Лука 9

ЯБГЪОНЭРЭШЪХЬ

Игъогу рыкӀорэ нэбгырэ пшӀыкӀутӀур Тхьэм фэлэжьэнхэу Исус зэрэдигъэкӀыгъэхэр

(Маттэ 10:5-15; Марк 6:7-13)

1Исус игъогу рыкӀорэ нэбгырэ пшӀыкӀутӀур зэӀуигъакӀи, цӀыфмэ джынапцӀэхэр ахафынхэуи, яузхэр агъэхъужьынхэуи лъэкӀырэ тетыгъорэ аритыгъ. 2Тхьэм и Тетыгъошхо ехьылӀэгъэ къэбарышӀур агъэӀунэуи, сымаджэхэр агъэхъужьынхэуи дигъэкӀыгъэх. 3Моущтэу ариӀуагъ: – Гъогум шъузытехьэкӀэ, зи зыдэшъумышт, бэщи, Ӏалъмэкъи, хьалыгъуи, ахъщи зыдэшъумышт. ДжэнитӀуи зыщышъумылъ. 4ХьакӀэу унэ горэм шъуихьэмэ, а чӀыпӀэм шъукъекӀыжьыфэ, бысымыр зэблэшъумыхъу. 5ЦӀыфхэм шъурамыгъэблагъэмэ, якъалэ шъукъыздэкӀыжьыкӀэ, мыхъунэу ашӀагъэмкӀэ ахэмэ апашъхьэ шыхьат щыхъуным пае, шъулъакъохэм ателъ сапэр атешъуутхыпкӀыкӀ.

6Аущтэу Исус игъогу рыкӀохэрэр ежьэхи, къуаджэмэ адэхьэ-адэкӀхэу къэбарышӀур щагъэӀущтыгъ, тыдэкӀи сымаджэхэри щагъэхъужьыщтыгъэх.

Пщы Ирод зэрэгумэкӀыгъэр

(Маттэ 14:1-12; Марк 6:14-29)

7Пщы Ирод Исус ышӀэгъэ пстэуми якъэбар зэхихыгъэти, гумэкӀыщтыгъэ, зыфихьын ымышӀэу, сыда пӀомэ, зы цӀыф купым ыӀощтыгъ: – Пегъымбар Иуан лӀагъэхэм къахэтэджыкӀыжьыгъ.

8– Пегъымбар Иляс#9:8 пегъымбар Иляс – ащ чӀылъэм къыгъэзэжьынышъ, Христос игъогу фигъэпсынэу джуртхэр паплъэщтыгъэх. Еплъ Пегъымбар Малахие тхылъэу ытхыгъэм 4:5-6. къэкӀуагъ, – аӀощтыгъ нэмыкӀхэми. – Пэсэрэ пегъымбархэм ащыщ горэ къэтэджыжьыгъ, – аӀощтыгъ адрэхэми. 9Ау Ирод къыӀуагъ: – Иуан ышъхьэ пязгъэупкӀыгъ. Адэ, мыщ фэдэ къэбархэр зэраӀуалӀэрэ лӀыр хэта? Аущтэу ыӀозэ, Исус зэригъэлъэгъуным ыуж итыгъ.

Исус нэбгырэ минитф зэригъэшхагъэр

(Маттэ 14:13-21; Марк 6:30-44; Иуан 6:1-14)

10Апостолхэм Исус дэжь къызагъэзэжьым, Ӏофхэу ашӀагъэхэр раӀотэжьыгъэх. ЕтӀанэ Исус цӀыфхэм ахэкӀи, апостолхэр зыдищэхи, язакъоу Бет-СайдэкӀэ заджэхэрэ къалэм#9:10 Бет-СайдэкӀэ заджэхэрэ къалэр – Галилей псыхъураем итемыр тыгъэ къокӀыпӀэ Ӏушъо Ӏутыгъ. кӀуагъэх. 11Ау цӀыф купышхохэм ар къызашӀэм, Исус лъыкӀуагъэх. Исус ахэмэ дахэкӀэ къапэгъокӀыгъ, Тхьэм и Тетыгъошхо ехьылӀагъэуи къадэгущыӀагъ, зэӀэзэн фаеу зищыкӀагъэхэри ыгъэхъужьыгъэх.

