Лука 7
7
ЯБЛЭНЭРЭШЪХЬ
Исус дзэ пащэм иунэӀут зэригъэхъужьыгъэр
(Маттэ 8:5-13; Иуан 4:43-54)
1Исус а гущыӀэхэм зэкӀэ цӀыфхэр зарегъэдэӀухэ ужым, къалэу Капернаум дэхьагъ. 2Дзэ пащэ горэм шӀу ылъэгъурэ унэӀут горэ иӀагъ. А унэӀутыр лӀэным нэсыгъэу сымаджэу щылъыгъ. 3Дзэ пащэм Исус икъэбар зызэхехым, Исус къэкӀонышъ, иунэӀут ыгъэхъужьынэу джуртхэм янахьыжъхэм#7:3 нахьыжъхэр – лъытэныгъэ зиӀэ джурт дин тхьэмэтэ купыгъ. Ахэмэ ащыщ заулэ Тхьэмэтэ Хэсэшхом хэтыгъ. ащыщхэу заулэ лъэӀуакӀоу ыдэжь ыгъэкӀуагъэх. 4Ахэр Исус дэжь къызэкӀохэм, лъэшэу елъэӀухэзэ раӀуагъ: – О ар фэпшӀэныр ифэшъуаш, 5сыда пӀомэ, тэ тлъэпкъ шӀу елъэгъу, тисинэгогуи тфаригъэшӀыгъ.
6Исус адишти, адэкӀуагъ. Дзэ пащэм иунэ пэблагъэ зэхъухэм, дзэ пащэм иныбджэгъухэр Исус къыпигъэгъокӀыхи, къыраригъэӀуагъ: – Тхьэматэ, зымыгъэулэу, о сэ сиунэ укъихьанэу сифэшъуашэп. 7Ар зэрэсимыфэшъуашэм пае, уадэжь сшъхьэкӀэ сыкъэкӀонэуи зыфэзгъэшъошагъэп. Ау гущыӀэ закъо къаӀуи, унашъо шӀи, сиунэӀут хъужьыщт. 8Сыда пӀомэ, сэри лӀы горэм иунашъо ыӀэчӀэгъ сычӀэт, сиунашъуи ыӀэчӀэгъ дзэлӀхэр чӀэтых. Зыгорэм «КӀо» есӀомэ, кӀощт. Адрэми «КъакӀо» есӀомэ, къэкӀощт. СиунэӀути «Мыр шӀэ» есӀомэ, ышӀэщт.
9Исус ар зызэхехым, а лӀыр ыгъэшӀэгъуагъ, ыуж ит цӀыф купышхоми зыфигъази, ариӀуагъ: – Сэ шъосэӀо, мыщ фэдэ шӀошъхъуныгъэ зиӀэ цӀыф Израиль хэгъэгуми изгъотагъэп.
10ЕтӀанэ лӀыкӀохэм унэм агъэзэжьыгъ. Къызагъэзэжьым, унэӀутыр хъужьыгъэу рихьылӀэжьыгъэх.
Наин щыщ шъузабэм икӀалэу лӀагъэр Исус къызэригъэтэджыжьыгъэр
11Охътэ тӀэкӀу тешӀагъэу Исус Наин зыцӀэ къалэм кӀуагъэ. Игъогу рыкӀохэри цӀыф купышхори игъусагъэх. 12Исус къэлапчъэм игъунэгъу зэхъум, хьадэ горэ къыдахыщтыгъ. Ар шъузабэ горэм ыкъо зэкъуагъ. ЦӀыф купышхуи къалэм щыщэу шъузабэм игъусагъ. 13Зиусхьаным шъузабэр зелъэгъум, ыгу егъуи, моущтэу риӀуагъ: – Умыгъ, тян.
14ЕтӀанэ пхъэмбаим бгъодахьи, теӀэбагъ. Хьадэр зыхьыхэрэр къызэтеуцуагъэх. ЕтӀанэ Исус къыӀуагъ: – А кӀал, къэтэдж осэӀо!
15Ар зеӀом, лӀэгъэ кӀалэр къэтэджыжьи, къэгущыӀэу фежьагъ. Исуси ар янэ ритыжьыгъ.
16ЗэкӀэми щынэгъошхо агу къихьагъ, Тхьэми щытхъу фашӀэу аӀуагъ: – Пегъымбарышхо къытхэкӀыгъ. Тхьэр нэшӀукӀэ илъэпкъ къеплъыгъ.
17Исус ышӀагъэм икъэбар зэкӀэ Иудей хэкуми зэкӀэ Ӏэгъо-благъоми ащыӀугъ.
