Марк 15

ЯПШӀЫКӀУТФЭНЭРЭШЪХЬ

Ӏэшъхьэтет Пилат ыпашъхьэ Исус зэрэращагъэр

(Маттэ 27:1-2, 11-14; Лука 23:1-5; Иуан 18:28-38)

1Нэф къызэрышъэу, нахьыжъхэри, Тэурат егъэджэкӀо пащэхэри, адрэ тхьэматэхэу Тхьэмэтэ Хэсэшхом хэтхэри ягъусэхэу, дин пэщэшхохэм хасэ ашӀыгъ. Исус Ӏэхъу тыралъхьи, Ӏуащи, Ӏэшъхьэтет Пилат#15:1 Пилат – еплъ Маттэ 27:2. ӀэкӀалъхьагъ.

2– О джуртхэм уряпачъыхьа? – къеупчӀыгъ Пилат Исус.

– Ары, къызэрэпӀорэм фэд#15:2 – Ары, къызэрэпӀорэм фэд – е – О пшъхьэкӀэ къэоӀо., – риӀожьыгъ Исус.

3Дин пэщэшхохэм ӀэджыкӀи Исус агъэмысэщтыгъ. 4Пилат джыри зэ Исус къеупчӀыгъ:

– Сыда зи къызкӀэмыӀорэр? Къыптыралъхьэрэр зыфэдизыр плъэгъурэба?

5Ау Исус зи къыӀожьыгъэп. Зи къызэримыӀожьыгъэр Пилат ыгъэшӀэгъуагъ.

Исус укӀ зэрэтыралъхьагъэр

(Маттэ 27:15-26; Лука 23:13-25; Иуан 18:39–19:16)

6ӀутӀыжъ мэфэкӀ мэфэшхор къэсымэ, цӀыфхэр зыкӀэлъэӀурэ хьапсчӀэс горэ къафитӀупщыжьыныр Пилат ихэбзагъ. 7А мафэхэм цӀыфхэм бырсыр къызаӀэтым, лӀы горэ зыукӀыгъэу нэбгырэ заулэ хьапсым чӀэсыгъ. Бар-Аббэ ыцӀэу лӀы горэ ахэмэ ахэтыгъ. 8ЦӀыфхэр купышхоу Пилат дэжь къакӀохи, ихабзэ фэдэу къафишӀэнэу къелъэӀугъэх.

9– Джуртхэм япачъыхьэ шъхьафитэу къышъуфэстӀупщыжьыным шъуфая? – яупчӀыгъ Пилат. 10Пилат аущтэу зыкӀяупчӀыгъэр шъугъоным къыхэкӀэу, дин пащэхэм Исус къызэрэӀэкӀалъхьагъэр къыгурыӀуагъэти ары. 11Ау Пилат Бар-Аббэ къырагъэтӀупщыжьыным пае, дин пэщэшхохэм цӀыфхэр зэкӀагъэплъыхьагъэх.

12– Адэ, джуртхэм япачъыхьэу зыфашъуӀорэм сыда есшӀэщтыр? – джыри зэ яупчӀыгъ Пилат.

13– Къащым теӀулӀ! – къэкууагъэх ахэр.

14– Сыда ащ бзэджагъэу ышӀагъэр? – яупчӀыгъ Пилат. Ау ахэр нахь инэу къэзэрэгъэкууагъэх:

– Къащым теӀулӀ!

15Джащыгъум Пилат цӀыф купышхор ыгъэрэзэнэу фэягъэти, Бар-Аббэ къафитӀупщыжьыгъ. ЕтӀанэ Исус къамыщкӀэ ригъаохи, къащым тыраӀулӀэнэу аӀэкӀилъхьагъ.

