Маттэ 25
25
ЯТӀОКӀЫРЭ ТФЫНЭРЭШЪХЬ
ПшъэшъипшӀымэ яхьылӀэгъэ гъэсэпэтхыдэр
1– А мафэм уашъом щыӀэ Тхьэм и Тетыгъошхо зыфэдэщтыр мары. ПшъэшъипшӀмэ яостыгъэхэр аштэхи, шъаом пэгъокӀынхэу дэкӀыгъэх. 2Ахэмэ ащыщэу тфыр акъылынчъагъ, тфыр Ӏушыгъ. 3Акъыл зимыӀэ пшъашъэхэм яостыгъэхэр заштэхэм, дагъэ зыдаштагъэп. 4Пшъэшъэ Ӏушхэм яостыгъэмэ ягъусэу, дагъэ зэрыт дэгъалъэхэри зыдаштагъэх. 5Шъаор къызэгужъом, пшъашъэхэр зэкӀэ шъхьаукъэхи, хэчъыягъэх.
6– Ау чэщныкъом макъэ горэ къэӀугъ: «Мары, шъаор къэкӀо! ШъукъыпэгъокӀ!»
7– Джащыгъум а пшъашъэхэр зэкӀэ къэтэджыхи, яостыгъэхэр агъэхьазырыгъ. 8Акъыл зимыӀэ пшъашъэхэр пшъэшъэ Ӏушхэм ялъэӀугъэх: «Шъуидагъэ щыщ къытэшъут, сыда пӀомэ, тиостыгъэхэр мэкӀуасэх».
9– Ау пшъэшъэ Ӏушхэм къаӀожьыгъ: «Шъори тэри ар тфикъунэп. Дагъэ зыщэрэмэ адэжь шъукӀоу къызфэшъущэфымэ нахьышӀу».
10– ЩэфакӀо ахэр зэкӀохэм, шъаор къэсыгъ, хьазырэу щытыгъэ пшъэшъитфыри игъусэхэу джэгу зыщашӀырэ унэм ихьэхи, къэлапчъэри къыфашӀыжьыгъ.
11– Ащ нэуж адрэ пшъашъэхэри къэкӀожьхи, моущтэу аӀуагъ: «Титхьэмат, титхьэмат! Къэлапчъэр къытфыӀух!»
12– Ау ащ къыӀожьыгъ: «Шъыпкъэр шъосэӀо, шъо хэтми шъузщыщыр сшӀэрэп».
13– Арышъ, шъумычъыеу шъусакъ, – къыпигъэхъожьыгъ Исус, – сыда пӀомэ, ЦӀыф Лъэпкъым ы Къо дунаим къызыкӀожьыщт мафэри сыхьатри шъушӀэрэпышъ ары.
Талант зыцӀэ ахъщэхэм яхьылӀэгъэ гъэсэпэтхыдэр
(Лука 19:11-27)
14– Джыри уашъом щыӀэ Тхьэм и Тетыгъошхо къызэрэкӀощтыр зыфэдэр мары. ЛӀы горэ хымэ хэгъэгу горэм кӀон зэхъум, иунэӀутмэ къяджи, имылъку аӀэкӀилъхьагъ. 15Зым талантитф ритыгъ, адрэм талантитӀу ритыгъ, нэмыкӀми зы талант ритыгъ. Хэти лъэкӀэу иӀэм фэшъуашэ рити, гъогум техьагъ. 16Талантитф зэритыгъэр занкӀэу кӀуи, ахэр ыгъэлажьэхи, джыри талантитф къыхьыжьыгъ. 17Джащ фэдэу талантитӀу зэритыгъэми джыри талантитӀу къыхьыжьыгъ. 18Ау тхьэматэм зы талант зэритыгъэр кӀуи, ар чӀыгум чӀитӀи, итхьэматэ иахъщэ ыгъэбылъыгъ.