УмэхъэкӀо Иуан лӀыкӀохэр Исус дэжь зэригъэкӀуагъэхэр
(Маттэ 11:2-19)
18Мы Ӏофхэр зэкӀэ Иуан игъогу рыкӀохэрэм ежь раӀотэжьыгъэх. 19Ахэмэ ащыщхэу нэбгыритӀу Иуан къяджи, Зиусхьаным дэжь ыгъэкӀуагъэх моущтэу еупчӀынхэу: – Ора къэкӀон фаер хьауми нэмыкӀ горэм тыпэплъэн фая?
20А нэбгыритӀур Исус дэжь къызэкӀохэм, къаӀуагъ: – УмэхъэкӀо Иуан тыкъыоупчӀынэу уадэжь тыкъыгъэкӀуагъ: «Ора къэкӀон фаер хьауми нэмыкӀ горэм тыпэплъэн фая?»
21А мафэхэм сымэджэ Ӏаджи, уз Ӏае зиӀэ Ӏаджи, джынапцӀэ зыхэс цӀыф Ӏаджи Исус ыгъэхъужьыгъэх. Нэшъу Ӏаджи къыгъэплъэжьыгъ. 22Исус а къэкӀуагъэхэм ариӀожьыгъ: – Жъугъэзэжьи, Ӏофэу шъулъэгъугъэхэмрэ зэхэшъухыгъэхэмрэ Иуан ешъуӀотэжьых: нэшъухэр къэплъэжьых, лъащэхэр тэрэзэу зекӀо мэхъужьых, шъоджэ уз Ӏаер зиӀэхэр псаухэу, къабзэхэу мэхъужьых, дэгухэми зэхахыжьы, лӀагъэхэр къэтэджыжьых, тхьамыкӀэхэми къэбарышӀур зэхахы. 23Сэщ пае зыгу мыхъун къизымыгъахьэрэр гъогу мафэ теуцуагъ.
24Иуан илӀыкӀохэр зыӀокӀыжьхэм, Исус цӀыф купышхохэм Иуан ехьылӀагъэу ариӀоу ыублагъ: – Шъоф нэкӀым шъузыдэкӀым, сыда шъулъэгъунэу шъузыфэягъэр? Жьыбгъэм ыгъэсысырэ къамыл шъулъэгъунэу арыгъа? 25Армырмэ, сыда шъулъэгъунэу шъузыфэягъэр ащ шъузыдэкӀым? Дахэу фэпэгъэ лӀы гора? Дэхэ дэдэу фэпагъэхэу, псэукӀэшӀу зиӀэхэр зэрысхэр пачъыхьэхэм яунэшхохэр ары. 26Адэ, сыда шъулъэгъунэу шъузыфэягъэр ащ шъузыдэкӀым? Пегъымбара? Сэ шъосэӀо, ар пегъымбар къодыеп, ар пегъымбарым нахьи нахь ин. 27Ар лӀыкӀоу зикъэбар Тхьэм игущыӀэ тхыгъэхэм моущтэу арытыр ары#7:27 Тхьэм игущыӀэ тхыгъэхэм арытхэр – еплъ Пегъымбар Малахие тхылъэу ытхыгъэм 3:1.: «Мары, о уапэ силӀыкӀо къэсэгъакӀо, ащ уигъогу пфигъэпсыщт».
28– Сэ шъосэӀо, бзылъфыгъэхэм къакӀэхъуагъэхэм ащыщэу умэхъэкӀо Иуан нахьи нахь ин щыӀэп. Ау щытми, Тхьэм и Тетыгъошхо ыӀэчӀэгъ чӀэт цӀыфхэм ащыщэу анахь цӀыкӀури Иуан нахьи нахь ин.
29Исус гущыӀэхэу къыӀуагъэхэм ядэӀущтыгъэ цӀыф пстэуми, хьакъулахь ахъщэр хэзыххэрэри ахэмэ ахэтхэу, Тхьэм игущыӀэхэр зафэхэу алъытагъ. Ахэр арыгъэх Иуан зезгъэумэхъыгъэхэр. 30Ау фарисейхэмрэ Тэурат егъэджэкӀо пащэхэмрэ ашӀэн фаеу Тхьэр зыфаер адагъэп. Ахэр арыгъэх Иуан зезымыгъэумэхъыгъэхэр.
31– Джырэ цӀыфхэр сыда зыфэзгъэдэщтыр? – къыӀуагъ Исус. – Сыда ахэр зыфэдэхэр? 32Урамым тес кӀалэхэу моущтэу зыӀохэу, зэджэжьхэрэм афэдэх: «Къамылым тышъуфепщагъэ пэтми, шъо шъукъэшъуагъэп; тэ гъыбзэ къышъуфэтӀуагъэ пэтми, шъо шъугъыгъэп».