ДзэлӀхэр Исус зэрэкӀэнэкӀагъэхэр

(Маттэ 27:27-31; Иуан 19:2-3)

16ДзэлӀхэм преторие#15:16 преторие – еплъ Маттэ 27:27. зыцӀэ унэшхом Исус чӀащи, адрэ къэнэгъэ дзэлӀ купышхор ащ щызэхаугъоягъ. 17ЕтӀанэ плъыжь чӀапцӀэу шъошэ кӀыхьэ Исус щалъи, пэнэ къутамэхэр аблэзэ, пачъыхьэ тандж хашӀыкӀи, ышъхьэ тыралъхьагъ. 18Шъхьащэ фашӀэу аублагъ: «Опсэу, о джуртхэм япачъыхь!» аӀозэ. 19ЕтӀанэ бэщкӀэ ышъхьэ еощтыгъэх, теужъунтхэщтыгъэх, агъэлъапӀэрэм фэдэу лъэгонджэмышъхьэкӀэ ыпашъхьэ къитӀысхьэщтыгъэх. 20Ахэр Исус зыкӀэнакӀэхэ ужым, шъошэ кӀыхьэ плъыжь чӀапцӀэр щахыжьи, ежь ищыгъынхэр щалъэжьыгъэх. ЕтӀанэ къащым тыраӀулӀэнэу преторием ращыжьыгъ.

Исус къащым зэрэтыраӀулӀагъэр

(Маттэ 27:32-44; Лука 23:26-43; Иуан 19:17-27)

21Къалэу Кириние#15:21 къалэу Кириние – еплъ Маттэ 27:32. щыщэу, Симон ыцӀэу лӀы горэ щыӀагъ. Ар Александрэрэ Рутрэ ятагъ. Ар губгъом къикӀыгъэу блэкӀ пэтэу, Исус икъащ ыхьынэу рагъэзыгъ. 22Голготэ зыфаӀорэ чӀыпӀэм Исус ащагъ, (Голготэм къикӀырэр «Шъхьэпкъ ЧӀыпӀ» ары). 23Ащ дэжьым зынэсхэм, муркӀэ заджэхэрэ мыстхъу горэ зыхэлъ сэнэпс Исус фащэигъ, ау аӀихыгъэп. 24ЕтӀанэ Исус къащым тыраӀулӀагъ. Пхъэдз радзэзэ, ищыгъынхэм ащыщэу хэти иӀахьэу къылъыӀэсыщтыр зэфагощыгъ.

25Исус къащым зытыраӀулӀэм, пчэдыжьым сыхьатыр бгъум нэсыгъагъ. 26Исус къащым зыкӀытыраӀулӀагъэр пхъэмбгъум моущтэу тетхэгъагъ: «Джуртхэм я Пачъыхь». 27А чӀыпӀэм хъункӀэкӀуитӀу, зыр иджабгъукӀэ адрэр исэмэгубгъукӀэ, Исус игъусэхэу къащхэм атыраӀулӀагъэх. 28Аущтэу Тхьэм мы игущыӀэ тхыгъэхэр#15:28 Тхьэм игущыӀэ тхыгъэхэр – еплъ Пегъымбар Ешайа тхылъэу ытхыгъэм 53:12. къэшъыпкъэжьыгъэх: «Хабзэм текӀыгъэхэм ащыщэу ежь алъытагъ». 29БлэкӀырэ цӀыфхэр Исус ехъоныщтыгъэх, ашъхьэхэр агъэсысхэу, моущтэу аӀозэ:

– О Тхьэм иунэшхо зэхэзыкъутэу, мэфищкӀэ зэтезгъэуцожьыщтыр, 30умыкӀодэу зыкъэгъэнэжьи, къащым къехыжь!

31Ащ фэдэу дин пэщэшхохэмрэ Тэурат егъэджэкӀо пащэхэмрэ Исус кӀэнакӀэхэу зэраӀожьыгъ:

– НэмыкӀ цӀыфхэр мыкӀодэу къыгъэнэжьыгъэх, ау ежь зыкъыгъэнэжьышъурэп. 32Христосэу Израиль ипачъыхьэ джы къащым къерэхыжь. Къызэрехыжьыгъэр тлъэгъумэ, шӀошъхъуныгъэ тиӀэ хъущт. Исус игъусэхэу къащхэм атыраӀулӀагъэхэри ежь къехъоныщтыгъэх.

