КъызкӀысщифагъэр тхьамыкӀэхэм къэбарышӀур язгъэӀуныр ары. Зыгу кӀодыгъэхэр згъэхъужьынхэуи, хьапсчӀэсхэр шъхьафит зэрэхъужьыщтхэр язгъэӀунэуи, нэшъухэр къэзгъэплъэжьынхэуи, къин зыщэчыхэрэр шъхьафит сшӀыжьынхэуи Тхьэм сыкъыгъэкӀуагъ
19Зиусхьаным ынэшӀу цӀыфхэм къазыщифэщт илъэсыр къызэрэсыгъэм икъэбар язгъэӀунэуи сыкъыгъэкӀуагъ».
20Исус етӀанэ тхылъыр зэгуипӀожьи, синэгогу ӀофышӀэм ритыжьи, тӀысыгъэ. Синэгогум чӀэс цӀыф пстэури анэхэр тырагъэдыкъагъэхэу ащ къеплъыщтыгъэх. 21Исус ахэмэ ариӀоу ыублагъ: – Зэхэшъухызэ, Тхьэм мы игущыӀэ тхыгъэхэр непэ къэшъыпкъэжьыгъэх.
22ЦӀыфхэм агу инэу Исус еӀугъ, игущыӀэ дахэхэри агъэшӀэгъуагъэх. Ахэмэ къаӀуагъ: – Юсыф ыкъор арыба мыр?
23– Щэч хэмылъэу, мы гущыӀэжъыр къысэшъуӀощт: «Ӏазэр, зыгъэхъужь!» – ариӀуагъ Исус. – Къалэу Капернаум Ӏофэу щыпшӀагъэхэу зэхэтхыгъэхэр мы къалэу уянэ икъалэ щышӀэх.
24Исус етӀани къыпигъэхъожьыгъ: – Шъыпкъэр шъосэӀо, хэтрэ пегъымбари янэ икъалэ щадэрэп. 25Ау шъыпкъэр шъосэӀо, пегъымбар Иляс#4:25-26 пегъымбар Иляс – еплъ Пачъыхьэхэм якъэбархэр зэрыт апэрэ тхылъым (3-я Царств) 17:1. имафэхэм илъэсищырэ мэзихырэ ощхыр къемышхэу, уашъом щыӀэ Тхьэм ошъогур зызэфешӀым, хэкум тыдэкӀи гъэблэшхуи зыщэхъум, Израильым шъузэбэ Ӏэджи исыгъ. 26Ау щытми, ахэмэ ащыщ горэм дэжь Тхьэм Иляс ыгъэкӀуагъэп, къалэу Сидон иӀэгъо-благъо ит къуаджэу Сарептэ дэс шъузабэ горэм дэжь ыгъэкӀуагъэ нахь. 27Ащ фэдэуи, пегъымбар Елисей#4:27 пегъымбар Елисей – еплъ Пачъыхьэхэм якъэбархэр зэрыт ятӀонэрэ тхылъым (4-я Царств) 5:1-4. имафэхэм шъоджэ уз Ӏаер зиӀэ цӀыфыбэхэр Израиль исыгъэх, ау Елисей ахэмэ ащыщэу зи ыгъэхъужьыгъэп. Сирие хэкум щыщэу НаӀаман зыцӀэр ыгъэхъужьыгъ нахь.
28Ар зызэхахым, синэгогум чӀэс цӀыф пстэури лъэшэу къэгубжыгъ. 29Къызщылъэтхи, Исус къалэм дафи, къалэр зытет бгышъхьэм радзыхынэу ащагъ. 30Ау Исус ахэмэ азыфагу дэдэ пхырыкӀи, ӀукӀыжьыгъ.
