Matyù 15
15
Yěsû a saʼà pɨ̀Farìsî mbə̀ʼə pɨ̀mbòomə pɨ̀tǎ pɨ̀tǎ ɨ̀pobə
(Mrk 7.1-13)
1A kɨ pə tyìʼə̀ aŋunə mətùmə nkwùə̀, pɨ̀Farìsî pobə pɨ̀nèrə̀ mbòomə furə̀ a Yèrusalèmə̀ ntô mbyiitə̀ a Yěsû lo, 2“Ka ɨ̀zùŋə̀ ndzùmə̀ ɨ̀pô nùŋə̀ a ghobə pɨ̀mbòomə pɨ̀tǎ pɨ̀tǎ ɨ̀pəə lə mbə̀ʼə àkə? Ka pobə pə nsùu a ghobə mbô ɨ̀mobə amwuə ndwuumə̀ nɨ ɨ kùʼnə̀nə mbòŋə̀ zɨghə̀!”
3Yěsû a kẅùə̀ lo, “À ghɨ̀rə̀ àkə lo kò nɨ̀ mə ndzùŋə̀ a wɨghə ntə̌ Nẅùə̀, ntyiʼə̀ ndzùŋə̀ pə pɨ̀mbòomə ɨ̀pɨghə? 4Ntiinə Nẅùə̀ à lə̀ shwəŋə̀ lo, ‘Zuʼnə̀ a tǎ ɨwɨghə pobə mǎ o,’ nkɨ nshwəŋə̀ lo, ‘Ŋònə̀ nɨ à zòomə̀nə a mǎ e kə̀ a tǎ ɨghobə, à kùʼnə̀ lo pɨ̀ zhwuutə̀ e.’ 5La nɨ̀ shwəŋə̀ àzɨghə lo ŋwùə̀ à tə nshwəŋə̀ ambo tǎ ɨghobə kə̀ mǎ e lo, ‘Àzwuumə̀ za zhyə̀ nɨ ǹtənə mbə ŋâ ambo ghò la, ŋ̀ŋâ a zèrə̀ ambo Nẅùə̀,’ 6yi ka à chyə̂ mbə e nɨ àghuʼtə̀ aŋunə tǎ ɨghobə pobə mǎ e. Zèrə zə a nèrə̀ la tsaʼnə nɨ̀ waʼnə mɨ̀ntə̌ mɨ Nẅùə̀ ntyiʼə̀ ndzùŋə̀ pə ɨ̀mɨghə mɨ̀ntə̌. 7Pɨghə ngàŋə àpə̀grə̀! Ngàŋə̀ ntwuumə̀ Nẅùə̀ Ìsayà à lə̀ zəənə̀ tyìʼə̀ ɨ̀shìʼnə̀ ŋŋwàʼnə̀ ànwùə̀ nɨ Nẅùə̀ à lə̀ shwəŋə̀nə mbə̀ʼə wɨghə lo:
8‘Pànə̀ pə̀ pa ndzuʼnə̀ mə̀ pə nɨ ɨ̀kòbə̀ ntswùə̀,
la mɨ̀ntɨŋmə̀ ɨ̀mobə pə a ndyə̌ sàa aŋunə mɨ̀ŋə̀.
9Ka ɨ̀sùmə ɨ̀tse ɨ̀ pə e ghu ambo pobə a nɨ səəkə̀ mə̀, ntiinə pobə pa nnèrə̀ pə pɨ̀mbòomə pɨ pànə̀ pɨ mɨsoŋə.’”
Àzwuumə̀ nɨ a ghɨ̀rə̀nə lo kò ŋwùə̀ a laanə̀
(Mrk 7.14-23)
10Yěsû a tyiʼə̀ nfuŋə̀ àpùŋə̀ pə̀ənə̀ za a tô a nɨ̀pwùnə ze nshwəŋə̀ ambo pobə lo, “Nɨ̀ zhwiʼtə̀ àtwuə̀ àzɨghə â laanə̀! 11Ka a ghɨ̀rə̀ e àzwuumə̀ zhyə̀ nɨ ŋwùə̀ à zɨghə̀nə a ntswùə̀ ngɨ̀rə̀ lo â laanə̀ a mbyə̀ Nẅùə̀. La à ghɨ̀rə̀ zhyə̀ za nɨ a furə̀nə a ntɨŋmə̀ ze ngɨ̀rə̀ lo kò a laanə̀ e.”
12Ɨ̀zùŋə̀ ndzùmə̀ ɨ̀pe paatə̀ e mbyiitə̀ ambo ze lo, “Wə̀ zhyə̂ lo pɨ̀Farìsî pə ndzaŋə̀ a loŋə aŋunə ghò ntii ànwùə̀ za nɨ wə̀ shwəŋə̀nə la?”
