Маттэ 16
16
ЯПШӀЫКӀУХЭНЭРЭШЪХЬ
Нэшэнэ гъэшӀэгъон уашъом къафыригъэхынэу фарисейхэр Исус къызэрелъэӀугъэхэр
(Марк 8:11-13; Лука 11:29-32)
1Фарисейхэмрэ саддукейхэмрэ Исус дэжь къакӀохи, ежь агъэунэфыным пае, нэшэнэ гъэшӀэгъон уашъом къафыригъэхынэу къелъэӀугъэх.
2Ау Исус ахэмэ ариӀожьыгъ:
– Пчыхьэм моущтэу шъоӀо: «Уашъор шэплъышъ, мафэр ошӀу хъущт». 3Пчэдыжьыми моущтэу шъоӀо: «Уашъом ошъуапщэр тиз, шэплъы, непэ оешхо хъущт». Уашъом итеплъэ къикӀырэр къыжъугурэӀо, ау мы лъэхъаным инэшанэхэм къарыкӀырэр къыжъугурыӀон шъулъэкӀырэп. 4Джырэ цӀыф бзаджэхэу Тхьэр зымышӀэхэрэр нэшэнэ гъэшӀэгъон фаех, ау пегъымбар Юныс инэшанэ#16:4 пегъымбар Юныс инэшанэ – еплъ 12:39-40. нэмыкӀ Тхьэм ахэмэ къаритыщтэп. Ар къызеӀо ужым, Исус ахэмэ ахэкӀи, ӀукӀыжьыгъ.
Фарисейхэмрэ саддукейхэмрэ ятэджэпс
(Марк 8:14-21)
5ЕтӀанэ псыхъураем иадрабгъу зызэпырэкӀыжьхэм, игъогу рыкӀохэрэм хьалыгъу къыздахьынэу ащыгъупшэгъагъ. 6Исус ахэмэ ариӀуагъ:
– Шъуфэсакъ. Фарисейхэмрэ саддукейхэмрэ ятэджэпс зыщышъуухъум.
7– Хьалыгъу тиӀэпышъ ары ащ зыкӀиӀорэр, – зэраӀозэ, игъогу рыкӀохэрэр а Ӏофым тегущыӀагъэх.
8Исус ахэмэ аӀорэм гу лъити, къыӀуагъ:
– ШӀошъхъуныгъэ зимакӀэхэр, хьалыгъу зэрэшъуимыӀэм сыд пае шъутегущыӀэра? 9Джыри зи къыжъугурымыӀоу ара? Шъугу къэкӀыжьырэба, хьалыгъуитфыр цӀыф минитфым зафызэгосэчым, хьалыгъу такъырхэр арызэу сыд фэдиз матэу шъуугъоижьыгъэхэр? 10Хьалыгъуиблыри цӀыф миниплӀым зафызэгосэчым, хьалыгъу такъырхэр матэхэм арызэу сыд фэдиза шъуугъоижьыгъэхэр? 11«Фарисейхэмрэ саддукейхэмрэ ятэджэпс зыщышъуухъум» зысэӀом, хьалыгъур арэп зыфэсӀогъагъэр, ар сыдэущтэу къыжъугурымыӀора?
12Исус зыфиӀогъагъэр хьалыгъу тэджэпсыр арыгъэп, ау фарисейхэмрэ саддукейхэмрэ цӀыфхэр Ӏофхэу зыфагъасэщтыгъэхэр ары нахь. Ащ зыщаухъумэн зэрэфаер Исус игъогу рыкӀохэрэм джы къагурыӀуагъ.
«Оры Христосэу Тхьэм ы Къор» Петрэ Исус зэрэриӀуагъэр
(Марк 8:27-30; Лука 9:18-21)
13ЕтӀанэ къалэу Кайсарфилипие#16:13 къалэу Кайсарфилипие – Галилей псыхъураем километрэ 40-кӀэ пэчыжьэу, итемыр лъэныкъомкӀэ итыгъ. иӀэгъо-благъо Исус къызэкӀом, игъогу рыкӀохэрэм яупчӀыгъ:
– Сэ, ЦӀыф Лъэпкъым ы Къо, хэт сыщыщэу цӀыфхэм аӀора?
14– Зы купым о уумэхъэкӀо Иуанэу аӀо, – къаӀожьыгъ ахэмэ. – НэмыкӀхэми о упегъымбар Илясэу#16:14 пегъымбар Иляс – ащ чӀылъэм къыгъэзэжьынышъ, Христос игъогу фигъэпсынэу джуртхэр паплъэщтыгъэх. Еплъ Пегъымбар Малахие тхылъэу ытхыгъэм 4:5-6. аӀо. ЕтӀанэ адрэхэми о упегъымбар Иеремиеу е пегъымбархэм уащыщ горэу аӀо.