19Бэ тешӀагъэу а унэӀутмэ ятхьэматэ къэкӀожьыгъ, иунэӀутхэм ахъщэр зэрагъэлэжьагъэмкӀи яупчӀынэу ыублагъ. 20Талантитф зэритыгъагъэр тхьэматэм бгъодахьи, адрэ талантитфэу къыхьыгъэхэр къыфихьыхи, къыӀуагъ: «Тхьэматэ, талантитф къысӀэкӀэплъхьагъ. Мары, ахэмкӀэ джыри талантитф къэсхьыжьыгъ». 21Тхьэматэм ащ риӀуагъ: «Дэгъоу пшӀагъэ. О сыпщыгугъынэу уунэӀут дэгъу! Ӏоф макӀэхэмкӀэ сызщыгугъын лӀэу узэрэщытыгъэм пае, Ӏофыбэхэр къыпӀэкӀэслъхьащтых. КъакӀуи, уитхьэматэ игушӀуагъо къыхахь!» 22Джаущтэу талантитӀу зэритыгъагъэри тхьэматэм бгъодахьи, къыӀуагъ: «Тхьэматэ, талантитӀу къысӀэкӀэплъхьагъ. Мары, ахэмкӀэ джыри талантитӀу къэсхьыжьыгъ». 23Тхьэматэм ащ риӀуагъ: «Дэгъоу пшӀагъэ. О сыпщыгугъынэу уунэӀут дэгъу! Ӏоф макӀэхэмкӀэ сызщыгугъын лӀэу узэрэщытыгъэм пае, Ӏофыбэхэр къыпӀэкӀэслъхьащтых. КъакӀуи, уитхьэматэ игушӀуагъо къыхахь!»
24ЕтӀанэ зы талант зэритыгъагъэри тхьэматэм бгъодахьи, къыӀуагъ: «Тхьэматэ, о узэрэлӀ пхъашэр сшӀэщтыгъэ, чылапхъэ зыхэмыпхъагъэм лэжьыгъэр къыщыохыжьы, зыхэмытэкъуагъэми къыщыоугъоижьы. 25Сэщынэти сыкӀуи, уиталант чӀыгум чӀэзгъэбылъхьагъ. Мары, о уиер осэтыжьы». 26Тхьэматэм ащ риӀуагъ: «О уунэӀут бзадж, уунэӀут фэмыф! О пшӀэщтыгъэ сэ чылапхъэр зыхэсымыпхъагъэм лэжьыгъэ къызэрэщысхыжьырэри, зыхэсымытэкъуагъэм къызэрэщысыугъоижьырэри. 27Ащ Ӏофыр зытеткӀэ, сиахъщэ ахъщэхъожьхэм яптын фэягъэба? Джащыгъум сыкъызыкӀожьыкӀэ, сиахъщэ хэхъуагъэу къысӀэкӀэхьажьыщтыгъ». 28«Мы лӀым талантыр Ӏышъухи, талантипшӀ зиӀэм ешъут. 29Сыда пӀомэ, Тхьэм хэт щыщми зиӀэм нахьыбэ къыритыщт, къелыжьэуи бэ иӀэщт. Ау Тхьэм зимыӀэм иӀэ тӀэкӀури Ӏихыжьыщт. 30Ау мы унэӀутэу пкӀэ зимыӀэр шӀункӀым икуупӀэ хэшъудз. Ащ дэжьым куохьаурэ цэ зэрэгъэшхырэ щыхъущтых». Ар къызеӀо ужым, Исус мэкъэшхокӀэ къыӀуагъ:
– РыдэӀонэу тхьакӀумэ зиӀэм зэхерэх.
ЦӀыф Лъэпкъым ы Къо цӀыф лъэпкъхэм хьыкум зэратыришӀыхьащтыр
31– ЦӀыф Лъэпкъым ы Къо щытхъушхо иӀэу, имэлэӀич пстэури игъусэу дунаим къызыкӀожьыкӀэ, итӀысыпӀэ лъапӀэу щытхъушхо зиӀэм тетӀысхьащт. 32Лъэпкъ пстэури ежь ыпашъхьэ къыщызэрэугъоищт, мэлахъом мэлхэмрэ пчэнхэмрэ зэрэзэхидзыхэрэм фэдэуи, цӀыфхэр зэхидзыщт. 33Мэлхэр иджабгъукӀэ, пчэнхэр исэмэгубгъукӀэ ыгъэуцущтых.