13Yěsû a kẅùə̀ lo, “Àzwuumə̀ za àtsùmə̀ nɨ ka à pyə̀ e Tǎ ɨwəə a nɨ̀pwuurə̀ la, pɨ ghǎ sòʼò a zèrə waʼà. 14Nɨ̀ myàʼtə̀ a ghobə! Pobə la pɨ̀fə̀ mmə nnèrə̀ àlàŋə ambo pɨ̀tse pɨ̀fə̀; ɨ̀fə̀ à tə mə nnèrə̀ àlàŋə ambo yɨ̀tse ɨ̀fə̀, yi pobə pɨ̀tsùmə̌ kunə̀ amwuə nɨ̀ntaamə̀.”
15Pità a shwəŋə̀ ambo ze lo, “Tiitə̀ ɨ̀sùmə àshwəŋnə̀ nàanə nàanə zə̀ ambo pəə.”
16Yěsû a kẅùə̀ lo, “Mbaa pə pɨghə, ka nɨ̀ zhwuumə̀ a wɨghə a nɨ zhyə̂ ànwùə̀ nɨ ǹshwəŋə̀nə? 17Ka nɨ̀ zəənə̀ a wɨghə lo, àzwuumə̀ zhyə̀ nɨ ŋwùə̀ a zɨghə̀nə a ntswùə̀ ze a làŋə̀ nshwuʼə̀ la a nɨ̀pùmə̀ ze a kɨ nchi nnyìi a zèrə? 18Àshwəŋnə̀ nɨ a furə̀nə a ntswùə̀ ŋwùə̀ a furə̀ la a ntɨŋmə̀ ze mbə la zhyə̀ za nɨ a ghɨ̀rə̀nə lo kò ŋwùə̀ a laanə̀ e a mbyə̀ Nẅùə̀. 19Àkwàŋə̀ tɨ̀pòŋə̀ nɨ a pənə a ntɨŋmə̀ ŋwùə̀ a za ngɨ̀rə̀ ŋwùə̀ a zhwuutə̀, ngɨ̀rə̀ àfànə̀, ngɨ̀rə̀ a məghàbə̀, ngɨ̀rə̀ a zə̀ərə̀, nnyìi a chwìrə̀, nshwəŋə̀ a tɨ̀pòŋə̀ àtwuə̀ ŋwùə̀. 20La a ghɨ̀rə̀ mɨ̀nwùə̀ mə lo kò ŋwùə̀ a laanə̀; ka nɨ̀zɨghə̀ tɨ sùu mbô a ghɨ̀rə̀ e lo kò ŋwùə̀ a laanə̀.”
Mə̀ngyə̌ nɨ à pənə nɨ àpyiimə̀ ntɨŋmə̀
(Mrk 7.24-30)
21Yěsû à lə̀ tyiʼə̀ mmyàʼtə̀ alyiʼə ghu ndèrə̀ a pàa àlaʼà Tayə̀ ghobə Sidònə̀. 22A təəmə̀ lo, mə̀ngyə̌ Kanàanə̀ ɨ̀tse nɨ à lə̀ mənə nchyə̂ a pàa àlaʼà ghu, a tô ambo ze ngyìi nshwəŋə̀ lo, “Koorə̀ mɨ̀lɨŋə̀ ɨ̀mâ mbǎ Ndòʼnə̀mbyə̂ moonə̀ Dàfirə̀; àzhyə̂ àtse a zə amwuə moonə̀ mə̀ ghù mə̀ngyə̌ mmə ŋŋâ ngəʼə̀ ambo ze ka mɨ̀zùŋə.”
23La ka Yěsû a lə̀ kẅùə̀ e ànwùə̀ àtse ambo ze. Ɨ̀zùŋə̀ ndzùmə̀ ɨ̀pe tyiʼə̀ ntô ambo ze mbuʼù mbô nshwəŋə̀ lo, “Kantə̀ e â lèrə̀ kò a kɨ nga ngyìi àzwuumə̀ zə̀ a ndzùmə̀ pə̀ənə̀.”
24Yěsû a kẅùə̀ lo, “Pɨ lə̀ tsàa mə̀ la ndàʼà ambo pànə̀ pa nɨ pɨ pənə amwuə àlaʼà Israel pyə̀ nɨ pənə tsaʼa mɨ̀mbyə̂ mɨ̀ndzìrə̀ ma nɨ mɨ pînə la.”
25Nkwùə̀ ghu, mə̀ngyə̌ wa a tô nkẅiʼtə̀ a mbyə̀ Yěsû nshwəŋə̀ lo, “Ndòʼnə̀mbyə̂ yèmpə̀ mə̀!”
26Yěsû a kẅùə̀ lo, “Ka a kùʼnə̀ e a nɨ lòo àpaanə̀ àghòbə mmàʼà ambo mɨ̀ngwɨghə̀.”
27Mə̀ngyə̌ wa a kẅùə̀ lo, “A nkǔŋə nkuŋə mbǎ Ndòʼnə̀mbyə̂; La mɨ̀ngwɨghə̀ ma ndyàa ɨ̀chepə̀ mɨ̀zɨghə̀ nɨ mɨ furə̀nə àtwuə̀ tepèrə̀ pɨ̀tǎ ɨ̀pobə nkẅìnə̀ a ɨ̀shyə̂ ndzɨghə̀.”
