Маттэ 11

ЯПШӀЫКӀУЗЭНЭРЭШЪХЬ

1Исус игъогу рыкӀорэ нэбгырэ пшӀыкӀутӀум унашъохэр зафешӀыхэ ужым, а чӀыпӀэм икӀи, джуртмэ якъалэхэм цӀыфхэм Тхьэм игущыӀэхэр щаригъэшӀэнхэу, щаригъэӀунхэу кӀуагъэ.

УмэхъэкӀо Иуан Исус дэжь лӀыкӀохэр зэригъэкӀуагъэхэр

(Лука 7:18-35)

2Иуан хьапсым чӀэсэу#11:2 Иуан хьапсым чӀэсэу – еплъ 14:3-4. Христос Ӏофэу ышӀагъэхэм якъэбар зызэхехым, игъогу рыкӀохэрэм ащыщэу нэбгыритӀу ыгъакӀуи, 3ригъэупчӀыгъ:

– Ора къэкӀон фаер, хьауми нэмыкӀ горэм тыпэплъэн фая?

4– Жъугъэзэжьи, – ариӀожьыгъ Исус ахэмэ, – Ӏофэу зэхэшъухыхэрэмрэ шъулъэгъухэрэмрэ Иуан ешъуӀотэжьых: 5нэшъухэр къэплъэжьых, лъащэхэр тэрэзэу зекӀо мэхъужьых, шъоджэ уз Ӏае зиӀэхэр псаухэу, къабзэхэу мэхъужьых, дэгухэм зэхахыжьы, лӀагъэхэр къэтэджыжьых, тхьамыкӀэхэми къэбарышӀур зэхахы. 6Сэщ пае зыгу мыхъун къизымыгъахьэрэр гъогу мафэ теуцуагъ.

7Иуан игъогу рыкӀохэрэр зежьэжьхэм, Исус цӀыф купышхохэм Иуан ехьылӀагъэу ариӀоу ыублагъ:

– Шъоф нэкӀым шъузыдэкӀым, сыда шъулъэгъунэу шъузыфэягъэр? Жьыбгъэм ыгъэсысырэ къамыл шъулъэгъунэу арыгъа? 8Армырмэ, сыда шъулъэгъунэу шъузыфэягъэр ащ шъузыдэкӀым? Щыгъын дахэхэр зыщыгъ лӀы горэ арыгъа? Щыгъын дахэхэр зыщыгъхэр зэрысхэр пачъыхьэхэм яунэшхохэр ары. 9Адэ, сыда шъулъэгъунэу шъузыфэягъэр ащ шъузыдэкӀым? Пегъымбара? Сэ шъосэӀо, ар пегъымбар къодыеп, ар пегъымбарым нахьи нахь ин. 10Ар лӀыкӀоу зикъэбар Тхьэм игущыӀэ тхыгъэхэм#11:10 Тхьэм игущыӀэ тхыгъэхэм арытыр – еплъ Пегъымбар Малахие тхылъэу ытхыгъэм 3:1. моущтэу арытыр ары:

«Мары, о уапэ силӀыкӀо къэсэгъакӀо, ащ уигъогу пфигъэпсыщт».

11– Шъыпкъэр шъосэӀо, бзылъфыгъэхэм къакӀэхъуагъэхэм ащыщэу умэхъэкӀо Иуан нахьи нахь ин щыӀэп. Ау щытми, Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм ащыщэу анахь цӀыкӀури Иуан нахьи нахь ин. 12УмэхъэкӀо Иуан имафэхэм къащегъэжьагъэу джы нэс, цӀыфхэм Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм къин арагъэщэчыгъ, а тетыгъошхор лӀыгъэкӀэ аубытынэу бзэджашӀэхэри ыуж итых; 13сыда пӀомэ, умэхъэкӀо Иуан имафэхэм анэсыфэ, пегъымбархэр зэкӀэ пегъымбар Мусэ и Тэурат хабзэ итхэмкӀи а тетыгъошхор къызэрэкӀощтым къытегущыӀагъэх. 14Ар шъуштэнэу шъуфаемэ, умэхъэкӀо Иуаныр къэкӀон фэегъэ пегъымбар Иляс#11:14 къэкӀон фэегъэ пегъымбар Иляс – еплъ Пегъымбар Малахие тхылъэу ытхыгъэм 4:5-6. ары. 15РыдэӀонэу тхьакӀумэ зиӀэм зэхерэх!

16– Джырэ цӀыфхэр сыда зыфэзгъэдэщтыр? Урамым тес кӀалэхэу моущтэу зыӀохэу, яныбджэгъумэ яджэхэрэм афэдэх:

17«Къамылым тышъуфепщагъэ пэтми, шъо шъукъэшъуагъэп; тэ гъыбзэ орэд къышъуфэтӀуагъэ пэтми, шъо шъугъыгъэп».