12Мафэр хэкӀуатэу ыублагъ. Игъогу рыкӀорэ нэбгырэ пшӀыкӀутӀур Исус къыбгъодахьи, къыраӀуагъ: – Къоджэ-чылэ гъунэгъухэм кӀонхэшъ, гъолъыпӀэрэ гъомлапхъэрэ къагъотыным пае, цӀыф купышхор тӀупщыжь; сыда пӀомэ, мы чӀыпӀэр Ӏудзыгъ.

13– Шъо ахэр жъугъашхэх, – ариӀуагъ Исус. – Тэ хьалыгъуитфырэ пцэжъыитӀурэ нахь тиӀэп, – къаӀуагъ ахэмэ, – хьауми мы цӀыф пстэуми ашхын къафэтщэфынэу тыкӀона?

14Ахэр лӀы минитф фэдиз хъущтыгъэх. ЕтӀанэ Исус игъогу рыкӀохэрэм ариӀуагъ: – ЦӀыфхэр шъэныкъо-шъэныкъоу, куп-купэу ежъугъэтӀысэхых.

15Игъогу рыкӀохэрэм аущтэу ашӀызэ, цӀыф пстэури рагъэтӀысэхыгъ. 16ЕтӀанэ Исус хьалыгъуитфымрэ пцэжъыитӀумрэ къыштэхи, уашъом дэплъыий, ахэмэ апае Тхьэм щытхъу фишӀыгъ. ЕтӀанэ хьалыгъухэр зэгуичхи, цӀыфмэ апашъхьэ ралъхьанхэу игъогу рыкӀохэрэм аритыгъ. 17ЦӀыф пстэури шхагъэ, загъэшхэкӀыгъ. Ащ нэужым къялыжьыгъэ хьалыгъу такъырхэр мэтэ пшӀыкӀутӀумэ арызэу аугъоижьыгъэх.

«Оры Тхьэм и Христос» Петрэ Исус зэрэриӀуагъэр

(Маттэ 16:13-19; Марк 8:27-29)

18Мафэ горэм чӀыпӀэ Ӏудзыгъэ горэм щыӀэу, игъогу рыкӀохэрэр игъусэхэу Исус Тхьэм зелъэӀу ужым, ахэмэ яупчӀыгъ: – ЦӀыф купышхохэм сэ хэт сыщыщэу аӀора?

19– Зы купым о уумэхъэкӀо Иуанэу аӀо, – къыраӀожьыгъ ахэмэ. – НэмыкӀхэми о упегъымбар Илясэу аӀо. ЕтӀанэ адрэхэми пэсэрэ пегъымбархэм ащыщэу зыгорэ къэтэджыжьыгъэу аӀо.

20– Адэ шъо, сэ хэт сыщыщэу шъуӀора? – ариӀуагъ Исус. – Оры Тхьэм и Христос, – къыӀожьыгъ Петрэ.

Ежь зэраукӀыщтри лӀагъэхэм къызэрахэтэджыкӀыжьыщтри Исус къызэриӀуагъэр

(Маттэ 16:20-28; Марк 8:31–9:1)

21Джащыгъум ежь зэрэ Христосыр зыми рамыӀотэжьынэу Исус афигъэпытагъ.

22– ЦӀыф Лъэпкъым ы Къо къиныбэ ыщэчын фаеу къыпыщылъ, – ыӀуагъ Исус. – Нахьыжъхэми, дин пэщэшхохэми, Тэурат егъэджэкӀо пащэхэми ежь зэрамыпэсэу аукӀын фае, ящэнэрэ мафэми лӀагъэхэм къахэтэджыкӀыжьын фае.

