Маттэ 23

ЯТӀОКӀЫРЭ ЩЫНЭРЭШЪХЬ

Исус Тэурат егъэджэкӀо пащэхэмрэ фарисейхэмрэ ямысагъэ къызэрэхигъэщыгъэр

(Марк 12:38-40; Лука 11:37-52; 20:45-47)

1Джащыгъум ариӀуагъ Исус цӀыф купышхохэмрэ игъогу рыкӀохэрэмрэ:

2– Тэурат егъэджэкӀо пащэхэмрэ фарисейхэмрэ пегъымбар Мусэ итӀысыпӀэ лъапӀэ тетӀысхьагъэх. 3Арышъ, зэкӀэ шъушӀэн фаеу, жъугъэцэкӀэн фаеу ахэмэ къышъуаӀорэр жъугъэцакӀэ, ау ашӀэрэр шъумышӀэ, сыда пӀомэ, ахэмэ аӀо нахь, агъэцакӀэрэп. 4Хьылъэу щэчыгъуаехэр зэкӀоцӀапхэзэ, цӀыфхэм атамэхэм атыралъхьэ, ау ежьхэр цӀыфхэм адэӀэпыӀэнхэу зы Ӏэхъуамби агъэхъыерэп.

5– Ахэмэ яшӀушӀэ пстэури цӀыфхэм арагъэлъэгъуным пае ашӀэ. Ахэмэ янэмаз къэмлэнэжьыехэр#23:5 янэмаз къэмлэнэжьыехэр – къэмлэнэжьыехэу (шъом хэшӀыкӀыгъэ дэлъхьэпӀэ цӀыкӀухэр) ятхылъ лъапӀэхэм арытхэм ащыщхэр зыдэлъхэр джуртхэм шъо кӀапсэкӀэ анатӀэхэмрэ аӀапшъэхэмрэ аращэкӀых. Еплъ Пегъымбар Мусэ ятфэнэрэ тхылъэу ытхыгъэм 6:8; 11:18. агъэшъуамбгъох, яшъошэ кӀыхьэхэм акӀапэхэри агъэкӀыхьэх. 6Гухэхъо Ӏанэхэм адэжьи цӀыфхэр синэгогухэм защызэӀукӀэхэкӀи тхьэмэтэ тӀысыпӀэхэр аубытынхэри шӀу алъэгъу. 7ЗэӀукӀэхэми ежьхэм аӀэхэм цӀыфхэр ащарагъэбэунхэри, «дин гъэсакӀокӀэ» зэрагъэджэнхэри якӀас.

8– Ау шъо «дин гъэсакӀокӀэ» зэшъумыгъаджэх, сыда пӀомэ, дин гъэсакӀоу шъуиӀэ закъор Христос ары, шъо зэкӀэми шъузэкъош. 9ШъуятэкӀэ зыми чӀылъэм шъущемыдж, сыда пӀомэ, шъо шъуятэу шъуиӀэ закъор уашъом щыӀэ шъуя Тэ лъапӀэр ары. 10Ащ фэдэуи «ушъыякӀокӀэ» зэшъумыгъаджэх, сыда пӀомэ, ушъыякӀоу шъуиӀэ закъор Христос ары. 11Шъо шъуащыщэу анахь ин дэдэр Ӏофтабгэ къышъуфэхъун фае. 12Сыда пӀомэ, хэти ежь ышъхьэ зыгъэиныжьырэр Тхьэм ыгъэцӀыкӀущт, хэти ежь ышъхьэ зыгъэцӀыкӀужьыри Тхьэм ыгъэиныщт.

13– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо, нэпитӀу зиӀэхэр! Тхьэу уашъом щыӀэм и Тетыгъошхо икъэлапчъэ цӀыфмэ апашъхьэ щышъогъэпытэ. Шъо а тетыгъошхом ыӀэчӀэгъ шъучӀахьэрэп, чӀэхьанхэу фаехэри чӀэхьанхэу фит шъушӀыхэрэп. 14Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо, нэпитӀу зиӀэхэр! Шъузабэхэм яунэхэр къатешъохых, цӀыфмэ зяжъугъэгъэшӀэгъоным паий, тхьэлъэӀухэр шъогъэкӀыхьэх. Ащ пае Тхьэм инэу шъуигъэпщынэжьыщт.

15– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо, нэпитӀу зиӀэхэр! Шъо чӀыгуми хыми къащышъокӀухьэ, цӀыф закъо шъуидин къижъугъэхьаным пае. Ар къызыжъудэхъукӀэ, шъощ нахьи фэдитӀукӀэ нахь Ӏаеу, джэхьнэм бынэу ар шъогъэхъу.

16– Гъогу мыгъо шъутеуцуагъ, шъо пэщэ нэшъухэу моущтэу зыӀохэрэр: «Тхьэм иунэшхо ыцӀэкӀэ зыгорэм тхьэ ыӀомэ, ащ зи къикӀырэп, ау Тхьэм иунэшхо идышъэ ыцӀэкӀэ зыгорэм тхьэ ыӀомэ, тхьарыӀуагъэ мэхъу». 17Шъо, акъыл зимыӀэхэу цӀыф нэшъухэр! Тара нахь лъапӀэр: дышъэр ара хьауми Тхьэм иунэшхоу дышъэр лъапӀэ зышӀырэр ара? 18Моущтэуи шъоӀо: «КъурмэншӀыпӀэм ыцӀэкӀэ зыгорэм тхьэ ыӀомэ, ащ зи къикӀырэп, ау къурмэныпхъэу къурмэншӀыпӀэм телъым ыцӀэкӀэ зыгорэм тхьэ ыӀомэ, тхьарыӀуагъэ мэхъу». 19Шъо, цӀыф нэшъухэр! Тара нахь лъапӀэр, къурмэныпхъэр ара, хьауми къурмэншӀыпӀэу къурмэныпхъэр лъапӀэ зышӀырэр ара? 20Арышъ, къурмэншӀыпӀэм ыцӀэкӀэ тхьэ зыӀорэм къурмэншӀыпӀэм ыцӀэкӀи, ащ телъ пстэумэ ацӀэкӀи тхьэ ыӀуагъэу мэхъу. 21Джащ фэд, Тхьэм иунэшхо ыцӀэкӀэ тхьэ зыӀорэми Тхьэм иунэшхо ыцӀэкӀи, ащ чӀэсым ыцӀэкӀи тхьэ ыӀуагъэ мэхъу. 22Уашъом ыцӀэкӀэ тхьэ зыӀорэми Тхьэм итӀысыпӀэ лъапӀэ ыцӀэкӀи, ащ тесым ыцӀэкӀи тхьэ ыӀуагъэ мэхъу.

23– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо, нэпитӀу зиӀэхэр! Хатэм къыдэкӀагъэхэм анахь пыутхэм ащыщэу зы пшӀанэр Тхьэм пае шъоты, ау Тэурат хабзэм итхэу, нахь Ӏофхэу жъугъэцэкӀэн фаехэу, зэфагъэр, гукӀэгъур, Тхьэм шъуфэшъыпкъэныр къэшъогъанэх. Ахэр ары жъугъэцэкӀэн фаехэр, адрэ Ӏофхэри къэшъумыгъанэхэу. 24Шъо, пэщэ нэшъухэр! Шъузашъорэм аргъоир хэшъухызэ, махъшэу хэлъыр шъодыры.

25– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо, нэпитӀу зиӀэхэр! Шъо шъуишъуалъэхэмрэ шъуилагъэхэмрэ акӀыбхэр шъогъэкъабзэх, ау акӀоцӀхэм нэйпсыягъэрэ зымыщыӀэныгъэрэ нахь зи арылъэп. 26О фарисей нэшъур! Ыпэ рапшӀэу шъуалъэмрэ лагъэмрэ акӀоцӀ гъэкъабзэ, джащыгъум акӀыбхэри къабзэ хъущтых.

27– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр. Шъо фыжьэу зыкӀыӀу гъэлэгъэ къэунэхэм шъуафэд. Ахэр дахэу къэлъагъох, ары шъхьакӀэ акӀоцӀыкӀэ хьэдэкъупшъхьэрэ сыдрэ шӀоигъэрэ ачӀиз. 28Ащ фэдэу шъори шъуитеплъэкӀэ шъыпкъагъэр зиӀэ цӀыфхэм шъуафэдэу цӀыфхэм шъукъафэлъагъо, ау шъукӀоцӀыкӀэ нэпитӀугъэрэ бзэджагъэрэ шъукӀоцӀиз.

29– Гъогу мыгъо шъутеуцуагъ, Тэурат егъэджэкӀо пащэхэри, фарисейхэри, шъо нэпитӀу зиӀэхэр! Пегъымбархэм апае къэунэхэр шъогъэуцух, шъыпкъагъэ зиӀэ цӀыфхэм якъэнэтӀэхэсхэри шъогъэкӀэракӀэх. 30Ау щытми, «Тятэжъхэм ямафэхэм тэ тыщыӀагъэмэ, ахэмэ пегъымбармэ алъ загъачъэм, гъусэ тафэхъущтыгъэп» шъоӀо. 31Джаущтэу шъуӀозэ, пегъымбархэр зыукӀыгъэмэ шъузэракъохэр шъор-шъорэу къэшъоушыхьатыжьы. 32Дэгъуба ащыгъум, шъуятэжъхэм къаублэгъэ Ӏофыр ижъугъэкъужь.

33– Шъо, блэхэр! Шъо, блэщылъфэхэр! Джэхьнэмым шъукӀонэу Тхьэм къышъутырилъхьащтым сыдэущтэу шъуӀэкӀэкӀын? 34Ащ пае мары пегъымбархэри, акъылышӀу зиӀэ цӀыфхэри, дин гъэсакӀохэри сэ къышъуфэсэгъакӀох. Ахэмэ ащыщэу зы купыр къащым тешъуӀулӀэнышъ, шъуукӀыщт; адрэ купми шъуисинэгогухэм къамыщкӀэ шъущяощт, зы къалэм дэшъуфыхэзэ адрэ къалэм шъуфыщтых. 35Аущтэу дунаим щагъэчъэгъэ лъы хыер зэкӀэ шъо къышъутефэщт, шъыпкъагъэ зиӀэу пегъымбар Хьавэл ылъ щегъэжьагъэу пегъымбар Зэчрееу Барахый ыкъо ылъ къыхиубытэу. Пегъымбар Зэчрей ары Тхьэм иунэшхорэ къурмэншӀыпӀэмрэ азыфагу щышъуукӀыгъагъэр. 36Шъыпкъэр шъосэӀо, мы мыхъо-мышӀэ Ӏоф пстэуми ямысагъэ джырэ цӀыфхэм къатефэщт.

Ей, Ерусалим!

(Лука 13:34-35)

37– Ей, Ерусалим, Ерусалим! УицӀыфхэм пегъымбархэр аукӀых, мыжъокӀэ яохэзэ Тхьэм илӀыкӀохэри аукӀых. Бзыум ищырхэр ытамэмэ ачӀэгъ зэрэщычӀиугъуаехэрэм фэдэу, сыд фэдизрэ уибынхэр зэсыугъоилӀэнхэу сыфэягъ, ау шъо шъуфэягъэп. 38Моу зэ шъуеплъ, Тхьэр шъуикъалэ нэшӀукӀэ къеплъыжьыщтэп. 39Сэ шъосэӀо, «Зиусхьаным ыцӀэкӀэ къакӀорэм щытхъушхор ий!» зыщышъуӀощт мафэм нэсыфэ, сышъулъэгъужьыщтэп.

Currently Selected:

Маттэ 23: AdgNT14

Highlight

Copy