18– Сыда пӀомэ, Иуан къэкӀуагъ. Ащ енэкӀы, сэнэпси ешъорэп. «Ащ джынапцӀэ хэс» аӀо. 19ЦӀыф Лъэпкъым ы Къо къэкӀуагъ. Ар машхэ, ешъо. «Шхэн-ешъоныр зикӀасэу, хьакъулахь ахъщэр хэзыххэрэмрэ псэкӀод зышӀэхэрэмрэ яныбджэгъу» аӀо. Ау Тхьэм иакъылышӀуагъэ къыхэкӀыгъэ хъугъэ-шӀагъэхэм а акъылышӀуагъэр къагъэшъыпкъэжьы.

Гъогу мыгъо утеуцуагъ, къалэу Хоразин! Гъогу мыгъо утеуцуагъ, къалэу Бет-Сайдэ!

(Лука 10:13-15)

20Джащыгъум Исус ежь иӀофышхо гъэшӀэгъонхэм анахьыбэхэр зыщишӀэгъэ къалэхэм ягыеу ыублагъ, ахэр япсэкӀодшӀагъэхэм зэрафыкӀэмыгъожьыгъэхэм пае.

21– Гъогу мыгъо утеуцуагъ, къалэу Хоразин! Гъогу мыгъо утеуцуагъ, къалэу Бет-Сайдэ! Сыда пӀомэ, шъуадэжь щысшӀэгъэ Ӏофышхо гъэшӀэгъонхэр къалэхэу Тиррэ Сидонрэ#11:21 къалэхэу Тиррэ Сидонрэ – ахэр хымэ къалэхэу Галилей хэкум итемыр лъэныкъомкӀэ хы Ӏушъом Ӏутыгъэхэр ары. ащысшӀэгъагъэхэмэ, бэшӀагъэу шъыгъоныгъэ щыгъын ащыгъэу, анэгухэр яжьэкӀэ цӀэлагъэхэу япсэкӀодшӀагъэхэм афыкӀэгъожьыщтыгъэх. 22Ау шъосэӀо, ахърэт мафэм къинэу шъущэчыщтым нахьи, Тиррэ Сидонрэ къинэу ащэчыщтыр нахь мэкӀэщт. 23О Капернаум, уашъом удэкӀоена? Джэхьнэмым икуупӀэ унэсыфэ упхырызыщт нахь#11:23 О Капернаум… упхырызыщт нахь – еплъ Пегъымбар Ешайа тхылъэу ытхыгъэм 14:13,15., сыда пӀомэ, уадэжь щысшӀэгъэ Ӏофышхо гъэшӀэгъонхэр къалэу Содом#11:23 къалэу Содом – еплъ 10:15. щысшӀэгъагъэхэмэ, ар джы нэсыфэ щытэу къэнэщтыгъ. 24Ау сэ шъосэӀо, ахърэт мафэм къинэу о пщэчыщтым нахьи, Содом къинэу ыщэчыщтыр нахь мэкӀэщт.

Садэжь шъукъакӀуи, гупсэф шъостыщт

(Лука 10:21-22)

25Ащ дэжьым Исус игущыӀэ лъигъэкӀуатэу ыӀуагъ:

– Ся Т, уашъоми чӀылъэми я Зиусхьан, мы Ӏофхэр цӀыф акъылышӀу зиӀэхэмрэ зэхэшӀыкӀ зиӀэхэмрэ ашӀоуушъэфыгъэу, сабыйхэм зэрябгъэшӀагъэмкӀэ щытхъу пфэсэшӀы. 26Ары, ся Т, о ар аущтэу пшӀоигъуагъ.

27– Ся Тэ щыӀэ пстэури къысӀэкӀилъхьагъ. Къо лъапӀэр Ты лъапӀэм нэмыкӀ зыми ышӀэрэп. Ты лъапӀэри зыми ышӀэрэп, Къо лъапӀэмрэ Къо лъапӀэм ар зэхаригъэшӀыкӀэнэу къыхихырэ цӀыфхэмрэ анэмыкӀ.

28– ЗэкӀэ улэугъэхэу, хьылъэшхо зытелъхэр, садэжь шъукъакӀуи, гупсэф шъостыщт. 29Сэ сибжь#11:29 Сэ сибжь – бжьыр цухэр е псыцухэр кум зыкӀашӀэкӀэ, апшъэ далъхьэрэ пхъэр ары. зытешъулъхьи, къасӀорэр зэжъугъашӀэ, сыда пӀомэ, сыгу шъабэ, пэгагъи илъэп. ЕтӀанэ гупсэф жъугъотыщт; 30сыда пӀомэ, сэ сибжь щэчыгъошӀу, сихьылъи псынкӀэ.

Currently Selected:

Маттэ 11: AdgNT14

Highlight

Copy