15– Адэ шъо, сэ хэт сыщыщэу шъуӀора? – яупчӀыгъ Исус ахэмэ.
16– Оры Христосэу щыӀэныгъэр къыздикӀырэ Тхьэм ы Къор, – къыӀожьыгъ Симон Петрэ.
17– Гъогу мафэ утеуцуагъ о, Юныс ыкъо Симон, – къыриӀожьыгъ Исус. – Сыда пӀомэ, мыр зэхэозгъэшӀыкӀыгъэр цӀыфэп, ся Тэу уашъом щыӀэр ары нахь. 18Сэ осэӀо, о у Петрэ#16:18 Петрэ – а цӀэм къикӀырэр «мыжъо», мыжъом уфэд, сэ сичылыс о къыптесшӀыхьащт, лӀэныгъэм ыкӀуачӀэхэри а чылысым текӀонхэ алъэкӀыщтэп. 19Тхьэу уашъом щыӀэм и Тетыгъошхо иӀункӀыбзэхэр остыщт; чӀылъэм сыд щыщми о фит умышӀырэр уашъоми фит щыхъущтэп; чӀылъэм сыд щыщми о фит пшӀырэри уашъоми фит щыхъущт.
20Джащыгъум ежь зэрэ Христосыр зыми рамыӀотэнэу игъогу рыкӀохэрэм Исус унэшъо пытэ афишӀыгъ.
Ежь зэраукӀыщтри лӀагъэхэм къызэрахэтэджыкӀыжьыщтри Исус къызэриӀуагъэр
(Марк 8:31–9:1; Лука 9:22-27)
21А лъэхъаным къыщегъэжьагъэу Исус игъогу рыкӀохэрэм къагуригъаӀоу ыублагъ:
– Сэ Ерусалим сыкӀон фае. Нахьыжъхэми#16:21 нахьыжъхэр – лъытэныгъэ зиӀэ джурт дин тхьэмэтэ купыгъ. Ахэмэ ащыщхэу заулэ Тхьэмэтэ Хэсэшхом хэтыгъ., дин пэщэшхохэми, Тэурат егъэджэкӀо пащэхэми къиныбэ сагъэщэчыни саукӀыни фаеу къыспыщылъ, ящэнэрэ мафэми лӀагъэхэм сыкъахэтэджыкӀыжьын фае.
22Аущтэу къызеӀом, Петрэ Исус лъэныкъокӀэ Ӏуищи, фимыдэу фежьагъ:
– Зиусхьан, Тхьэм ар ерэмыд. Ар зыкӀи къыохъулӀэ хъущтэп.
23Исус Петрэ зыкъыфигъази, къыриӀуагъ:
– Сауж икӀ, шэйтан. Сэ сигъогукӀэ пэрыохъу укъысфэхъу, сыда пӀомэ, о уигупшысакӀэ Тхьэм игупшысакӀэп, цӀыфым игупшысакӀ нахь.
24Джащыгъум Исус игъогу рыкӀохэрэм ариӀуагъ:
– Зыгорэ сауж къырыкӀонэу фаемэ, ежь зыфэе Ӏофхэр къерэгъанэхи, лӀэныгъэм икъащ къерэшти, сауж къырэрэкӀу; 25сыда пӀомэ, хэти зыпсэ мыкӀодэу къэзгъэнэжьынэу фаем ыпсэ шӀокӀодыщт, ау хэти сэщ пае зыпсэ зышӀокӀодрэм ыпсэ мыкӀодэу къыгъэнэжьыщт. 26Дунаир зэкӀэ цӀыфым ие хъоу, ежь кӀодмэ, а цӀыфым ишӀуагъэу къекӀыщтыр сыда? Хьауми цӀыфым ыпсэ пае уасэу сыда ытышъущтыр? 27Сыда пӀомэ, ЦӀыф Лъэпкъым ы Къо имэлэӀичхэр игъусэхэу ежь я Тэ ищытхъушхо фэдэ щытхъушхо иӀэу къэкӀожьыщт. Ащыгъум хэти ышӀагъэм фэшъуашэр ригъэгъотыжьыщт. 28Шъыпкъэр шъосэӀо, ЦӀыф Лъэпкъым ы Къо и Тетыгъошхо иӀэу къакӀоу алъэгъуфэ, мыщ дэжьым щыт цӀыфхэм ащыщхэу заулэм лӀэныгъэр алъэгъущтэп.
Currently Selected:
Маттэ 16: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
