Маттэ 18
18
ЯПШӀЫКӀОЕНЭРЭШЪХЬ
Тхьэм и Тетыгъошхо ыӀэчӀэгъ чӀэт цӀыфхэм ащыщэу хэта анахь ин дэдэр?
(Марк 9:33-37; Лука 9:46-48)
1А мафэхэм игъогу рыкӀохэрэр Исус къыбгъодахьэхи, къеупчӀыгъэх:
– Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм ащыщэу хэта анахь ин дэдэр?
2Исус сабый горэм къеджи, азыфагу дигъэуцуи, 3къыӀуагъ:
– Шъыпкъэр шъосэӀо, шъугухэм арылъыр зэшъухъокӀэу, сабыйхэм шъуафэдэ шъумыхъумэ, Тхьэу уашъом щыӀэм и Тетыгъошхо ыӀэчӀэгъ шъучӀэхьащтэп. 4Арышъ, мы сабыим фэдэу хэти зышъхьэ зыгъэцӀыкӀужьырэр ары Тхьэу уашъом щыӀэм и Тетыгъошхо ыӀэчӀэгъ чӀэт цӀыфхэм анахь ин дэдэр. 5Хэти мыщ фэдэ сабыир сцӀэкӀэ къезгъэблагъэрэм сэ сыригъэблэгъагъэу мэхъу.
ЦӀыфхэм псэкӀод ашӀэнэу дэзыхьыхырэ Ӏофхэр
(Марк 9:42-48; Лука 17:1-2)
6– Ау мы цӀыкӀухэм ащыщэу сэркӀэ шӀошъхъуныгъэ зиӀэм псэкӀод ышӀэнэу хэти дэзыхьыхыгъэм мыжъошъхьал рашӀэу, хы куупӀэм хадзэу рагъэтхьэлагъэмэ, ежьыркӀэ нахьышӀущтыгъ. 7ЦӀыфхэм псэкӀод ашӀэнэу дэзыхьыхырэ Ӏофхэм апаекӀэ дунаир гъогу мыгъо теуцуагъ. Шъыпкъэ, ащ фэдэ Ӏофхэр къэхъунхэ фае, ау цӀыфэу къызыпкъырыкӀырэр гъогу мыгъо теуцуагъ. 8О пӀэ е о плъакъо псэкӀод пшӀэнэу удихьыхмэ, пыупкӀыжьи, чӀэдз. ПӀитӀури е плъэкъуитӀури уиӀэхэу мыухыжьын машӀом упадзэным нахьи, уӀащэу е улъащэу мыкӀодыжьын щыӀэныгъэ бгъотыныр оркӀэ нахьышӀу. 9Ащ фэдэуи, о унэ псэкӀод пшӀэнэу удихьыхмэ, къитхъыжьи, чӀэдз. УнитӀу псаоу джэхьнэмым имашӀо упадзэным нахьи, зы нэ нахь уимыӀэми, мыкӀодыжьын щыӀэныгъэ бгъотыныр оркӀэ нахьышӀу.
10– Шъуфэсакъ, мы цӀыкӀухэм ащыщэу зыгори зэшъумыпэсэу шъущымыт; сыда пӀомэ, сэ шъосэӀо, мы цӀыкӀухэм ямэлэӀичхэу уашъом щыӀэхэм ся Тэу уашъом щыӀэм ынэгу щалъэгъу зэпыт. 11ЦӀыф Лъэпкъым ы Къо къызыфэкӀуагъэр цӀыф кӀодыгъэм лъыхъунышъ, мыкӀодэу къыгъэнэжьыныр ары.
Мэлэу кӀодыгъэм ехьылӀэгъэ гъэсэпэтхыдэр
(Лука 15:3-7)
12– Шъо сыдэущтэу шъухаплъэра? ЦӀыф горэм мэлишъэ иӀэу тӀон. Ахэмэ ащыщэу зыр гъуащэмэ, адрэ тӀокӀиплӀырэ пшӀыкӀубгъурэр Ӏуашъхьэмэ къатыринэнхэшъ, кӀонышъ, мэлэу гъощагъэм лъыхъущтба? 13Шъыпкъэр шъосэӀо, а мэлыр къызигъотыжькӀэ, мэл тӀокӀиплӀырэ пшӀыкӀубгъурэу ныбжьи мыгъощагъэхэм анахьи, а мэлым нэхь щыгушӀукӀыщт. 14Ащ фэдэу шъуя Тэ лъапӀэу уашъом щыӀэр мы цӀыкӀухэм ащыщ гори кӀодыным фаеп.