Исус лӀы горэм джынэпцӀэ Ӏаер зэрэхифыгъэр
(Марк 1:21-28)
31ЕтӀанэ Исус Галилей хэкум щыщ Капернаум#4:31 Капернаум – Галилей псыхъураем итемыр тыгъэ къохьэпӀэ Ӏушъом Ӏут. къалэмкӀэ къехи, шэмбэт мафэм цӀыфхэм Тхьэм игущыӀэхэр аригъашӀэу ыублагъ. 32ЦӀыфхэм Исус Тхьэм игущыӀэхэр зэраригъашӀэщтыгъэ шӀыкӀэр лъэшэу агъэшӀэгъуагъ, сыда пӀомэ, тетыгъошхо иӀэу, ахэмэ адэгущыӀэщтыгъэшъ ары.
33Синэгогум джынэпцӀэ Ӏае зыхэс лӀы горэ чӀэтыгъ. Ар мэкъэшхокӀэ къахэкууагъ:
34– Е-о-ой, сыд уиӀофэу къытхэлъыр, Назарет щыщ Исус? ТыбгъэкӀодынэу укъэкӀуагъа? О хэтми узыщыщыр сэшӀэ: Тхьэм дэжь къикӀыгъэ ЛъапӀэр оры!
35– Щыгъэт, мы лӀым хэкӀыжь! – къыӀуагъ Исус джынапцӀэм егыеу. ДжынапцӀэм зэкӀэмэ апашъхьэ лӀыр къыриути, зи римышӀэу хэкӀыжьыгъ.
36ЗэкӀэми лъэшэу агъэшӀагъоу зэраӀожьыщтыгъ: – Мыр сыда? Тетыгъошхорэ лъэкӀышхорэ иӀэу, джынэпцӀэ Ӏаехэм унашъо афишӀызэ, цӀыфхэм ахефых.
37Джаущтэу Исус икъэбар хэкум иӀэгъо-благъо тыдэкӀи щыӀугъ.
Исус цӀыфыбэхэр зэригъэхъужьыгъэхэр
(Маттэ 8:14-17; Марк 1:29-34)
38Исус синэгогум къычӀэкӀыжьи, Симон иунэ ихьагъ. Симон ишӀугуащэ плъыр-стырэм лъэшэу ригъэзыгъэу пӀэм хэлъыгъ. Исус ар ыгъэхъужьынэу елъэӀугъэх.
39Исус сымаджэм шъхьэщыуцуи, плъыр-стырэм егыий, хигъэкӀыжьыгъ. Бзылъфыгъэр ащ лъыпытэу къэтэджыжьи, ахэр къыхьакӀэу ыублагъ.
40Тыгъэр къохьажь зэхъум, уз зэфэшъхьаф зиӀэ сымаджэхэр зэкӀэ Исус къыфащэхэу цӀыф пстэуми аублагъ. Ахэмэ ащыщ пэпчъ ыӀэ тырилъхьэзэ, ыгъэхъужьыщтыгъ. 41ДжынапцӀэхэр цӀыфыбэхэм къахэкӀыжьыщтыгъэх, куохэзэ: – Оры Христосэу Тхьэм ы Къор! Ар зэрэ Христосыр ахэмэ ашӀэщтыгъэти, Исус ягыити, къэгущыӀэнхэу фит ышӀыщтыгъэхэп.
Исус Галилей хэкур къыкӀухьэзэ, Тхьэм игущыӀэхэр цӀыфхэм зэраригъэӀущтыгъэр
(Марк 1:35-39)
42Нэф къызэшъым, Исус къалэм дэкӀи, чӀыпӀэ Ӏудзыгъэ горэм кӀуагъэ. Ау цӀыф купышхохэр лъыхъухи, къызагъотыжьым, адэжь къагъэнэнэу пылъыгъэх.
43– НэмыкӀ къалэхэми Тхьэм и Тетыгъошхо ехьылӀэгъэ къэбарышӀур цӀыфмэ щязгъэӀун фае. Джары Тхьэм сыкъызфигъэкӀуагъэр, – ариӀуагъ Исус.
44Аущтэу Галилей хэкум ит синэгогухэм Тхьэм игущыӀэхэр цӀыфмэ щаригъэӀущтыгъ.
Currently Selected:
Лука 4: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