28Lenəla Yěsû a kẅùə̀ lo, “Mə̀ngyə̌, àpyiimə̀ ntɨŋmə̀ o a noʼò. Wə̌ pə nɨ ànwùə̀ nɨ wə̀ tàʼnə la.” Tyìʼə̀ nkwùə̀ ghu moonə̀ e wa a zùŋə̀ nfiitə̀.
Yěsû a parə̀ pànə̀ pɨ̀noʼnə
29Yěsû à lə̀ tyiʼə̀ nfurə̀ alyiʼə ghu ngə̀ ndàŋə̀ a nɨ̀pwùnə atəŋə Galìlyə̂, nkoʼò ngə̀ nnwuunə̀ àtwuə̀ mbarə̀. 30Ɨ̀pùŋə̀ pə̀ənə̀ pɨ̀ẅùunə lə̀ tô ambo ze nɨ pɨ̀kɨkə̀ghə, nɨ pɨ̀fə̀, nɨ pɨ̀koŋə̀ ɨ̀shyə̂, nɨ pɨ̀paapaa, nɨ pɨ̀tse pɨghoonə tyìʼə̀ pɨ̀noʼnə ntô nnwuunə̀ a mbyə̀ ze a parə̀ a ghobə. 31Pànə̀ pèrə pə lə̀ yerə̀ amwuə ndwuumə̀ nɨ pobə lə̀ zəənə̀nə pɨ̀paapaa shwəŋnə̀, pɨ̀koŋə̀ ɨ̀shyə̂ yìinə̀, pɨ shyə̀ mɨ̀kwùə̀ mɨ pɨ̀kɨkə̀ghə, pɨ̀fə̀ zəənə̀, pobə pɨ̀tsùmə̀ tyiʼə̀ nguʼtə̀ a Nẅùə̀ pànə̀ pɨ Israel.
Yěsû a zə̂ mbyàŋnə̀ nkaamə̀ nɨ̀kwàa
(Mrk 8.1-10)
32Yěsû à lə̀ tyiʼə̀ nfuŋə̀ ɨ̀zùŋə̀ ndzùmə̀ ɨ̀pe nshwəŋə̀ ambo pobə lo, “Ngwə̀ nkoorə̀ mɨ̀lɨŋə̀ mɨ pànə̀ pə, ntiinə pobə pə mə njyə̂ ɨtarə pə̀ənə̀ pɨ pobə tɨ̀tsòŋə̀ ka zɨghə̀ a ghobə àzwuumə̀ àtse. Mbə̀ʼə ntsàa mə̀ a ghobə nɨ njyə̀ apə̀, ntiinə pobə chyə̂ ghə̀ kuntə̀ a àlàŋə.”
33Ɨ̀zùŋə̀ ndzùmə̀ ɨ̀pe pyiitə̀ e lo, “Mbə̀ʼə pə̀ənə̀ lòo mɨ̀zɨghə̀ la ɨghə a alyiʼə waakə a nɨ zə̂ ɨ̀pùŋə̀ pànə̀ pɨ̀noʼnə pə̀?”
34Yěsû a pyiitə̀ a ghobə lo, “Nɨ̀ wə̀ nɨ ntsɨŋə̀ àpaanə̀ ɨshiʼə?”
Pobə kẅùə̀ lo, “Ntsɨŋə̀ àpaanə̀ sàmbaa nɨ kɨyii ɨ̀swuə̀ ɨ̀tse.” 35Lenəla Yěsû a shwəŋə̀ ambo pànə̀ pɨ̀ghu lo nɨ̀ nwuunə̀ a ɨ̀shyə̂. 36A tyiʼə̀ ndòo àpaanə̀ za ntsɨŋə̀ sàmbaa ghobə ɨ̀swuə̀ za, ŋŋâ a mɨyàa ambo Nẅùə̀, mbiʼtə̀ a zèrə̀ ŋŋâ ambo ɨ̀zùŋə̀ ndzùmə̀ ɨ̀pe, pɨ tyiʼə̀ ngàbə̀ ambo pànə̀ pa. 37Ŋwùə̀ ntsùmə̀ à lə̀ zɨghə̀ ndzwurə̀; ɨ̀zùŋə̀ ndzùmə̀ ɨ̀pe tyiʼə̀ ndyàa ɨ̀chepə̀ ndẅenə̀ mɨnkaamə sàmbaa. 38Mbyàŋnə̀ nɨ lə̀ zɨghə̀nə lə̀ pə nkaamə̀ nɨ̀kwàa, ka pɨ shaŋə̀ e pə̀ngyə̌ pobə ɨ̀poonə̀.
39Yěsû à lə̀ ghɨ̀rə̀ pànə̀ pa sìimə̀ ndèrə̀, a tyiʼə̀ nkwuunə̀ amwuə àkànwuʼə ndèrə̀ a pàa àlaʼà Magadànə̀.
Currently Selected:
Matyù 15: pny
Highlight
Share
Copy
Want to have your highlights saved across all your devices? Sign up or sign in
© 2017, Cameroon Association for Bible Translation and Literacy