34– Джащыгъум Пачъыхьэм иджабгъукӀэ щытхэм ариӀощт: «Сэ ся Тэ лъапӀэ ынэшӀу зыщифагъэхэр, шъукъакӀуи, Тхьэм дунаир къызигъэхъугъэм къыщегъэжьагъэу къышъуфигъэхьазырыгъэ тетыгъор шъуиӀахьышӀоу шъуубыты. 35Сыда пӀомэ, мэлакӀэ сызэлӀэм, сыжъугъэшхагъ; псыфалӀэ сызэлӀэми, псы сежъугъэшъуагъ; сызэхымэми, сыкъежъугъэблэгъагъ, 36зыщыслъэн зысемыӀэми, сышъуфэпагъ; сызэсымаджэми, шъукъыслъыплъагъ; хьапсым сызычӀэсыми, садэжь шъукъэкӀуагъ».
37– Джащыгъум шъыпкъагъэ зиӀэ цӀыфхэм къыраӀожьыщт: «Зиусхьан, сыдигъуа мэлакӀэ улӀэу утлъэгъуи, узыдгъэшхагъэр е псыфалӀэ улӀэу псы узедгъэшъуагъэр? 38Сыдигъуа хымэу утлъэгъуи, узедгъэблэгъагъэр е зыщыплъэн уимыӀэу узытфэпагъэр? 39Усымаджэу е хьапсым учӀэсэу сыдигъуа утлъэгъуи, уадэжь тыкъызыкӀуагъэр?»
40– Пачъыхьэм ахэмэ пэгъокӀ аритыщт: «Шъыпкъэр шъосэӀо, сэ сшы анахь цӀыкӀу дэдэхэм ащыщэу зыгорэм фэшъушӀагъэр сэ къысфэшъушӀагъэу мэхъу».
41– ЕтӀанэ Пачъыхьэм исэмэгубгъукӀэ щытхэм ариӀощт: «Садэжь шъуӀукӀ, шъо Тхьэм ынае зыщифагъэхэр. Шэйтанымрэ ащ имэлэӀичхэмрэ Тхьэм афигъэхьазырыгъэ мыкӀосэжьын машӀом шъукӀу. 42Сыда пӀомэ, мэлакӀэ сызэлӀэм, сыжъугъэшхагъэп; псыфалӀэ сызэлӀэми, псы сежъугъэшъуагъэп; 43хымэу сызыщэтыми, сежъугъэблэгъагъэп, зыщыслъэн зысемыӀэми, сышъуфэпагъэп; сызэсымаджэми, хьапсым сызычӀэсми, шъукъыслъыплъагъэп».
44– Джащыгъум ахэми Пачъыхьэм къыраӀожьыщт: «Зиусхьан, мэлакӀэ улӀэу, е псыфалӀэ улӀэу, е ухымэу, е зыщыплъэн уимыӀэу, е усымаджэу, е хьапсым учӀэсэу утлъэгъуи, тишӀуагъэ отымыгъэкӀэу сыдигъуа укъызыдгъэнагъэр?»
45– Джащыгъум Пачъыхьэм пэгъокӀ аритыщт: «Шъыпкъэр шъосэӀо, мы цӀыкӀу дэдэмэ ащыщэу зыгорэм фэшъумышӀагъэр къысфэшъумышӀагъэу мэхъу».
46– Аущтэу ахэр мыухыжьын къин ащэчынэу ӀукӀыжьыщтых, ау шъыпкъагъэ зиӀэ цӀыфхэм мыкӀодыжьын щыӀэныгъэ къалъыӀэсынэу ӀукӀыжьыщтых.
Currently Selected:
Маттэ 25: AdgNT14
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 1991, 1992, 2014. Стокгольм