23– Зыгорэ сауж къырыкӀонэу фаемэ, ежь зыфэе Ӏофхэр къерэгъанэхи, лӀэныгъэм икъащ мафэ къэс къерэшти, сауж къырэрэкӀу, – ариӀуагъ Исус зэкӀэмэ. 24– Сыда пӀомэ, хэти зыпсэ мыкӀодэу къэзгъэнэжьынэу фаем ыпсэ шӀокӀодыщт, ау хэти сэщ пае зыпсэ зышӀокӀодрэм ыпсэ мыкӀодэу къыгъэнэжьыщт. 25Дунаир зэкӀэ зы цӀыфым ие хъоу, ежь кӀодмэ е ыпсэ иягъэ екӀыжьмэ, а цӀыфым ишӀуагъэу къекӀыщтыр сыда? 26Хэти сэррэ сигущыӀэхэмрэ къыттеукӀытыхьэрэм сэ, ЦӀыф Лъэпкъым ы Къуи, а цӀыфым сытеукӀытыхьажьыщт, Ты лъапӀэмрэ мэлэӀич лъапӀэхэмрэ ящытхъушхо фэдэ щытхъушхо сиӀэу сыкъызыкӀожькӀэ. 27Шъыпкъэр шъосэӀо, Тхьэм и Тетыгъошхо алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.

Исус итеплъэ зэрэзэрихъокӀыгъэр

(Маттэ 17:1-8; Марк 9:2-8)

28Исус а гущыӀэхэр къызеӀохэ ужым мэфий тешӀагъэу, Петри, Иуани, Якъуби зыдищэхи, Тхьэм елъэӀунэу Ӏуашъхьэм дэкӀоягъ. 29Тхьэм елъэӀузэ, ынапэ итеплъэ зэрихъокӀыгъ, ищыгъынхэри фыжьыбзэу, къэлыдэу хъугъэх. 30Зэплъэхэм, нэбгыритӀу Исус къыдэгущыӀэу алъэгъугъ. Ахэр пегъымбар Мусэрэ Илясрэ арыгъэх. 31Нэфынэ гъэшӀэгъонышхом къыхэлыдыкӀыхэу къэлъэгъуагъэх, Исус Ерусалим дунаим зэрэщехыжьын фаеми тегущыӀагъэх. 32Петрэрэ игъусэхэмрэ хэчъыягъэх, ау къызэущыжьхэм, Исус нэфынэ гъэшӀэгъонышхом хэтэу, къыхэлыдыкӀэу адрэ нэбгыритӀур къыбгъодэтэу алъэгъугъ. 33А нэбгыритӀур ӀукӀыжьхэ зэхъум, Петрэ Исус риӀуагъ: – Тхьэматэ, мыщ дэжьым тызэрэщыӀэр дэгъу. Чэлищ щыдгъэӀэн, ощ пае зы, Мусэ паий зы, Иляс паий зы. Петрэ ыӀорэр ымышӀэу ащ фэдэу къыӀуагъ.

34Петрэ къэгущыӀэзэ, ошъуапщэ къакӀуи, къашъхьэщыхьагъ. Исус игъогу рыкӀохэрэр къэщтагъэх. 35Ошъуапщэм макъэ горэ къыхэӀукӀыгъ: – Мары сэ шӀу слъэгъурэ с Къо кӀасэр. Ащ ыӀорэм шъуедэӀу. #9:35 Мары сэ шӀу слъэгъурэ с Къо кӀасэр. Ащ ыӀорэм шъуедэӀу – яплъ Орэд ЛъапӀэхэм 2:7; Пегъымбар Мусэ апэрэ тхылъэу ытхыгъэм (УблапӀэм) 22:2; Мусэ ятфэнэрэ тхылъэу ытхыгъэм 18:15.

36А макъэр къызэӀу ужым, Исус изакъоу къэнагъ. Ау игъогу рыкӀохэрэм алъэгъугъэр а мафэхэм зыми рамыӀуатэу аушъэфыгъ.

