Маттэ 14

ЯПШӀЫКӀУПЛӀЭНЭРЭШЪХЬ

УмэхъэкӀо Иуан ышъхьэ зэрэпаупкӀыгъэр

(Марк 6:14-29; Лука 9:7-9)

1А мафэхэм пщэу Ирод#14:1 пщэу Ирод – Ирод Антипэ ары. Исус къэхъуным ыпэкӀэ я 4-рэ илъэсым къыщегъэжьагъэу Исус къызэхъу нэужым я 39-рэ илъэсым нэс, ар Галилей хэкумрэ Перей хэкумрэ япщыгъ. Исус икъэбар зэхихыгъэти, 2Ӏофтабгэхэм ариӀуагъ:

– Ар умэхъэкӀо Иуан арын фае. Ар лӀагъэхэм къахэтэджыкӀыжьыгъ, джары ащ фэдэ лъэкӀ зыхэлъ Ӏофышхохэр зыкӀыӀэкӀэкӀыхэрэр. 3,4Ирод ар зыкӀиӀуагъэр мыры: ежь ышэу Филипп зыцӀэр псауми, Ирод а Филипп ишъузэу Иродиадэ къыщэжьыгъ. Ар къызэрищэжьыгъэм пае, Иуан Ирод риӀощтыгъ: «О пшы ишъуз къэпщэжьыныр хабзэкӀэ хъущтэп». Ащ нэужым Иродиадэ ихьатыркӀэ Ирод идзэлӀхэм Иуан аригъэубыти, Ӏэхъу-лъэхъу тыраригъалъхьи, хьапсым чӀаригъэдзагъ. 5Ирод фэягъ Иуан ыукӀынэу, ау цӀыфхэм ащыщынэщтыгъ, сыда пӀомэ, ахэмэ Иуан пегъымбаркӀэ алъытэщтыгъэти ары. 6Ау Ирод къызыхъугъэ мафэр агъэлъапӀэзэ, Иродиадэ ыпхъу утыгум къиуцуи, къызэрэугъоигъэхэм къафэшъуагъ, пщы Ироди ыгу еӀугъ. 7Ыгу еӀугъэти, пшъашъэм тхьарыӀо фишӀи, ыӀуагъ:

– Сыд щыщми узыфаер остын.

8Янэ ыуӀушыгъэти, пшъашъэм къыӀуагъ:

– УмэхъэкӀо Иуан ышъхьэ лэгъэшхом илъэу къысэт.

9,10Пачъыхьэм ар зызэхехым, ыгу лъэшэу къеуагъ, ау хьакӀэхэм апашъхьэ пшъашъэм тхьарыӀоу фишӀыгъэм пае зыфаер ратынэу унашъо ышӀи, Иуан ышъхьэ хьапсым къыщыпиупкӀынэу дзэлӀ горэ ыгъэкӀуагъ. 11Иуан ышъхьэ лэгъэшхом илъэу къахьи, пшъашъэм ратыгъ, пшъашъэми янэ фихьыгъ. 12ЕтӀанэ Иуан игъогу рыкӀохэрэр къакӀохи, Иуан ихьадэ хьапсым чӀахыжьи, агъэтӀылъыжьыгъ. ЗычӀалъхьажьым, къэбарыр Исус фахьыгъ.

Исус нэбгырэ минитф зэригъэшхагъэр

(Марк 6:30-44; Лука 9:10-17; Иуан 6:1-14)

13Исус а къэбарыр зызэхехым, цӀыфхэм ахэкӀи, къуашъомкӀэ Ӏудзыгъэ чӀыпӀэ горэм изакъоу кӀуагъэ. Ау цӀыфхэм ар зызэхахым, къалэхэм къадэкӀхи, лъэсэу Исус лъыкӀуагъэх. 14Исус къуашъом къикӀи, цӀыф купышхор зелъэгъум, ыгу ягъуи, сымаджэхэу ахэтхэр ыгъэхъужьыгъэх.

15Пчыхьэ зэхъум, игъогу рыкӀохэрэр Исус къыбгъодахьэхи, къаӀуагъ:

– Мы чӀыпӀэр нэкӀы, мафэри хэкӀотэгъах. Къуаджэхэм адэхьанхэшъ, гъомлапхъэ къызфащэфыжьыным пае, цӀыф купышхохэр тӀупщыжьых.

16– Зыми кӀонхэу ящыкӀагъэп. Шъо ахэр жъугъашхэх, – ариӀуагъ Исус ахэмэ.