Исус зэрэлӀагъэр

(Маттэ 27:45-56; Лука 23:44-49; Иуан 19:28-30)

33Щэджагъом#15:33 щэджагъом – еплъ Маттэ 27:45. щегъэжьагъэу сыхьатыр щым#15:33 сыхьатыр щым – еплъ Маттэ 27:45. нэс, а хэгъэгум тыдэкӀи шӀункӀ къыщыхъугъ. 34Сыхьатыр щым дэжь Исус мэкъэшхокӀэ джагъэ: – Элой, Элой! Лама сабахтани? (Ащ къикӀырэр, «О си Тхь, о си Тхь! Сыд пае о сыкъэубгынагъ?»)

35А чӀыпӀэм щытхэм ащыщхэм ар зызэхахым, аӀуагъ:

– ШъуедэӀу, ар пегъымбар Иляс еджэ.

36Зыгорэ Ӏулъади, кӀышъо зэраӀотырэм сэнэпс шӀоӀугъэр хиз ышӀи, бэщ горэм пилъхьи, Исус кӀигъэшъунэу фищэигъ. ЕтӀанэ ыӀуагъ:

– Зэ, пегъымбар Иляс къакӀоу къащым къыпихыжьмэ, тежъугъэплъ.

37Ау Исус мэкъэшхокӀэ джи, ыпсэ ытыгъ.

38Джащыгъум Тхьэм иунэшхо ипэӀухъо ыпшъэкӀэ къыщегъэжьагъэу ыхэ нэсыфэ тӀоу къызэготхъыгъ.

39ДзэлӀхэм япащэу Исус фэзанкӀэу щытым, ар моущтэу лӀэзэ зелъэгъум, къыӀуагъ:

– Шъыпкъэ дэдэу, мы лӀыр Тхьэм ы Къуагъ.

40ЧыжьэкӀэ къаплъэхэу, бзылъфыгъэхэри ащ дэжьым щытыгъэх. Ахэмэ ахэтыгъэх мыхэр: Магдалэ щыщ Мерэми, Саломий, нэмыкӀ Мерэми. А Мерэм Якъубэ нахьыкӀэу зыфаӀорэмрэ ыш Иосыерэ янагъ. 41Исус Галилей хэкум зыщэӀэм, ахэр игъусэщтыгъэх, ӀэпыӀэгъу къыфэхъущтыгъэх. Ахэмэ анэмыкӀхэуи бзылъфыгъэ Ӏаджи Исус игъусэхэу Ерусалим къэкӀуагъэхэу а чӀыпӀэм щытыгъэх.

Исус ихьадэ къэунэм зэрэчӀалъхьажьыгъэр

(Маттэ 27:57-61; Лука 23:50-56; Иуан 19:38-42)

42Бэрэскэшхо мэфагъ, шэмбэт мафэм ыпэрэ мафэр ары. Пчыхьэшъхьапэ хъугъэти, 43къуаджэу Ариматей щыщ Юсыф къэкӀуагъ. А Юсыф Тхьэмэтэ Хэсэшхом хэтэу, лъытэныгъэ зифэшъошэ тхьэмэтагъ. Тхьэм и Тетыгъошхо къэсыным ар паплъэщтыгъ. Ащ зигъэгушхуи, Пилат дэжь кӀуи, Исус ихьадэ кӀэлъэӀугъ. 44Исус зэрэлӀагъэр Пилат ыгъэшӀэгъуагъ. ДзэлӀхэм япащэ къаригъащи, еупчӀыгъ:

– Исус бэшӀагъа зылӀагъэр?

45Дзэ пащэм Исус зэрэлӀагъэр Пилат къызыреӀом, Юсыф Исус ихьадэ ыхьыжьынэу фит ышӀыгъ. 46Юсыф чэфын къыщэфи, хьадэр къащым къыпихыжьи, чэфыныр рищэкӀи, Ӏошъхьэ цакӀэм хаупкӀыгъэ къэунэм чӀилъхьажьыгъ. ЕтӀанэ къэунэ чӀэхьапӀэм мыжъошхо ӀуигъэукӀорэягъ. 47Магдалэ щыщ Мерэмрэ Иосый янэ Мерэмрэ Юсыф хьадэр зычӀилъхьажьыгъэр алъэгъугъ.

Currently Selected:

Марк 15: AdgNT14

Highlight

Copy