Исус джынапцӀэ зыхэс кӀалэ горэ зэригъэхъужьыгъэр

(Маттэ 17:14-18; Марк 9:14-27)

37ЯтӀонэрэ мафэм ахэр Ӏуашъхьэм къызехыжьхэм, цӀыф купышхо Исус къыпэгъокӀыгъ. 38ОшӀэ-дэмышӀэу а цӀыф купышхом лӀы горэ къыхэкуукӀыгъ: – Дин гъэсакӀу, сэ скъо усфеплъынэу сыолъэӀу, а къо закъор ары сиӀэр. 39ДжынапцӀэ горэм кӀалэр зэкӀеубытэшъ, ошӀэ-дэмышӀэу егъэкуо. КӀалэм Ӏупс къыӀуифэу, джынапцӀэм къегъэкӀэзэзышъ, къинышхо римыгъэлъэгъоу хэкӀыжьырэп. 40О уигъогу рыкӀохэрэм джынапцӀэр хафынэу сялъэӀугъ, ары шъхьакӀэ ахэмэ хафын алъэкӀыгъэп.

41– Е-о-ой, шӀошъхъуныгъэ зимыӀэхэу, джырэ цӀыф къуанчэхэр, – къыӀожьыгъ Исус. – Сыд фэдизрэ сышъухэтын, шъусщыӀэн фая? О пкъо моу къащэ.

42Ау кӀалэр къакӀозэ, джынэпцӀэ Ӏаем чӀыгум тыридзи, ыгъэкӀэзэзыгъ. Исус джынэпцӀэ Ӏаем егыий, кӀалэр ыгъэхъужьыгъ, яти ритыжьыгъ. 43ЦӀыф пстэуми Тхьэм илъэкӀышхо лъэшэу агъэшӀэгъуагъ.

Ежь цӀыфхэм зэраубытыщтыр ятӀонэрэу

Исус къызэриӀуагъэр

(Маттэ 17:22-23; Марк 9:30-32)

ЦӀыф пстэуми Исус Ӏофэу ышӀэгъэ пстэури агъэшӀагъо зэхъум, игъогу рыкӀохэрэм ариӀуагъ:

44– Мы гущыӀэхэр шъутхьакӀумэхэм арыжъугъахь. ЦӀыф Лъэпкъым ы Къо цӀыфхэм аубытыщт.

45Ау а гущыӀэхэм къарыкӀырэр къагурыӀуагъэп. А гущыӀэхэр къагурыӀон амылъэкӀынэу ахэмкӀэ гъэбылъыгъагъэх, а гущыӀэхэм яхьылӀагъэуи Исус къеупчӀынхэу щынэщтыгъэх.

Хэта анахь ин дэдэр?

(Маттэ 18:1-5; Марк 9:33-37)

46Исус игъогу рыкӀохэрэм, «Тэ тщыщэу хэта анахь иныр?» аӀоу, зэнэкъокъу къахэхьагъ. 47Исус ахэмэ агухэм арылъыр ышӀэзэ, сабый горэ къышти, ыбгъукӀэ ыгъэуцуи, ариӀуагъ:

48– Хэти мы сабыир сэ сцӀэкӀэ къезгъэблагъэрэм сэ сыригъэблэгъагъэ мэхъу, хэти сэ сезгъэблагъэрэми сэ сыкъэзгъэкӀуагъэри ригъэблэгъагъэ мэхъу, сыда пӀомэ, шъуащыщэу анахь цӀыкӀур ары анахь ин дэдэр.

Къышъупэмыуцурэр шъуигъус

(Марк 9:38-40)

49– Тхьэматэ, о пцӀэкӀэ лӀы горэм джынапцӀэхэр цӀыфхэм ахифхэу тлъэгъугъэ, – къыӀуагъ Иуан. – Ар тэ зэрэтщымыщым пае, зэтетӀэжьэнэу тыпылъыгъ.