17– Тэ хьалыгъуитфрэ пцэжъыитӀурэ нахь тиӀэп, – къыраӀожьыгъ адрэхэм.

18– Моу ахэр сэ къысфэшъухь, – къыӀожьыгъ Исус.

19ЕтӀанэ Исус цӀыф купышхохэр уцым хэтӀысхьанхэу ариӀуагъ. Хьалыгъуитфымрэ пцэжъыитӀумрэ къыштэхи, уашъом дэплъыий, Тхьэм щытхъу фиӀуагъ. ЕтӀанэ хьалыгъухэр зэгуичхи, игъогу рыкӀохэрэм аритыгъ; ахэми цӀыф купышхохэм афагощыгъ. 20ЦӀыф пстэури шхагъэ, загъэшхэкӀыгъ. Ащ нэужым къялыжьыгъэ хьалыгъу такъырхэр мэтэ пшӀыкӀутӀумэ арызэу аугъоижьыгъэх. 21Шхагъэхэр зэкӀэ, бзылъфыгъэхэмрэ сабыйхэмрэ хэмытхэу, нэбгырэ минитф фэдиз хъущтыгъэх.

Исус псы кӀыӀум тетэу зэрэкӀуагъэр

(Марк 6:45-52; Иуан 6:16-21)

22ЕтӀанэ Исус цӀыф купышхохэр етӀупщыжьыфэхэ, игъогу рыкӀохэрэр ежь ыпэ рапшӀэу псыхъураем иадрабгъу зэпырыкӀынхэу къуашъом ригъэтӀысхьагъэх. 23ЦӀыф купышхохэр зетӀупщыжьыхэ ужым, Тхьэм елъэӀунэу изакъоу Ӏуашъхьэм дэкӀоягъ. Пчыхьэ къызэхъуми, а чӀыпӀэм зэризакъоу тетыгъ. 24Ау къуашъор псыхъураем ыгузэгу нэсыгъагъ, жьыбгъэри къыпеоти, хыорхэм къуашъор къин хадзагъ.

25АтэкъэӀогъум дэжь къуашъом исхэм алъэныкъокӀэ псы кӀыӀум тетэу, Исус къэкӀуагъ. 26Исус псы кӀыӀум тетэу къакӀоу игъогу рыкӀохэрэм залъэгъум, хьэдэджадэу аӀуи, лъэшэу щтагъэхэу кууагъэх.

27Ау зэкуохэм, Исус къариӀуагъ:

– Шъугу шъумыгъэкӀоды, сэры ар, шъумыщын.

28– Зиусхьан, орымэ ар, псы кӀыӀум сытетэу, уадэжь сыкъэкӀонэу къысаӀу, – риӀуагъ Петрэ Исус.

29– КъакӀо, – къыриӀожьыгъ Исус. Петрэ къуашъом икӀи, псы кӀыӀум тетэу Исус дэжь кӀоу ыублагъ. 30Ау жьыбгъэшхоу къепщэрэм гу зылъетэм, къэщтагъ. Псым чӀэбэу зеублэм, къэкууагъ:

– Зиусхьан, симытхьалэу сыкъэгъэнэжь.

31Петрэ ар къызэриӀоу, Исус ыӀэ ыщэий, къыубыти, риӀуагъ:

– О шӀошъхъуныгъэ зимакӀэр, сыда узкӀехъырэхъышагъэр?

32ЕтӀанэ а нэбгыритӀур къуашъом зетӀысхьажьым, жьыбгъэр уцужьыгъэ. 33Ащ ыуж, къуашъом исхэр лъэгонджэмышъхьэкӀэ Исус ыпашъхьэ къитӀысхьэхи, раӀуагъ: – Шъыпкъэу о Тхьэм ури Къу.

Исус Геннисарет хэкум сымаджэхэр зэрэщигъэхъужьыгъэхэр

(Марк 6:53-56)

34Псыхъураем зызэпырэкӀыхэм, Геннисарет хэкум нэсыгъэх. 35А чӀыпӀэм ис цӀыфхэм Исус къызашӀэжьым, а хэкум зэрэщытэу макъэ щагъэӀуи, сымаджэхэр зэкӀэ Исус къыфахьыгъэх. 36Зи мыхъуми, Исус ищыгъын цыпэ нигъэсынхэу къелъэӀугъэх, ищыгъын цыпи нэсыгъэ пстэури хъужьыгъэ.

Currently Selected:

Маттэ 14: AdgNT14

Highlight

Copy