33– Сыда пӀомэ, умэхъэкӀо Иуан къэкӀуагъ. Ащ хьалыгъу ышхырэп, сэнэпси ешъорэп. «Ащ джынапцӀэ хэс» шъоӀо. 34ЦӀыф Лъэпкъым ы Къо къэкӀуагъ. Ар машхэ, ешъо. «Шхэнешъоныр зикӀасэу, хьакъулахь ахъщэр хэзыххэрэмрэ псэкӀод зышӀэхэрэмрэ яныбджэгъу» шъоӀо. 35Ары шъхьакӀэ Тхьэм иакъылышӀуагъэ зыдэгъэ пстэуми а акъылышӀуагъэр къагъэшъыпкъэжьы.
Исус бзылъфыгъэ хэтакӀом ипсэкӀодшӀагъэхэр зэрэфигъэгъугъэр
36Фарисейхэм ащыщэу зыгорэм Исус ыгъэшхэнэу ригъэблэгъагъ. Исус фарисеим иунэ ихьи, Ӏанэм пэтӀысхьагъ#7:36 пэтӀысхьагъ – А лъэхъаным цӀыфхэм яӀанэхэр лъхъэнчэ дэдэщтыгъэх. Лъакъохэр зычӀэбгъэуцон щыӀэщтыгъэпти, кӀылъэныкъом тегъэкӀагъэу, лъакъохэр кӀэдзыгъэхэу Ӏанэу къашӀыгъэм кӀэрысыщтыгъэх.. 37Къалэм щыщэу псэкӀодышӀэ бзылъфыгъэ хэтакӀо горэм Исус фарисеим иунэ щышхэнэу зэреблэгъагъэр ышӀагъ. Алабастэрым хэшӀыкӀыгъэу, къошын горэ осэшхо зиӀэ дагъэр итэу къыздихьи, къэкӀуагъ. 38Исус ыкӀыбкӀэ ылъакъохэм къяуцуалӀи, лъэшэу гъызэ, ынэпсыхэмкӀэ Исус ылъакъохэр ыгъэуцӀынхэу ыублагъ. ЕтӀанэ Исус ылъакъохэр ышъхьацыкӀэ ылъэкӀыжьыгъ, ылъакъохэм ябэугъ, осэшхо зиӀэ дагъэри ащифагъ.
39Фарисееу Исус къезгъэблэгъагъэм ар зелъэгъум, ыгукӀэ ыӀуагъ: – Мыр пегъымбарыгъэмэ, мы бзылъфыгъэу къынэсырэр зыфэдэр, зэрэпсэкӀодышӀэ бзылъфыгъэ хэтакӀор ышӀэщтыгъ.
40– Симон, сэ зыгорэ осӀощт, – риӀуагъ Исус а лӀым. – КъаӀо, дин гъэсакӀу, – къыӀожьыгъ Симон.
41– ЧӀыфэ зытырэ лӀы горэм ичӀыфэ нэбгыритӀумэ ателъыгъ, зым динар шъитф, адрэм шъэныкъо, – ыӀуагъ Исус. 42– А чӀыфэхэр къапщыныжьын замылъэкӀым, тӀуми афигъэгъугъ. МитӀум язэу хэта чӀыфэ зытырэ лӀыр нахь шӀу зылъэгъущтыр?
43– СызэрэгугъэрэмкӀэ, нахьыбэ зыфигъэгъугъэр ары, – къыӀожьыгъ Симон. – КъэпшӀагъ, – риӀожьыгъ Исус.
44ЕтӀанэ Исус бзылъфыгъэм зыфигъази, Симон риӀуагъ: – Мы бзылъфыгъэр олъэгъуа? Сэ о уиунэ сыкъызехьэм, слъакъохэр стхьакӀынхэу псы къысэптыгъэп, ау мы бзылъфыгъэм ынэпсыхэмкӀэ слъакъохэр къыгъэуцынхи, ышъхьацыкӀэ къылъэкӀыжьыгъэх. 45О укъысэбэугъэп, ау унэм сыкъызэрихьэу, слъакъомэ къябэуныр мы бзылъфыгъэм зэпигъэугъэп. 46Сэ сшъхьэ дагъэ къыщыпфагъэп, ау ащ слъакъохэм осэшхо зиӀэ дагъэр къащифагъ. 47Арышъ осэӀо, шӀулъэгъуныгъэшхо ыгу илъыгъэти, ащ ипсэкӀодшӀагъэхэу бэ хъухэрэр фэгъугъэх. Ау макӀэ зыфэгъугъэм ыгу шӀулъэгъуныгъэ макӀэ илъ.
48ЕтӀанэ Исус бзылъфыгъэм риӀуагъ: – УипсэкӀодшӀагъэхэр пфэгъугъэх.
49Джащыгъум адрэ хьакӀэхэм агухэмкӀэ аӀоу аублагъ: – Мы лӀэу псэкӀодшӀагъэхэри зыгъэгъурэр хэта?
50Ау Исус бзылъфыгъэм риӀуагъ: – УишӀошъхъуныгъэ умыкӀодэу укъыгъэнэжьыгъ. Гъогумаф. Гупсэф уиӀэу опсэу.
Currently Selected:
Лука 7: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