Пшэу псэкӀод зышӀэрэр
(Лука 17:3)
15– О пшы оркӀэ псэкӀод ышӀэмэ, ыдэжь кӀуи, ар зэрэпсэкӀодыр шъуизакъо зыхъукӀэ, гурыгъаӀу. КъызыодэӀукӀэ, ащыгъум о пшы къыпфэнэщт. 16Ау къызыомыдэӀукӀэ, зы нэбгырэ е нэбгыритӀу пшы дэжь зыдащ. Ащыгъум «шыхьатитӀумэ е шыхьатищымэ къаӀорэмкӀэ#18:16 шыхьатитӀумэ е шыхьатищымэ къаӀорэмкӀэ… – еплъ Пегъымбар Мусэ ятфэнэрэ тхылъэу ытхыгъэм 19:15. сыдрэ гущыӀи гъэшъыпкъагъэ хъущт». 17Ахэмэ ядэӀунэу ымыдэмэ, чылыс зэӀукӀэм щыщхэм апашъхьэ Ӏофыр илъхь. Чылыс зэӀукӀэми едэӀунэу ымыдэмэ, хымэ лъэпкъхэм ащыщэу зыгорэм фэдэу е хьакъулахь ахъщэр хэзыхырэм#18:17 хьакъулахь ахъщэр хэзыхырэр – еплъ 5:46. фэдэу оркӀэ орэхъу.
18– Шъыпкъэр шъосэӀо, чӀылъэм сыд щыщми шъо фит шъумышӀырэр уашъоми фит щыхъущтэп; чӀылъэм сыд щыщми шъо фит шъушӀырэри уашъоми фит щыхъущт.
19– Джыри шъосэӀо, чӀылъэм шъуащыщэу нэбгыритӀу шъузэгурыӀоу, сыд щыщкӀи шъуелъэӀумэ, ся Тэу уашъом щыӀэм ар къышъуфишӀэщт. 20Сыда пӀомэ, сэ сцӀэкӀэ нэбгыритӀу е нэбгырищ зызэрэугъоихэкӀэ, сэри ахэмэ сахэт.
ГукӀэгъу зыхэмылъ унэӀутым ехьылӀэгъэ гъэсэпэтхыдэр
21Джащыгъум Петрэ Исус къыбгъодахьи, къеупчӀыгъ:
– Зиусхьан, сэ сшы сэркӀэ псэкӀод ышӀэмэ, тхьапшырэ фэзгъэгъун фая? Гъогогъуиблым нэса?
22– Сэ осэӀо, гъогогъуибл къодыеп, гъогогъуиблыр тӀокӀищырэ пшӀырэкӀэ штагъэу нахь, – риӀожьыгъ Исус.
23– Арышъ, Тхьэу уашъом щыӀэм и Тетыгъошхо зыфэдэр пачъыхьэу зиунэӀутмэ ателъ чӀыфэр зылъытэнэу фэягъэр ары. 24Ылъытэнэу зыфежьэм, талант#18:24 талант – зы талантыр динар минихым фэдиз мэхъу. Зы динар лэжьакӀом имэфапкӀэщтыгъ. минипшӀ чӀыфэ зытелъэу зыгорэ къыфащагъ. 25Ау къыритыжьынэу амал иӀэпти, ари, ащ ишъузи, илъфыгъэхэри, иӀэр зэкӀэ ащэхэзэ, чӀыфэр ригъэпщыныжьынэу пачъыхьэм унашъо ышӀыгъ.
26– Джащыгъум а унэӀутым лъэгонджэмышъхьэкӀэ пачъыхьэм ыпашъхьэ зыщыридзыхи, риӀуагъ: «Семыгъэз. ЗэкӀэ остыжьыщт». 27Пачъыхьэм ыгу унэӀутым егъуи, чӀыфэр фигъэгъуи, ытӀупщыжьыгъ.
28– А унэӀутыр зыӀокӀыжьым, адрэ унэӀутмэ ащыщэу идинаришъэ чӀыфэ зытелъым ӀукӀи, «Сэ сичӀыфэу птелъыр къысэтыжь» ыӀуи, ытхьалэу ыублагъ.
29– Джащыгъум адрэ унэӀутым ащ ыпашъхьэ зыщыридзыхи, елъэӀузэ, къыӀуагъ: «Семыгъэз, остыжьыщт».
30– Ау мыдрэм ымыдэу, хьапсым чӀаригъэдзагъ, чӀыфэр къыретыжьыфэ чӀэсынэу. 31Адрэ унэӀутхэу ар зылъэгъугъэмэ лъэшэу агу къеуагъэти, тхьэматэм дэжь кӀохи, хъугъэр зэкӀэ раӀотэжьыгъ.
32– Тхьэматэм а унэӀутыр къаригъащи, риӀуагъ: «УнэӀут бзадж, укъысэлъэӀугъэти, сичӀыфэу птелъыгъэр зэкӀэ пфэзгъэгъугъ. 33Сэ о гукӀэгъу къызэрэпфэсшӀыгъэм фэдэу, ори адрэ унэӀутым гукӀэгъу фэпшӀын фэягъэба?» 34Тхьэматэр лъэшэу къэгубжыгъ, ичӀыфэу телъыри зэкӀэ къыретыжьыфэ аӀыгъынэу а унэӀутыр хьапс ухъумакӀохэм аритыгъ.
35– Шъуащыщэу хэти ыгукӀэ ыш фэзымыгъэгъурэм ся Тэу уашъом щыӀэр ащ фэдэу къыдэзекӀощт, – къыпигъэхъожьыгъ Исус етӀанэ.
Currently Selected:
Маттэ 18: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