50– ЗэтешъумыӀажь ар, – къыриӀожьыгъ Исус, – сыда пӀомэ, шъо къышъупэмыуцурэр шъуигъус.

Самарие къуаджэ горэм дэсхэм

Исус рагъэблэгъэнэу зэрамыдагъэр

51Тхьэм Исус уашъом зыдищэежьыщт мафэр къызэблагъэм, Исус Ерусалим кӀонэу тыриубытагъ. 52ЛӀыкӀохэр ыпэ рапшӀэу ыгъэкӀуагъэх. Ахэр кӀохи, Самарие хэкум#9:52 Самарие хэкур – Иудей хэкумрэ Галилей хэкумрэ азыфагу дэлъ хэкур арыгъэ. Джуртхэмрэ самарие цӀыфхэмрэ яхабзэхэри ядинхэри зэрэзэфэшъхьафхэм пае, зэпыищтыгъэх. ит къуаджэ горэм зыщахьэкӀэн чӀыпӀэ къыфагъэхьазырынэу дэхьагъэх. 53Ау Исус Ерусалим зэрэкӀорэм пае, а къуаджэм дэс цӀыфхэм рагъэблэгъэныр адагъэп. 54Ар залъэгъум, Исус игъогу рыкӀохэрэм ащыщхэу Якъубэрэ Иуанрэ къаӀуагъ: – Зиусхьан, уашъом машӀо къехынышъ, мы цӀыфхэр ыгъэстынхэу тӀона?

55Ау Исус ахэмэ зафигъази, афимыдэу ариӀуагъ: – Хьау, ар хъущтэп; 56сыда пӀомэ, ЦӀыф Лъэпкъым ы Къо къызфэкӀуагъэр цӀыфхэр ыгъэкӀодынхэр арэп, мыкӀодхэу къыгъэнэжьынхэр ары нахь. ЕтӀанэ нэмыкӀ къуаджэ горэм кӀуагъэх.

Исус игъогу рыкӀоным къин щэчыгъоу хэлъыр

(Маттэ 8:19-22)

57Гъогум рыкӀохэзэ, зыгорэм Исус къыриӀуагъ: – Тыдэ укӀоми, уауж сыкъырыкӀощт.

58– Баджэхэм исынхэу бы яӀ, ошъогу бзыухэми набгъо яӀ, ау ЦӀыф Лъэпкъым ы Къо ышъхьэ зэрихьылӀэжьын чӀыпӀэ иӀэп, – риӀожьыгъ Исус.

59– Сауж къырыкӀу, – риӀуагъ Исус нэмыкӀ горэм. – Тхьэматэ, – къыӀожьыгъ адрэм, – ыпэ рапшӀэу сыкӀонышъ, сятэ чӀэслъхьажьынэу фит сыкъэшӀ.

60– ЛӀагъэхэм ежьхэм ялӀагъэхэм яхьадэхэр чӀарэлъхьажьых, ау о кӀуи, Тхьэм и Тетыгъошхо ехьылӀэгъэ къэбарышӀур гъэӀу, – риӀожьыгъ Исус.

61– Сэ уауж сыкъырыкӀощт, тхьэматэ, – къыӀуагъ нэмыкӀ горэми, – ау ыпэ рапшӀэу сэ сибынхэм аӀапэ сыубытыжьынэу фит сышӀ.

62– ПхъэӀэшэкӀыр#9:62 пхъэӀашэкӀыр – шыхэр е цухэр зыкӀэшӀагъэу чӀыгур зэражъорэр пхъэӀашэр ары. ПхъэӀэшэкӀ – пхъэӀашэм ыкӀэ зыубытыгъэу къызэплъэкӀыжьырэр Тхьэм и Тетыгъошхо фэлэжьэныр ифэшъуашэп, – риӀожьыгъ ащ Исус.

Currently Selected:

Лука 9: AdgNT14

Highlight

Copy